LESON 30
Olketa lo Famili and Olketa Fren blo Iu Savve Laef Bak!
Taem samwan hem dae datwan savve mekem iumi sorre tumas. Dastawe Bible sei dae hem enemy. (1 Corinth 15:26) Iu lanem finis lo leson 27, Jehovah bae finisim datfala enemy. Bat, wat nao bae happen lo pipol wea dae finis? Lo disfala leson, bae iu lanem nara promis blo Jehovah. Hem bae mekem staka billion pipol for laef bak for enjoyim laef olowe. Hao nao iumi savve datwan bae happen? Hao, God bae resurrectim olketa for stap lo heven or lo earth?
1. Wat nao Jehovah bae duim for olketa lo famili and olketa fren blo iumi wea dae finis?
Jehovah laekem tumas for mekem pipol wea dae finis for laef bak. Wanfala faithful man wea nem blo hem Job hem trustim hao God bae no forgetim hem taem hem dae. Hem sei lo God: “Bae yu kol kam long mi, an bae mi ansarem yu [taem mi insaed Grev].”—Readim Job 14:13-15.
2. Hao nao iumi savve pipol wea dae finis savve resurrect?
Taem Jesus stap lo earth, God givim hem paoa for resurrectim pipol wea dae. Jesus mekem wanfala 12 years old gele and son blo wanfala widow woman for laef bak. (Mark 5:41, 42; Luke 7:12-15) Gogo, Lazarus tu hem dae, wea hem wanfala fren blo Jesus. Nomata Lazarus dae and stap lo grev for fofala day finis, Jesus mekem hem for laef bak. Bihaen Jesus prea lo God, hem sei: “Lazarus, iu kamaot!” And “datfala man wea dae finis hem kamaot nao.” Lazarus hem laef nao! (John 11:43, 44) Datwan mas mekem famili and olketa fren blo Lazarus hapi tumas!
3. Hao, eni hope stap for olketa lo famili and olketa fren blo iu wea dae finis?
Bible sei: “God bae mekem pipol . . . for laef bak.” (Acts 24:15) Pipol wea Jesus resurrectim taem hem stap lo earth olketa no go lo heven. (John 3:13) Olketa hapi tumas for Jesus mekem olketa laef bak lo earth. Klosap nao Jesus bae resurrectim staka billion pipol wea dae for laef olowe lo paradaes lo earth. Hem sei evriwan wea God tingim olketa bae resurrect, wea insaed diswan hem pipol wea no eniwan tingim olketa.—John 5:28, 29.
DIG GO MOA
Lanem olketa pruv lo Bible wea showim Jesus bae resurrectim pipol wea dae and hem garem paoa for duim datwan. Lanem tu hao resurrection hope savve comfortim iu.
4. Samting wea Jesus duim pruvim hem savve resurrectim pipol wea dae
Lanem samfala samting moa abaotem wanem Jesus duim lo fren blo hem Lazarus. Readim John 11:14, 38-44, then discussim tugeta olketa kwestin hia:
Hao nao iumi savve Lazarus hem dae finis?—Lukim verse 39.
If Lazarus dae and go finis lo heven, iu tingse Jesus bae mekem hem for laef bak moa lo earth?
5. Staka pipol bae resurrect!
Readim Sams 37:29, then discussim tugeta kwestin hia:
Staka billion pipol wea bae resurrect bae stap lo wea?
Jesus bae resurrectim pipol wea worshipim Jehovah and staka nara pipol tu. Readim Acts 24:15, then discussim tugeta disfala kwestin:
Hu nao iu laek for lukim hem laef bak?
Tingim diswan: Jesus savve resurrectim eniwan olsem wanfala dadi savve wekapem pikinini blo hem wea sleep
6. Resurrection hope savve comfortim iu
Story lo Bible abaotem gele blo Jairus hem comfortim and encouragem staka pipol wea sorre tumas. Readim datfala tru story lo Luke 8:40-42, 49-56.
Bifor Jesus resurrectim gele blo Jairus, hem sei lo Jairus: “Iu no wari, showimaot faith nomoa.” (Lukim verse 50.) Hao nao resurrection hope savve helpem iu . . .
taem eniwan lo famili or fren blo iu hem dae?
taem laef blo iu stap lo danger?
Pleim VIDEO, then discussim tugeta disfala kwestin.
Hao nao resurrection hope comfortim and encouragem parents blo Phelicity?
SAMFALA SAVVE TALEM: “Pipol wea dae bae resurrect for go lo heven, no for stap lo earth.”
Hao nao tingting blo iu?
Wat kaen scripture nao bae iu iusim for showim staka pipol wea dae bae resurrect and stap lo earth?
MAIN POINT
Bible sei staka billion pipol wea dae bae resurrect. Jehovah laekem olketa for laef bak, and hem givim paoa lo Jesus for resurrectim olketa.
Review
Hao nao iumi savve Jehovah and Jesus laekem tumas for mekem pipol wea dae for laef bak?
Staka billion pipol wea bae resurrect bae stap lo heven, or lo earth? Why nao iu ting olsem?
Wat nao mekem iu sure olketa lo famili and olketa fren blo iu savve laef bak moa?
FAENDAOT MOA
Read abaotem olketa samting iu savve duim for deal witim feeling for sorre tumas.
Hao, olketa Bible principle savve helpem samwan wea sorre tumas?
Taem wanfala lo famili or wanfala gud fren hem dae, hao nao olketa pikinini savve deal witim datwan?
Hao, samfala bae resurrect and go ap lo heven? Wat kaen pipol nao bae resurrect?