Kwestin From Reader

Hao nao datfala snek long garden bilong Eden givim idea long Eve for brekem law bilong God abaotem datfala tree bilong savve long gud and nogud samting?

Genesis 3:1 sei: “So snek hem wanfala wild animal wea barava careful winim evri narawan wea Jehovah God wakem. So hem start for sei long woman: ‘Waswe, hem really tru God talem iu for no kaikai from evri tree bilong garden?’” Olketa difren kaen idea stap abaot hao nao datfala snek maet story witim Eve. Wanfala idea hem hao hem maet duim diswan thru long olketa akson. Olsem example, wanfala bigman bilong religion long England Joseph Benson hem sei: “Luk olsem hem duim thru samkaen saen. Tru nao, samfala tingse wei for tingting and toktok hem fasin bilong olketa snek long dat taem, . . . bat no eni samting pruvim diswan.”

Bat, sapos datfala snek iusim akson nomoa, hao nao hem bae pasim datfala idea long Eve hao sapos hem tekem datfala tambu frut hem bae kamap olsem God, and fit for disaedem wanem nao gud and nogud? And tu, Eve share long datfala wei for story tugeta, and ansarem kwestin wea disfala snek askem. (Genesis 3:2-5) Disfala tingting wea sei snek story thru olketa saen or akson nomoa savve mekem man for bilivim hao Eve hem ansa bak thru long akson, bat Bible sei hao Eve hem toktok.

Taem hem story abaotem disfala samting wea happen, aposol Paul warnim olketa Christian: “Mi fraet, olsem snek hem giamanim Eve long trik bilong hem, maet mind bilong iufala bae lusim stretfala fasin.” Danger wea Paul story abaotem hia kam from “olketa false aposol, olketa giaman wakman.” Danger wea “olketa stael aposol” olsem givim hem no thru long akson nomoa. Insaed diswan hem olketa story—kleva toktok bilong olketa, wea olketa talem for giamanim pipol.—2 Corinthians 11:3-5, 13.

Nomata hem iusim wei for story for giamanim Eve long garden bilong Eden, no eni samting showimaot hao really snek garem part bilong body for mekem voice. Hem no needim diswan. Taem angel bilong God tok long Balaam thru long wanfala mere-donkey, animal hia no needim olketa part bilong body for mekem voice olsem man. (Numbers 22:26-31) Taem disfala ‘animal for kare hevi wea no savve toktok hem tok olsem man,’ hem klia hao paoa wea kam from spirit world nao duim.—2 Peter 2:16.

Bible showimaot datfala spirit creature wea bihaenem datfala snek wea tok long Eve hem “datfala firstfala snek, datwan wea olketa kolem Devil and Satan.” (Revelation 12:9) Datfala voice wea Eve herem and ansarem hem kam from Satan, wea “go ahed for changem hemseleva olsem wanfala angel bilong laet.”—2 Corinthians 11:14.

[Piksa long page 27]

“Iu bae kamap olsem God, savve long gud and nogud samting”