“Kam Klos Long God, and Hem Bae Kam Klos Long Iufala”
Bifor and Bihaen—Nogud Fasin Bifor, Distaem Gudfala Future
“WORD bilong God hem laef and garem paoa for duim samting and hem sharp winim eni tu-saed sword . . . and hem fit for luksavve long tingting and samting wea heart want for duim.” (Hebrews 4:12) Hem nao wanem aposol Paul talem abaotem paoa bilong message bilong God for affectim man. Wei wea disfala message savve kasem heart hem barava showaot klia long first century C.E. Nomata pipol long datfala taem garem barava nogud fasin, olketa wea kamap Christian werem datfala niufala fasin.—Romans 1:28, 29; Colossians 3:8-10.
Wei wea toktok bilong God insaed long Bible savve changem fasin bilong man hem showaot distaem tu. Olsem example, tingim samting wea happen long Richard, wanfala man wea tol and strong. From hem savve isi for kros, Richard hem kwiktaem for laek faetem eniwan wea mekem hem kros. Raf fasin bilong hem barava spoelem living bilong hem. Richard joinim tu wanfala club bilong boxing. Hem duim staka training and kamap heavyweight champion bilong Westphalia, Germany. Richard hem drinkim tumas alcohol tu, and planti taem hem raoa and faet witim pipol. Long wanfala taem olsem, samwan hem dae, and Richard klosap mas go long prison.
Waswe long marit bilong Richard? Richard hem sei, “Bifor mitufala Heike studyim Bible, mitufala no spendem staka taem tugeta. Heike evritaem kaban witim olketa fren bilong hem, and mi laek duim wanem mi interest long hem—boxing, ski long wave, and daev long sea.”
Taem Richard and Heike start for studyim Bible witim Olketa Jehovah’s Witness, Richard barava feel olsem hem bae hard tumas for change fitim olketa hae standard insaed Word bilong God. Bat, taem hem start for savve gud long Jehovah God, Richard mekem grow strongfala feeling for laek mekem hem hapi. Richard luksavve hao God no appruvim olketa wea lovem raf fasin or olketa wea iusim diswan for hapitaem. Richard hem lanem hao, “Soul bilong [Jehovah] barava heitim eniwan wea lovem raf fasin. “—Psalm 11:5.
Nara samting, Richard and Heike barava interest long hope for laef olowe long wanfala paradaes earth. Tufala want for stap tugeta long paradaes! (Isaiah 65:21-23) Datfala invitation for “kam klos long God, and hem bae kam klos long iu,” hem barava muvim heart bilong Richard. (James 4:8) Hem luksavve hao hem important for followim disfala kaonsel from God: “No jealous long man wea duim raf fasin, no chusim eni wei bilong hem. From Jehovah barava no laekem man wea giaman, bat Hem fren gud witim olketa wea raeteous.”—Proverbs 3:31, 32.
Nomata hem barava laek for changem wei bilong hem, Richard luksavve hao hem no savve duim diswan long strong bilong hemseleva. Hem luksavve hao hem need for luk aotem help bilong Jehovah thru long prea. So hem duim wanem Jesus talem long olketa aposol bilong Hem: “Prea evritaem, mekem iufala no foldaon long temptation. Hem tru, spirit hem willing, bat body hem wik.”—Matthew 26:41.
Bihaen hem savve long tingting bilong God abaotem raf fasin and wei for barava kros, Richard no garem eni daot hao boxing hem no fitim. Witim help from Jehovah and encouragement from olketa wea studyim Bible witim hem, Richard finis for duim raf fasin. Hem finis for duim boxing and wei for raoa and faet witim pipol, and hem disaed for mekem living bilong famili bilong hem kamap moabeta. Richard, wea distaem garem kwaet fasin and wea serve olsem overseer long wanfala kongregeson bilong Olketa Jehovah’s Witness hem sei, “Truth wea mi lanem from Bible, helpem mi for stop and tingting firstaem bifor mi duim samting.” Hem sei moa: “Distaem, mi followim olketa principle bilong love and respect long wei wea mi deal witim waef and olketa pikinini bilong mi. From diswan, mifala feel klos long each other.”
Samfala taem, pipol wea kasem rong information sei Olketa Jehovah’s Witness spoelem olketa famili. Bat, olketa example olsem Richard pruvim hao datwan hem no tru. Truth from Bible savve givim gudfala famili living and gudfala future long olketa wea garem nogud fasin bifor.—Jeremiah 29:11.
[Blurb long page 9]
“Datfala hope for stap long wanfala paradaes earth muvim mi for change”
[Box long page 9]
Olketa Bible Principle wea Help
Bible savve barava affectim living bilong pipol. Long hia nao samfala Bible principle wea helpem pipol wea duim raf fasin for change:
“Man wea slow for kros hem winim maeti man, and man wea kontrolem spirit bilong hem winim wan wea tekovarem wanfala taon.” (Proverbs 16:32) Kros wea man no savve kontrolem showimaot hem wik, no strong.
“Fasin bilong man for luksavve barava katem daon kros bilong hem.” (Proverbs 19:11) Wei wea man savve minim and luksavve long really reason for why samting hem happen helpem hem for no kamap kros.
‘No kaban witim eniwan wea hem wei bilong hem for kros mekem iu no followim olketa wei bilong hem.’ (Proverbs 22:24, 25) Olketa Christian wise for no kaban witim pipol wea isi for kros.