Followim Warning!

BOOM! Long June 3, 1991, witim bigfala bosta, staka volcano gas and asis sut aot from Maunt Fugen long Japan. Barava hot samting hia ran daon long maunten. Hem killim dae 43 pipol. Staka wea laef barava burn nogud. Samfala singaot, “Wata, wata, plis.” Olketa fireman and police kwiktaem ran go for helpem olketa.

OLKETA lukim lava antap long Maunt Fugen samting olsem tufala week bifor, so olketa bigman and pipol wea stap long there stap redy. For winim wan week bifor disfala trabol, olketa advaesem pipol for lusim datfala area. Just wan day bifor hem bosta, olketa police askem samfala niusman for no go insaed danger area. Nomata olsem, 43 pipol nao stap long danger area hia long aftanun bilong bosta.

Why nao staka go insaed datfala area or go ahed for stap long there? Samfala farmer wea lusim hom bilong olketa go bak for chekim gaden and olketa samting bilong olketa. Thrifala savveman saed long volcano trae for stap klosap long volcano for kasem moa savve. Samfala niusman and pipol for tek piksa nating fraet for go insaed long datfala danger ples bikos olketa laek for reportim samting wea volcano duim. Thrifala taxi draeva wea olketa niusman haerem long there tu. Olketa police and volunteer fireman olketa waka. Evriwan garem reason for go insaed datfala danger area—and from diswan olketa lusim laef.

Waswe, Iu Insaed Wanfala Danger Area?

No evriwan long iumi stap klosap wanfala laef volcano. Bat, waswe sapos iumi feisim wanfala bigfala trabol wea bae kasem full world, wea putim iumi evriwan insaed wanfala danger area? Wanfala buk wea showaot finis olsem wanfala buk bilong profesi wea fit for iumi trustim hem warnim iumi abaotem wanfala barava nogud samting wea bae kasem full world and hem storyim olsem: “Sun bae kamap dark, and moon bae no givim laet bilong hem, and olketa star bae foldaon from heven, and olketa paoa long heven bae seksek. ... Olketa pipol long earth bae hitim olketa seleva and krae big.” (Matthew 24:29,30) Long hia, disfala spesol samting long skae wea big bilong hem kasem evri ples, hem affectim “olketa pipol long earth.” Wea minim, disfala profesi hem abaotem wanfala bigfala trabol wea bae affectim evriwan long iumi.

Disfala buk bilong profesi wea fit for man trustim hem Bible. Hem interesting hao olketa verse wea stap raonem scripture wea iumi talem long paragraf antap, hem minim klia olketa samting wea bae lead go long datfala bigfala world trabol. Long sem wei wea olketa lava and nara volcano saen givim olketa savveman long taon bilong Shimabara reason for markem datfala danger zone, Bible givim iumi olketa reason for lukaot gud and for redyim iumiseleva for stap laef. Iumi savve lanem wanfala leson from bigfala trabol wea happen long Maunt Fugen and luksavve hao samting wea stap front long iumi hem barava serious.

[Piksa Credit Line long page 2]

KAVA: Yomiuri/​Orion Press/​Sipa Press

[Piksa Credit Line long page 3]

Yomiuri/Orion Press/Sipa Press