Followim Example Bilong Datfala Nambawan Teacher
“So go and mek-disaepol long pipol . . . , teachim olketa for duim evri samting wea mi komandim long iufala.”—MATTHEW 28:19, 20.
1, 2. (a) Hao nao iumi evriwan olketa teacher? (b) Saed long teaching, wanem nao spesol responsibility bilong olketa tru Christian?
WASWE, iu wanfala teacher? Long samfala wei iumi evriwan olketa teacher. Evritaem iu talem man wea lus hao for kasem ples wea hem laek go long hem, taem iu showim wanfala wakfren hao for duim wanfala samting, or iu showim wanfala pikinini hao for taemapem shoe bilong hem, iu teachim samwan. Waswe, hem mekem iu satisfae for helpem nara pipol long wei olsem?
2 Saed long waka for teach, olketa tru Christian garem wanfala spesol responsibility. Iumi kasem komand for “mek-disaepol long pipol . . . , teachim olketa.” (Matthew 28:19, 20) Samfala taem iumi teach long kongregeson tu. Olketa man wea kasem mark kasem appointment for serve olsem olketa “shepherd and teacher,” for buildimap kongregeson. (Ephesians 4:11-13) Insaed long Christian waka wea olketa mature woman duim evriday, olketa mas kamap “olketa teacher bilong gudfala samting” long olketa young woman. (Titus 2:3-5) Iumi evriwan mas encouragem olketa brata and sista, and iumi savve duim datwan taem iumi iusim Bible for buildimap narawan. (1 Thessalonians 5:11) Hem wanfala spesol privilege for kamap teacher bilong Word bilong God and for sharem spiritual samting wea savve helpem pipol for olowe!
3. Hao nao iumi savve kamap olketa teacher wea moabeta?
3 Bat, hao nao iumi savve kamap olketa teacher wea moabeta? Main wei, hem for followim Nambawan Teacher, Jesus. Samfala maet ask: ‘Bat hao nao iumi savve followim Jesus wea perfect?’ Tru nao, iumi kanduit kamap olketa perfect teacher. Bat, nomata wanem savve iumi garem, iumi savve duim best bilong iumi for followim wei wea Jesus hem teach. Bae iumi lukluk long hao iumi savve iusim fofala teknik bilong hem—wei for mekem samting simpol, olketa gudfala kwestin, for story long wei wea pullim tingting bilong pipol, and olketa tokpiksa wea fitim.
Teach Long Simpol Wei
4, 5. (a) Why nao olketa truth bilong Bible, olketa simpol? (b) For teach long simpol wei, why nao hem important for careful long olketa word wea iumi iusim?
4 Olketa main truth bilong Word bilong God olketa no hard for minim. Jesus hem prea olsem: “Mi praisem iu long pablik, Father, . . . bikos iu haedem samting hia from olketa man wea garem bigfala savve, and iu showim long olketa baby.” (Matthew 11:25) Jehovah mekem olketa purpose bilong hem showaot klia long olketa wea garem honest and hambol heart. (1 Corinthians 1:26-28) So, olketa truth bilong Bible, olketa simpol.
5 Taem iu conductim wanfala hom Bible study or duim return visit long olketa wea interest, hao nao iu savve teach long simpol wei? Wanem nao iumi lanem from datfala Nambawan Teacher? For mek sure olketa wea lisin savve minim hem, Jesus iusim olketa simpol toktok wea olketa wea “no skul gud and man nating” isi for minim. (Acts 4:13) So, first samting for helpem iumi teach long simpol wei hem for careful long olketa word wea iumi iusim. Iumi no need for iusim olketa big word or kleva toktok for mekem pipol bilivim olketa truth from Word bilong God. Kaen “stael toktok” olsem savve mekem pipol no feel isi, especially olketa wea no skul gud. (1 Corinthians 2:1, 2) Example bilong Jesus pruvim hao olketa simpol word wea man chusim gud garem paoa for teachim truth.
6. Hao nao iumi savve stap klia from wei for mekem student feel olsem hem no fit from iumi storyim staka tumas information?
6 For teach long simpol wei, iumi mas careful tu for no mekem student feel olsem hem no fit from iumi givim hem staka tumas information. Jesus tingim wei wea olketa disaepol bilong hem no fit long samfala wei. (John 16:12) Iumi tu, mas garem semkaen tingting abaotem olketa student bilong iumi. Olsem example, taem iumi conductim wanfala study insaed buk Savvy Wea Lead Go long Laef Olawe, iumi no need for explainim evri smol point.a And tu, iumi no need for hariap for finisim datfala information, bikos haomas information iu kavarem hem no main important samting. Hem moabeta for storyim haomas information fitim need and savve bilong datfala student. Goal bilong iumi hem for helpem datfala student for kamap wanfala disaepol bilong Christ and man wea worshipim Jehovah. Iumi need for spendem taem for helpem student minim klia samting wea hem lanem. Long wei olsem, truth savve kasem heart bilong hem and muvim hem for duim samting followim.—Romans 12:2.
7. Olketa wanem idea nao savve helpem iumi for teach long simpol wei taem iumi givim tok insaed kongregeson?
7 Taem iumi givim olketa tok insaed kongregeson, hao nao iumi savve toktok long wei wea “isi for minim,” especially sapos olketa niu wan stap long audience? (1 Corinthians 14:9) Tingim thrifala idea wea savve help. First samting, explainim mining bilong olketa toktok wea iu mas iusim wea student maet no minim. Savve bilong iumi long Word bilong God mekem iumi iusim samfala toktok wea difren. Sapos iumi iusim toktok olsem “faithful and wise slave,” “nara sheep,” and “Bigfala Babylon,” maet iumi need for explainim long simpol wei for mekem mining hem klia. Mek-tu samting, stap klia long wei for iusim tumas word. Tumas word, and wei for iusim olketa word long stael wei savve mekem audience lus interest. Toktok bilong man savve kamap moa klia sapos hem aotem olketa word and toktok wea hem no barava needim. Mek-thri, no trae for storyim tumas information. Taem iumi duim research maet iumi lanem planti interesting point. Bat best wei nao hem for organizem datfala information insaed tu-thri main point, and iusim nomoa information wea help for pruvim olketa point hia and wea iu fit for storyim long kliafala wei insaed taem wea iu garem.
Iusim Gud Olketa Kwestin
8, 9. Hao nao iumi savve chusim kwestin wea fitim interest bilong haosholder? Storyim samfala example.
8 Remember hao Jesus savve tumas for iusim olketa kwestin for pullim tingting bilong olketa disaepol bilong hem and for muvim and trainim tingting bilong olketa. Jesus iusim olketa kwestin for kasem and muvim heart bilong olketa long kaenfala wei. (Matthew 16:13, 15; John 11:26) Hao nao iumi savve iusim gud olketa kwestin olsem Jesus duim?
9 Taem iumi preach from haos tu haos, iumi savve iusim olketa kwestin for mekem pipol interest and openem wei for iumi story abaotem Kingdom bilong God. Hao nao iumi savve chusim kwestin wea fitim interest bilong haosholder? Lukluk raon. Taem iu go long wanfala haos, luk long datfala area. Waswe, iu lukim olketa toy wea minim olketa garem pikinini? Sapos olsem, maet iumi ask, ‘Waswe, iu enitaem tingim hao nao bae world taem olketa pikinini bilong iu full-grown?’ (Psalm 37:10, 11) Waswe, olketa garem olketa lock long door, or wanfala security alarm? Iumi savve ask: ‘Waswe, iu ting enitaem long future iumi savve feel sef insaed haos bilong iumi and taem iumi long road?’ (Micah 4:3, 4) Waswe, olketa wakem haos long spesol wei for man wea cripple? Maet iumi ask: ‘Waswe long future, bae enitaem evriwan garem gudfala health?’ (Isaiah 33:24) Iumi savve faendem planti idea long datfala buklet Hao for Startim and Go Ahed for Story Abaotem Bible.b
10. Hao nao iumi savve iusim olketa kwestin for ‘pullim kamaot’ tingting and feeling from heart bilong wanfala Bible student, bat wanem samting nao iumi mas tingim evritaem?
10 Hao nao iumi savve iusim gud olketa kwestin taem iumi conductim olketa Bible study? Iumi no olsem Jesus wea savve lukluk long heart bilong pipol. Nomata olsem, olketa kaenfala kwestin wea fitim savve helpem iumi for ‘pullim kamaot’ tingting and feeling from heart bilong student. (Proverbs 20:5) Olsem example, tingim sapos iumi studyim datfala chapter “Why Living wea Followim God Bringim Hapi,” long Savvy buk. Hem storyim tingting bilong God abaotem fasin for no honest, dirty fasin, and samfala samting moa. Student maet ansarem olketa kwestin long stretfala wei, bat waswe, hem agree witim samting wea hem lanem? Maet iumi askem hem: ‘Waswe, iu tingse tingting bilong Jehovah abaotem samting olsem hem stret?’ ‘Hao nao iu savve iusim olketa Bible principle hia long laef bilong iu?’ Bat tingim evritaem hao iu mas showimaot respect and honor long datfala student. Iumi no laek for askem olketa kwestin wea savve mekful long Bible student or mekem hem feel shame.—Proverbs 12:18.
11. Hao nao olketa pablik speaker savve iusim gud olketa kwestin?
11 Olketa pablik speaker tu savve iusim gud olketa kwestin. Olketa kwestin for ting raonem—wea iumi no expectim olketa for talemaot ansa—savve helpem audience for tingting. Samfala taem Jesus iusim kaen kwestin olsem. (Matthew 11:7-9) And tu, bihaen hem talem finis introduction bilong hem, wanfala speaker maet iusim olketa kwestin for showimaot olketa main point wea hem bae storyim. Hem savve sei: “Long disfala tok tuday, bae iumi ting raonem ansa for olketa kwestin hia . . . ” Then, long conclusion, hem savve iusim olketa kwestin hia for reviewim olketa main point.
12. Storyim wanfala example for showim hao olketa Christian elder savve iusim olketa kwestin for helpem wanfala brata or sista kasem comfort from Word bilong God.
12 Long shepherding waka, olketa Christian elder savve iusim olketa kwestin for helpem wanfala ‘soul wea feel sorre’ for kasem comfort from Word bilong Jehovah. (1 Thessalonians 5:14) Olsem example, for helpem samwan wea feel wikdaon, wanfala elder maet readim Psalm 34:18. Hem sei: “Jehovah hem stap klosap long olketa wea heart bilong olketa brek; and hem sevem olketa wea spirit bilong olketa pisis.” For mek sure datwan wea feel wikdaon hem lukim hao disfala verse fitim hem, datfala elder savve askem hem: ‘Jehovah hem klosap long hu? Waswe, samfala taem iu feel olsem ‘heart bilong iu brek’ and ‘spirit bilong iu pisis’? Sapos, olsem Bible talem, Jehovah hem klosap long olketa olsem, waswe, hem klosap long iu?’ Kaenfala encouragement olsem savve strongim moa spirit bilong datwan wea feel sorre.—Isaiah 57:15.
Story Long Wei wea Pullim Tingting Bilong Pipol
13, 14. (a) Hao nao iumi savve pullim tingting bilong man wea sei hem no biliv long wanfala God wea hem no savve lukim? (b) Why nao iumi no expectim evriwan for acceptim?
13 Long ministry bilong iumi, iumi laek for pullim tingting bilong pipol long gudfala wei wea savve kasem heart. (Acts 19:8; 28:23, 24) Waswe, datwan minim iumi mas lane for duim diswan long kleva wei for mekem nara pipol bilivim truth long Word bilong God? Nomoa. For story long wei wea pullim tingting hem no hard samting. Best wei hem for storyim stretfala pruv long wei wea simpol. Tingim wanfala example.
14 Hao nao iumi savve story witim man wea sei hem no biliv long wanfala God wea hem no savve lukim? Maet iumi storyim natural law hao evri samting wea happen garem reason, or samting wea kosim datwan. Taem iumi lukim samting wea happen, iumi acceptim wei wea samting mas kosim datwan. Maet iumi sei: ‘Sapos iu long wanfala farawe area and then iu faendem wanfala gudfala haos wea fulap witim kaikai (samting wea kamaot), bae iu acceptim hao samwan (samting wea kosim) buildim datfala haos and fulimap olketa food sef witim kaikai. Long sem wei, taem iumi lukim design wea showaot long nature and hao earth garem staka kaikai (samting wea kamaot), waswe, hem mek sense for acceptim hao Samwan (samting wea kosim) mas wakem evriting hia?’ Bible nao minim diswan long klia and simpol wei: “Tru nao, evri haos garem samwan wea wakem, bat man wea wakem evri samting hem God.” (Hebrews 3:4) Bat, nomata iumi savve storyim diswan long gudfala wei, samfala bae no acceptim. Bible remindim iumi hao only olketa wea ‘garem fasin wea fitim’ bae kamap olketa wea biliv.—Acts 13:48; 2 Thessalonians 3:2.
15. Wanem teknik nao iumi savve iusim for mekhae long olketa fasin and wei bilong Jehovah, and wanem nao tufala example wea showimaot hao iumi savve duim diswan?
15 Taem iumi teach, nomata long field ministry or insaed kongregeson, iumi savve story long wei wea pullim tingting for mekhae long olketa fasin and wei bilong Jehovah. Wanfala barava gudfala teknik wea Jesus iusim long samfala taem hem for storyim samting and then strongim point go moa. (Luke 11:13; 12:24) Disfala teknik iusim wei for markem tufala samting and hem savve barava affectim tingting bilong pipol. For showimaot hao hellfire teaching hem no mek sense, iumi savve sei: ‘No eni dadi bae putim hand bilong pikinini insaed long fire for panisim hem. So, datfala idea bilong hellfire mas barava nogud tumas long tingting bilong loving Father bilong iumi long heven!’ (Jeremiah 7:31) For teachim samwan hao Jehovah hem kea for each servant bilong hem wanwan, iumi savve sei: ‘Sapos Jehovah hem savve long nem bilong evri star, hem mas barava kea for olketa man wea lovem hem and wea hem baem witim blood bilong Son bilong hem!’ (Isaiah 40:26; Acts 20:28) For pullim tingting bilong man long gudfala wei olsem savve helpem iumi for kasem heart bilong pipol.
Olketa Tokpiksa wea Fitim
16. Why nao hem gud tumas for iusim olketa tokpiksa for teach?
16 Olketa gudfala tokpiksa olsem salt wea savve mekem pipol moa interest long samting iumi teachim. Why nao hem gud for iusim olketa tokpiksa for teach? Wanfala teacher hem sei: “Hem barava hard tumas for olketa man for tingim samting and no tingim piksa bilong datwan long mind bilong hem.” Olketa tokpiksa strongim olketa piksa wea garem mining long mind bilong iumi and helpem iumi for minim gud olketa niu idea. Jesus savve tumas for iusim olketa tokpiksa. (Mark 4:33, 34) Bae iumi lukluk long hao iumi savve iusim disfala teaching teknik for teach.
17. Wanem fofala samting nao savve mekem wanfala tokpiksa hem gudfala?
17 Wanem nao savve mekem wanfala tokpiksa hem gudfala? First samting, hem shud fitim audience bilong iumi and join witim olketa samting wea happen wea olketa wea lisin savve long hem. Iumi remember hao Jesus iusim olketa tokpiksa wea join witim living bilong pipol evriday. Mek-tu, hem mas klia hao wanfala tokpiksa hem join witim point wea iu laek teachim. Sapos hem no really fitim, datfala tokpiksa bae no helpem olketa wea lisin. Mek-thri, wanfala tokpiksa mas no garem tumas smol point wea no really important. Remember, Jesus storyim nomoa information wea important. Mek-foa, taem iumi iusim wanfala tokpiksa, iumi mas mek sure mining hem showaot klia. Sapos nomoa, samfala maet no minim wei for followim datwan.
18. Hao nao iumi savve tingim samfala tokpiksa wea fitim?
18 Hao nao iumi savve tingim samfala tokpiksa wea fitim? Iumi no need for mekap olketa bigfala story. Olketa short tokpiksa savve gud tumas. Tingim samfala example abaotem point wea iu storyim. Olsem example, tingim sapos iumi storyim wei wea God savve forgive, and iumi want for givim example for datfala point long Acts 3:19, wea hem sei Jehovah hem ‘aotem,’ olketa mistek bilong iumi. Wanem nao wanfala really samting wea iumi savve iusim olsem example for showimaot disfala point—wanfala rubber for rabemaot samting? wanfala sponge? Maet iumi sei: ‘Taem Jehovah forgivim olketa sin bilong iumi, hem rabemaot olketa olsem hem iusim wanfala sponge (or rubber).’ Hard for man no minim point bilong simpol tokpiksa olsem.
19, 20. (a) Wea nao iumi savve faendem olketa gudfala tokpiksa? (b) Wanem nao samfala example bilong olketa gudfala tokpiksa long olketa pablikeson bilong iumi? (Lukim box tu.)
19 Wea nao iu savve faendem olketa tokpiksa wea fitim and olketa example bilong samting wea really happen? Lukluk long laef bilong iuseleva or long olketa difren living and experience bilong olketa brata and sista. Olketa tokpiksa savve storyim planti samting, maet samting wea garem laef or nomoa, samting iumi iusim long haos, or samting wea happen wea planti long community savve abaotem. Key for faendem olketa gudfala tokpiksa hem for redy, for “lukluk gud” long samting wea go ahed raonem iumi evriday. (Acts 17:22, 23) Wanfala buk abaotem wei for givim tok long pablik hem explainim olsem: “Wanfala speaker wea lukluk gud long laef bilong olketa man and samting wea olketa duim, wea story witim evri difren kaen pipol, wea interest for lukluk gud long samting and askem olketa kwestin go kasem taem hem minim, bae hipimap staka information wea hem savve iusim for olketa tokpiksa taem hem needim.”
20 Narafala ples for faendem staka gudfala tokpiksa hem olketa Wastaoa and Wekap! magasin, and olketa nara pablikeson bilong Olketa Jehovah’s Witness. Iu savve lanem planti samting sapos iu lukluk gud long wei wea olketa buk hia iusim olketa tokpiksa.c Olsem example, tingim datfala tokpiksa insaed Savvy buk long chapter 17, paragraf 11. Hem markem pipol wea garem difren fasin insaed kongregeson witim olketa difren kaen trak wea gogo witim iu long wanfala road. Wanem nao mekem datfala tokpiksa gud tumas? Hem storyim samting wea happen evriday, hem join long klos wei witim point, and mining bilong hem klia. Iumi savve iusim olketa tokpiksa from olketa buk taem iumi teach, maet iumi changem lelebet for fitim student bilong iumi or for fitim wanfala tok.
21. Wanem nao olketa reward wea kamaot from wei for teachim Word bilong God long gudfala wei?
21 For teach long gudfala wei givim olketa bigfala reward. Taem iumi teach, iumi share witim nara pipol; iumi iusim samting bilong iumi for helpem olketa. For give long wei olsem mekem man hapi, olsem Bible sei: “Moa hapi kamaot from wei for givim winim wei for kasem.” (Acts 20:35) For olketa wea teachim Word bilong God, datfala hapi hem from iumi savve iumi givim samting wea barava spesol and helpem man for olowe—truth abaotem Jehovah. Iumi savve satisfae tu for savve iumi followim datfala Nambawan Teacher, Jesus Christ.
[Olketa Footnote]
a Olketa Jehovah’s Witness pablisim.
b Lukim datfala sekson “Olketa Introduction For Use-im long Field Ministry,” long page 2-7.—Olketa Jehovah’s Witness pablisim.
c For faendem example, lukluk long Watch Tower Publications Index 1986-2000, anda long “Illustrations.”—Olketa Jehovah’s Witness nao pablisim long planti languis.
Waswe, Iu Remember?
• Hao nao iumi savve teach long simpol wei taem iumi conductim hom Bible study? taem iumi givim tok insaed kongregeson?
• Hao nao iumi savve iusim gud olketa kwestin taem iumi preach from haos tu haos?
• Hao nao iumi savve story long wei wea pullim tingting for mekhae long olketa fasin and wei bilong Jehovah?
• Wea nao iumi savve faendem olketa tokpiksa wea fitim?
[Box/Piksa long page 23]
Waswe, Iu Rememberim Olketa Tokpiksa Hia?
Long daon hem samfala nomoa long olketa gudfala tokpiksa. Waswe sapos iu lukluk insaed buk or magasin wea olketa tokpiksa hia kam from and lukim wei wea olketa strongim point wea olketa storyim?
• Olsem tufala acrobat or tufala wea ski tugeta long ice, for garem gudfala marit hem depend long wei for garem gudfala partner.—Wastaoa, May 15, 2001, page 16.
• For lane for showimaot love hem olsem wei for lanem wanfala niu languis.—Wastaoa, February 15, 1999, page 18, 22-3.
• Olketa demon iusim spiritism olsem man for hunting iusim bait. Spiritism hem pullim kam samting wea man laek for kasem.—Savvy Wea Lead Go long Laef Olawe, page 111.
• Iumi savve markem wei wea Jesus sevem olketa pikinini bilong Adam witim wanfala rich man wea peim kaon bilong wanfala bisnis (kaon wea kamap from wanfala manager wea no honest) and hem openem moa datfala factory, and long wei olsem helpem planti wakman.—The Watchtower, February 15, 1991, page 13.
• Long sem wei wea man wea tinghae long art bae waka hard for repairim wanfala painting wea samting spoelem, Jehovah no tingim evritaem wei wea iumi no perfect bat hem savve lukim olketa gud point bilong iumi, and gogo bae hem mekem iumi kasem bak wei for perfect wea Adam lusim.—The Watchtower, February 15, 1990, page 22.
[Olketa Piksa long page 20]
Olketa trufala Christian teachim Word bilong God
[Piksa long page 21]
Olketa elder savve iusim olketa kwestin for helpem olketa brata and sista kasem comfort from Word bilong God