Waswe, Iu Feel Olsem Samwan Minim Iu Rong?

ANTONIO hem wari tumas. Seknomoa, gudfala fren bilong hem Leonardo les long hem and hem no savve why.a Long samfala difren taem hem no ansa taem Antonio hello long hem, and taem tufala stap tugeta hem feel olsem wanfala wall stap midolwan long tufala. Antonio start for wari nogud hem duim or talem samting wea fren bilong hem minim rong. Bat wanem samting?

Wei for minim narawan rong hem samting wea savve happen planti taem. Planti long olketa problem hia smol nomoa and isi for stretem. Bat, narawan savve hard for deal witim, especially taem olketa rong idea go ahed nomata man trae hard for stretem. Why nao wei for minim narawan rong savve happen? Hao nao hem affectim olketa man wanwan? Wanem nao iu savve duim sapos nara pipol minim iu rong? Waswe, wei wea narawan ting long iu hem important or nomoa?

Samting wea Iu No Savve Missim

Bikos nara pipol no savve luksavve long tingting and olketa goal long mind bilong iumi, gogo samwan bae minim rong olketa toktok or akson bilong iumi. Wei for minim narawan rong savve kamap planti taem. Long samfala taem, iumi just fail for talemaot tingting bilong iumi long full and klia wei. Maet samfala noise and nara samting for disturb mekem hem hard for nara pipol for lisin gud long iumi.

Samfala wei and fasin tu hem isi for man minim rong. Olsem example, pipol maet minim rong man wea garem fasin for shame, and tingse hem les, no interest, or hem praod. Samting wea kasem man bifor maet mekem hem duim samting followim feeling winim wei for followim balance tingting long samfala samting. Olketa difren kastom and languis minim iumi kanduit expectim pipol for minim iumi evritaem. Taem iumi tingim tu olketa report wea no stret and gossip, iumi shud no sapraes for lukim hao long samfala taem wei for minim samting wea samwan talem or duim hem barava difren from wanem nao man hia min for duim or talem. Bat evri samting hia no comfortim man wea feel olsem narawan minim hem rong.

Olsem example, taem fren bilong hem no stap, Anna talem lelebet toktok abaotem hao nao pipol laekem hem. Samwan hem talem moa disfala toktok bat no talem long stretfala wei, gogo Anna barava sapraes and feel nogud taem fren bilong hem kros and accusim hem front long samfala pipol hao hem jealous nomoa bikos wanfala man showim interest long hem. Datwan wea talem moa toktok bilong Anna barava minim hem rong, and evri samting wea hem trae for duim for pruvim long fren bilong hem hao hem no min for spoelem hem, hem iusles nomoa. Datfala problem kosim bigfala pain, and planti taem hem go pas bifor Anna savve stretem evribit.

Wei wea nara pipol ting long iu hem planti taem depend long wei wea olketa minim samting wea iu duim or talem. So hem wei bilong iumi olketa man for feel nogud taem pipol minim rong reason bilong iumi for duim samting. Maet iu feel kros, and tingse no eni reason stap for eniwan minim iu rong. Long tingting bilong iu, kaen judgment olsem hem wansaed, hard tumas, or barava no stret, and hem savve kosim deep pain—especially sapos hem kam from man wea iu respectim.

Nomata iu maet feel kros long wei wea pipol judgem iu, iumi mas respectim tingting bilong olketa. Hem no followim Christian Wei for ting nating long tingting bilong nara pipol, and iumi no enitaem laekem toktok or akson bilong iumi for spoelem nara pipol. (Matthew 7:12; 1 Corinthians 8:12) So long samfala taem iu maet need for trae for stretem wei wea samwan garem rong tingting abaotem iu. Bat wei for ova tumas for laekem narawan for appruvim iu, hem no duim eni gud samting, and savve lead go long wei for no respectim seleva or for feel olsem pipol rejectim iu. Hem no depend long tingting bilong nara pipol sapos iumi important or nomoa.

Long narasaed, maet iu luksavve hao samfala toktok againstim iu hem garem strong faondeson. Datwan, tu, savve mekem iu feel pain, bat sapos iu willing and honest for luksavve long olketa wik point bilong iu, iu savve kasem gud samting from kaen experience olsem, and hem savve muvim iu for mekem olketa change wea fitim.

Nogud Samting wea Savve Kamaot From Diswan

Wei for minim narawan rong maet lead go long serious samting. Tingim sapos iu herem wanfala man story big tumas long wanfala ples for kaikai, maet iu ting hem duim for mekem pipol lukim hem or for show-off. Maet iu nao rong. Maet man wea hem story witim hem earpas. Or maet iu feelim wanfala wakman long stoa hem nating kaen long iu, bat maet hem feel sik. Nomata olketa wei olsem for minim man rong maet lead go for ting nogud long samting, klosap evritaem samting wea kamaot from diswan hem no for longfala taem or serious tumas. Bat, long samfala taem, wei for minim samwan rong savve lead go long bigfala trabol. Ting raonem tufala samting wea happen long history bilong Israel bifor.

Taem Nahash, king bilong Ammon, hem dae, David sendem go olketa man for talemaot message for comfortim son bilong hem Hanun, wea start finis for rul for changem dadi bilong hem. Nomata olsem, Hanun minim rong purpose bilong olketa man for talemaot message and tingse olketa kam for spae long Ammonite territory, and diswan muvim hem for mekful long olketa wea givim message and bihaen for faet againstim Israel. From diswan, winim 47,000 pipol dae—bikos wanfala man minim rong gudfala samting wea narawan want for duim.—1 Chronicles 19:1-19.

Bifor datwan, long history bilong Israel, semkaen wei for minim samwan rong hem kamap bat wei wea olketa deal witim hem difren evribit. Olketa tribe bilong Reuben and Gad and haf tribe bilong Manasseh buildim wanfala altar wea evriwan savve lukim klosap long Jordan River. Olketa narawan bilong Israel tingse hem akson wea showimaot olketa no garem faith, and barava bighed fasin for againstim Jehovah. Dastawe olketa hipap tugeta olsem army for faet againstim olketa. Olketa Israelite hia no duim eni samting kwiktaem, bat sendem olketa man for talemaot message for tokaot hao olketa feel kros long wei wea olketa no loyal. Diswan hem gud tumas, bikos olketa wea buildim datfala altar talem ansa hao olketa nating ting for lusim klinfala worship. Nomoa nao, bat datfala altar hem for serve olsem wanfala samting for mekem olketa no forgetim faithful fasin bilong olketa long Jehovah. Maet disfala wei for minim narawan rong hem savve kosim wanfala kill-kill, bat wisdom nao stopem diswan for kamap nogud.—Joshua 22:10-34.

Mekem Olketa Samting Klia Long Spirit Bilong Love

For markem tufala story hia witim each other savve teachim iumi samting. Tru tumas, hem followim wisdom for mekem samting hem klia. Long lastfala story wea iumi lukim, iumi no savve haomas man nao stap laef bikos tufala saed evriwan willing for story tugeta. Long planti taem, nomata laef bae no stap long danger sapos iu fail for minim narawan long stretfala wei, wei for fren witim hem maet stap long danger. So sapos iu feel olsem samwan hem duim samting wea no stret long iu, waswe, iu really minim samting wea happen, or maet iu minim rong? Wanem nao reason for hem duim samting? Askem hem. Waswe, iu feel olsem hem minim iu rong? Story abaotem. No letem praodfala fasin stopem iu for story tugeta.

Jesus givim nambawan reason for muvim iumi for stretem problem bilong wei for minim narawan rong: “Sapos iu tekem present bilong iu long altar, and taem iu long there iu remember hao brata bilong iu hem garem samting againstim iu, leavim present bilong iu front long altar, and go; mek peace witim brata bilong iu firstaem, then taem iu kam bak, offerim present bilong iu.” (Matthew 5:23, 24) So stret samting for duim hem for go seleva long datfala man, no story long eniwan moa. Bae hem mekem hem moa hard sapos datfala man herem samting wea iu komplen long hem from nara man firstaem. (Proverbs 17:9) Iu shud garem goal for mekem peace long spirit bilong love. Long kwaet wei iusim olketa klia, simpol word wea no blamem hem for minim problem long hem. Explainim hao nao disfala problem mekem iu feel. Then no judgem hem taem iu lisin long tingting bilong hem. No kwiktaem for sei nogud samting nao muvim hem. Mas willing for trustim hao gud samting nao muvim datfala man. Remember, love “bilivim evri samting.”—1 Corinthians 13:7.

Hem tru, nomata taem iumi stretem problem finis, wei for feel nogud or nogud samting wea kamaot from datwan savve go ahed yet. Wanem nao iumi savve duim? Sapos need kamap, honest wei for tok sorre long narawan hem fitim, and tu eni nara samting wea iumi savve duim for stretem diswan hem gud. Long enitaem olsem, man wea hem feel nogud shud followim disfala kaonsel from Bible: “Go ahed for patient witim narawan and willing for forgivim narawan sapos eniwan garem reason for komplen againstim narawan. Olsem Jehovah hem willing for forgivim iufala, iufala mas duim olsem tu. Bat, witim evri samting hia, iufala mas werem love, from hem nao perfect wei for keepim wan mind.”—Colossians 3:13, 14; 1 Peter 4:8.

Wei for spoelem feeling and minim narawan rong bae go ahed taem iumi no perfect. Eniwan savve mistek for toktok long wei wea here olsem hem no kea long feeling bilong narawan or wea no kaen. Bible hem sei: “Iumi evriwan mistek planti taem. Sapos eniwan no mistek long toktok, hem wanfala perfect man, wea fit for bossim tu full body bilong hem.” (James 3:2) From Jehovah God hem luksavve hao diswan hem tru tumas, hem provaedem iumi witim olketa instruction olsem: “No kwiktaem for letem spirit bilong iu for feel kros, bikos wei for feel kros hem feeling wea olketa stupid wan garem. And tu, no givim heart bilong iu long evri word wea pipol maet talem, mekem iu no herem servant bilong iu talem nogud samting abaotem iu. Bikos heart bilong iu hem barava savve hao planti taem iu, nomata iu, talem finis nogud samting abaotem narafala pipol.”—Ecclesiastes 7:9, 21, 22.

“Jehovah Hem Lukluk Gud Long Olketa Heart”

Waswe sapos hem luk olsem iu nating savve stretem wei wea samwan tingting nogud abaotem iu? No givap. Duim best bilong iu for go ahed for mekem grow and showimaot klia olketa Christian fasin. Askem Jehovah for helpem iu for kamap moabeta long samfala point wea need stap. Gudfala wei bilong iu hem no samting wea narafala pipol disaedem. Jehovah nomoa savve “lukluk gud long olketa heart.” (Proverbs 21:2) Nomata planti no tinghae long Jesus, and samfala man lukdaonem hem, datwan no affectim wei wea Jehovah ting long hem. (Isaiah 53:3) Nomata samwan maet judgem iu rong, iu savve ‘pourimaot heart bilong iu’ long Jehovah, and feel sure hem minim iu, “from God no lukim samting olsem man hem lukim samting, from man hem lukim samting wea eye nomoa lukim; bat Jehovah, hem lukim heart.” (Psalm 62:8; 1 Samuel 16:7) Sapos iu go ahed for duim samting wea gud, olketa wea garem rong tingting abaotem iu, gogo, maet luksavve long mistek bilong olketa and changem tingting bilong olketa.—Galatians 6:9; 2 Timothy 2:15.

Waswe, iu rememberim Antonio, long start bilong disfala article? Hem winim fasin for fraet and followim advaes from Bible, for go story witim fren bilong hem Leonardo, and askem hem wanem nao hem duim wea mekem hem feel nogud. Wanem nao kamaot from datwan? Leonardo hem barava sapraes and konfius. Hem talem hao Antonio no duim eni samting for mekem hem feel nogud and hem explainim tu hao hem no min for act olsem hem les long hem. Sapos hem luk olsem hem les long hem, maet datwan from mind bilong hem go difren nomoa. Leonardo tok sorre from hem spoelem feeling bilong fren bilong hem nomata hem no min for duim olsem, and hem talem thankiu long hem for mekem hem savve long disfala problem. Hem talem tu hao, long future, hem bae moa careful nogud hem mekem narawan garem kaen feeling olsem. Evri nogud feeling midolwan long tufala hem finis, and tufala stap olsem klos fren moa.

Hem nating naes for feel olsem samwan minim iu rong. Bat, sapos iu duim evri samting for kliarem and strong for followim olketa Bible principle bilong love and forgiveness, hem luk olsem iu tu savve kasem gudfala samting olsem.

[Footnote]

[Olketa Piksa long page 23]

For mekem samting klia long spirit bilong love and forgiveness savve lead go long olketa hapi samting