Showimaot Love Long Olketa Famili Member

TOHRU singaot olsem long waef bilong hem, “Bonem sapos iu savve duim! Go ahed bonem!”a Waef bilong hem laetem match for bonem foto bilong tufala and sei witim kros, “Bae mi duim.” Then hem sei, “Bae mi bonem full haos!” Tohru finisim raoa hia taem hem slapem waef.

Thrifala year bifor, Tohru and Yoko marit and stap hapi tugeta. So, wanem nao happen? Nomata luk olsem Tohru hem naesfala man, waef bilong hem feel olsem hem no showimaot love long hem and staka taem hem no kea abaotem feeling bilong hem. Luk olsem hem no savve showimaot kaenfala love taem waef bilong hem showimaot diswan. From hem no savve hao for deal witim diswan, Yoko kamap moa and moa kros. Gogo hem no savve sleep, hem wari tumas, no interest for kaikai, savve feel kros, garem sorre feeling wea go ahed, and planti taem hem kasem feeling for fraet. Nomata olsem, Tohru no wari abaotem diswan. Hem olsem normal samting nomoa long hem.

“Nogud Taem wea Hard for Deal Witim”

Distaem, kaen problem olsem hem kamap evritaem. Aposol Paul talem profesi hao pipol bilong distaem bae “no garem love.” (2 Timothy 3:1-5) Firstfala Greek word wea olketa transleitim “no garem love” hem join long klos wei witim word for kaen love wea olketa famili member feelim for each other. Distaem, pipol barava no garem love for narawan. Nomata sapos olketa famili member feelim love for narawan, olketa no showimaot datwan.

Planti parents distaem no savve hao for showimaot love long olketa pikinini bilong olketa. Samfala parents hia growap insaed famili wea no showimaot love long narawan and maet no minim hao laef savve moabeta and mekem man moa hapi sapos olketa insaed famili feelim and showimaot love. Luk olsem datwan nao samting wea happen long Tohru. Taem hem growap, dadi bilong hem evritaem busy long waka bilong hem and kam bak from waka leit long naet. Samfala taem nomoa hem story long Tohru, and diswan for tok spoelem hem. Mami bilong Tohru waka full-taem tu, and no spendem staka taem witim hem. Television nao best fren bilong hem. No eniwan long famili praisem or story gud long narawan.

Maet kastom nao samting wea mekem problem olsem kamap. Long samfala part bilong Latin America, hasband mas go againstim kastom sapos hem laek showimaot love long waef bilong hem. Long planti kantri long Asia and Africa, hem againstim kastom for samwan showimaot love thru long toktok or samting wea hem duim. Maet olketa hasband faendem hem hard for sei “Mi lovem iu” long waef or pikinini bilong olketa. Nomata olsem, iumi savve lanem leson from wanfala famili, wea go ahed strong for barava longfala taem.

Famili wea Nambawan Example

Famili wea hem nao best example for iumi hem datfala klos wei for fren midolwan Jehovah God and only-born Son bilong hem. Tufala showimaot love long each other long perfect wei. For staka thousand year, datfala spirit creature wea bihaen hem kamap Jesus Christ enjoyim hapi wei for fren witim Dadi bilong hem. Hem storyim datwan witim disfala toktok: “Mi nao kamap datwan wea hem barava laekem tumas evriday, and evritaem mi hapi taem mi stap witim hem.” (Proverbs 8:30) Son hem barava sure long love bilong Dadi bilong hem dastawe hem savve talemaot long olketa narawan hao hem nao wan wea Jehovah laekem tumas evriday. Hem evritaem feel hapi taem hem stap witim Dadi bilong hem.

Nomata taem hem stap long earth olsem datfala man Jesus, Dadi bilong hem talemaot deep love wea hem garem for hem. Bihaen Jesus hem baptaes, hem herem voice bilong Dadi bilong hem: “Diswan nao Son bilong mi, wea mi lovem, wea mi appruvim.” (Matthew 3:17) Datwan hem wanfala toktok for showimaot love wea barava encouragem Jesus long start bilong waka bilong hem long earth! For sure, wei wea hem herem Dadi bilong hem appruvim hem taem hem start for rememberim full laef bilong hem long heven, hem muvim heart bilong hem.

So, Jehovah showim best example bilong wei for showimaot barava bigfala love long full famili bilong hem long universe. Sapos iumi acceptim Jesus Christ, iumi savve kasem love bilong Jehovah tu. (John 16:27) Nomata iumi bae no herem eni toktok from heven, bae iumi lukim love bilong Jehovah wea showaot long nature, long ransom sakrifaes bilong Jesus, and long olketa nara samting. (1 John 4:9, 10) Jehovah hem lisin long olketa prea bilong iumi tu and hem ansarem long best wei for helpem iumi. (Psalm 145:18; Isaiah 48:17) Taem iumi mekem grow klos wei for fren witim Jehovah, iumi mekem grow wei wea iumi tinghae long loving kea bilong hem.

Jesus lane hao for kaen long pipol from Dadi bilong hem, hao for tingim feeling and kea for olketa. Hem sei olsem: “Eni samting wea [Father] hem duim, Son hem duim olketa samting hia long sem wei tu. From Father hem lovem son and showim hem evri samting wea hem duim.” (John 5:19, 20) Long sem wei, iumi savve lanem hao for showimaot love taem iumi studyim example wea Jesus showim taem hem stap long earth.—Philippians 1:8.

Love Insaed Famili—Hao nao?

From “God hem Love” and hem creatim iumi “long image bilong hemseleva,” iumi savve feelim and showimaot love. (1 John 4:8; Genesis 1:26, 27) Bat nomata olsem, diswan no just happen nomoa. For showimaot love, iumi mas firstaem feelim love for partner and olketa pikinini bilong iumi. Lane for luk aotem and luksavve long eni naesfala fasin bilong olketa, nomata maet firstaem hem luk olsem smol samting nomoa, and tingim diswan evritaem. Maet iu sei: ‘No eni naes samting abaotem hasband [waef or pikinini] bilong mi. Olketa wea parents nao chusim marit partner bilong olketa maet no feelim love for partner bilong olketa. Maet samfala garem pikinini bat no really chus for garem. Nomata olsem, tingim feeling bilong Jehovah abaotem tokpiksa waef bilong hem, nation bilong Israel, long mek-ten century B.C.E. Nomata profet bilong hem Elijah tingse no eni narawan long ten-tribe nation bilong Israel worshipim Jehovah, Jehovah lukluk gud and faendem staka pipol—7,000—wea garem olketa fasin wea hem laekem. Waswe, iu savve copyim Jehovah long wei for luk aotem olketa gudfala fasin wea olketa famili member garem?—1 Kings 19:14-18.

Bat, for mekem olketa nara member bilong famili feelim love bilong iu, iu mas trae hard for showim datwan. Taem iu lukim olketa duim gud samting, praisem olketa. Taem hem storyim wanfala waef wea barava fit, Word bilong God talem wanfala interesting wei bilong famili bilong hem: “Olketa son bilong hem getap and talemaot hao hem hapi; owner bilong hem getap, and praisem hem.” (Proverbs 31:28) Lukim hao olketa famili member feel free for talem hao olketa tinghae long each other. Taem hem praisem waef bilong hem, dadi showimaot gud example for son bilong hem, wea encouragem hem for no hol bak for givim praise long waef bilong hem bihaen hem marit.

Nara samting tu, parents shud praisem olketa pikinini bilong olketa. Datwan savve helpem pikinini for respectim seleva. Tru nao, hao nao man savve ‘lovem neiba olsem hemseleva’ sapos hem no respectim hemseleva? (Matthew 22:39) Long narasaed, sapos parents evritaem luk aotem rong long pikinini and no enitaem praisem hem, hem isi for pikinini lusim wei for respectim seleva and maet hem faendem hem hard for showimaot love long narawan.—Ephesians 4:31, 32.

Iu Savve Faendem Help

Waswe sapos iu no growap insaed loving famili? Nomata olsem, iu savve lane for showimaot love. First step hem for luksavve long problem and luksavve long need for kamap moabeta long datwan. Word bilong God, Bible, hem bigfala help long diswan. Hem olsem wanfala mirror. Taem iumi lukluk gud long iumiseleva long olketa teaching bilong Bible wea olsem mirror, iumi lukim klia olketa rong tingting wea iumi garem. (James 1:23) For fitim olketa Bible teaching, iumi savve changem eni tingting wea no fitim. (Ephesians 4:20-24; Philippians 4:8, 9) Iumi need for duim olsem evritaem, nating “givap for duim wanem hem gud.”—Galatians 6:9.

Maet samfala faendem hem hard for showimaot love bikos long kastom or wei wea olketa growap. Bat, samfala research wea olketa duim no longtaem go nomoa showimaot hao man savve win ovarem diswan. Dr. Daniel Goleman, wanfala savveman saed long health bilong mind, explainim hao ‘nomata man garem samfala nogud fasin wea hem lanem taem hem pikinini and wea stap deep insaed long heart, hem savve changem fasin hia.’ Winim 1,900 year bifor, Bible showimaot hao man savve lusim samfala nogud fasin wea barava stap deep insaed heart witim help bilong spirit bilong God. Hem encouragem iumi for: “Tek aotem oldfala fasin witim olketa wei bilong hem, and werem datfala niufala fasin.”—Colossians 3:9, 10.

Bihaen iu luksavve long problem, famili savve studyim Bible for kasem help saed long datfala need. Olsem example, waswe sapos iu faendemaot wanem Bible hem sei abaotem ‘love’? Maet iu faendem wanfala scripture olsem diswan: “Iufala herem hao Job go ahed strong and lukim samting wea Jehovah duim, hao Jehovah hem showim kaenfala love and garem bigfala mercy.” (James 5:11) Then tingim story insaed Bible abaotem Job, and lukim wei wea Jehovah hem showim kaenfala love and mercy long hem. Bae iu laek for followim example bilong Jehovah long wei for barava showimaot kaenfala love and mercy long famili bilong iu.

Bat, from iumi no perfect, “iumi evriwan foldaon staka taem” long toktok bilong iumi. (James 3:2) Maet wei wea iumi toktok long olketa famili member no encouragem olketa. Diswan needim wei for prea and depend long Jehovah. No givap. “Prea evritaem.” (1 Thessalonians 5:17) Jehovah bae helpem olketa long famili wea barava needim love and olketa wea want for showimaot love bat wea faendem hem hard for duim datwan.

Nara samting, Jehovah kaen long iumi from hem provaedem help insaed long Christian kongregeson. James hem raet: “Waswe, eniwan wea sik [long spiritual wei] stap midolwan long iufala? Hem shud kolem kam olketa older man bilong kongregeson, and olketa savve prea ovarem hem, and oilim hem witim oil long nem bilong Jehovah.” (James 5:14) Tru nao, olketa elder long olketa kongregeson bilong Olketa Jehovah’s Witness savve barava helpem olketa famili wea samfala member faendem hem hard for showimaot love long narawan. Nomata olketa elder no olketa doctor bilong mind, olketa savve helpem olketa brata and sista long patient wei, no talem olketa wanem olketa shud duim, bat talem moa tingting bilong Jehovah and for prea witim olketa and for olketa.—Psalm 119:105; Galatians 6:1.

Saed long Tohru and Yoko, olketa Christian elder evritaem lisin long olketa problem bilong olketa and comfortim olketa. (1 Peter 5:2, 3) Samfala taem, wanfala elder witim waef bilong hem visitim Yoko mekem hem savve kasem gud samting from wanfala mature Christian woman wea savve ‘helpem hem for garem stretfala tingting for lovem hasband bilong hem.’ (Titus 2:3, 4) Taem olketa elder showimaot feeling and fasin for minim olketa sorre samting and wei for safa wea olketa brata and sista kasem, olketa kamap “wanfala ples for haed from wind and wanfala ples for haed from bigfala rain.”—Isaiah 32:1, 2.

From hem kasem help from olketa kaenfala elder, gogo Tohru luksavve hao hem garem problem saed long wei for showimaot feeling, and hao long olketa “last day,” Satan attakim famili arrangement. (2 Timothy 3:1) Tohru disaed for deal witim problem bilong hem. Hem start for minim hao samting wea mekem hem fail for showimaot love hem wei wea no eniwan showimaot love long hem taem hem young. Thru long serious wei for studyim Bible and prea, Tohru isisi start for tingim need bilong Yoko saed long feeling.

Nomata long firstaem hem kros long Tohru, taem Yoko minim reason why Tohru no showimaot love and hem luksavve long olketa wik point bilong hemseleva, hem barava trae hard for lukim olketa gud point bilong hasband bilong hem. (Matthew 7:1-3; Romans 5:12; Colossians 3:12-14) Hem barava ask strong long Jehovah for strong wea hem needim for go ahed for lovem hasband. (Philippians 4:6, 7) Gogo, Tohru start for showimaot love bilong hem, wea barava mekem waef hapi fogud.

Tru nao, nomata iu faendem hem hard for feelim and showimaot love insaed long famili, iu savve barava winim disfala problem. Word bilong God givim iumi gudfala instruction. (Psalm 19:7) Taem iumi luksavve hao diswan hem serious samting and iumi trae for lukim olketa gud point bilong olketa famili member, long wei for studyim and followim Word bilong God, long wei for depend long Jehovah thru long strongfala prea, and long wei for luk aotem help bilong olketa mature Christian elder, iumi savve winim disfala hard samting wea savve spoelem wei wea iu stap gud witim famili bilong iu. (1 Peter 5:7) Iu savve hapi tu, olsem wanfala hasband long United States. Hem kasem encouragement for showimaot love for waef bilong hem. Taem hem trae hard, gogo hem feel free for sei “mi lovem iu,” hem sapraes long samting wea waef duim. Hem krae witim hapi and sei: “Mi lovem iu tu, bat diswan hem first taem insaed 25 year wea iu talem datwan witim feeling olsem.” No weit for longfala taem olsem for showimaot love bilong iu for partner and olketa pikinini bilong iu!

[Footnote]

[Piksa long page 28]

Jehovah provaedem help insaed long Word bilong hem, Bible