Mekem Grow Insaed Heart Wei for Fraet Long Jehovah

“Bae hem gud for olketa mas mekem grow insaed long heart wei for fraet long mi and for keepim evri komandment bilong mi evritaem.”—DEUTERONOMY 5:29.

1. Hao nao iumi sure wanday pipol bae enjoyim freedom from fraet?

FRAET hem samting wea olketa man kasem for planti handred year. Wei for fraetem hangre, sik, raf fasin, or war mekem planti million pipol wari evritaem. Dastawe introduction bilong Universal Declaration of Human Rights hem talemaot feeling bilong man for laekem world wea evri man bae enjoyim freedom from fraet.a Iumi hapi tumas bikos God seleva promisim iumi hao kaen world olsem bae kam—bat no thru long samting olketa man duim. Thru long profet bilong hem Micah, Jehovah promisim iumi hao insaed niu world bilong raeteous fasin bilong hem, ‘no eniwan bae mekem pipol bilong hem seksek.’—Micah 4:4.

2. (a) Hao nao Bible encouragem iumi for fraet long God? (b) Wanem nao olketa kwestin wea maet kamap taem iumi tingting long responsibility for fraet long God?

² Long narasaed, fraet hem gud samting tu. Long Bible, olketa servant bilong God evritaem kasem encouragement for fraet long Jehovah. Moses talem olketa Israelite: “Iufala shud fraet long Jehovah, God bilong iufala, and iufala shud servem hem.” (Deuteronomy 6:13) Planti handred year bihaen, Solomon raet olsem: “Fraet long trufala God and obeyim olketa komandment bilong hem. From diswan nao full responsibility bilong man.” (Ecclesiastes 12:13) Thru long waka bilong iumi for witness, wea olketa angel leadim, iumi tu encouragem evri pipol for “fraet long God and givim hem glory.” (Revelation 14:6, 7) For join witim wei for fraet long Jehovah, olketa Christian mas lovem hem witim full heart. (Matthew 22:37, 38) Hao nao iumi savve lovem God and long semtaem fraet long hem? Why nao iumi need for fraet long wanfala loving God? Wanem gudfala samting nao iumi kasem taem iumi mekem grow wei for fraet long hem? For ansarem olketa kwestin hia, iumi mas savve firstaem wanem nao disfala wei for fraet long God hem minim and hao nao diskaen wei for fraet hem important part long wei wea iumi fren witim Jehovah.

Tinghae, Respect, and Fraet

3. Wanem nao wei for fraet long God hem minim?

³ Fraet long God hem wanfala feeling wea olketa Christian shud garem for Datwan wea Mekem olketa. Wanfala mining bilong disfala wei for fraet hem “wei for showimaot bigfala respect and tinghae long Creator and gudfala wei for fraet for mekem hem no hapi.” So, wei for fraet long God hem affectim tufala important part long laef bilong iumi: tingting bilong iumi abaotem God and tingting bilong iumi abaotem fasin wea hem heitim. Hem klia hao tufala saed hia important and fitim for iumi lukluk gud long olketa. Olsem Vine’s Expository Dictionary of New Testament Words hem talem, for olketa Christian, disfala wei for fraet witim respect hem ‘wanfala samting wea kontrolem living long spiritual wei and saed long fasin.’

4. Hao nao iumi savve mekem grow olketa feeling bilong tinghae and respect for Creator bilong iumi?

⁴ Hao nao iumi savve mekem grow olketa feeling bilong tinghae and respect for Creator bilong iumi? Iumi savve tinghae tumas taem iumi lukim wanfala ples wea barava luk naes, bigfala watafol, or taem sun go daon and kalakala bilong hem narawe. Disfala feeling hem moa strong taem iumi luksavve, witim eye bilong faith, hao God nao wakem evri samting hia. And tu, olsem King David, iumi luksavve hao iumi smol tumas taem iumi markem iumiseleva witim nambawan creation bilong Jehovah. “Taem mi lukim heven bilong iu, olketa samting wea iu wakem, moon and olketa star wea iu wakem, why nao iu tingim man wea savve dae?” (Psalm 8:3, 4) Disfala wei for tinghae hem lead go for respect, wea muvim iumi for sei thankiu and praisem Jehovah for evri samting wea hem duim for iumi. David raet olsem tu: “Mi bae praisem iu from iu wakem mi long nambawan wei. Olketa waka bilong iu barava nambawan, and soul bilong mi luksavve.”—Psalm 139:14.

5. Why nao iumi shud fraet long Jehovah, and wanem nambawan example nao iumi garem long diswan?

⁵ Feeling for tinghae and respect hem mekem man garem wei for fraet long paoa bilong God olsem Creator and long wei wea hem fit for Ruler bilong universe. Insaed wanfala vision wea aposol John lukim, “olketa wea win ovarem wild animal and image bilong hem”—olketa anointed follower bilong Christ wea stap long heven—talemaot: “Jehovah God, Olmaeti Wan, olketa waka bilong iu big tumas and nambawan. Olketa wei bilong iu raeteous and tru, King bilong olowe. Hu nao bae no fraet long iu, Jehovah, and givim glory long nem bilong iu?” (Revelation 15:2-4) Wei for fraet long God, wea kamaot from barava bigfala respect for glory bilong hem, hem leadim olketa hia wea rul witim Christ insaed Kingdom long heven for honorim God olsem man wea garem bigfala paoa. Taem iumi tingim evri samting wea Jehovah duim finis and raeteous wei wea hem rulim universe, iumi garem planti reason for fraet long hem.—Psalm 2:11; Jeremiah 10:7.

6. Why nao iumi shud garem gudfala wei for fraet for mekem Jehovah no hapi?

⁶ Bat, for join witim wei for tinghae and respect, wei for fraet long God hem needim tu wei for fraet for mekem hem no hapi or for disobeyim hem. Why nao olsem? Bikos nomata Jehovah hem “slow for kros and garem bigfala loving-kaeness,” iumi mas remember hao “hem bae no letem man wea duim rong for missim panis.” (Exodus 34:6, 7) Nomata hem garem love and mercy, Jehovah no acceptim fasin wea no raeteous and wei for min for duim rong samting. (Psalm 5:4, 5; Habakkuk 1:13) Olketa wea min for duim wicked samting and no repent and wea againstim hem kanduit missim panis. Olsem aposol Paul talem, “hem samting wea mekem man fraet for God wea laef for judgem hem.” Gudfala wei for fraet for duim samting olsem hem barava protectim iumi.—Hebrews 10:31.

“Hol Strong Long Hem”

7. Wanem nao olketa reason wea iumi garem for trust long paoa bilong Jehovah for sevem man?

⁷ Wei for fraet long God witim respect and luksavve evribit long bigfala paoa bilong hem, hem samting wea man mas garem bifor hem savve trustim Jehovah. Long sem wei wea wanfala young pikinini feel sef taem dadi bilong hem stap klosap, iumi tu feel sef and garem trust long hand bilong Jehovah wea leadim iumi. Bihaen Jehovah leadim olketa Israelite go aot from Egypt, lukim wei wea diswan affectim olketa: “Israel lukim tu bigfala samting wea hand bilong Jehovah duim againstim olketa bilong Egypt; and olketa pipol start for fraet long Jehovah and putim faith long Jehovah.” (Exodus 14:31) Samting wea kasem Elisha pruvim tu hao datfala “angel bilong Jehovah hem stap raonem olketa wea fraet long hem, and hem sevem olketa.” (Psalm 34:7; 2 Kings 6:15-17) History bilong pipol bilong Jehovah distaem and samting wea iumiseleva kasem pruvim hao God hem showimaot paoa bilong hem for olketa wea servem hem. (2 Chronicles 16:9) So iumi start for luksavve hao “long wei for fraet long Jehovah strongfala trust hem stap.”—Proverbs 14:26.

8. (a) Why nao wei for fraet long God hem muvim iumi for wakabaot long olketa wei bilong hem? (b) Explainim wei wea iumi shud “hol strong” long Jehovah.

⁸ Gudfala wei for fraet long God hem mekem trust and wei for biliv strong long hem for kamap and tu hem muvim iumi for wakabaot long olketa wei bilong hem. Taem Solomon dedicatem temple, hem prea olsem long Jehovah: ‘Letem [Israel] . . . fraet long iu mekem olketa wakabaot long olketa wei bilong iu evriday wea olketa stap laef long ples wea iu givim long olketa laen dadi bilong mifala.’ (2 Chronicles 6:31) Bifor, Moses encouragem olketa Israelite: “Iufala shud wakabaot bihaenem God bilong iufala Jehovah, and iufala shud fraet long hem, and iufala shud obeyim olketa komandment bilong hem, and iufala shud lisin long voice bilong hem, and iufala shud servem hem, and iufala shud hol strong long hem.” (Deuteronomy 13:4) Olsem olketa verse hia talem, feeling for laek wakabaot long olketa wei bilong Jehovah and for “hol strong” long hem kamaot from wei for trustim and biliv strong long God. Tru nao, wei for fraet long God leadim iumi for obeyim Jehovah, servem hem, and hol strong long hem, olsem smol pikinini hem barava hol strong long dadi wea hem trustim and bilivim evribit.—Psalm 63:8; Isaiah 41:13.

For Lovem God Minim for Fraet Long Hem

9. Hao nao wei for lovem God and fraet long God hem join tugeta?

⁹ Saed long Bible, wei for fraet long God no minim man no lovem hem. Olketa Israelite kasem instruction for “fraet long Jehovah . . . mekem iufala wakabaot followim evri wei bilong hem and for lovem hem.” (Deuteronomy 10:12) So, wei for fraet long God and wei for lovem God hem join tugeta. Wei for fraet long God muvim iumi for wakabaot followim olketa wei bilong hem, and diswan pruvim love wea iumi garem for hem. (1 John 5:3) Diswan hem fitim bikos taem iumi lovem samwan, iumi fraet for mekem hem feel nogud. Olketa Israelite mekem Jehovah feel nogud taem olketa bighed long wilderness. Iumi no laek for duim eni samting for mekem Father bilong iumi long heven feel sorre olsem. (Psalm 78:40, 41) Long narasaed, from “Jehovah hem hapi long olketa wea fraet long hem,” wei wea iumi obey and faithful hem mekem heart bilong hem hapi. (Psalm 147:11; Proverbs 27:11) Love for God muvim iumi for mekem hem hapi, and wei for fraet long hem stopem iumi for mekem hem feel nogud. Tufala fasin hia no againstim bat saportim each other.

10. Hao nao Jesus showimaot hem kasem hapi long wei for fraet long Jehovah?

¹⁰ Laef bilong Jesus Christ barava showimaot klia hao iumi savve lovem and fraet long God long semtaem. Profet Isaiah raet olsem abaotem Jesus: “Spirit bilong Jehovah mas stap long hem, spirit bilong wisdom and bilong wei for minim samting, spirit bilong kaonsel and bilong bigfala paoa, spirit bilong savve and wei for fraet long Jehovah; and hem bae hapi from hem fraet long Jehovah.” (Isaiah 11:2, 3) Olsem profesi hia showimaot, spirit bilong God muvim Jesus for garem wei for fraet long Father bilong hem long heven. And tu, iumi lukim hao disfala wei for fraet, hem no wanfala hevi bat hem givim wei for satisfae. Jesus kasem hapi from hem duim will bilong God and mekem hem hapi, nomata long barava hard taem. Taem hem feisim dae long torture stake, hem talem Jehovah: “No olsem will bilong mi, bat olsem will bilong iu.” (Matthew 26:39) From disfala wei for fraet long God, Jehovah lisin long prea bilong son bilong hem, strongim hem, and resurrectim hem.—Hebrews 5:7.

Lane for Fraet Long Jehovah

11, 12. (a) Why nao iumi mas lane for fraet long God? (b) Long wanem wei nao Jesus teachim iumi for fraet long Jehovah?

¹¹ Wei for fraet long God hem no samting wea kamap seleva nomoa, olsem feeling for tinghae wea iumi garem taem iumi lukim bigfala paoa bilong Jehovah from creation bilong hem. Dastawe Bigfala David, Jesus Christ, invaetem iumi thru long disfala profesi toktok: “Kam, iufala son, lisin long mi; wei for fraet long Jehovah nao hem samting wea mi bae teachim iufala.” (Psalm 34:11) Hao nao iumi savve lane from Jesus for fraet long Jehovah?

¹² Jesus teachim iumi for fraet long Jehovah taem hem helpem iumi for minim nambawan fasin bilong Father bilong iumi long heven. (John 1:18) Example bilong Jesus showimaot wei wea God ting and hao hem deal witim nara pipol, bikos Jesus showimaot fasin bilong Dadi bilong hem long perfect wei. (John 14:9, 10) And tu, thru long sakrifaes bilong Jesus, iumi savve go front long Jehovah taem iumi prea for hem forgivim olketa sin bilong iumi. Disfala nambawan wei wea God showimaot mercy hem wanfala barava strong reason for fraet long hem. Man wea raetem psalm hem sei: “Iu garem trufala wei for forgive, mekem olketa savve fraet long iu.”—Psalm 130:4.

13. Wanem nao olketa step wea buk bilong Proverbs talem for helpem iumi fraet long Jehovah?

¹³ Buk bilong Proverbs hem talem samfala step wea mekem iumi fit for mekem grow wei for fraet long God. “Son bilong mi, sapos iu acceptim toktok bilong mi and tinghae long komandment bilong mi, for iu lisin gud long wisdom witim ear bilong iu, mekem iu savve tanem heart bilong iu long fasin for luksavve; and tu, sapos iu singaot for minim samting and ask for fasin for luksavve, .  . . then iu bae minim wei for fraet long Jehovah, and iu bae faendem barava savve bilong God.” (Proverbs 2:1-5) So, for fraet long God, iumi mas studyim Word bilong hem, traem best for minim instruction insaed, and then lisin gud long kaonsel bilong hem.

14. Hao nao iumi savve followim kaonsel wea olketa king bilong Israel kasem?

¹⁴ Evri king long Israel bifor kasem instruction for raetem wanfala copy bilong Law and ‘readim long full laef bilong hem for mekem hem lane for fraet long God bilong hem Jehovah, for keepim evri toktok bilong law.’ (Deuteronomy 17:18, 19) Wei for readim and studyim Bible barava important tu for iumi lane for fraet long Jehovah. Taem iumi followim olketa Bible principle long living bilong iumi, isisi iumi kasem wisdom and savve bilong God. Iumi “minim wei for fraet long Jehovah” bikos iumi lukim gudfala wei wea hem affectim living bilong iumi, and iumi tinghae tumas long wei wea iumi fren witim God. And tu, taem iumi hipap evritaem witim olketa nara brata, olketa young wan and olo tu savve lisin long teaching bilong God, lane for fraet long God, and wakabaot long olketa wei bilong hem.—Deuteronomy 31:12.

Hapi Nao Evriwan wea Fraet Long Jehovah

15. Hao nao wei for fraet long God hem join witim worship bilong iumi for hem?

¹⁵ So, iumi savve lukim hao wei for fraet long God hem gudfala wei wea iumi evriwan shud mekem grow, bikos hem wanfala main part long worship bilong iumi for Jehovah. Hem leadim iumi for trust evribit long hem, for wakabaot long olketa wei bilong hem, and for hol strong long hem. Olsem Jesus Christ, wei for fraet long God savve muvim iumi tu for fulfillim dedication promis bilong iumi distaem and for olowe.

16. Why nao Jehovah encouragem iumi for fraet long hem?

¹⁶ Wei for fraet long God hem no samting wea nogud or barava hard. Bible sei: “Hapi nao evriwan wea fraet long Jehovah, wea wakabaot long olketa wei bilong hem.” (Psalm 128:1) Jehovah encouragem iumi for fraet long hem bikos hem savve disfala fasin bae protectim iumi. Iumi lukim loving kea bilong hem long toktok wea hem talem long Moses: “Sapos olketa mekem grow insaed long heart wei for fraet long mi and for keepim evri komandment bilong mi evritaem, then bae olketa and olketa son bilong olketa savve kasem gudfala samting for olowe!”—Deuteronomy 5:29.

17. (a) Wanem nao olketa gudfala samting wea iumi kasem from wei for fraet long God? (b) Olketa wanem part long wei for fraet long God nao bae iumi storyim long next article?

¹⁷ Long sem wei tu, sapos iumi mekem grow insaed heart bilong iumi wei for fraet long God, bae iumi kasem gud samting. Long olketa wanem wei? First samting, kaen tingting olsem bae mekem God hapi and bae mekem iumi feel klos long hem. From samting hem experiencem David savve hao “samting wea olketa wea fraet long hem wantem, bae hem duim, and singaot bilong olketa for help, bae hem herem, and bae hem sevem olketa.” (Psalm 145:19) Mek-tu samting, wei for fraet long God bae helpem iumi bikos hem bae affectim tingting bilong iumi long samting wea nogud. (Proverbs 3:7) Next article bae lukluk long hao disfala wei for fraet hem protectim iumi from spiritual danger, and bae hem reviewim samfala Bible example bilong olketa man wea fraet long God and tanawe from nogud samting.

[Footnote]

Waswe Iu Savve Givim Ansa?

• Wanem nao hem minim for fraet long God, and hao nao diswan affectim iumi?

• Hao wei for fraet long God and wakabaot witim God join tugeta?

• Hao nao example bilong Jesus showaot wei for fraet long God hem join witim wei for lovem God?

• Wanem nao olketa wei wea iumi savve mekem heart bilong iumi fraet long Jehovah?

[Piksa long page 17]

Olketa Israelite king kasem komand for raetem copy bilong Law for olketa seleva and readim evriday

[Piksa long page 18]

Wei for fraet long Jehovah mekem iumi trustim hem olsem son hem trustim dadi

[Piksa Credit Line long page 15]

Olketa star: Photo by Malin, © IAC/RGO 1991