Kwestin From Reader
Waswe, hem wise for wanfala tru Christian attendim funeral or wedding long wanfala church?
Jehovah no hapi long wei wea iumi share long eni samting bilong giaman religion and man mas stap klia from diswan. (2 Corinthians 6:14-17; Revelation 18:4) Funeral wea olketa duim insaed Church hem wanfala service bilong religion wea garem sermon wea saportim olketa idea olsem soul no savve dae and wanfala reward long heven for evri gud pipol, olketa idea wea againstim Bible. Maet insaed diswan hem wei for mekem saen bilong cross and share long prea bilong priest or pastor. Olketa prea and olketa nara samting wea religion duim wea no agree witim teaching bilong Bible, hem tu maet part long wedding ceremony bilong religion wea olketa duim insaed church or long nara ples. Taem wanfala Christian hem insaed wanfala grup wea evriwan share long samting wea religion duim, hem maet hard for againstim hevi for join insaed diswan. Hem no wise for letem iuseleva for kasem hevi olsem!
Waswe sapos wanfala Christian hem feel olsem hem mas attendim funeral or wedding wea kamap insaed wanfala church? Olsem example, maet wanfala hasband wea no biliv encouragem waef bilong hem for joinim hem. Waswe, hem savve go for lukluk nomoa? From hasband wantem tumas, waef maet disaed for go witim hem, bat hem disaed strong for no share long eni kastom bilong religion. Long narasaed, hem maet disaed for no go, maet from hem tingim hao hevi saed long feeling savve kamap big tumas, and maet diswan mekem hem for no followim olketa principle bilong God. Hem nao bae mekem disison. Hem keepim klin conscience from hem want for garem peace long heart.—1 Timothy 1:19.
Nomata wanem, hem gud for explainim long hasband hao conscience bilong hem no letem hem for share insaed eni kastom bilong religion or join for singim olketa hymn or bow daon taem olketa prea. Diswan maet mekem hasband tingim hao sapos waef bilong hem go hem bae duim samting wea maet mekem hem feel nogud. Hem maet chus for go seleva from hem lovem waef bilong hem, respectim olketa biliv bilong hem, or for stopem shame. Bat sapos hem forcem waef for go, hem maet go for lukluk nomoa.
Narafala samting for tingim tu hem hao wei for attendim wanfala service insaed building bilong religion bae affectim nara brata and sista bilong iumi. Waswe, hem bae spoelem conscience bilong samfala? Maet diswan mekem olketa for wikdaon long faet bilong olketa for stap klia from wei for worshipim idol? “Mek sure long olketa samting wea moa important,” aposol Paul hem sei, “for mekem iufala savve stap stret and no mekem nara pipol stambol go kasem day bilong Christ.”—Philippians 1:10.
Sapos disfala wedding or funeral hem bilong wanfala klos relative, maet hem narafala hevi moa. Nomata wanem, wanfala Christian mas ting raonem gud evri samting wea join witim diswan. Long taem olsem hem maet disaedem hao no eni problem bae kamap from wei for attendim wanfala church funeral or wedding taem hem go for lukluk nomoa. Bat, olketa samting wea happen taem man attend maet spoelem conscience bilong hem or bilong nara pipol winim wei for kasem gud samting from wei for attend. Nomata wanem, wanfala Christian shud mek sure disison bilong hem bae no stopem wei for keepim gudfala conscience front long God and olketa man.