Wanfala Man for Wakem Eye-glass Plantim Seed
Hao nao hard waka bilong wanfala man for wakem eye-glass long Lviv, Ukraine, hem join witim wei wea Russian-languis kongregeson bilong Olketa Jehovah’s Witness hem grow kamap long Haifa, Israel, wea hem samting olsem 2,000 kilometer and samfala kantri awe? Diswan hem story wea showimaot wei wea disfala toktok bilong Bible long Ecclesiastes 11:6 hem stret: “Long morning plantim seed bilong iu and go kasem evening no letem hand bilong iu for rest; from iu no savve wea nao bae iu win, maet long hia or there, or sapos tufala evriwan bae gud.”
STORY bilong iumi start long 1990 taem Ella, wanfala young woman wea kam from tribe bilong olketa Jew, hem stap long Lviv. Ella and famili bilong hem redy for go stap long Israel. No longtaem bifor olketa go, Ella garem arrangement for lukim man for wakem eye-glass wea hem wanfala long Olketa Jehovah’s Witness. Long dat taem, olketa tambuim waka bilong Olketa Jehovah’s Witness long Ukraine. Nomata olsem, datfala man for wakem eye-glass hem sharem olketa biliv bilong hem wea kam from Bible witim Ella. Hem mekem woman hia sapraes taem hem sei hao God garem nem. Datwan mekem Ella barava interest for savve, and wanfala gudfala story from Bible hem start.
Ella enjoyim tumas datfala story so hem ask for nara story olsem moa long week bihaen and then nara week bihaen datwan moa. Interest bilong hem go ahed for grow, bat wanfala problem stap. Taem hem klosap nao for famili hia for lusim datfala ples for go long Israel. Ella still garem planti samting for lanem! For hem kasem gud samting from taem wea still stap, hem ask for wanfala Bible study evri day go kasem taem hem go. Nomata Ella no startim bak study bilong hem taem hem first arrive long Israel, datfala seed bilong truth hem start for grow insaed heart bilong hem. Long end bilong datfala year, hem start for studyim Bible moa.
War hem start long Persian Gulf, and Israel hem stap anda attak from Iraq. Evritaem pipol story abaotem diswan. Wanday long wanfala supermarket Ella hem herem wanfala famili wea just kam from Russia olketa story long Russian languis. Nomata hem still studyim Bible seleva, Ella kam long famili hia and sharem promis bilong Bible abaotem wanfala world wea garem peace witim olketa. Samting wea kamaot from diswan, granmami, Galina; mami, Natasha; son, Sasha (Ariel); and dota, Ilana, evriwan hia joinim Ella for studyim Bible.
Sasha nao first member bilong datfala famili for muv ahed and baptaes—nomata staka test. Nomata hem wanfala student wea garem bigfala savve, olketa aotem hem from skul bikos Christian conscience bilong hem no letem hem for share long wei for train long army, wea hem wanfala part long subject bilong skul wea olketa mas duim. (Isaiah 2:2-4) Case bilong Sasha hem go long Hae Kot Bilong Israel long Jerusalem, wea givim order for Sasha go bak long skul mekem hem finisim datfala skul term. Disfala case hem kamap bigfala nius long datfala full kantri. From diswan, planti pipol bilong Israel luksavve long olketa biliv bilong Olketa Jehovah’s Witness.a
Bihaen hem finisim hae skul, Sasha hem joinim full-taem ministry bilong Olketa Jehovah’s Witness. Distaem hem serve olsem wanfala spesol pioneer and kongregeson elder. Sista bilong hem, Ilana, hem joinim hem long full-taem ministry. Mami bilong olketa and granmami bilong olketa evriwan kamap olketa Witness wea baptaes finis. Datfala seed wea datfala man for wakem eye-glass plantim hem go ahed yet for garem frut!
Long semtaem, Ella hem muv ahed long spiritual wei and no longtaem bihaen hem go ahed for preach from haos tu haos. Long barava firstfala door, Ella meetim Faina, wea just arrive from Ukraine. Faina safa from wei for feel sorre tumas. Bihaen, Ella hem faendemaot hao no longtaem bifor hem noknok long door bilong Faina, datfala woman wea feel sorre hem prea olsem long God: “Mi no savve hu nao iu, bat sapos iu herem mi, helpem mi.” Hem and Ella garem wanfala naesfala story. Faina askem staka kwestin and ting raonem gud olketa ansa wea hem kasem. Gogo, hem biliv strong hao Olketa Jehovah’s Witness teachim truth from Bible. Hem changem olketa university study program bilong hem for mekem hem fit for spendem moa taem witim kongregeson and long preaching waka. Long May 1994, Faina hem baptaes. Hem tu joinim pioneer service, and saportim hemseleva taem hem duim part-taem waka saed long computer.
Long November 1994, taem hem go ahed for duim preaching waka, Ella hem feel wik tumas. Hem go long hospital and olketa test showimaot hem garem ulcer long bele wea blood go ahed for ran. Kasem evening hemoglobin count bilong Ella hem go daon kasem 7.2. Wanfala elder long kongregeson bilong Ella, wea hem chairman bilong Hospital Liaison Committee (HLC), givim long olketa doctor planti information abaotem olketa operation wea no iusim blood.b Olketa win for duim operation wea no iusim blood, and Ella kamap gud moa.—Acts 15:28, 29.
Doctor bilong Ella, Karl, wanfala Jew wea born long Germany, hem barava sapraes. Then hem rememberim hao dadi and mami bilong hem, wea stap laef bihaen long Holocaust, savve long Olketa Jehovah’s Witness insaed olketa concentration camp. Karl askem planti kwestin. Nomata hem busy tumas witim waka bilong hem long medical, Karl mekem taem for studyim Bible evritaem. Long year bihaen, hem go ahed for attendim olketa Christian meeting evri week.
Wanem nao kamaot from datfala seed wea datfala man for wakem eye-glass hem plantim? Iumi lukim finis samting wea happen long Sasha and famili bilong hem. And witim Ella, wea wanfala spesol pioneer minister. Dota bilong hem, Eina, wea hem just finisim hae skul, hem go ahed long waka bilong hem olsem wanfala pioneer. Faina tu hem serve olsem wanfala pioneer. And Karl, doctor bilong Ella, distaem hem wanfala baptaes Witness and hem kamap ministerial servant, wea go ahed for sharem paoa bilong Bible truth for healim man witim olketa sikman bilong hem and nara pipol tu.
Datfala smol grup wea tok long Russian languis wea kam, wea firstaem olketa part bilong Haifa Hebrew Kongregeson, distaem olketa kamap wanfala strongfala Russian kongregeson witim winim 120 Kingdom pablisa. Disfala increase kamap, long wanfala wei, from wanfala man for wakem glass long Lviv hem go ahed for mekius long wanfala chance for plantim seed!
[Olketa Footnote]
a For moa information, lukim November 8, 1994, issue bilong Awake!, page 12-15.
b Olketa HLC waka for Olketa Jehovah’s Witness evriwea long world, and help for story midolwan olketa sikman and olketa bigman long hospital. Olketa givim tu information abaotem olketa difren kaen medical treatment wea no iusim blood wea kam from niu medical research.
[Map long page 29]
(For formatted text, lukim pablikeson)
UKRAINE
ISRAEL
[Credit Line]
Mountain High Maps® Copyright © 1997 Digital Wisdom, Inc.
[Olketa Piksa long page 30]
Ella and dota bilong hem, Eina
[Piksa long page 31]
Hapi grup bilong Olketa Witness wea tok long Russian languis long Haifa. Left saed go kasem raet: Sasha, Ilana, Natasha, Galina, Faina, Ella, Eina, and Karl