Olketa Kill Bilong War

“LONG war no eniwan savve win,” wanfala soldia wea faet long World War II bifor hem sei. “Evriwan lus nomoa.” Planti agree witim hem. Barava nogud samting nao kamaot from war; olketa wea win and olketa wea lus tu kasem barava nogud samting. Nomata bihaen faet hem finis, planti million go ahed for safa from olketa nogud kill bilong war.

Olketa wanem kill? War savve finisim evribit big haf long population, and leavim bihaen planti widow and pikinini wea no garem dadi or mami. Planti long olketa wea stap laef garekil nogud long physical wei, and long mind tu. Planti million maet kamap poor tumas or maet kamap refugee. Waswe, iumi savve tingim heit and sorre wea stap long heart bilong olketa wea no dae long olketa faet olsem?

Olketa Kill Kamap Moa Big

Olketa kill bilong war hem stap deep insaed heart bilong pipol and go ahed for mekem olketa feel nogud nomata faet hem finis, saond bilong gun finis, and olketa soldia go hom. Olketa genereson bihaen bae keepim wei for barava feel nogud long narawan. Long disfala wei olketa kill bilong wanfala war savve kamap main reason for next wan wea kamap.

Olsem example, datfala Agreement bilong Versailles, wea olketa saenem long 1919 for finisim World War I, mekem samfala rul long pipol bilong Germany wea olketa citizen bilong hem tingim olsem ova tumas and hem wei for pei bak. Olsem Encyclopædia Britannica talem, toktok bilong datfala agreement “mekem pipol bilong Germany for barava feel nogud and diswan muvim olketa for lukaotem wei for pei bak.” Samfala year bihaen, “wei for feel nogud long datfala peace agreement givim Hitler reason for duim samting” and hem wanfala main samting wea lead go for World War II.

World War II hem start long Poland and go kasem olketa Balkan state. Olketa kill wea olketa difren ethnic grup long datfala area givim long narawan insaed long olketa year bihaen long 1940 hem mek-wei for datfala war long olketa Balkan state long olketa year bilong 1990. Niuspepa bilong Germany Die Zeit sei olsem: “Datfala fasin for heit and pei bak hem kamap big, and hem go ahed kam kasem taem bilong iumi.”

For olketa man stap long peace, for sure olketa kill bilong war mas healap. Hao nao diswan savve kamap? Wanem nao iumi savve duim for finisim fasin for heit and sorre? Hu nao savve healim olketa kill bilong war?

[Olketa Piksa Credit Line long page 2]

COVER: Fatmir Boshnjaku

[Olketa Piksa Credit Line long page 3]

U.S. Coast Guard photo; UN PHOTO 158297/J. Isaac