“Iufala Kasem Free, Give Free”
“IUFALA kasem free, give free.” (Matthew 10:8) Jesus givim datfala instruction long olketa aposol bilong hem taem hem sendem olketa for go preachim datfala gud nius. Waswe, olketa aposol obeyim datfala direction? Yes, and olketa go ahed for obeyim nomata bihaen Jesus hem lusim earth.
Olsem example, taem datfala man Simon wea bifor hem iusim demon paoa lukim paoa wea aposol Peter and John garem for duim olketa mirakol, hem offer for peim olketa mekem olketa givim datfala paoa long hem. Bat Peter tok strong long Simon taem hem sei: “Letem silver bilong iu finis witim iu, bikos iu tingse thru long selen iu savve kasem datfala free present bilong God.”—Acts 8:18-20.
Aposol Paul showimaot spirit wea semsem olsem Peter. Paul savve letem hemseleva kamap wanfala hevi for olketa Christian brata bilong hem long Corinth saed long selen. Bat, hem waka for saportim hemseleva. (Acts 18:1-3) Dastawe hem fit for talem hao hem preachim gud nius long olketa long Corinth long wei wea “no garem kost.”—1 Corinthians 4:12; 9:18.
Sorre nao, planti wea sei olketa followim Christ no showimaot sem willing wei for “give free” olsem. Tru nao, planti bigman bilong Christendom “teach for selen.” (Micah 3:11) Samfala bigman bilong religion kamap rich from selen wea olketa kolektem from flock bilong olketa. Long 1989, wanfala preacher long U.S. go long prison for 45 year. Why nao olsem? Hem “raverave witim planti million dollar wea pipol givim for saportim church and iusim samfala selen hia for peim olketa haos, trak, holiday and tu wanfala spesol haos for dog wea garem air-conditioning.”—People’s Daily Graphic, October 7, 1989.
Olsem Ghanaian Times niuspepa bilong March 31, 1990 talem, wanfala Roman Catholic priest tekem selen wea olketa kolektem taem service go ahed and torowem go bak long kongregeson. Niuspepa hia sei, “hem duim datwan bikos church expectim olketa full-grown man for givim selen wea moa big.” Iumi no sapraes tu hao planti church mekius long greedy fasin bilong olketa church member, taem olketa apim and saportim wei for gambol and olketa nara plan for kasem selen.
Long wei wea barava difren, Olketa Jehovah’s Witness trae for followim example bilong Jesus and olketa disaepol bilong hem long first century. Olketa no garem olketa bigman wea kasem wages. Each Witness hem wanfala minister wea garem responsibility for preachim “gud nius bilong kingdom” long nara pipol. (Matthew 24:14) So winim six million Witness hia tekem go disfala “wata bilong laef” long olketa pipol, free. (Revelation 22:17) Long wei olsem, “olketa wea no garem eni selen” tu savve herem message bilong Bible. (Isaiah 55:1) Olketa donation nao saportim waka bilong olketa, and no enitaem olketa ask for selen. Olsem olketa tru minister bilong God, olketa no “sellim word bilong God,” bat olketa story ‘from trufala feeling, tru nao, olsem God nao sendem olketa.’—2 Corinthians 2:17.
Bat, why nao Olketa Jehovah’s Witness willing for helpem nara pipol, nomata olketa mas iusim selen bilong olketa seleva for duim diswan? Wanem nao muvim olketa? Waswe, wei for give free minim olketa no kasem eni reward for hard waka bilong olketa?
Ansarem Kwestin Bilong Satan
Distaem, main samting wea muvim olketa tru Christian hem feeling for laek mekem Jehovah hapi—no for kamap rich. So from diswan, olketa savve givim ansa for datfala kwestin bilong Devil Satan planti handred year bifor. Abaotem datfala raeteous man Job, Satan challengem Jehovah witim disfala kwestin: “Waswe, Job no garem reason for fraet long God?” Satan talem hao only reason why Job servem God hem bikos God protectim hem. Hem sei sapos Job lusim olketa material samting bilong hem, bae hem tok spoelem God!—Job 1:7-11.
For ansarem diswan, God letem Satan for testim Job taem hem sei: “Evri samting wea hem garem stap long hand bilong iu.” (Job 1:12) Wanem nao kamaot from diswan? Job pruvim hao Satan hem laea. Nomata olketa barava no gud samting kasem Job, hem go ahed loyal. Hem sei olsem: “Go kasem taem mi dae, mi bae no tekem awe faithful fasin from miseleva!”—Job 27:5, 6.
Olketa tru worshiper distaem showimaot semkaen tingting olsem Job. Olketa no worshipim God for kasem material samting.
Kaenfala Fasin wea Man No Fit for Kasem—Free Present From God
Nara reason why olketa tru Christian willing for “give free” hem bikos olketa wanwan “kasem free” from God. Olketa man kamap slave bilong sin and dae bikos long sin bilong laen dadi bilong iumi Adam. (Romans 5:12) From love bilong hem, Jehovah mekem arrangement for Son bilong hem dae olsem wanfala sakrifaes—wea hem wanfala bigfala sakrifaes for Jehovah. Olketa man barava no fit for kasem diswan. Tru nao, diswan hem wanfala present from God.—Romans 4:4; 5:8; 6:23.
Long Romans 3:23, 24, Paul sei olsem long olketa anointed Christian: “Evriwan sin and no kasem glory bilong God, and olsem free present nao hem kolem olketa raeteous thru long kaeness bilong hem wea iumi no fit for kasem wea mekem olketa kamap free thru long ransom wea Christ Jesus peim.” Olketa wea garem hope for laef olowe long earth tu kasem wanfala “free present.” Insaed disfala present hem privilege for Jehovah kolem iumi raeteous olsem olketa fren bilong hem.—James 2:23; Revelation 7:14.
Ransom sakrifaes bilong Christ mekem evri Christian fit for serve olsem olketa minister bilong God tu. Aposol Paul hem sei: “Mi kamap wanfala minister bilong diswan [holy secret] from free present bilong kaenfala fasin bilong God wea man no fit for kasem.” (Ephesians 3:4-7) From olketa tru minister kasem instruction for duim disfala ministry thru long datfala present wea olketa no fit for kasem, bae hem no fitim for olketa laek kasem material samting olsem pei for wei wea olketa talem nius abaotem disfala present long olketa narawan.
Waswe, God Switim Iumi Witim Laef Olowe?
Waswe, diswan minim God laekem iumi for servem hem bat no kasem eni reward? Nomoa, bikos aposol Paul hem sei olsem long olketa Christian brata: “God hem no wicked mekem hem forgetim waka bilong iufala and love wea iufala showimaot for nem bilong hem.” (Hebrews 6:10) And tu, Jehovah no againstim justice. (Deuteronomy 32:4) Jehovah hem “kamap datwan wea givim reward long olketa wea barava luk aotem hem.” (Hebrews 11:6) Bat waswe, God givim disfala promis for laef olowe for switim man?—Luke 23:43.
Nomoa nao. Wanfala reason hem bikos disfala feeling for laekem laef olowe long Paradaes hem kam from God seleva. Hem nao wan wea givim disfala chance long first man and woman. (Genesis 1:28; 2:15-17) And tu, hem mekem disfala chance kamap moa taem Adam and Eve lusim diswan for olketa pikinini bilong tufala. Dastawe God promisim long Word bilong hem hao “creation seleva tu bae kamap free from wei for slave bilong sin and kasem datfala nambawan freedom olsem olketa pikinini bilong God.” (Romans 8:21) So hem barava fitim for olketa Christian distaem, olsem Moses bifor, for ‘luk forward long reward wea olketa bae kasem.’ (Hebrews 11:26) God no offerim disfala reward olsem wanfala bribe. Hem offerim from trufala love bilong hem for olketa wea servem hem. (2 Thessalonians 2:16, 17) From diswan, “iumi love, bikos hem lovem iumi firstaem.”—1 John 4:19.
Stretfala Reason for Servem God
Nomata olsem, olketa Christian distaem mas evritaem lukluk gud long wanem nao muvim olketa for servem God. Long John 6:10-13, iumi readim hao Jesus feedim long mirakol wei wanfala crowd wea winim faev thousand pipol. From datwan, samfala start for followim Jesus from olketa selfish reason. Jesus talem olketa: “Iufala luk aotem mi . . . bikos iufala kaikaim datfala bred and feel satisfae.” (John 6:26) Samting olsem 30 year bihaen, samfala Christian wea dedicate tu servem God bat “no witim stretfala reason.” (Philippians 1:17) Samfala wea ‘no agree long healthy toktok bilong Jesus Christ’ garem tingting for mekius long wei wea olketa fren witim olketa Christian brata for kasem material samting from olketa.—1 Timothy 6:3-5.
Sapos only reason wea wanfala Christian distaem serve hem from hem laek for kasem laef olowe long Paradaes, maet hem serve from selfish reason nomoa. Gogo, maet diswan lead go long wei for foldaon long spiritual wei. From luk olsem system bilong Satan hem go ahed winim wanem hem expectim, maet man olsem “kamap taed” and feel olsem end hem delay nao. (Galatians 6:9) Maet hem start for barava feel nogud from wei wea hem sakrifaesim finis planti material samting. Jesus remindim iumi: “Iu mas lovem God bilong iu Jehovah witim full heart bilong iu and witim full soul bilong iu and witim full mind bilong iu.” (Matthew 22:37) Tru nao, sapos love nao hem main reason man worshipim God, bae hem no putim eni spialaen long diswan. Hem barava disaed strong for servem Jehovah for olowe! (Micah 4:5) Bae hem no feel sorre hao hem mekem finis olketa sakrifaes for servem God. (Hebrews 13:15, 16) Love for God bae muvim iumi for putim olketa interest bilong God firstaem.—Matthew 6:33.
Distaem, winim six million trufala worshiper “willing for givim olketa seleva” for servem Jehovah. (Psalm 110:3) Waswe, iu wanfala long olketa hia? Sapos nomoa, ting raonem olketa samting wea God offerim long iumi: stretfala savve bilong truth; (John 17:3) wei for kamap free from olketa false teaching bilong giaman religion; (John 8:32) hope for laef olowe. (Revelation 21:3, 4) Olketa Jehovah’s Witness savve helpem iu lane hao for kasem evri samting hia from God—free.
[Blurb long page 22]
Main samting wea muvim olketa tru Christian distaem hem feeling for laek mekem Jehovah hapi—no for kamap rich
[Piksa long page 21]
Free present bilong ransom wea God givim muvim olketa Christian for sharem gud nius free