Waswe, Stretfala Fasin Long Bible Nao Hem Best Wan?

“COMMUNITY needim olsem faondeson olketa fasin wea bae givim olketa member bilong hem sef living and gaedens.” Hem nao koment bilong wanfala German man for raet and toktok long television. Datwan hem mek sense. For living bilong olketa man stedy and win, pipol mas garem strong faondeson long fasin wea pipol acceptim olsem mark for luksavve long wanem hem stret and rong, gud or nogud. Kwestin nao: What kaen mark nao best, for community and olketa member bilong hem?

Sapos olketa fasin insaed Bible nao mark wea olketa followim, olketa shud helpem man wanwan, garem stedy, hapi laef. Datwan bae mekem living bilong pipol wea followim olketa fasin hia for kamap moa hapi and stedy. Waswe, hem olsem? Letem iumi lukluk gud long wanem Bible talem long tufala important samting: faithful fasin long marit and honest fasin insaed evriday living.

Stap Witim Partner Bilong Iu

Creator bilong iumi creatim Adam and then hem wakem Eve for kamap partner bilong hem. Marit bilong tufala nao first wan long history and hem shud for olowe. God hem sei: “Man bae lusim dadi and mami bilong hem and hem mas stap witim waef bilong hem.” Samting olsem 4,000 year bihaen, Jesus Christ talem moa disfala mark bilong marit for evri follower bilong hem. Winim datwan, hem tok strong againstim wei for duim sex aotsaed long marit.—Genesis 1:27, 28; 2:24; Matthew 5:27-30; 19:5.

Olsem Bible talem, tufala important key for wanfala hapi marit hem love and respect midolwan tufala partner evriwan. Hasband, wea hem nao hed long famili, mas showimaot love wea no selfish taem hem tingim interest bilong waef bilong hem. Hem mas stap witim hem “long wei wea fitim savve” and shud no “kros tumas” long hem. Waef hem mas deal witim hasband bilong hem witim “bigfala respect.” Sapos olketa marit partner followim olketa principle hia, olketa bae missim or winim planti problem long marit. Hasband hem bae want for stap witim waef bilong hem and waef witim hasband bilong hem.—1 Peter 3:1-7; Colossians 3:18, 19; Ephesians 5:22-33.

Waswe, mark bilong Bible abaotem wei for stap tugeta long faithful wei witim marit partner savve bringim wanfala hapi marit? Tingim samting wea kamaot from wanfala survey wea olketa duim long Germany. Olketa askem pipol wanem samting nao hem important for gudfala marit. First samting long list wea olketa talem hem wei for faithful long narawan. Waswe, bae iu agree hao marit pipol olketa moa hapi taem olketa savve hao partner bilong olketa hem faithful?

Waswe Sapos Olketa Problem Kamap?

Bat, waswe sapos wanfala hasband and waef no savve agree? Waswe sapos love bilong tufala wikdaon? Waswe, hem best for finisim marit long taem olsem? Or mark bilong Bible long wei for stap tugeta hem still gud samting for followim?

Olketa man wea raetem Bible luksavve hao evri hasband and waef bae garem olketa problem from olketa no perfect. (1 Corinthians 7:28) Nomata olsem, hasband and waef wea followim olketa mark bilong Bible trae for forgive and trae for stretem bak olketa problem. Bat, samfala samting stap—olsem adultery or wei for spoelem man long physical wei—wea hem maet fitim wanfala Christian for ting raonem wei for separate or divorce. (Matthew 5:32; 19:9) Bat wei for kwiktaem finisim marit or chusim narafala partner nomata no eni serious reason stap hem showimaot selfish wei for no tingim narawan. Hem no savve mekem laef stedy or hapi. Letem iumi tingim wanfala example.

Peter feelim hao marit bilong hem lusim hapi wea hem garem firstaem.a So, hem lusim waef bilong hem and tekem Monika, wanfala woman wea lusim hasband bilong hem. Hao nao evri samting go ahed? Insaed samfala month nomoa, Peter talemaot hao for stap witim Monika hem “no isi olsem mi tingim.” Why? Wik point showaot klia long niu ‘marit’ olsem long old marit bilong hem. For mekem diswan kamap worse, disfala hariap and selfish disison mekem hem kasem problem saed long selen. Nara samting tu, disfala big change long famili laef barava spoelem feeling bilong olketa pikinini bilong Monika.

Olsem disfala experience showimaot, taem wanfala marit hem feisim raf weather, wei for lusim ship hem no savve stretem eni samting. Long narasaed, taem iu feisim raf weather, wei for live followim olketa mark long Word bilong God, Bible, savve stopem wanfala marit for sink daon and leadim hem for kasem sef wata. Diswan nao samting wea happen long Thomas and Doris.

Thomas and Doris marit for winim 30 year finis taem Thomas hem start for drink tumas. Doris wikdaon long feeling, and tufala storyim divorce. Doris talem long wanfala Jehovah’s Witness. Datfala Witness showim long Doris wanem Bible talem abaotem marit, and encouragem hem for no separate kwiktaem bat for waka tugeta witim hasband for faendem wanfala ansa. Hem nao wanem Doris duim. Insaed tu-thri month nomoa, tufala no ting for divorce nao. Thomas and Doris waka tugeta long problem bilong tufala. Wei for followim kaonsel bilong Bible strongim marit bilong tufala and givim taem for tufala stretem problem bilong tufala.

Honest Long Evri Samting

For stap faithful long wanfala marit partner needim wei for strong long stretfala fasin and love for principle. Man needim diswan tu for hem go ahed for honest insaed world wea no honest. Bible garem staka samting for talem abaotem honest fasin. Aposol Paul raet olsem long olketa first-century Christian long Judea: “Mifala want for duim evri samting long honest wei.” (Hebrews 13:18) Wanem nao datwan minim?

Wanfala honest man hem fulap long truth and free from giaman fasin. Hem no teksaed taem hem deal witim pipol—garem stret fasin, honor, no giaman or giamanim man. And tu, wanfala honest man hem garem faithful fasin wea no savve ravem nara man. Honest pipol help for mekem feeling bilong trust kamap, wea lead go long gudfala tingting and apim strong wei for fren midolwan olketa man.

Waswe, olketa honest pipol hapi? Olketa garem reason for hapi. Nomata wei for raverave and no honest hem kasem evriwea—or maet bikos long diswan—pipol barava tinghae tumas long olketa man wea honest. Olsem wanfala survey wea olketa duim midolwan olketa young pipol, honest fasin nao hem fasin wea 70 percent long olketa barava mekhae long hem. And tu, nomata wanem nao age bilong iumi, honest fasin nao hem wanfala main samting wea iumi laekem long wanfala fren.

Christine lane hao for steal from taem hem 12 year. Insaed olketa year hem savve tumas for steal. “Samfala day mi savve tekem kam bak long hom samting olsem DM 5,000 [$11,300, S.I.] long cash,” hem sei. Bat olketa arrestim Christine samfala taem, and hem stap long danger for go long prison. Taem Olketa Jehovah’s Witness explainim long hem wanem nao Bible sei abaotem honest fasin, diswan pullim interest bilong Christine long olketa mark bilong Bible saed long fasin. Hem lane for obeyim disfala kaonsel: “Letem man wea steal no steal moa.”—Ephesians 4:28.

Kasem taem Christine hem baptaes olsem wanfala Jehovah’s Witness, hem no wanfala woman for steal nao. Hem trae hard for honest long evri samting, from olketa Witness barava mekhae long honest fasin and olketa nara Christian fasin. Datfala niuspepa Lausitzer Rundschau report olsem: “Olketa fasin olsem wei for honest, no ova tumas, and love for neiba hem samting wea olketa apim tumas insaed faith bilong olketa Witness.” Hao nao Christine feel abaotem change long laef bilong hem? “Mi moa hapi distaem from mi lusim finis wei for steal. Mi feelim hao mi wanfala member wea garem honor insaed long community.”

Evri Community Kasem Gud Samting

Pipol wea faithful long partner bilong olketa and wea honest olketa no just moa hapi seleva bat diswan helpem evriwan long community tu. Olketa boss laekem nomoa olketa wakman wea no savve raverave. Iumi evriwan laekem olketa neiba wea iumi fit for trustim, and iumi laek for shopping insaed olketa stoa wea olketa gudfala bisnis man nao ranem. Waswe, iumi no respectim olketa man bilong politik, olketa policeman, and olketa judge wea stap klia from raverave fasin? Community bae kasem gud samting tumas taem olketa member bilong hem showimaot honest fasin olsem wanfala principle, no just long taem wea fitim olketa for duim diswan.

Nara samting tu, faithful marit partner hem main faondeson bilong olketa famili wea stedy. And planti pipol bae agree witim man bilong politik long Europe wea sei: “Famili [wea normal] wea stap distaem hem still barava important ples for givim olketa man sev living and laef wea garem mining.” Famili wea garem peace hem nao best ples wea olketa bigman and pikinini garem best chance for feel sef saed long feeling. Dastawe, olketa wea faithful long marit help for buildimap wanfala stedy community.

Ting abaotem hao evriwan bae kasem gud samting sapos nomoa eni wei for lusim partner, divorce kot, or olketa case bilong child-custody. And, waswe sapos no eni man stealim man, stealim stoa, raverave fasin, olketa bigman wea raverave, olketa scientist wea giamanim man? Waswe, datwan saond olsem wanfala dream nomoa? No long olketa wea showimaot interest long Bible and wanem hem talem abaotem future bilong iumi. Word bilong God promisim hao Messiah Kingdom bilong Jehovah bae klosap tekova for rulim olketa man. Anda long datfala Kingdom evriwan wea hem rulim bae kasem teaching for live followim olketa fasin long Bible. Long datfala taem, “olketa raeteous wan seleva bae kasem earth, and olketa bae stap olowe long hem.”—Psalm 37:29.

Stretfala Fasin Long Bible Hem Best Stretfala Fasin

Planti million pipol wea lukluk gud long olketa Holy Scripture barava tinghae long hao kaonsel bilong Bible hem garem faondeson long wisdom bilong God, wea barava winim tingting bilong man. Olketa hia ting long Bible olsem man fit for trustim and hem fitim laef long world distaem. Olketa savve hao wei for followim kaonsel long Word bilong God hem for helpem olketa.

Dastawe, olketa man olsem obeyim disfala kaonsel bilong Bible: “Trust long Jehovah witim full heart bilong iu and no depend long savve bilong iuseleva. Long evri wei bilong iu, lisin long hem, and hemseleva nao bae stretem gogo bilong iu.” (Proverbs 3:5, 6) Taem olketa duim olsem, laef bilong olketa seleva kamap moabeta, and olketa helpem tu pipol wea stap raonem olketa. And olketa mekem grow strongfala trust long “laef . . . wea bae kam,” taem evri man followim stretfala fasin bilong Bible.—1 Timothy 4:8.

[Footnote]

[Blurb long page 5]

Insaed wanfala raf weather bilong marit, wei for live followim olketa mark bilong Bible savve evritaem stopem wanfala marit for sink daon and leadim hem for kasem sef wata

[Blurb long page 6]

Nomata raverave fasin hem big tumas—or maet from diswan—pipol savve tinghae tumas long olketa wea honest