Waswe, Iu Remember?

Waswe, iu enjoyim olketa Wastaoa wea iu readim insaed olketa month wea go pas finis? Well, trae for ansarem olketa kwestin long daon:

• Hao nao “wei for tingting gud” hem protectim iumi? (Proverbs 1:4)

Hem savve mekem iumi luksavve long olketa samting wea savve spoelem iumi long spiritual wei and muvim iumi for planim wise samting for duim, olsem wei for stap klia from temptation bilong dirty fasin long wakples. Hem helpem iumi for luksavve hao olketa Christian brata bilong iumi no perfect, wea savve mekem iumi for no kwiktaem feel nogud taem samwan duim nogud samting long iumi. Hem savve mekem iumi missim tu kaen living wea aftarem olketa material samting, wea savve spoelem iumi long spiritual wei.—8/15, page 21-4.

• Hao nao man savve kamap neiba wea savve helpem community?

Tufala wei for kamap gudfala neiba hem nao for willing for give and for tinghae long samting man kasem. Long taem bilong trabol nao man barava needim gudfala neiba. Olketa Jehovah’s Witness trae for olsem gudfala neiba long wei for olketa talemaot warning long pipol abaotem wanem hem klosap nao for happen, wei wea God bae finisim barava nogud fasin.—9/1, page 4-7.

• Long Bible, hu nao olketa trufala saint, and hao nao bae olketa helpem olketa man?

Evri first Christian olketa trufala saint, or holy wan, wea God nao markem olketa olsem and no eni man or organization. (Romans 1:7) Bihaen olketa resurrect go for laef long heven, olketa holy wan hia bae share witim Christ for blessim olketa faithful wan long earth. (Ephesians 1:18-21)—9/15, page 5-7.

• Hao nao wei for savve abaotem olketa sports long Greece bifor helpem olketa Christian distaem?

Insaed raeting bilong aposol Peter and Paul, tufala iusim olketa tokpiksa wea join witim olketa game bilong bifor. (1 Corinthians 9:26; 1 Timothy 4:7; 2 Timothy 2:5; 1 Peter 5:10) Hem important for wanfala sportsman bifor garem gudfala man wea trainim hem, garem fasin for bossim seleva, and for no waka hard nating. Diswan hem sem tu witim wei wea wanfala Christian hem trae hard long spiritual wei distaem.—10/1, page 28-31.

• Wanem nao olketa challenge and reward bilong wei for bringimap pikinini long difren kantri?

Planti pikinini savve kwiktaem lanem niu languis winim parents bilong olketa, wea maet faendem hard for minim samfala samting pikinini tingim and duim. And olketa pikinini maet faendem hard for minim olketa Bible teaching long languis bilong parents bilong olketa. Bat, famili savve kamap moa klos taem parents teachim languis bilong olketa long olketa pikinini, diswan mekem pikinini savve long tufala languis and feel olketa part bilong tufala kastom.—10/15, page 22-6.

• Why nao wei for lane for sei sorre hem important?

Wei for sei sorre from heart hem planti taem stretem wei for fren wea wanfala samting hem spoelem. Bible givim olketa example wea showimaot hao wei for sei sorre garem bigfala paoa. (1 Samuel 25:2-35; Acts 23:1-5) Planti taem, taem tufala man raoa, blame hem stap long tufala saed evriwan. Dastawe, tufala evriwan need for acceptim blame and sei sorre.—11/1, page 4-7.

• Why nao wei for gambol, nomata for lelebet selen nomoa, hem nogud?

Wei for gambol hem encouragem bighed fasin, strongfala feeling for win, and greedy fasin wea Bible tok againstim. (1 Corinthians 6:9, 10) Staka wea gambol start long wei for plei for lelebet selen nomoa taem olketa young.—11/1, page 31.

• From olketa raetem staka Bible buk long Greek languis, why nao olketa need for transleitim Bible go long Greek languis, and wanem nao kamaot from diswan?

Greek languis bilong distaem hem barava difren from Greek languis insaed Septuagint transleison bilong olketa Hebrew Scripture and from Olketa Christian Greek Scripture. Insaed tu-thri handred year wea go pas, planti difren pipol trae for transleitim samfala part or full Bible long Greek languis wea pipol minim. Distaem, samting olsem 30 difren transleison bilong full Bible or samfala part bilong hem stap wea isi for pipol bilong Greece for readim, wea spesol wan hem New World Translation of the Holy Scriptures, wea olketa pablisim long 1997.—11/15, page 26-9.

• Why nao olketa Christian no need for givim tithe?

Anda long Law wea Israel bifor kasem, wei for givim tithe hem saportim tribe bilong Levi and lukaftarem olketa wea garem need. (Leviticus 27:30; Deuteronomy 14:28, 29) Sakrifaes bilong Jesus hem finisim datfala Law, and witim datwan, komand for kolektem tithe. (Ephesians 2:13-15) Olketa firstfala Christian kongregeson followim wei for give fitim wanem man garem and wanem hem disaedem long heart. (2 Corinthians 9:5, 7)—12/1, page 4-6.

• Waswe, samting wea Revelation 20:8 talem minim Satan bae giamanim wanfala bigfala namba bilong pipol long lastfala test?

Scripture hia sei namba bilong olketa wea Satan bae giamanim hem olsem “sandbis long sea.” Insaed Bible, disfala toktok planti taem piksarem wanfala namba wea no eniwan savve, and no givim idea hao datfala namba hem big fogud. Seed bilong Abraham, wea bae “olsem olketa sandbis long saed sea,” hem nao 144,000, wea Jesus Christ no insaed. (Genesis 22:17; Revelation 14:1-4)—12/1, page 29.