Kwestin From Reader
Taem John Lukim datfala “bigfala crowd” givim holy service long temple bilong Jehovah, long wanem part bilong datfala temple nao olketa duim diswan?—Revelation 7:9-15.
Hem fitim iumi for sei datfala bigfala crowd worshipim Jehovah insaed wanfala long olketa temple courtyard bilong bigfala spiritual temple bilong hem long earth, barava datwan wea semsem witim datfala aotsaed courtyard long temple bilong Solomon.
Long bifor, olketa talem hao long spiritual wei, Court bilong olketa Gentile wea stap long taem bilong Jesus hem semsem witim, or piksarem samting wea datfala bigfala crowd stap insaed. Bat, wei for duim moa research showimaot faevfala reason why hem no olsem. First wan, no evri part long temple bilong Herod hem piksarem samting long bigfala spiritual temple bilong Jehovah. Olsem example, temple bilong Herod garem wanfala Court bilong olketa Woman and wanfala Court bilong Israel. Olketa man and woman savve go insaed datfala Court bilong olketa Woman, bat olketa man nomoa savve go insaed Court bilong Israel. Long olketa courtyard long earth bilong bigfala spiritual temple bilong Jehovah, olketa man and woman no separate long worship bilong olketa. (Galatians 3:28, 29) So, datfala spiritual temple no garem samting wea semsem olsem datfala Court bilong olketa Woman and Court bilong Israel.
Mek-tu, no eni Court bilong olketa Gentile stap long plan wea God givim for temple bilong Solomon or for temple bilong vision bilong Ezekiel; and datfala temple wea Zerubbabel buildim moa no garem tu. Dastawe, no eni reason stap for sei wanfala Court bilong olketa Gentile hem piksarem samting insaed bigfala spiritual temple arrangement bilong Jehovah for worship, especially taem iumi tingim nextfala point.
Mek-thri, King Herod bilong Edom nao buildim datfala Court bilong olketa Gentile for givim glory long hemseleva and for mekem Rome favorim hem. Herod hem start for repairim temple bilong Zerubbabel maet long 18 or 17 B.C.E. The Anchor Bible Dictionary hem sei: “For followim kaen building wea datfala Rul long west saed [Rome] laekem tumas . . . bae needim wanfala temple wea moa big winim olketa narawan long olketa taon long east.” Bat, size bilong datfala temple hem stap finis. Datfala dictionary sei: “Nomata datfala Temple bae need for garem sem size olsem olketa wea stap bifor long hem [bilong Solomon and bilong Zerubbabel], no eni samting stopem datfala Temple Maunt for garem difren size.” Dastawe, Herod mekem big datfala temple area taem hem addim go moa wanem olketa kolem distaem Court bilong olketa Gentile. Kaen construction bilong temple olsem no fit for piksarem samting insaed spiritual temple arrangement bilong Jehovah.
Mek-foa, klosap eniwan—pipol wea blind, cripple, and olketa Gentile wea no circumcise—savve go insaed datfala Court bilong olketa Gentile. (Matthew 21:14, 15) Tru, datfala court hem for planti Gentile wea no circumcise wea want for mekem olketa offering long God. Long there nao samfala taem Jesus story long pipol and tufala taem hem raosem olketa bisnisman and pipol for changem selen, and talem hao olketa no honorim haos bilong Dadi bilong hem. (Matthew 21:12, 13; John 2:14-16) Nomata olsem, The Jewish Encyclopedia hem sei: “For tok stret, disfala court long aotsaed hem no part bilong datfala Temple. Graon bilong hem no holy, and eniwan nomoa savve go insaed.”
Mek-faev, datfala Greek word (hi·e·ron’) wea olketa transleitim “temple” wea olketa iusim taem olketa story abaotem datfala Court bilong olketa Gentile “hem minim full area, no datfala Temple building nomoa,” A Handbook on the Gospel of Matthew by Barclay M. Newman and Philip C. Stine hem sei. Long narasaed, datfala Greek word (na os’) wea olketa transleitim “temple” long vision bilong John abaotem datfala bigfala crowd hem minim wanfala part nomoa. Long saed bilong datfala temple long Jerusalem, klosap evritaem hem minim datfala Holy bilong olketa Holy, datfala temple building, or area bilong temple. Samfala taem olketa transleitim olsem “sanctuary.”—Matthew 27:5, 51; Luke 1:9, 21; John 2:20.
Olketa member bilong datfala bigfala crowd showimaot faith long ransom sakrifaes bilong Jesus. Olketa klin long spiritual wei, from olketa “wasim finis kaleko bilong olketa and mekem kamap white long blood bilong Lamb.” Dastawe, olketa kamap raeteous witim goal for kamap olketa fren bilong God and for winim datfala bigfala trabol. (James 2:23, 25) Long planti wei, olketa olsem olketa proselyte long Israel wea stap anda long datfala Law covenant and worship witim olketa Israelite.
Bat, olketa proselyte hia no serve insaed datfala insaed courtyard wea olketa priest duim waka bilong olketa. And olketa member bilong datfala bigfala crowd no stap long datfala insaed courtyard long spiritual temple bilong Jehovah, courtyard wea stand for olketa anointed wan, “sekson bilong olketa holy priest” wea kasem anointing witim spirit taem olketa stap long earth. (1 Peter 2:5) Bat olsem datfala elder long heven hem talem John, datfala bigfala crowd hem really stap insaed datfala temple, no aotsaed long temple area wea olsem spiritual Court bilong olketa Gentile. Hem barava bigfala privilege! And hem mekhae long need for each wan for keepim wei for klin evritaem long spiritual wei and saed long fasin!
[Piksa long page 31]
Temple Bilong Solomon
1. Temple Building
2. Insaed Courtyard
3. Aotsaed Courtyard
4. Step for kasem Temple Courtyard