Leta From Governing Body

Dear Olketa Brata and Sista:

Iumi wea worshipim Jehovah, iumi laekem tumas Word blo hem, Bible. Iumi sure samting wea Bible storyim abaotem history hem stret, iumi fit for trustim olketa advaes insaed, and hem showim olketa pruv hao Jehovah lovem iumi olketa man wea datwan encouragem iumi. (Psalm 119:105; Luke 1:3; 1 John 4:19) Iumi barava laek for helpem olketa narawan for lanem olketa nambawan truth wea stap insaed Word blo God. From datwan, mifala hapi tumas for provaedem disfala buk Olketa Leson Iu Savve Lanem lo Bible. Mifala laek storyim samfala samting abaotem disfala buk.

Disfala buk hem for olketa pikinini. Nomata olsem, hem savve helpem tu olketa wea big finis wea laek for lane moa abaotem Bible. And from Bible hem buk for evriwan, mifala sure iumi evriwan bae kasem gud samting taem iumi storyim olketa leson insaed, wea savve helpem iumi for barava hapi.

Disfala buk hem garem olketa story insaed lo Bible, wea storyim first famili wea stap lo earth start kam lo creation. Hem big waka for mekem olketa story lo Bible hem klia and isi for minim, and olketa putim followim order blo taem wea olketa samting hia happen.

Disfala buk hem no storyim nomoa olketa story lo Bible. Olketa toktok and piksa wea stap insaed, olketa redyim lo wei wea mekem olketa story hia hem laef and showim feeling blo olketa wea iumi lukim lo piksa.

Disfala pablikeson helpem iumi for lukim hao Bible hem buk abaotem pipol. Olketa wea obeyim Jehovah and olketa wea disobey. And datwan mekem iumi for lanem samting from example blo olketa. (Rome 15:4; 1 Corinth 10:6) Buk hia garem 14-fala sekson. Lo start blo each sekson hem storyim samfala leson wea iumi savve lanem.

Sapos iu wanfala dadi or mami, iu savve readim wanfala leson witim pikinini blo iu and storyim piksa lo datfala leson. Then iutufala savve readim olketa Bible verse wea stap lo leson hia. Helpem pikinini blo iu for ting raonem hao nao verse wea hem readim join witim leson lo buk hia. Iu savve duim sem samting for helpem samwan wea big finis for minim wanem Bible storyim.

Mifala hope disfala pablikeson bae helpem evriwan wea young and olo wea garem honest heart, for lanem samting from Word blo God and followim olketa leson wea stap insaed lo laef blo olketa. Datwan bae mekem olketa tu savve worshipim God and part lo famili blo hem wea hem lovem.