LESON 42
Wat Nao Advaes lo Bible for Olketa wea Marit and wea Singol?
Lo culture blo samfala pipol, olketa sei man wea marit nomoa savve hapi. Bat no evriwan wea marit and evriwan wea singol olketa hapi. Bible sei for singol and for marit hem present from Jehovah.
1. Wat nao samfala gud samting wea olketa wea singol savve kasem?
Bible sei: “Man wea disaed for marit bae kasem gud samting, bat man wea disaed for stap singol bae hem kasem staka gud samting.” (Readim 1 Corinth 7:32, 33, 38.) Wat nao Bible minim taem hem sei olketa wea singol “bae kasem staka gud samting”? Olketa Christian wea singol no need for lukaftarem eni marit partner. So olketa free for duim staka samting. Example nao, samfala fit for duim staka interesting samting moa lo ministry, olsem for go preach lo nara ples. And important samting nao, olketa savve iusim staka taem for fren gud witim Jehovah.
2. Wat nao samfala gud samting for mekem marit hem legal?
Olketa wea marit tu kasem gud samting olsem olketa wea singol. Bible sei “wei wea tufala pipol save waka tugeta . . . hemi gud moa winim waka blong wanfala man.” (Eklesiastes 4:9) Olketa Christian wea followim Bible principle lo marit blo olketa nao experiencem diswan. Olketa couple wea mekem marit blo olketa legal promis for lovem, respectim, and lukaftarem each other. From datwan, staka taem olketa feel sef winim olketa couple wea stap tugeta nomoa. And pikinini blo olketa tu bae feel sef.
3. Wat nao tingting blo Jehovah abaotem marit?
Taem Jehovah arrangem first marit, hem sei: “Man hemi mas lusim mami an dadi blong hem, an hemi mas joen wetem waef blong hem.” (Jenesis 2:24) Jehovah laekem hasband and waef for lovem each other and stay tugeta go kasem taem narawan dae. Hem letem tufala wea marit for divorce only if eniwan lo tufala duim adultery. Lo situation olsem, Jehovah givim raet lo partner wea innocent for disaed if bae hem divorcem partner blo hem.a (Matthew 19:9) Jehovah no letem wanfala Christian for maritim winim wanfala hasband or waef.—1 Timothy 3:2.
DIG GO MOA
Bae iumi storyim wat iu savve duim for hapi and for mekem Jehovah hapi nomata iu singol or marit.
4. Iusim gud singol laef blo iu
Lo tingting blo Jesus for singol hem wanfala present. (Matthew 19:11, 12) Readim Matthew 4:23, then discussim tugeta disfala kwestin:
Hao nao Jesus iusim singol laef blo hem for duim samting wea Dadi blo hem laekem and for helpem pipol?
Olketa Christian wea no marit savve hapi for iusim singol laef blo olketa olsem Jesus. Pleim VIDEO, then discussim tugeta disfala kwestin.
Wat nao olketa gud samting wea olketa Christian wea singol savve duim?
Maet iu laek savve
Bible no markem age for marit. Bat hem sei hem gud for olketa young pipol no marit taem olketa “young tumas.” Lo datfala taem, feeling for laek duim sex hem strong tumas, wea savve mekem hem no isi for olketa mekem gud disison.—1 Corinth 7:36.
5. Chusim gud samwan wea iu laek maritim
Wanfala lo olketa barava important disison wea iu bae mekem hem for chusim samwan wea iu laek maritim. Readim Matthew 19:4-6, 9, then discussim tugeta kwestin hia:
Why nao wanfala Christian mas no disaed kwiktaem for marit?
Bible savve helpem iu for luksavve lo olketa wei blo wanfala gud hasband or waef. Bat important samting nao, hem for faendem samwan wea lovem Jehovah.b Readim 1 Corinth 7:39 and 2 Corinth 6:14. Then discussim tugeta olketa kwestin hia:
Why nao iumi shud maritim nomoa wanfala Christian?
Iu tingse hao nao bae Jehovah feel if iumi maritim samwan wea no lovem Hem?
If tufala animal wea no semsem waka tugeta, bae tufala safa. Hem semsem tu, if wanfala Christian maritim samwan wea no lovem Jehovah bae hem kasem staka problem
6. Garem tingting blo Jehovah abaotem marit
Lo Israel bifor, samfala man divorcem waef blo olketa bikos olketa tingim olketa seleva nomoa. Readim Malakae 2:13, 14, 16, then discussim tugeta kwestin hia:
Why nao Jehovah heitim pipol wea divorce bikos lo olketa reason wea no followim Bible principle?
Adultery and for divorce savve spoelem tumas innocent partner and olketa pikinini
Pleim VIDEO, then discussim tugeta kwestin hia.
If iu maritim samwan wea no lovem Jehovah, wat nao iu savve duim for garem hapi marit?
7. Followim standard blo Jehovah abaotem marit
Maet samwan mas waka hard for followim standard blo Jehovah abaotem marit.c Bat Jehovah blessim olketa wea obeyim hem. Pleim VIDEO.
Readim Hebrew 13:4, then discussim tugeta olketa kwestin hia:
Iu tingse standard blo Jehovah abaotem marit hem fitim? Why nao olsem?
Jehovah laekem olketa Christian for registerim marit blo olketa and for registerim tu taem olketa divorce bikos datwan hem law blo gavman lo staka kantri. Readim Titus 3:1, then discussim tugeta disfala kwestin:
If iu marit, hao, marit blo iu hem followim law blo gavman lo kantri blo iu?
ENIWAN MAET ASK: “Why nao mi mas registerim marit blo mi?”
Wat nao bae iu talem?
MAIN POINT
For singol and for marit hem present from Jehovah. Olketa wea singol and marit savve garem hapi laef if olketa followim standard blo Jehovah.
Review
Wat nao samwan wea singol savve duim for iusim gud laef blo hem?
Why nao Bible talem iumi for maritim nomoa wanfala Christian?
Wat nao only reason for divorce wea Bible storyim?
FAENDAOT MOA
Wat nao hem minim for maritim nomoa “wanfala disaepol bilong Christ”?
Lukim tufala short video wea savve helpem iu for mekem gud disison abaotem wei for fren and for marit.
Lukim why wanfala brata tingse wanem Jehovah givim for hem, hem important winim olketa samting wea hem lusim.
Wat nao samfala samting wea samwan shud tingim firstaem bifor hem disaed for separate or divorce?
“Tinghae Long ‘Samting wea God Joinim Finis’” (Wastaoa, December 2018)
b Lo samfala culture, parents nao savve chusim samwan for boy or gele blo olketa for maritim. If culture lo ples blo iu hem olsem, important samting for parents tingim nao if datfala boy or gele lovem Jehovah or nomoa, no if hem rich or nomoa.
c If iu stap nomoa witim samwan and iu no maritim, hem disison blo iuseleva if bae iu maritim or lusim hem.