Olketa Faithful Christian Woman—Olketa Worshiper wea Spesol Long God
“Naesfala fasin maet giaman, and for luk naes maet hem iusles; bat woman wea fraet long Jehovah nao hem fit for kasem praise.”—PROVERBS 31:30.
1. Hao nao samting wea luk naes long Jehovah hem difren from samting wea world sei hem luk naes?
WORLD hem barava mekhae long lukluk bilong pipol, main wan nao olketa woman. Bat, Jehovah interest long heart bilong man, wea savve kamap moabeta taem hem kamap moa olo. (Proverbs 16:31) Dastawe, Bible encouragem olketa woman olsem: “No letem wei wea iufala luk naes kamaot from fasin for staelem hair and for werem olketa gold samting or wei for werem stael kaleko, bat luk naes bilong iu mas kamaot from secret man bilong heart, datfala kaleko wea no savve rotten bilong kwaet and hambol spirit, wea God hem barava tinghae long hem.”—1 Peter 3:3, 4.
2, 3. Hao nao olketa woman share for spreadim gud nius long first century, and hao nao Bible profesi abaotem diswan?
2 Planti woman insaed long Bible showimaot spirit olsem wea fit for kasem praise. Long first century, samfala hia kasem privilege for lukaftarem Jesus and olketa aposol bilong hem. (Luke 8:1-3) Bihaen, olketa Christian woman strong for talemaot gud nius; olketa narawan saportim olketa Christian man wea lead, olsem aposol Paul; and samfala barava showimaot welkam and letem kongregeson iusim haos bilong olketa for olketa meeting tu.
3 Bible hem profesi abaotem wei wea Jehovah bae iusim olketa woman long bigfala wei olsem insaed purpose bilong hem. Olsem example, Joel 2:28, 29 talem hao olketa man and woman, young and olo, bae kasem holy spirit and share for spreadim gud nius bilong Kingdom. Datfala profesi start for fulfill long Pentecost 33 C.E. (Acts 2:1-4, 16-18) Samfala woman wea kasem anointing witim spirit kasem tu olketa mirakol present bilong spirit, olsem present for talemaot profesi. (Acts 21:8, 9) From olketa strong long ministry, disfala bigfala, spiritual army bilong olketa faithful sista share long bigfala wei for mekem Christian Wei hem kasem staka ples kwiktaem long first century. Tru nao, long samting olsem 60 C.E., aposol Paul raetem hao olketa “preachim [gud nius] finis evriwea anda long heven.”—Colossians 1:23.
Kasem Praise for Fasin for No Fraet, Strong, and Welkam
4. Why nao Paul garem gudfala reason for praisem samfala woman long Christian kongregeson long first century?
4 Wanfala man wea barava tinghae long ministry bilong samfala woman hem aposol Paul—olsem olketa Christian overseer distaem tinghae long ministry bilong olketa woman wea duim witim strong. Samfala woman wea Paul talem nem bilong olketa hem “Tryphaena and Tryphosa, olketa woman wea waka hard saed long Lord,” and “Persis wea iumi lovem, from hem duim planti waka saed long Lord.” (Romans 16:12) Paul talem hao Euodia and Syntyche “waka hard witim [hem] saed long gud nius.” (Philippians 4:2, 3) Priscilla, witim hasband bilong hem, Aquila, serve tu witim Paul. Priscilla and Aquila, “putim laef bilong tufala long danger” for Paul, wea muvim hem for raet: “No just mi nomoa bat olketa kongregeson bilong olketa nation tu sei thankiu long tufala.”—Romans 16:3, 4; Acts 18:2.
5, 6. Long olketa wanem wei nao Priscilla showimaot nambawan example for olketa sista distaem?
5 Wanem nao mekem Priscilla strong and no fraet? Samting wea helpem iumi luksavve long ansa bilong diswan hem stap long Acts 18:24-26. Long there, iumi readim hao hem saportim hasband bilong hem for helpem Apollos, wea savve tumas for givim tok, for garem stretfala savve long truth. So luk olsem Priscilla studyim gud Word bilong God and olketa teaching bilong olketa aposol. From diswan, hem garem olketa fasin wea mekem hem spesol long God and hasband bilong hem and hem strongfala member bilong kongregeson long datfala taem. Olketa Christian sista distaem wea waka hard for studyim Bible and for minim spiritual kaikai wea Jehovah provaedem thru long “datfala faithful wakman,” olketa barava spesol tu.—Luke 12:42.
6 Aquila and Priscilla barava showimaot fasin for welkam. Paul stap long haos bilong tufala taem hem waka witim tufala long bisnis for wakem tent long Corinth. (Acts 18:1-3) Taem tufala muv go long Ephesus and bihaen, long Rome, olketa go ahed for showimaot Christian welkam and givim haos bilong olketa tu for olketa kongregeson garem meeting insaed. (Acts 18:18, 19; 1 Corinthians 16:8, 19) Nympha and Mary mami bilong John Mark tu givim haos bilong olketa for olketa kongregeson meeting.—Acts 12:12; Colossians 4:15.
Wanfala Spesol Samting Distaem
7, 8. Planti Christian woman garem wanem gudfala record bilong holy service distaem, and olketa savve sure long wanem samting?
7 Olsem long first century, olketa faithful Christian woman distaem duim big part insaed purpose bilong God, especially saed long preaching waka. And olketa sista hia garem nambawan record! Tingim example bilong Gwen, wea faithful for servem Jehovah for winim 50 year go kasem taem hem dae long 2002. Hasband bilong hem sei: “Long taon bilong mifala evriwan savve long strong bilong Gwen for talemaot gud nius. Gwen ting long evri man olsem samwan wea maet fit for kasem olketa promis bilong Jehovah and love bilong hem. Wei wea hem loyal long God, organization bilong hem, and famili bilong mifala—and tu loving encouragement wea hem givim taem mifala feel wikdaon—hem bigfala saport for mi and olketa pikinini bilong mifala long full and hapi laef wea mifala enjoyim tugeta. Mifala barava missim hem.” Gwen and hasband bilong hem marit for 61 year.
8 Planti thousand Christian woman, wea singol and marit serve olsem olketa pioneer minister and missionary. Olketa satisfae for garem need bilong olketa nomoa taem olketa spreadim Kingdom message long olketa farawe ples and olketa bigfala taon tu. (Acts 1:8) Planti no garem haos and no garem olketa pikinini mekem olketa free for servem Jehovah long wei wea moa big. Samfala narawan loyal for saportim hasband bilong olketa wea serve olsem olketa traveling overseer, and planti thousand sista serve long olketa Bethel hom raonem world. Olketa woman hia wea sakrifaesim seleva olketa barava part long “olketa barava spesol samting bilong evri nation” wea fulimap haos bilong Jehovah witim glory.—Haggai 2:7.
9, 10. Hao nao samfala famili member talemaot olketa tinghae long nambawan example bilong olketa Christian waef and mami?
9 Hem tru, planti Christian woman garem famili responsibility; bat, olketa mek sure olketa luk aotem Kingdom firstaem. (Matthew 6:33) Wanfala singol pioneer sista hem raet olsem: “Strongfala faith and nambawan example bilong mami bilong mi hem main samting wea muvim mi for kamap wanfala regular pioneer. Tru nao, hem wanfala best pioneer partner bilong mi.” Wanfala hasband hem sei olsem abaotem waef bilong hem, mami bilong faevfala full-grown dota: “Haos bilong mifala hem evritaem klin and stret. Bonnie keepim haos bilong mifala simpol and no tumas samting insaed mekem famili bilong mifala free for busy long olketa spiritual samting. Wei wea hem iusim selen long wisefala wei mekem mi fit for waka part-taem for 32 year, wea minim mi garem moa taem for lukaftarem famili and olketa spiritual samting. Waef bilong mi teachim olketa pikinini tu hao hem gud samting for waka hard. Hem barava fit for kasem praise bilong mi.” Distaem, Bonnie and hasband bilong hem serve long world headquarter bilong Olketa Jehovah’s Witness.
10 Wanfala hasband hem raet olsem abaotem waef bilong hem wea hem mami bilong olketa full-grown pikinini: “Mi barava tinghae long deepfala love bilong Susan for God and pipol, and tu fasin bilong hem for minim pipol, for tingim feeling bilong olketa, and wei wea hem honest. Hem evritaem talem hao Jehovah fit for kasem barava best samting iumi savve givim long hem—wanfala principle wea hemseleva followim olsem wanfala servant bilong God and wanfala mami.” Witim saport bilong waef bilong hem, disfala hasband fit for acceptim samfala spiritual privilege, olsem elder, pioneer, substitute circuit overseer, and Hospital Liaison Komiti member. Olketa woman hia barava spesol long hasband bilong olketa, long olketa Christian brata and sista, and winim evri samting, olketa spesol long Jehovah!—Proverbs 31:28, 30.
Olketa Woman wea Spesol wea No Garem Hasband
11. (a) Hao nao Jehovah showimaot hem tingim olketa faithful woman, especially olketa widow woman? (b) Olketa Christian widow woman and olketa nara faithful sista wea no garem hasband savve feel sure long wanem samting?
11 Planti taem Jehovah showimaot hem tingim olketa widow woman. (Deuteronomy 27:19; Psalm 68:5; Isaiah 10:1, 2) Hem garem sem tingting distaem. Hem barava interest long olketa widow woman, olketa singol mami, and tu, olketa woman wea chus for stap singol and olketa wea no faendem yet Christian hasband wea fit. (Malachi 3:6; James 1:27) Sapos iu nao wanfala wea faithful for servem Jehovah bat no garem saport bilong wanfala Christian partner, iu savve sure hao long eye bilong God iu spesol.
12. (a) Hao nao samfala Christian sista showimaot olketa loyal long Jehovah? (b) Samfala sista bilong iumi deal witim olketa wanem kaen feeling?
12 Olsem example, tingim olketa Christian sista bilong iumi wea no marit from olketa loyal for obeyim kaonsel bilong Jehovah for marit “only insaed long Lord.” (1 Corinthians 7:39; Proverbs 3:1) Word bilong God promisim olketa: “[Jehovah] bae duim samting long loyal wei long man wea loyal.” (2 Samuel 22:26) Nomata olsem, for stap singol hem wanfala challenge for planti long olketa. Wanfala sista sei: “Mi disaed strong for marit only insaed long Lord, bat planti taem mi krae taem mi lukim olketa fren bilong mi maritim olketa gudfala Christian man, taem mi go ahed singol nomoa.” Nara sista sei: “Mi servem Jehovah for 25 year. Mi disaed strong finis for loyal long hem, bat planti taem mi feel sorre from mi lonely.” Hem sei moa: “Olketa sista olsem mi wantem tumas encouragement.” Hao nao iumi savve helpem olketa loyal wan olsem?
13. (a) Wanem nao iumi lanem from example bilong olketa wea visitim dota bilong Jephthah? (b) Wanem nao samfala nara wei wea iumi savve showimaot iumi tingim olketa singol sista long kongregeson bilong iumi?
13 Iumi lukim wanfala wei wea iumi savve help from wanfala example long Bible. Taem dota bilong Jephthah lusim chance bilong hem for garem hasband, pipol luksavve diswan hem wanfala sakrifaes for hem. Wanem nao olketa duim for encouragem hem? “Evri year olketa dota bilong Israel savve go and praisem dota bilong Jephthah from Gilead, fofala day insaed long year.” (Judges 11:30-40) Long sem wei, iumi shud praisem olketa singol sista wea loyal for obeyim law bilong God.a Wanem nao nara wei wea iumi savve showimaot iumi tingim olketa? Long olketa prea bilong iumi, iumi shud askem Jehovah for saportim olketa faithful sista hia for go ahed loyal long service bilong olketa. Olketa fit for kasem encouragement from iumi hao Jehovah and full Christian kongregeson lovem and barava tinghae long olketa.—Psalm 37:28.
Hao Olketa Singol Dadi and Mami Win
14, 15. (a) Why nao olketa singol mami shud askem help bilong Jehovah? (b) Wanem nao olketa singol dadi and mami savve duim for followim prea bilong olketa?
14 Olketa Christian woman wea singol mami feisim planti challenge tu. Bat, olketa savve luk long Jehovah for helpem olketa for bringimap olketa pikinini followim olketa Bible principle. Hem tru, sapos iu wanfala singol dadi or mami, iu kanduit duim evribit waka bilong dadi and mami. Nomata olsem, Jehovah bae helpem iu for fulfillim olketa responsibility bilong iu sapos iu askem help bilong hem long faith. Olsem example: Tingim sapos iu karem wanfala hevi bag potatoe from garden go bak long haos bilong iu wea hem farawe yet. Waswe, bae iu stragol for karem seleva sapos wanfala fren go pas long trak bilong hem and offer for tekem iu? Nomoa nao! Long sem wei, no trae for karem seleva olketa hevi saed long feeling. Askem help bilong Jehovah. Tru nao, hem invaetem iu for askem hem. Psalm 68:19 hem sei: “Blessim Jehovah, wea evriday karem lod for iumi.” And tu, 1 Peter 5:7 invaetem iu for torowem evri wari bilong iu long Jehovah, ‘bikos hem kea for iu.’ So taem olketa problem and wari kamap big tumas, “evritaem” torowem diswan long Dadi bilong iu long heven.—1 Thessalonians 5:17; Psalm 18:6; 55:22.
15 Olsem example, sapos iu wanfala mami, for sure iu wari abaotem wei wea olketa nara skul pikinini wea sem age bae affectim pikinini bilong iu or olketa test bilong faith wea olketa pikinini maet kasem. (1 Corinthians 15:33) Hem fitim for wari abaotem samting olsem. Bat hem fitim for iumi prea abaotem kaen samting olsem tu. Tru nao, hem gud for prea witim olketa pikinini abaotem diswan bifor olketa go long skul, maet bihaen iu storyim text bilong datfala day. Olketa prea from heart wea targetim problem savve barava affectim tingting bilong olketa pikinini. Winim evri samting, bae iu kasem blessing bilong Jehovah taem iu trae hard long patient wei for putim Word bilong hem deep insaed long heart bilong olketa pikinini bilong iu. (Deuteronomy 6:6, 7; Proverbs 22:6) No forget, “eye bilong Jehovah hem lukluk long olketa raeteous wan, and ear bilong hem lisin long prea bilong olketa.”—1 Peter 3:12; Philippians 4:6, 7.
16, 17. (a) Wanem nao wanfala son talem abaotem love wea mami bilong hem showimaot? (b) Hao nao spiritual tingting bilong datfala mami affectim olketa pikinini bilong hem?
16 Tingim example bilong Olivia, wanfala mami wea garem sixfala pikinini. Hasband bilong hem wea no biliv lusim famili bihaen lastfala pikinini hem born, bat witim willing fasin Olivia acceptim responsibility for trainim olketa pikinini followim wei bilong God. Son bilong Olivia, Darren, wea distaem hem 31 year and serve olsem Christian elder and pioneer, hem samting olsem 5 year long datfala taem. Nara hevi wea Olivia kasem hem bigfala sik wea Darren kasem wea go ahed nomata distaem. Taem hem ting bak long taem wea hem pikinini, Darren hem raet olsem: “Mi still rememberim taem mi long bed long hospital and weitim Mami bilong mi for kam. Hem savve kam and sidaon klosap and readim Bible long mi evriday. Then hem singim datfala Kingdom song ‘O Thankiu, Jehovah.’b Kam kasem distaem, mi laekem tumas datfala Kingdom song.”
17 Love bilong Olivia for Jehovah and wei wea hem trust long hem helpem hem for win olsem wanfala singol mami. (Proverbs 3:5, 6) Gudfala tingting bilong hem showaot long olketa goal wea hem markem for olketa pikinini bilong hem. Darren hem sei: “Mami evritaem encouragem mifala for garem goal for duim full-taem ministry. From diswan, fofala long faevfala sista bilong mi and mi join insaed full-taem ministry. Nomata olsem, no enitaem Mami tokplas abaotem diswan long nara pipol. Mi trae hard for followim olketa nambawan fasin bilong hem.” Hem tru, no evri pikinini servem God taem olketa growap olsem olketa pikinini bilong Olivia. Bat taem wanfala mami duim best bilong hem for live followim olketa Bible principle, hem savve feel sure hem kasem loving saport and help bilong Jehovah.—Psalm 32:8.
18. Hao nao iumi savve showimaot iumi tinghae long Christian kongregeson wea Jehovah provaedem?
18 Planti wei wea God saportim iumi hem long Christian kongregeson, thru long olketa meeting, olketa Christian brata and sista, and “olketa present olsem man” wea mature long spiritual wei. (Ephesians 4:8) Olketa faithful elder waka hard for encouragem evriwan long kongregeson, and barava tingim need bilong “olketa pikinini wea no garem dadi and mami and olketa widow woman wea kasem hardfala taem.” (James 1:27) So stap klos long pipol bilong God, no stap seleva.—Proverbs 18:1; Romans 14:7.
Wei for Stap Anda Hem Fasin wea Naes Tumas
19. Why nao wei wea waef stap anda long hasband bilong hem no minim hem low winim hem, and wanem nao example from Bible wea pruvim diswan?
19 Jehovah creatim woman olsem wanfala helper for man. (Genesis 2:18) Dastawe, wei wea waef stap anda long hasband bilong hem no minim hem low winim hem. Bat, diswan honorim wanfala woman and letem hem iusim savve bilong hem long wei wea fitim will bilong God. Proverbs chapter 31 storyim staka difren samting wea wanfala waef wea fit long Israel bifor savve duim. Hem helpem olketa wea garem need, plantim wanfala grape plantation, and peim land. Tru nao, “heart bilong owner bilong hem trustim hem, and hem no short long eni samting.”—Verse 11, 16, 20.
20. (a) Hao nao wanfala Christian woman shud ting long savve bilong hem wea kam from God? (b) Esther showimaot olketa wanem gudfala fasin, and diswan mekem Jehovah iusim hem for duim wanem samting?
20 Wanfala woman wea hambol and fraet long God hem no apim hemseleva ovarem hasband bilong hem or trae for winim hem. (Proverbs 16:18) Hem no trae for satisfaem hemseleva long wei for aftarem samting bilong disfala world bat hem iusim savve wea God givim long hem for servem nara pipol—famili bilong hem, olketa nara Christian, olketa neiba, and winim evri samting, Jehovah. (Galatians 6:10; Titus 2:3-5) Tingim example from Bible abaotem Queen Esther. Nomata hem barava luk naes tumas, hem hambol and stap anda. (Esther 2:13, 15) Taem hem marit, hem showimaot deep respect for hasband bilong hem, King Ahasuerus, no olsem Vashti, firstfala waef bilong datfala king. (Esther 1:10-12; 2:16, 17) Long wei wea showimaot respect Esther followim tingting bilong Mordecai, wea hem big kasin bilong hem, saed long samfala samting—nomata taem hem queen. Bat hem no wik saed long fasin! Hem no fraet taem hem talemaot hao Haman, wanfala raf and strongfala man plan for killim dae evri Jew. Jehovah iusim Esther long bigfala wei for sevem pipol bilong hem.—Esther 3:8-4:17; 7:1-10; 9:13.
21. Hao nao wanfala Christian woman savve kamap moa spesol long Jehovah?
21 Hem klia, bifor and distaem, olketa woman showimaot hao olketa barava lovem Jehovah and worship bilong hem. Dastawe, olketa woman wea fraet long God olketa spesol long eye bilong Jehovah. Olketa Christian sista, letem Jehovah thru long spirit bilong hem isisi sheipim iu for kamap wanfala “dish” wea moa naes, wea “redy for duim evri gudfala waka.” (2 Timothy 2:21; Romans 12:2) Word bilong God hem sei olsem abaotem olketa spesol worshiper hia: “Givim hem frut bilong waka bilong hand bilong hem, and letem waka bilong hem praisem hem long olketa gate.” (Proverbs 31:31) Letem datwan kamap tru for each wan long iufala.
[Olketa Footnote]
a Saed long wei for givim praise olsem, lukim Wastaoa bilong March 15, 2002, page 26-8.
b Song 94 long songbuk Singim Praise long Jehovah, wea Olketa Jehovah’s Witness pablisim.
Waswe, Iu Remember?
• Why nao samfala Christian woman long first century spesol long eye bilong Jehovah?
• Hao nao planti sista distaem mekem olketa seleva spesol long God?
• Hao nao Jehovah saportim olketa singol mami and olketa nara sista wea no garem hasband?
• Hao nao wanfala woman savve showimaot hem barava respectim hedship arrangement?
[Box long page 17]
OLKETA EXAMPLE FOR TING RAONEM
Waswe, iu laek for lukluk long samfala moa example bilong olketa faithful woman wea Bible story abaotem? Sapos olsem, plis readim olketa scripture long daon. Taem iu ting raonem each woman hia, trae for luksavve long olketa principle wea maet iu fit for iusim long bigfala wei moa long laef bilong iu.—Romans 15:4.
◆ Sarah: Genesis 12:1, 5; 13:18a; 21:9-12; 1 Peter 3:5, 6.
◆ Olketa kaenfala Israelite woman: Exodus 35:5, 22, 25, 26; 36:3-7; Luke 21:1-4.
◆ Deborah: Judges 4:1–5:31.
◆ Ruth: Ruth 1:4, 5, 16, 17; 2:2, 3, 11-13; 4:15.
◆ Woman bilong Shunem: 2 Kings 4:8-37.
◆ Woman bilong Phoenicia: Matthew 15:22-28.
◆ Martha and Mary: Mark 14:3-9; Luke 10:38-42; John 11:17-29; 12:1-8.
◆ Tabitha: Acts 9:36-41.
◆ Fofala dota bilong Philip: Acts 21:9.
◆ Phoebe: Romans 16:1, 2.
[Piksa long page 15]
Waswe, iu praisem olketa singol sista wea loyal for obeyim law bilong God?
[Piksa long page 16]
Hem gud for askem wanem samting long prea bifor olketa pikinini go long skul?