Jehovah Hem Kea for Iu
“Torowem evri wari bilong iufala long [God], bikos hem kea for iufala.”—1 PETER 5:7.
1. Long wanem important wei nao Jehovah and Satan barava opposite evribit?
WEI bilong Jehovah and wei bilong Satan barava opposite evribit. Eniwan wea garem feeling for laek kam klosap long Jehovah bae barava les long Devil. Wanfala buk talem klia hao tufala hia difren tumas. Taem hem storyim samting wea Satan duim, wea stap insaed Bible buk bilong Job, Encyclopædia Britannica (1970) hem sei: ‘Waka bilong Satan hem for lukluk long earth for lukaotem wei for accusim pipol or sei samting olketa duim hem nogud; so goal bilong hem, hem opposite long goal bilong “eye bilong Lord,” wea lukluk long earth for strongim evri gudfala samting (II Chron. xvi, 9). Satan no bilivim hao olketa man savve showimaot gudfala fasin wea no selfish and God letem hem testim diswan insaed spialaen wea God markem.’ Tru nao, tufala hia barava opposite!—Job 1:6-12; 2:1-7.
2, 3. (a) Hao nao samting wea kasem Job barava showimaot klia mining bilong datfala word “Devil”? (b) Hao nao Bible showimaot Satan hem go ahed for accusim olketa servant bilong Jehovah long earth?
2 Datfala word “Devil” hem kam from wanfala Greek word wea minim “man for accusim long giaman wei,” “man for tokspoelem.” Buk bilong Job showimaot hao Satan accusim faithful servant bilong Jehovah, Job, long wei for sei Job hem servem God from hem tingim hemseleva nomoa. Satan hem sei: “Waswe, Job no garem reason for fraet long God?” (Job 1:9) Record long buk bilong Job showimaot hao nomata hem kasem olketa test and hard taem, Job hem kam moa klosap long Jehovah. (Job 10:9, 12; 12:9, 10; 19:25; 27:5; 28:28) Taem test bilong hem finis, hem sei long God: “Bifor, mi herem samting wea olketa talem abaotem iu, bat distaem eye bilong miseleva barava lukim iu.”—Job 42:5.
3 Waswe, bihaen taem bilong Job Satan finis for accusim olketa faithful servant bilong God? Nomoa. Buk bilong Revelation showim hao long disfala taem bilong end, Satan hem go ahed for accusim olketa anointed brata bilong Christ and tu olketa faithful fren bilong olketa. (2 Timothy 3:12; Revelation 12:10, 17) Dastawe, iumi olketa trufala Christian barava need for stap anda long God wea kea for iumi, Jehovah, servem hem from deep love wea iumi garem for hem and long wei olsem pruvim Satan laea for accusim iumi. Taem iumi duim olsem, iumi mekem heart bilong Jehovah hapi.—Proverbs 27:11.
Jehovah Lukaotem Olketa Wei for Helpem Iumi
4, 5. (a) Long wei wea difren tumas from Satan, wanem nao Jehovah lukaotem long earth? (b) Wanem nao iumi mas duim sapos iumi laekem Jehovah for hapi long iumi?
4 Devil hem wakabaot long earth and lukaotem samwan for hem accusim and kaikaim. (Job 1:7, 9; 1 Peter 5:8) Long narasaed, Jehovah lukaotem wei for helpem olketa wea needim strong bilong hem. Profet Hanani talem King Asa: “Eye bilong Jehovah muv raonem full earth for showim strong bilong hem for olketa wea givim full heart long hem.” (2 Chronicles 16:9) Wei bilong Satan for luk kam long iumi witim bigfala heit hem barava difren from loving kea bilong Jehovah!
5 Jehovah no spae long iumi from hem laek lukim evri mistek and wik point bilong iumi. Man wea raetem psalm hem sei: “Sapos olketa mistek nao samting wea iu lukaotem, O Jah, O Jehovah, hu nao savve standap?” (Psalm 130:3) Ansa hem: no eniwan. (Ecclesiastes 7:20) Sapos iumi kam klosap long Jehovah witim full heart, bae hem lukluk long iumi, no for judgem iumi, bat for lukim wei wea iumi trae hard and for ansarem olketa prea for helpem and forgivim iumi. Aposol Peter hem raet: “Eye bilong Jehovah hem lukluk long olketa raeteous wan, and ear bilong hem lisin long prea bilong olketa; bat feis bilong Jehovah hem againstim olketa wea duim nogud samting.”—1 Peter 3:12.
6. Hao nao samting wea kasem David savve comfortim and warnim iumi?
6 David hem no perfect and hem duim bigfala sin. (2 Samuel 12:7-9) Bat hem pourimaot heart bilong hem long Jehovah and hem kam klosap long hem thru long barava strongfala prea. (Psalm 51:1-12, toktok long start) Jehovah herem prea bilong hem and forgivim hem, nomata David kasem nogud samting wea kamaot from sin bilong hem. (2 Samuel 12:10-14) Diswan savve comfortim and warnim iumi tu. Hem comfortim iumi for savve Jehovah willing for forgivim olketa sin bilong iumi sapos iumi barava repent, bat hem important for iumi luksavve tu hao olketa serious samting savve kamaot from sin. (Galatians 6:7-9) Sapos iumi want for kam klosap long Jehovah, iumi mas barava stap klia evribit from eni samting wea no mekem hem hapi.—Psalm 97:10.
Jehovah Pullim Pipol Bilong Hem for Kam Long Hem
7. Jehovah lukaotem wanem kaen pipol and hao nao hem pullim olketa kam long hem?
7 Long wanfala psalm, David hem raet: “Jehovah hem hae, bat hem lukim hambol wan; bat man wea praod hem lukim from farawe.” (Psalm 138:6) Olsem tu, nara psalm hem sei: “Hu nao olsem God bilong iumi Jehovah, Datwan wea stap long ples wea barava hae? Hem hambol for lukluk kamdaon long heven and earth, raisimap man nating wea foldaon long graon.” (Psalm 113:5-7) Tru nao, olmaeti Creator bilong universe hem willing for luk kam daon long earth, and eye bilong hem lukim “hambol wan,” “man nating,” olketa wea “feel nogud and wea krae long evri rabis samting wea pipol duim.” (Ezekiel 9:4) Thru long Son bilong hem, hem pullim pipol olsem for kam long hem. Taem hem long earth, Jesus hem sei: “No eni man savve kam long mi sapos Father, wea sendem mi, no pullim hem . . . No eniwan savve kam long mi sapos Father no letem hem for kam.”—John 6:44, 65.
8, 9. (a) Why nao iumi evriwan need for kam long Jesus? (b) Why nao ransom hem barava spesol tumas?
8 Evri man shud kam long Jesus and showimaot faith long ransom sakrifaes bikos olketa born olsem olketa sinner, and stap farawe from God. (John 3:36) Olketa need for fren bak moa witim God. (2 Corinthians 5:20) God no weit firstaem for olketa sinner askem hem for provaedem wei for olketa garem peace witim hem. Aposol Paul hem raet: “God showim love bilong hem long iumi long wei wea, taem iumi sinner yet, Christ hem dae for iumi. . . . From sapos, taem iumi enemy, iumi kam fren bak long God thru long dae bilong Son bilong hem, long bigfala wei moa, from distaem iumi fren bak, iumi bae sev thru long laef bilong hem.”—Romans 5:8, 10.
9 Aposol John strongim datfala nambawan truth hao God hem provaedem wei for olketa man fren bak witim hem taem hem raet: “Thru long diswan love bilong God hem showaot long iumi, bikos God sendem only-born Son bilong hem long world mekem iumi savve kasem laef thru long hem. Disfala love hem olsem, no from iumi lovem God, bat from hem lovem iumi and sendem kam Son bilong hem olsem wanfala sakrifaes for kavarem olketa sin bilong iumi.” (1 John 4:9, 10) God nao first wan for duim samting, no olketa man. Waswe, from God showimaot bigfala love for “olketa sinner,” wea olsem “olketa enemy” tu, iu feel olsem iu laek for kam klosap long hem?—John 3:16.
Need for Lukaotem Jehovah
10, 11. (a) Wanem nao iumi mas duim for lukaotem Jehovah? (b) Hao nao iumi shud ting long system bilong Satan?
10 Hem tru, Jehovah no forcem iumi for kam long hem. Iumi mas lukaotem hem, “barava lukaotem hem and really faendem hem, bat, hem no farawe from iumi wanwan.” (Acts 17:27) Iumi mas luksavve hao Jehovah garem raet for askem iumi for stap anda long hem. Disaepol James hem raet: “So, stap anda long God; bat againstim Devil, and hem bae ranawe from iufala. Kam klosap long God, and hem bae kam klosap long iufala. Klinim hand bilong iufala, iufala sinner, and mekem heart bilong iufala kamap klin, iufala wea no sure.” (James 4:7, 8) Iumi mas no hol bak for stand strong againstim Devil and saed witim Jehovah.
11 Diswan minim iumi mas no stap klosap long disfala wicked system bilong Satan. James hem raet tu: “Waswe, iufala no savve hao wei for fren witim world hem wei for enemy witim God? So, eniwan wea laek for kamap fren bilong world hem mekem hemseleva kamap enemy bilong God.” (James 4:4) Long narasaed, sapos iumi want for fren witim Jehovah, iumi mas expectim world bilong Satan for heitim iumi.—John 15:19; 1 John 3:13.
12. (a) Wanem toktok bilong comfort nao David hem raetem? (b) Wanem nao warning wea Jehovah givim thru long profet Azariah?
12 Taem world bilong Satan againstim iumi long wanfala samting, dat taem nao iumi mas barava prea long Jehovah and ask for help bilong hem. David, wea experiencem wei wea Jehovah sevem hem planti taem, hem raet for comfortim iumi: “Jehovah hem stap klosap long olketa wea kolem hem, long evriwan wea kolem hem witim trufala fasin. Samting wea olketa wea fraet long hem wantem, bae hem duim, and singaot bilong olketa for help, bae hem herem, and bae hem sevem olketa. Jehovah hem protectim evriwan wea lovem hem, bat evri nogud man hem bae finisim evribit.” (Psalm 145:18-20) Disfala psalm showimaot hao Jehovah savve sevem iumi wanwan and hao hem bae sevem pipol bilong hem olsem wanfala sekson long taem bilong “datfala big trabol.” (Revelation 7:14) Jehovah bae stap klosap long iumi sapos iumi stap klosap long hem. “Spirit bilong God” leadim profet Azariah for talem disfala tru samting: “Jehovah stap witim iufala sapos iufala showimaot iufala stap witim hem; and sapos iufala lukaotem hem, bae hem letem iufala for faendem hem, bat sapos iufala lusim hem bae hem lusim iufala.”—2 Chronicles 15:1, 2.
Jehovah Mas Wanfala Really Person Long Iumi
13. Hao nao iumi savve showimaot Jehovah hem wanfala really person long iumi?
13 Aposol Paul hem raet hao Moses “hem go ahed for stand strong olsem hem lukim Datwan wea iumi no savve lukim.” (Hebrews 11:27) Hem tru, Moses no really lukim Jehovah. (Exodus 33:20) Bat from Jehovah hem wanfala really person long hem, hem olsem Moses lukim Hem. Long sem wei, bihaen olketa test bilong Job finis, thru long faith bilong hem, hem lukim moa klia hao Jehovah hem wanfala God wea letem olketa servant bilong hem kasem test bat hem nating lusim olketa. (Job 42:5) Bible talem hao Enoch and Noah ‘wakabaot witim God.’ Olketa duim diswan taem olketa trae for obeyim God and mekem hem hapi. (Genesis 5:22-24; 6:9, 22; Hebrews 11:5, 7) Sapos Jehovah hem wanfala really person long iumi long sem wei wea hem really person long Enoch, Noah, Job, and Moses, iumi bae “lisin long hem” long evri samting iumi duim, and hem bae “stretem gogo bilong [iumi].”—Proverbs 3:5, 6.
14. Wanem nao hem minim for “hol strong” long Jehovah?
14 Taem olketa Israelite redy for go insaed long Promis Land, Moses kaonselem olketa: “Iufala shud wakabaot followim God bilong iufala Jehovah, and iufala shud fraet long hem, and iufala shud obeyim olketa komandment bilong hem, and iufala shud lisin long voice bilong hem, and iufala shud servem hem, and iufala shud hol strong long hem.” (Deuteronomy 13:4) Olketa mas followim Jehovah, fraet long hem, obeyim hem, and hol strong long hem. Saed long disfala word wea mifala transleitim olsem “hol strong,” wanfala Bible savveman hem sei hao “long Hebrew languis diswan minim wei for fren wea barava klos.” Man wea raetem psalm hem sei: “Klos wei for fren witim Jehovah hem bilong olketa wea fraet long hem.” (Psalm 25:14) Sapos Jehovah hem wanfala really person long iumi and iumi barava lovem hem and no want for duim eni samting wea savve mekem hem no hapi, then iumi savve garem disfala spesol, klos wei for fren witim hem.—Psalm 19:9-14.
Waswe, Iu Luksavve Hao Jehovah Hem Kea for Iu?
15, 16. (a) Hao nao Psalm 34 showimaot Jehovah hem kea for iumi? (b) Wanem nao iumi shud duim sapos hem hard for iumi rememberim gud samting wea Jehovah duim for iumi?
15 Wanfala kleva trik bilong Satan hem for trae mekem iumi forgetim wei wea God bilong iumi Jehovah hem evritaem lukaftarem olketa faithful servant bilong hem. King David bilong Israel barava savve hao Jehovah protectim hem long wanfala taem wea hem feisim bigfala danger. Taem hem mas act olsem hem mentol front long King Achish bilong Gath, hem raetem wanfala song, wanfala barava naesfala psalm, wea garem olketa toktok hia bilong faith: “O mekhae long Jehovah witim mi, iufala pipol, and letem iumi praisem nem bilong hem tugeta. Mi askem Jehovah, and hem ansarem mi, and from evri fraet bilong mi, hem sevem mi. Angel bilong Jehovah stap raonem olketa wea fraet long hem, and hem sevem olketa. Teistim and lukim hao Jehovah hem gud, O iufala pipol; hapi nao man wea mekem hem ples for stap sef. Jehovah hem stap klosap long olketa wea heart bilong olketa brek; and hem sevem olketa wea spirit bilong olketa pisis. Planti trabol kasem raeteous wan, bat from evriwan hia Jehovah sevem hem.”—Psalm 34:3, 4, 7, 8, 18, 19; 1 Samuel 21:10-15.
16 Waswe, iu barava bilivim hao Jehovah garem paoa for sevem man? Waswe, iu luksavve hao hem iusim olketa angel for protectim iu? Waswe, iuseleva experiencem wei wea Jehovah hem gud? Wanem nao last taem wea iu barava luksavve Jehovah hem duim gud samting long iu? Trae for remember. Waswe, hem taem iu go long last haos long ministry nomata iu feel taed tumas? Maet iu enjoyim naesfala story witim datfala haosholder. Waswe, iu remember for sei thankiu long Jehovah for wei wea hem strongim and blessim iu? (2 Corinthians 4:7) Long narasaed, maet hem hard for iu rememberim wanfala example bilong gud samting wea Jehovah duim for iu. Maet iu need for ting go bak long last week, last month, last year, or bifor datwan. Sapos olsem, waswe sapos iu trae hard for kam moa klosap long Jehovah and trae for lukim wei wea hem leadim and directim iu? Aposol Peter encouragem olketa Christian: “Kamap hambol anda long maeti hand bilong God . . . taem iufala torowem evri wari bilong iufala long hem, bikos hem kea for iufala.” (1 Peter 5:6, 7) Tru nao, bae iu barava sapraes hao hem kea for iu!—Psalm 73:28.
Go Ahed for Lukaotem Jehovah
17. Wanem nao iumi need for duim for go ahed lukaotem Jehovah?
17 Iumi mas go ahed waka hard for keepim wei wea iumi fren witim Jehovah. Jesus prea olsem long Father bilong hem: “Diswan nao minim laef olowe, for olketa kasem savve long iu, datfala only trufala God, and long datwan wea iu sendem kam, Jesus Christ.” (John 17:3) Iumi mas evritaem waka hard for kasem savve abaotem Jehovah and Son bilong hem. Iumi needim help bilong prea and holy spirit for minim “olketa deep samting bilong God.” (1 Corinthians 2:10; Luke 11:13) Iumi needim tu “faithful and wise slave” for leadim iumi and for feedim mind witim spiritual kaikai wea olketa givim “long barava taem.” (Matthew 24:45) Thru long olketa, Jehovah kaonselem iumi for readim Word bilong hem evriday, attendim olketa Christian meeting evritaem, and strong for share insaed waka for preachim “gud nius bilong kingdom.” (Matthew 24:14) Taem iumi duim olsem, iumi go ahed for lukaotem God wea hem kea for iumi, Jehovah.
18, 19. (a) Iumi mas disaed strong for duim wanem? (b) Sapos iumi stand strong againstim Devil and go ahed for lukaotem Jehovah, wanem blessing nao bae iumi kasem?
18 Satan iusim full paoa bilong hem for mekem world againstim, persecutim, and putim hevi long pipol bilong Jehovah. Hem trae for spoelem peace bilong iumi and gud nem wea iumi garem witim God. Hem no laekem iumi for go ahed lukaotem olketa wea garem honest heart and helpem olketa for saed witim Jehovah long disfala kwestin abaotem sovereign rul bilong universe. Bat iumi mas disaed strong for loyal long Jehovah, for trustim hem for sevem iumi from wicked wan. Taem iumi letem Word bilong God leadim iumi and go ahed waka witim organization bilong hem long earth, iumi savve sure hem bae saportim iumi evritaem.—Isaiah 41:8-13.
19 So, iumi evriwan mas stand strong againstim Devil and olketa kleva trik bilong hem, and evritaem lukaotem kaenfala God bilong iumi, Jehovah, wea bae no fail for ‘mekem iumi strong.’ (1 Peter 5:8-11) Long wei olsem, iumi bae ‘stap insaed long love bilong God, taem iumi weitim mercy bilong Lord bilong iumi, Jesus Christ, witim tingting for laef olowe.’—Jude 21.
Hao Nao Bae Iu Ansa?
• Wanem nao mining bilong Greek word for “Devil,” and wanem nao Devil duim wea showimaot datfala nem fitim hem?
• Hao nao wei wea Jehovah lukluk long olketa man long earth hem barava difren from wei wea Devil lukluk long olketa?
• Why nao man mas acceptim ransom for kam long Jehovah?
• Wanem nao hem minim for “hol strong” long Jehovah, and hao nao iumi savve go ahed for lukaotem hem?
[Piksa long page 15]
Nomata hem kasem olketa test, Job luksavve hao Jehovah kea for hem
[Olketa Piksa long page 16, 17]
For readim Bible evriday, evritaem attendim olketa Christian meeting, and for garem strongfala share long preaching waka remindim iumi hao Jehovah hem kea for iumi