Standap Evribit Witim Biliv wea Strong
Helpem Young Pipol Witim Instruction wea Kam Long Barava Taem
EPAPHRAS hem wanfala Christian long first century wea go for stap long Rome. Bat for gudfala reason, hem tingting kam bak long Colossae, wanfala taon long Asia Minor. Hem preachim gud nius long there and iumi sure hem helpem samfala long Colossae for kamap disaepol bilong Jesus Christ. (Colossians 1:7) Epaphras hem wari tumas abaotem olketa brata long Colossae, dastawe from Rome Paul raet olsem long olketa : “Epaphras . . . sendem hello bilong hem long iufala, hem evritaem prea strong for iufala, mekem long end iufala savve standap evribit witim biliv wea strong long full will bilong God.”—Colossians 4:12.
Olsem tu, olketa Christian dadi and mami distaem prea strong for spiritual saed bilong pikinini bilong olketa. Parents hia trae hard for putim love for God insaed heart bilong olketa young wan bilong olketa mekem olketa kamap strong long faith.
Planti young Christian askem help for deal witim olketa problem wea olketa feisim long skul and long nara ples. Wanfala 15-year girl hem sei: “Olketa problem bilong mifala go ahed for kamap worse. Laef hem nogud tumas. Mifala needim help!” Waswe, samting wea olketa young wan olsem askem and olketa prea bilong parents wea lovem God kasem ansa finis? Yes! “Faithful and wise slave” provaedem finis instruction wea kam from Bible. (Matthew 24:45) Disfala article storyim samfala buk wea helpem finis planti handred thousand young pipol for “standap evribit witim biliv wea strong.” Iumi ting raonem samfala long olketa buk hia.
“Lukim . . . 15,000 Niufala Witness!”
Long August 1941, 115,000 pipol hipap long St. Louis, Missouri, U.S.A., for wanfala barava bigfala convention bilong Olketa Jehovah’s Witness wea olketa holem long datfala taem. Long lastfala day bilong hem—“Day Bilong Olketa Pikinini”—samting olsem 15,000 pikinini wea sidaon klosap long platform barava lisin gud taem Joseph F. Rutherford hem story long disfala subject “Olketa pikinini bilong datfala King.” Klosap long end bilong tok bilong hem, Rutherford, wea hem 71 year, sei olsem witim saond long voice wea olsem wanfala dadi:
“Evriwan long iufala . . . olketa pikinini wea agree . . . for obeyim God and King bilong hem, plis standap.” Olketa pikinini hia standap semtaem. “Lukim,” Brata Rutherford hem singaot, “winim 15,000 niufala witness bilong Kingdom!” Evriwan barava klap big. Speaker hia sei moa: “Evriwan long iufala wea bae duim wanem iufala fit for duim for talem nara pipol abaotem kingdom bilong God . . . , plis sei Yes.” Olketa pikinini hia ansa witim laodfala “Yes!” Then hem showim datfala niu buk Children, wea olketa acceptim witim wei for klap wea go ahed for longfala taem.
Bihaen disfala tok wea muvim man, wanfala longfala laen bilong young pipol wakabaot go ap long platform, wea Brata Rutherford givim long evriwan wanfala copy bilong disfala niu buk olsem present. Samting wea audience lukim hia mekem wata kamaot long eye bilong olketa. Wanfala man wea lukim disfala samting hem sei: “Man wea no garem feeling nomoa bae no krae taem hem lukim wei wea olketa young wan hia [showimaot] trust and faith long God bilong olketa, Jehovah.”
Long datfala nambawan hipap, 1,300 young pipol nao baptaes for showimaot dedication long Jehovah. Planti long olketa still stap strong long faith kam kasem distaem. Olketa saportim kongregeson bilong olketa, volunteer long Bethel, or serve olsem missionary long olketa farawe kantri. Tru nao, “Day Bilong Olketa Pikinini” and datfala buk Children hem affectim planti young heart!
“Hem Olsem Olketa Kam Long Barava Taem”
Long olketa year bilong 1970, Olketa Jehovah’s Witness pablisim nara thrifala buk wea kasem heart bilong planti handred thousand young pipol. Olketa hia nao Listening to the Great Teacher, Your Youth—Getting the Best out of It, and Bible Story Buk bilong Mi. Long 1982, sekson bilong olketa article “Young Pipol Askem . . . ” hem start for kamaot insaed Wekap! magasin. Olketa article hia tasim heart bilong olketa wea young and olo. “Evri naet mi thankiu long God for mekem olketa pablisim diswan,” wanfala wea hem 14 year hem sei. “Mi lovem olketa article hia, hem olsem olketa kam long barava taem,” wanfala girl wea hem 13 year hem sei. Parents and olketa Christian elder agree hao olketa article hia kam long barava taem and savve helpem man.
Kam kasem 1989, samting olsem 200 “Young Pipol Askem . . . ” article kamaot finis insaed Wekap! Long “Way for Love-im God” Distrik Convention long datfala year, olketa releasem disfala buk Questions Young People Ask—Answers That Work. Waswe, hem helpem olketa young wan for stap strong evritaem long faith? Thrifala young boy raet olsem: “Disfala buk hem nambawan help long mifala for luksavve long olketa problem bilong mifala and for savve hao for deal witim olketa. Thankiu for interest bilong iufala for gud living bilong mifala.” Staka young reader evriwea long world agree.
“Hem Satisfaem Hangre Bilong Mifala”
Long 1999, Olketa Jehovah’s Witness mekem narafala instruction for young pipol wea kam long barava taem—hem nao video Young People Ask—How Can I Make Real Friends? Hem mekem kamap bigfala hapi feeling. “Disfala video barava affectim heart bilong mi,” wanfala 14-year girl hem sei. “Hem bae kamap part long spiritual kaikai bilong mifala evritaem,” wanfala singol mami hem sei. “Hem strongim man for savve hao best Fren bilong iumi, Jehovah, really lovem and kea for young pipol insaed organization bilong hem evriwea long world,” wanfala young woman hem sei.
Wanem gud samting nao kamaot from disfala video? Young pipol sei: “Hem helpem mi for careful long hu nao mi kaban witim, for kaban witim olketa difren wan insaed kongregeson, and for mekem Jehovah kamap fren bilong mi.” “Hem helpem mi for no fraet for feisim test from olketa wea sem age olsem mi.” “Hem mekem mi disaed strong for duim best bilong mi for servem Jehovah.” And wanfala hasband and waef raet olsem: “Mifala thankiu from heart bilong mifala for givim mifala disfala ‘kaikai.’ Hem satisfaem hangre bilong mifala.”
From olketa faithful long waka wea God givim long olketa, anointed “faithful and wise slave” provaedem spiritual kaikai long barava taem for evriwan wea bae acceptim. And hem wanfala hapi samting for lukim hao instruction wea kam from Bible hem helpem young pipol distaem for “standap evribit witim biliv wea strong long full will bilong God”!