Waswe, Olketa Wicked Spirit Nao Bihaenem?
“World hem barava konfius, hem olsem olketa wicked spirit waka strong for blokem olketa door for man no wei aot.”—Jean-Claude Souléry, niusman.
‘Wei wea man feel hem no wei nao, mekem tingting kamap hao wanfala wicked spirit mas bihaenem olketa samting.’—Josef Barton, man for raetem history.
BARAVA nogud samting wea kamaot from terrorist attak long September 11, 2001, hem mekem staka pipol for tingting moa. Michael Prowse hem raet olsem insaed niuspepa long England Financial Times: “No eni animal bae duim or savve duim kaen nogud fasin olsem.” Man for raet insaed New York Times hem sei: “Hem important for tingim bigfala heit wea disfala attak needim for mekem hem happen,” and no just bigfala plan wea bihaenem datfala attak. “Hem wanfala kaen heit wea winim heit bilong war, wea no garem spialaen, and no savve agree long eniting.”
Pipol bilong olketa difren religion tingim hao maet wanfala wicked paoa hem bihaenem evriting hia. Wanfala bisnisman from Sarajevo wea lukim barava nogud samting wea kamaot from heit midolwan long pipol long Bosnia, hem sei: “Bihaen war long Bosnia go ahed for wan year, mi biliv Satan nao kontrolem olketa samting wea happen. Hem barava nogud.”
Taem olketa askem man for raetem history, Jean Delumeau, sapos hem biliv long Devil, hem ansa: “Hao nao mi savve denyim wicked paoa taem mi lukim olketa samting wea go ahed for happen and evriting wea bin happen from taem mi born: Mek-tu world war, wea winim 40 million pipol dae long hem; Auschwitz and olketa death camp; kill-kill long Cambodia; raf rul bilong Ceauşescu wea killim dae staka; wei wea staka gavman iusim torture for mekem pipol duim wanem olketa laekem. List no savve end. . . . So mi ting iumi fit for sei kaen fasin olsem hem ‘wei bilong devil,’ no devil witim horn and leg olsem buluka bat wan wea piksarem spirit bilong wicked fasin and paoa wea kontrolem world.”
Olsem Jean Delumeau, staka pipol sei olketa barava nogud samting wea go ahed for happen distaem, insaed famili go kasem olketa international problem, hem “wei bilong devil.” Bat wanem nao diswan minim? Waswe, kaen barava nogud samting olsem kam from paoa bilong wicked fasin nomoa, or hem olketa really wicked spirit wea muvim man for duim olketa wicked fasin wea hard for man nating duim? Waswe, kaen paoa olsem garem faondeson long wanfala prince bilong wicked fasin—Devil Satan?
[Piksa Credit Line long page 3]
Olketa pikinini: U.S. Coast Guard photo