Jehovah Showim Iumi Hao for Kaontem Olketa Day Bilong Iumi
“Showim mifala hao nao for kaontem olketa day bilong mifala long wei wea mekem mifala garem wisefala heart.”—PSALM 90:12.
1. Why nao hem fitim for iumi askem Jehovah for showim iumi hao for ‘kaontem olketa day bilong iumi’?
JEHOVAH GOD hem Creator and Datwan wea Givim Laef long iumi. (Psalm 36:9; Revelation 4:11) Dastawe no eni wan moa fit for showim iumi hao for iusim olketa year bilong laef bilong iumi long wise wei. Hem nao why man wea raetem psalm hem strong for askem God olsem: “Showim mifala hao nao for kaontem olketa day bilong mifala long wei wea mekem mifala garem wisefala heart.” (Psalm 90:12) Hem fitim for iumi lukluk gud long mek-90 Psalm, wea talem toktok hia. Bat firstaem, iumi lukim olketa main point bilong disfala song wea kam from God.
2. (a) Hu nao raetem Psalm 90, and wanem taem nao maet hem raetem? (b) Hao nao mek-90 Psalm shud affectim tingting bilong iumi abaotem laef?
2 Toktok wea kam firstaem long Psalm 90 kolem diswan “wanfala prea bilong Moses, man bilong trufala God.” From disfala psalm mekhae long shortfala laef bilong olketa man, luk olsem hem raetem bihaen olketa Israelite kamaot from wei for prisoner long Egypt and long 40-year gogo bilong olketa insaed wilderness, taem dae bilong planti thousand finisim wanfala genereson wea no garem faith. (Numbers 32:9-13) Nomata wea nao hem raetem, Psalm 90 hem showimaot hao laef bilong olketa man wea no perfect hem short. Dastawe, iumi shud iusim olketa day bilong iumi long wisefala wei.
3. Wanem nao olketa main samting wea Psalm 90 story abaotem?
3 Psalm 90 verse 1 go kasem 6 storyim Jehovah olsem ples bilong iumi for stap olowe. Verse 7 go kasem 12 showim wanem iumi needim for mekem iumi iusim shortfala laef bilong iumi long wei wea hem acceptim. And olsem verse 13 go kasem 17 talem, iumi laekem tumas for kasem loving-kaeness and blessing bilong Jehovah. Tru, disfala psalm no profesi abaotem samting wea iumi wanwan kasem olsem olketa servant bilong Jehovah. Nomata olsem, iumi seleva shud ting strong long datfala prea. So, bae iumi lukluk gud long Psalm 90 olsem olketa wea dedicate long God.
Jehovah—“Barava Ples Bilong Mifala for Stap”
4-6. Hao nao Jehovah hem “wanfala barava ples bilong iumi for stap”?
4 Man wea raetem psalm start witim disfala toktok: “O Jehovah, iuseleva showimaot iu nao wanfala barava ples bilong mifala for stap long genereson go kasem genereson. Bifor olketa maunten born, or iu start for wakem disfala earth witim pain for bornem pikinini and olketa gudfala land, from taem olowe go kasem taem olowe iu nao God.”—Psalm 90:1, 2.
5 For iumi “God bilong olowe,” Jehovah, hem ‘wanfala barava ples for stap’—wanfala spiritual ples for stap sef. (Romans 16:26) Iumi feel sef bikos hem stap olowe for helpem iumi olsem “Man wea Herem prea.” (Psalm 65:2) From iumi torowem evri wari bilong iumi long Father bilong iumi long heven thru long Son wea hem lovem, ‘peace bilong God wea winim evri tingting bilong man bae protectim heart and tingting bilong iumi.’—Philippians 4:6, 7; Matthew 6:9; John 14:6, 14.
6 Iumi enjoyim spiritual sef living bikos, long tokpiksa wei, Jehovah hem “wanfala barava ples bilong iumi for stap.” Hem provaedem tu “olketa rum wea stap insaed”—wea join long barava klos wei witim olketa kongregeson bilong pipol bilong hem—olsem spiritual sef ples, wea olketa loving shepherd help for mekem iumi feel sef. (Isaiah 26:20; 32:1, 2; Acts 20:28, 29) And tu, samfala long iumi kam from olketa famili wea servem God for longtaem and iumi seleva faendem wei wea hem ‘wanfala barava ples for stap long genereson go kasem genereson.’
7. Long wanem wei nao olketa maunten “born” and earth kamap olsem “witim pain for bornem pikinini”?
7 Jehovah stap bifor olketa maunten “born” or earth kamap “witim pain for bornem pikinini.” Long tingting bilong man, wei for wakem evri difren kaen samting long disfala earth hem needim bigfala waka. And for sei olketa maunten “born” and earth hem kamap “witim pain for bornem pikinini,” man wea raetem psalm hem showimaot big respect for bigfala waka wea Jehovah duim for creatim olketa samting hia. Waswe, fitim iumi tu for showimaot semkaen respect and wei for tinghae long waka wea Creator duim?
Jehovah Hem Evritaem Redy for Helpem Iumi
8. Wanem nao toktok wea sei Jehovah hem God “from taem olowe go kasem taem olowe” hem minim?
8 Man wea raetem psalm hem sing: “From taem olowe go kasem taem olowe iu nao God.” Datfala toktok “taem olowe” savve minim samting wea garem end bat man no savve for hao long nao datfala samting hem bae go ahed. (Exodus 31:16, 17; Hebrews 9:15) Bat, long Psalm 90:2 and samfala nara ples long Hebrew Scripture, “taem olowe” minim “for olowe.” (Ecclesiastes 1:4) Mind bilong iumi no savve minim wei wea God hem bin stap for olowe. Nomata olsem, Jehovah no garem start and bae no garem end. (Habakkuk 1:12) Hem bae evritaem stap laef and stap redy for helpem iumi.
9. Man wea raetem psalm hem sei wan thousand year bilong man wea laef hem semsem witim wanem?
9 God muvim man wea raetem psalm for sei wan thousand year bilong man hem barava short taem nomoa long Creator wea stap for olowe. Hem story long God taem hem raet olsem: “Iu mekem man wea savve dae kamap samting wea pisis, and iu sei: ‘Go bak, iufala olketa son bilong olketa man.’ From long eye bilong iu wan thousand year hem olsem yesterday wea just go pas finis, and olsem taem wea man lukaot long naet.”—Psalms 90:3, 4.
10. Hao nao God mekem man ‘kamap samting wea pisis”?
10 Man savve dae, and God mekem hem “kamap samting wea pisis.” Diswan minim man go bak long “dust” olsem graon wea pisis. Hem olsem Jehovah sei: ‘Go bak long dust bilong graon wea mi wakem iu from.’ (Genesis 2:7; 3:19) Diswan hem kasem evriwan—olketa wea strong or wik, rich or poor—bikos no eni man wea no perfect ‘savve baem bak brata bilong hem, or givim wanfala ransom long God for hem, mekem hem laef olowe.’ (Psalm 49:6-9) Bat iumi thankiu tumas long wei wea ‘God givim only-born Son bilong hem, mekem evriwan wea showimaot faith long hem savve kasem laef olowe’!—John 3:16; Romans 6:23.
11. Why nao iumi savve sei taem wea longfala for iumi hem barava short tumas long God?
11 Nomata Methuselah wea stap laef for 969 year, hem no kasem wanfala day bilong Jehovah. (Genesis 5:27) Long God, wan thousand year hem olsem yesterday nomoa—24 hour wea go pas. Man wea raetem psalm sei tu hao long God, wan thousand year hem olsem fofala hour wea wanfala security gard hem standap gard long naet. (Judges 7:19) So, hem klia tumas hao taem wea longfala for iumi hem barava short tumas long God bilong olowe, Jehovah.
12. Hao nao God hem ‘swipim go’ olketa man?
12 Sapos iumi markem wei wea God stap olowe witim laef bilong olketa man, laef bilong olketa man hem barava short. Man wea raetem psalm sei: “Iu swipim olketa go; olketa kamap olsem wei for sleep nomoa; long morning olketa olsem green grass wea change. Long morning hem garem flaoa and mas change; long evening hem kamap wik and barava drae nao.” (Psalm 90:5, 6) Moses lukim planti thousand Israelite dae insaed wilderness, God ‘swipim olketa go’ olsem wanfala flood. Narafala Bible transleitim disfala verse olsem: “Iu swipim olketa man go insaed sleep bilong dae.” (New International Version) And tu, laef bilong olketa man wea no perfect hem “wei for sleep nomoa” for lelebet taem—olsem for sleep long wanfala naet nomoa.
13. Hao nao iumi “olsem green grass,” and hao nao diswan shud affectim tingting bilong iumi?
13 Iumi olsem ‘green grass wea garem flaoa long morning’ bat kasem evening hem kamap wiki bikos long hot sun. Tru nao, laef bilong iumi hem short olsem grass wea kamap wiki insaed wanfala day. So, iumi mas no westem disfala spesol samting. Bat, iumi shud luk long God for leadim iumi long hao for iusim olketa year wea iumi stap laef yet insaed disfala system.
Jehovah Helpem Iumi “for Kaontem Olketa Day Bilong Iumi”
14, 15. Long wanem wei nao Psalm 90:7-9 hem fulfill long olketa Israelite?
14 Man wea raetem psalm sei olsem moa abaotem God: “Mifala kasem end long kros bilong iu, and from hot bilong iu mifala seksek. Iu putim olketa mistek bilong mifala front long iu, olketa samting bilong mifala wea haed front long braet feis bilong iu. From olketa day bilong mifala hem kasem end bilong hem long kros bilong iu; mifala finisim olketa year bilong mifala olsem wanfala smol toktok nomoa.”—Psalm 90:7-9.
15 Olketa Israelite wea no garem faith ‘kasem end long kros bilong God.’ ‘Hot bilong hem mekem olketa seksek’ or ‘kros bilong hem mekem olketa fraet fogud.’ (New International Version) Samfala “dae long wilderness” from olketa judgment bilong God. (1 Corinthians 10:5) Jehovah ‘putim mistek bilong olketa front long hem.’ Hem askem ansa from olketa for wei wea olketa duim rong samting front long evriwan, bat nomata ‘olketa samting bilong olketa wea haed’ tu or sin bilong olketa wea haed, kamap ‘front long braet feis bilong hem.’ (Proverbs 15:3) Olsem sekson wea God kros long olketa, olketa Israelite wea no repent ‘finisim olketa year bilong olketa olsem smol toktok nomoa.’ For tok stret, laef bilong iumi hem olsem wanfala wind wea iumi breathim aot thru long lips bilong iumi olsem wanfala smol toktok nomoa.
16. Sapos samfala duim sin haed, wanem nao olketa shud duim?
16 Sapos eniwan long iumi duim sin haed, maet iumi savve haedem fasin olsem from olketa man for lelebet taem. Bat rong wea iumi duim haed bae stap ‘front long braet feis bilong Jehovah,’ and samting iumi duim bae spoelem wei wea iumi fren witim hem. For kasem bak wei for fren klos witim Jehovah, iumi bae need for prea for hem forgivim iumi, lusim olketa rong bilong iumi, and hapi for acceptim spiritual help from olketa Christian elder. (Proverbs 28:13; James 5:14, 15) Hem bae moabeta sapos iumi duim olsem winim wei for ‘finisim olketa year bilong iumi olsem wanfala smol toktok nomoa,’ and mekem hope for laef olowe stap long danger!
17. Planti pipol laef for hao long, and olketa year bilong iumi fulap witim wanem?
17 Taem hem story abaotem long bilong laef bilong olketa man wea no perfect, man wea raetem psalm sei: “Long olketa seleva olketa day bilong olketa year bilong mifala hem seventi year; and sapos from spesol strong hem eiti year, bat olketa barava fulap witim trabol and olketa nogud samting; from hem mas finis kwiktaem, and mifala flae awe.” (Psalm 90:10) Planti pipol laef go kasem 70 year, and taem hem 85 year, Caleb storyim spesol strong bilong hem. Samfala barava garem spesol strong, olsem Aaron (123 year), Moses (120 year), and Joshua (110 year). (Numbers 33:39; Deuteronomy 34:7; Joshua 14:6, 10, 11; 24:29) Bat datfala genereson wea no faithful wea kamaot from Egypt, wea olketa 20 year go ap, olketa dae nomoa insaed datfala 40 year gogo. (Numbers 14:29-34) Distaem, long planti kantri, olketa year wea pipol stap laef hem no winim wanem man for raetem psalm hem talem. Olketa year bilong iumi fulap witim “trabol and olketa nogud samting.” Olketa kwiktaem finis, ‘and iumi flae awe.’—Job 14:1, 2.
18, 19. (a) Wanem nao hem minim for ‘kaontem olketa day bilong iumi long wei wea mekem iumi garem wisefala heart’? (b) Wei wea iumi showimaot wisdom bae muvim iumi for duim wanem?
18 Man wea raetem psalm sing olsem: “Hu nao savve long strong bilong barava kros bilong iu and kros bilong iu saed long wei for fraet long iu? Showim mifala hao nao for kaontem olketa day bilong mifala long wei wea mekem mifala garem wisefala heart.” (Psalms 90:11, 12) No eniwan long iumi savve evribit long strong bilong kros bilong God or hao big nao kros bilong hem, and diswan shud mekem moa big wei wea iumi fraet long Jehovah witim respect. Tru nao, hem shud muvim iumi for askem hem “hao nao for kaontem olketa day bilong [iumi] long wei wea mekem [iumi] garem wisefala heart.”
19 Toktok bilong man wea raetem psalm hem wanfala prea for Jehovah teachim pipol bilong hem hao for showimaot wisdom for tinghae and iusim olketa day wea stap yet long wei wea God appruvim. Man wea laef for 70 year hem stap laef for 25,500 day. Bat, nomata wanem nao age bilong iumi, ‘iumi no savve wanem nao bae happen tumoro, from iumi olsem smoke wea stap for lelebet taem and then lus nao.’ (James 4:13-15) From ‘taem and samting wea iumi no expectim hem kasem iumi evriwan,’ iumi no savve hao long nao bae iumi stap laef. So hem fitim for iumi prea for wisdom for deal witim olketa test, for deal witim nara pipol long stretfala wei, and for duim best bilong iumi long service bilong Jehovah distaem nao! (Ecclesiastes 9:11; James 1:5-8) Jehovah leadim iumi thru long Word, spirit, and organization bilong hem. (Matthew 24:45-47; 1 Corinthians 2:10; 2 Timothy 3:16, 17) Wei for showimaot wisdom muvim iumi for ‘lukaotem Kingdom bilong God firstaem’ and for iusim day bilong iumi long wei wea givim glory long Jehovah and mekem heart bilong hem hapi. (Matthew 6:25-33; Proverbs 27:11) Tru, wei for worshipim hem witim full heart bae no aotem evri problem bilong iumi, bat hem givim bigfala hapi.
Blessing Bilong Jehovah Givim Iumi Hapi
20. (a) Long wanem wei nao God “feel sorre”? (b) Hao nao Jehovah bae deal witim iumi sapos iumi duim bigfala rong bat showimaot trufala wei for repent?
20 Hem bae gud tumas sapos iumi savve hapi for full laef bilong iumi! Moses hem ask olsem saed long diswan: “Kam bak, O Jehovah! For hao long nao bae hem olsem? And feel sorre long olketa servant bilong iu. Mekem mifala satisfae long morning witim loving-kaeness [or, “loyal love”] bilong iu, mekem mifala savve singaot witim hapi and savve hapi long evriday bilong mifala.” (Psalm 90:13, 14; footnote) God no savve duim eni mistek. Nomata olsem, hem savve “feel sorre” and ‘tan bak’ from kros bilong hem and from wei for givim panis taem warning bilong hem abaotem wei for duim samting olsem hem mekem olketa wea duim rong repent and changem tingting and fasin bilong olketa. (Deuteronomy 13:17) So nomata iumi duim bigfala rong bat showimaot trufala wei for repent, Jehovah bae ‘mekem iumi satisfae witim loving-kaeness bilong hem,’ and iumi bae garem reason for “singaot witim hapi.” (Psalm 32:1-5) And taem iumi garem living wea followim raeteous gogo, bae iumi feelim loyal love bilong God for iumi and bae iumi fit for ‘hapi long olketa day bilong iumi’—tru nao, for full laef bilong iumi.
21. Long toktok bilong Psalm 90:15, 16, wanem nao maet Moses askem?
21 Man wea raetem psalm hem prea strong olsem: “Mekem mifala hapi for fitim olketa day wea mifala kasem trabol, olketa year wea mifala lukim bigfala trabol. Showimaot waka bilong iu long olketa servant bilong iu and glory bilong iu long olketa son bilong olketa.” (Psalm 90:15, 16) Maet Moses hem askem God for blessim Israel witim hapi wea fitim or semsem witim olketa day wea olketa kasem trabol and olketa year wea olketa safa from bigfala trabol. Hem askem “waka” bilong God for blessim olketa Israelite for showaot klia long olketa servant bilong Hem and for glory bilong Hem showaot long olketa son, or pikinini bilong olketa. Iumi fit for prea for olketa blessing kasem olketa man wea obey insaed niu world wea God promisim.—2 Peter 3:13.
22. Olsem Psalm 90:17 showimaot, wanem nao iumi savve prea for hem?
22 Psalm 90 finis witim disfala toktok: “Letem naesfala samting bilong Jehovah God bilong mifala stap long mifala, and waka bilong hand bilong mifala mekem strong long mifala. Tru nao, waka bilong hand bilong mifala, strongim datwan.” (Psalm 90:17) Olketa word hia showimaot iumi fit for prea for God blessim waka wea iumi duim insaed service bilong hem. Olsem olketa anointed Christian or fren bilong olketa, olketa “nara sheep,” iumi hapi hao “naesfala samting bilong Jehovah” stap witim iumi. (John 10:16) Iumi hapi tumas from God ‘strongim waka bilong hand bilong iumi’ olsem olketa wea talemaot Kingdom and long olketa nara wei!
Mas Go Ahed Kaontem Olketa Day Bilong Iumi
23, 24. Hao nao iumi savve kasem gud samting from wei for tingting raonem mek-90 Psalm?
23 Wei for ting raonem mek-90 Psalm shud mekem iumi depend long bigfala wei moa long Jehovah, “barava ples bilong iumi for stap.” Taem iumi tingting long olketa toktok abaotem wei wea laef hem short tumas, iumi shud barava luksavve long need for God helpem iumi for kaontem olketa day bilong iumi. And sapos iumi no givap long wei for lukaotem and showimaot wisdom bilong God, iumi bae kasem loving-kaeness and blessing bilong Jehovah.
24 Jehovah bae go ahed for showim iumi hao for kaontem olketa day bilong iumi. And sapos iumi willing for followim instruction bilong hem, bae iumi fit for kaontem olketa day bilong iumi for olowe. (John 17:3) Bat, sapos iumi laek for kasem laef olowe, Jehovah nao mas sef ples bilong iumi. (Jude 20, 21) Olsem iumi bae lukim long next article, disfala point hem barava showaot klia long gudfala toktok insaed mek-91 Psalm.
Hao Nao Bae Iu Ansa?
• Hao nao Jehovah hem “barava ples bilong iumi for stap”?
• Why nao iumi savve sei Jehovah stap redy evritaem for helpem iumi?
• Hao nao Jehovah helpem iumi for “kaontem olketa day bilong iumi”?
• Wanem nao mekem iumi fit for “hapi long olketa day bilong iumi”?
[Piksa long page 11]
Jehovah hem God “bifor olketa maunten born”
[Piksa long page 12]
Long lukluk bilong Jehovah, Methuselah wea laef for 969 year no laef kasem wanfala day
[Olketa Piksa long page 14]
Jehovah hem ‘strongim waka bilong hand bilong iumi’