Buildim Famili wea Strong Long Spiritual Wei
“Go ahed for trainim olketa long discipline and wei for stretem tingting wea kam from Jehovah.”—EPHESIANS 6:4.
1. Wanem nao purpose bilong God for famili, bat wanem nao kamap bihaen?
“GAREM pikinini and kamap planti and fulimap earth.” (Genesis 1:28) Witim toktok hia long Adam and Eve, Jehovah God startim marit. (Ephesians 3:14, 15) Taem olketa tingim future, datfala first hasband and waef savve tingim wanfala earth wea fulap witim olketa pikinini—wanfala bigfala famili wea evriwan perfect and stap hapi long wanfala paradaes earth and wan mind for worshipim Barava Nambawan Creator bilong olketa. Bat Adam and Eve foldaon long sin, and earth no fulap witim olketa raeteous pipol wea fraet long God. (Romans 5:12) So famili laef kwiktaem brekdaon, and fasin for heit, raf fasin, and wei for short long “love” hem kamap, especially long “olketa last day” distaem.—2 Timothy 3:1-5; Genesis 4:8, 23; 6:5, 11, 12.
2. Olketa pikinini bilong Adam garem wanem savve, bat wanem nao bae olketa needim for buildim wanfala famili wea strong long spiritual wei?
2 God creatim Adam and Eve long image bilong hem. Nomata Adam kamap wanfala sinner, Jehovah letem hem for garem olketa pikinini. (Genesis 1:27; 5:1-4) Olsem dadi bilong olketa, olketa pikinini bilong Adam garem wei for savve long stretfala samting and savve lane for luksavve long stret and rong samting. Olketa savve lane hao for worshipim Creator bilong olketa and hao hem important for lovem hem witim full heart, soul, mind, and strong. (Mark 12:30; John 4:24; James 1:27) And tu, olketa savve lane “for showim justice and for lovem kaenfala fasin and for hambol taem [olketa] wakabaot witim God.” (Micah 6:8) Bat, from olketa sinner, olketa bae need for barava trae hard for buildim wanfala famili wea strong long spiritual wei.
Baem Taem
3. Hao nao parents savve “baem taem” for bringimap olketa pikinini olsem olketa Christian?
3 Long disfala hardfala, nogud taem wea iumi stap, man mas barava waka hard for helpem olketa pikinini “lovem Jehovah” and really “heitim nogud samting.” (Psalm 97:10) Parents wea wise bae “baem taem” for deal witim disfala hard responsibility. (Ephesians 5:15-17) Sapos iu wanfala dadi or mami, hao nao iu savve duim diswan? First samting, markem samting wea mas kam firstaem, lukluk gud long “olketa samting wea moa important,” wea minim tu for teachim and trainim olketa pikinini bilong iu. (Philippians 1:10, 11) Mek-tu, mekem living bilong iu moa simpol. Iu maet need for hol bak for duim samting wea no mas important. Or maet iu need for lusim olketa material samting wea iu no barava needim wea tek taem for lukaftarem. Olsem wanfala Christian dadi or mami, bae iu nating sorre long wei wea iu trae hard for bringimap olketa pikinini wea fraet long God.—Proverbs 29:15, 17.
4. Hao nao famili savve keepim wan mind?
4 For spendem taem witim olketa pikinini bilong iu, especially long olketa spiritual samting, hem givim gud samting and hem wanfala best wei for keepim wan mind long famili. Bat no tingse diswan savve happen seleva. Markem taem wea iufala bae duim samting tugeta. Diswan no minim wei for stap long sem haos nomoa, and evriwan duim difren samting. Olketa pikinini barava kamap gud tumas taem iumi showimaot interest long each wan evriday. Mas no hol bak for showimaot love and kea. Bifor olketa disaed for garem pikinini, tufala wea marit mas barava ting raonem disfala important responsibility. (Luke 14:28) Sapos olsem, tufala bae no ting long wei for bringimap pikinini olsem samting olketa no hapi for duim. Bat, tufala bae tingim olsem wanfala privilege and blessing.—Genesis 33:5; Psalm 127:3.
Teach Thru Long Toktok and Example
5. (a) For teachim olketa pikinini for lovem Jehovah hem start witim wanem? (b) Olketa parents kasem wanem kaonsel long Deuteronomy 6:5-7?
5 For teachim olketa pikinini bilong iu for lovem Jehovah hem start witim love wea iu garem for hem. Strongfala love for God bae muvim iu for followim evri instruction bilong hem long faithful wei. Insaed diswan hem for bringimap olketa pikinini “long discipline and wei for stretem tingting wea kam from Jehovah.” (Ephesians 6:4) God kaonselem parents for showimaot gudfala example for olketa pikinini, for story tugeta, and teachim olketa. Deuteronomy 6:5-7 hem sei: “Iu mas lovem Jehovah God bilong iu witim full heart bilong iu and full soul bilong iu and full strong bilong iu. And olketa toktok hia wea mi komandim iu tuday mas stap long heart bilong iu; and iu mas putim olketa deep insaed long son bilong iu and story abaotem taem iu sidaon long haos bilong iu and taem iu wakabaot long road and taem iu leidaon and taem iu getap.” Taem iu go ahed for givim kaenfala kaonsel and talem moa, iu savve putim olketa komandment bilong God deep insaed olketa pikinini bilong iu. Long wei olsem, olketa pikinini bilong iu bae luksavve long love bilong iu for Jehovah and datwan bae muvim olketa for kam klos long hem tu.—Proverbs 20:7.
6. From olketa pikinini lane followim example, hao nao parents savve mekius long diswan?
6 Olketa pikinini barava want for lane. Olketa redy for lisin and lukluk and kwiktaem followim example bilong iu. Taem olketa lukim hao iu no aftarem material samting, diswan helpem olketa for lane for followim kaonsel bilong Jesus. Iu teachim olketa for no wari abaotem olketa material samting, bat for ‘lukaotem firstaem kingdom bilong God.’ (Matthew 6:25-33) For story long gudfala wei wea buildimap man abaotem truth bilong Bible, kongregeson bilong God, and olketa elder wea hem appointim, iu teachim olketa pikinini bilong iu for respectim Jehovah and tinghae long olketa spiritual samting wea hem provaedem. Bikos olketa pikinini kwiktaem luksavve sapos man talem samting bat hemseleva no followim, iu mas saportim wei for talem instruction thru long fasin and tingting bilong iuseleva, wea showimaot hao iu barava tinghae long olketa spiritual samting. Hem wanfala blessing taem parents lukim hao gud example bilong olketa hem mekem olketa pikinini lovem Jehovah witim full heart!—Proverbs 23:24, 25.
7, 8. Wanem example nao showimaot hao hem gud samting for trainim olketa pikinini taem olketa smol yet, and hu nao mekem diswan win?
7 Iumi savve lukim gud samting wea kamaot from wei for trainim olketa pikinini taem olketa young long wanfala example long Venezuela. (2 Timothy 3:15) Hem abaotem wanfala young hasband and waef, Félix and Mayerlín. Tufala olketa pioneer minister. Taem son bilong tufala Felito hem born, tufala want for duim evri samting for bringimap Felito olsem wanfala tru worshiper bilong Jehovah. Mayerlín start for read laod long Felito from Bible Story Buk bilong Mi, wea Olketa Jehovah Witness pablisim. From taem hem smol, luk olsem Felito luksavve long Moses and olketa nara pipol wea buk storyim.
8 Taem hem smol yet, Felito start for go seleva for witness. Hem kasem goal bilong hem for kamap Kingdom pablisa, and bihaen hem baptaes. Gogo, Felito kamap regular pioneer. Parents bilong hem sei: “Taem mifala lukim hao son bilong mifala muv ahed, mifala luksavve diswan hem from Jehovah and instruction bilong hem.”
Helpem Olketa Pikinini Grow Long Spiritual Wei
9. Why nao iumi shud thankiu for spiritual instruction wea iumi kasem thru long datfala faithful and wise slave class?
9 Staka magasin, planti handred buk, and planti thousand samting stap long Internet for givim advaes for bringimap olketa pikinini. Wanfala spesol article long Newsweek abaotem olketa pikinini hem sei hao planti taem “datfala information nating agree. Samting wea mekem man wari moa hem taem information wea iu tingse iu savve trustim hem rong evribit.” Iumi barava thankiu hao Jehovah provaedem staka samting for teachim and mekem famili kamap gud long spiritual wei! Waswe, iu iusim evribit full samting wea kam thru long datfala faithful and wise slave class?—Matthew 24:45-47.
10. Hao nao wanfala famili study wea win hem givim gud samting long parents and long olketa pikinini?
10 Wanfala barava important need hem wanfala famili Bible study wea go ahed evritaem and long wei wea evriwan feel isi. For mekem evriwan lane, enjoyim, and kasem encouragement, hem needim wei for prepare gud. Long wei for faendemaot tingting bilong olketa pikinini, parents savve faendaot wanem nao long heart and mind bilong olketa. Wanfala wei for luksavve sapos famili study hem win hem sapos evriwan long haos luk forward long hem.
11. (a) Parents savve helpem olketa pikinini for markem olketa wanem goal? (b) Wanem nao kamaot from wei wea wanfala girl long Japan hem aftarem goal bilong hem?
11 Olketa spiritual goal tu savve help for strongim famili long spiritual wei, and parents shud helpem olketa pikinini for markem olketa goal hia. Insaed olketa goal wea fitim maet wei for readim Bible evriday, for kamap pablisa bilong gud nius, and for muv ahed for dedicate and baptaes. Olketa nara goal maet for serve full-taem olsem pioneer, long Bethel, or olsem wanfala missionary. Taem hem long primary skul, wanfala girl bilong Japan wea nem bilong hem Ayumi markem goal for witness long evriwan long class bilong hem. For kasem interest bilong teacher and olketa skulfren, hem ask for putim samfala Bible pablikeson long library. From diswan, insaed sixfala year wea hem long primary skul, hem conductim 13-fala Bible study. Wanfala Bible student hia witim samfala long famili bilong hem kamap olketa Christian wea baptaes.
12. Hao nao olketa pikinini savve kasem best samting from olketa Christian meeting?
12 For garem strong spiritual health hem important tu for attendim olketa meeting evritaem. Aposol Paul kaonselem olketa narawan wea biliv for “no lusim wei for hipap tugeta, olsem fasin bilong samfala.” No letem datwan kamap fasin bilong iumi, from olketa olo and young wan wea evritaem kam long olketa Christian meeting barava kasem gud samting. (Hebrews 10:24, 25; Deuteronomy 31:12) Teachim olketa pikinini for lisin gud. For prepare for olketa meeting hem important tu bikos nambawan gud samting hem kam from wei for tekpart for givim koment. Nomata wanfala smol pikinini maet start long wei for talem tu-thri word or for readim lelebet toktok long paragraf, best samting hem sapos iu trainim olketa for lukaotem olketa ansa and talem long toktok bilong olketa seleva. Waswe, iufala parents showimaot gudfala example long wei wea iufala seleva givim olketa gudfala koment evritaem? Hem gud tu for evriwan long famili for garem Bible, songbuk, and pablikeson wea iumi story insaed.
13, 14. (a) Why nao parents shud waka witim olketa pikinini bilong olketa long ministry? (b) Wanem samting nao bae help for mekem olketa pikinini enjoyim and kasem gud samting from field service?
13 Wise parents bae helpem olketa pikinini for iusim strong bilong olketa for servem Jehovah, helpem olketa for mekem preaching wanfala important part bilong laef. (Hebrews 13:15) Thru long wei for waka witim olketa pikinini long ministry, parents savve mek sure olketa kasem training wea olketa needim for kamap olketa minister “wea no shame long eni samting, wea iusim word bilong truth long stretfala wei.” (2 Timothy 2:15) So, waswe long iu? Sapos iu wanfala dadi or mami, waswe, iu helpem olketa pikinini prepare for field service? Sapos iu duim olsem, hem bae help for mekem ministry bilong olketa hapi, gudfala, and garem frut.
14 Why nao hem gud for parents and olketa pikinini bilong olketa for waka tugeta long ministry? Long wei olsem, olketa pikinini savve lukim and followim gudfala example bilong parents bilong olketa. Long semtaem, parents savve lukim feeling, fasin, and savve bilong olketa pikinini. Mek sure for tekem olketa pikinini witim iu long olketa difren part bilong ministry. Sapos fitim, givim evri pikinini witnessing basket for hemseleva, and teachim hem for keepim klin and gud. Taem iu givim training and encouragement evritaem, hem bae mekem grow fasin for tinghae long ministry, and olketa pikinini bae tingim preaching waka olsem wei for showimaot love for God and neiba.—Matthew 22:37-39; 28:19, 20.
Keepim Spiritual Fasin
15. From hem barava important for keepim spiritual fasin bilong famili, wanem nao samfala wei wea iumi savve duim diswan?
15 Hem important tumas for keepim spiritual fasin bilong famili. (Psalm 119:93) Wanfala wei for duim diswan hem for storyim olketa spiritual samting tugeta witim famili bilong iu long evri chance. Waswe, iu storyim text from Bible evriday witim olketa? Waswe, hem fasin bilong iu for sharem olketa field service experience or olketa point from niufala Wastaoa and Wekap! magasin “taem iu wakabaot long road”? Waswe, iu remember for thankiu long Jehovah long prea for evriday bilong laef and for staka samting wea hem provaedem “taem iu leidaon and taem iu getap”? (Deuteronomy 6:6-9) Taem olketa pikinini bilong iu lukim love bilong iu for God long evri samting wea iu duim, diswan bae helpem olketa for mekem truth samting bilong olketa seleva.
16. Why nao hem gud samting for encouragem olketa pikinini for duim research seleva?
16 Samfala taem, olketa pikinini bae needim kaonsel for deal witim and winim olketa problem or samting wea kamap. Winim wei for evritaem talem olketa wanem for duim, waswe sapos iu showim olketa hao for faendemaot tingting bilong God long wei for encouragem olketa seleva for duim research? For teachim olketa pikinini for iusim gud olketa tul and pablikeson wea ‘faithful slave’ provaedem bae helpem olketa for mekem grow klos wei for fren witim Jehovah. (1 Samuel 2:21b) And taem olketa sharem gud samting from Bible research bilong olketa witim nara famili member, spiritual fasin bilong famili hem kamap moabeta.
Depend Evribit Long Jehovah
17. Why nao olketa singol dadi and mami shud no lus hope for bringimap olketa pikinini olsem olketa Christian?
17 Waswe long olketa famili wea garem dadi or mami nomoa? Olketa garem extra challenge for bringimap olketa pikinini. Bat olketa singol dadi and mami, no wikdaon! Iu savve win, olsem planti singol dadi and mami showimaot wea trust long God, obey for followim kaonsel bilong hem, and bringimap olketa gudfala pikinini, wea strong long spiritual wei. (Proverbs 22:6) Hem tru, olketa Christian wea singol dadi or mami need for depend evribit long Jehovah. Olketa mas garem faith hao hem bae provaedem help.—Psalm 121:1-3.
18. Parents mas lukluk long wanem need saed long mind and body bilong olketa pikinini, bat wanem nao main samting for strongim?
18 Wise parents luksavve hao iumi ‘garem taem for laf and taem for jumpjump.’ (Ecclesiastes 3:1, 4) Important samting for buildim mind and body bilong wanfala pikinini hem taem for relax and gudfala hapitaem wea balance. Music wea buildimap man and especially for singim olketa song bilong praise long God bae helpem pikinini for kasem gudfala wei for tingting wea savve important for strongim wei wea hem fren witim Jehovah. (Colossians 3:16) Young laef hem taem tu for prepare for kamap full-grown man wea fraet long God, mekem hem savve enjoyim laef for olowe long wanfala paradaes earth.—Galatians 6:8.
19. Why nao parents savve sure Jehovah bae blessim hard waka wea olketa duim for bringimap olketa pikinini?
19 Jehovah wantem evri Christian famili for stap strong long spiritual wei witim wan mind. Sapos iumi barava lovem God and traem best bilong iumi for obeyim Word bilong hem, hem bae blessim iumi and givim strong wea iumi needim for followim instruction bilong hem. (Isaiah 48:17; Philippians 4:13) Remember chance wea iu garem distaem for teachim and trainim olketa pikinini bilong iu, hem bae end and bae no kamap moa. Duim best bilong iu for followim kaonsel from Word bilong God, and Jehovah bae blessim hard waka bilong iu for buildim wanfala famili wea strong long spiritual wei.
Wanem Nao Iumi Lanem?
• Taem iu trainim olketa pikinini, why nao hem barava important for baem taem?
• Why nao parents mas gud example?
• Wanem nao samfala important wei for helpem olketa pikinini grow long spiritual wei?
• Hao nao wanfala famili savve keepim spiritual fasin?
[Olketa Piksa long page 24, 25]
Olketa famili wea strong long spiritual wei evritaem studyim Word bilong God, attendim olketa Christian meeting, and share long ministry tugeta