Protectim Wei wea Iumi Christian

“Jehovah hem sei: ‘Iufala nao olketa witness bilong mi.’”—ISAIAH 43:10.

1. Wanem kaen pipol nao Jehovah pullim kam long hem?

TAEM iu stap long Kingdom Hall, lukluk long evriwan wea stap raonem iu. Hu nao olketa wea kam long datfala ples for worship? Maet iu lukim samfala young pipol wea lisin gud and gohed for kasem wisdom from Bible. (Psalm 148:12, 13) Bae iu lukim tu samfala wea hed bilong famili wea trae hard for mekem God hapi nomata olketa stap insaed world wea spoelem famili laef. Maet iu lukim tu olketa olo wan bilong iumi wea gohed for live followim dedication bilong olketa long Jehovah nomata olketa kasem enikaen problem wea kamaot from wei for olo. (Proverbs 16:31) Evriwan hia barava lovem Jehovah. And Jehovah hapi for pullim olketa kam for fren witim hem. Son bilong God strongim datwan taem hem sei: “No eni man savve kam long mi sapos Father, wea sendem mi, no pullim hem.”—John 6:37, 44, 65.

2, 3. Why nao hem hard for iumi evritaem tingim klia hao iumi Christian?

² Iumi barava hapi tumas from iumi join witim pipol wea Jehovah appruvim and blessim! Nomata olsem, hem hard for iumi evritaem tingim klia wei wea iumi Christian, from iumi stap long “nogud taem wea hard for deal witim.” (2 Timothy 3:1) Diswan barava tru saed long olketa young wan wea growap insaed truth. Wanfala young wan sei olsem: “Nomata mi attendim olketa Christian meeting mi nating garem olketa kliafala spiritual goal and, for tok stret, mi no garem strongfala feeling for laek servem Jehovah.”

³ Nomata samfala garem feeling for laek servem Jehovah, olketa maet no strong for duim datwan from tingting bilong world, hevi from olketa wea sem age, and sin, hem pullim tingting bilong olketa. Taem iumi kasem hevi, diswan savve isisi mekem iumi forget hao iumi olketa Christian. Tingim hao planti long world distaem tingse olketa standard bilong Bible saed long fasin hem no fitim taem bilong iumi. (1 Peter 4:4) Samfala tingse man no need for worshipim God followim wei wea hem markem. (John 4:24) Taem Paul raet go long olketa long Ephesus, hem sei world garem wanfala main tingting wea kamap big tumas. (Ephesians 2:2) Datfala tingting hem affectim pipol and pullim olketa for followim tingting bilong pipol wea no savve long Jehovah.

4. Hao nao Jesus strongim wei wea iumi need for protectim wei wea iumi showaot klia olsem Christian?

⁴ Bat iumi wea dedicate for servem Jehovah luksavve hao hem sorre samting sapos iumi lusim wei wea iumi showaot olsem Christian. Olketa standard bilong Jehovah and samting wea hem expectim from iumi, hem nomoa samting wea savve mekem iumi garem stretfala tingting abaotem hu nao iumi. Diswan hem from hem creatim iumi long image bilong hem. (Genesis 1:26; Micah 6:8) Bible hem sei olketa fasin and standard wea showimaot iumi Christian hem olsem kaleko wea man werem, wea evriwan savve lukim. Jesus talem disfala warning abaotem taem bilong iumi: “Mi bae kam olsem man for steal! Hapi nao man wea gohed for wekap and olketa no aotem kaleko bilong hem, mekem hem no wakabaot naked and pipol lukim hao hem shame.”a (Revelation 16:15) Iumi no laek for aotem olketa fasin and standard wea showimaot iumi Christian and iumi no laek letem world bilong Satan for affectim tingting bilong iumi and wanem iumi duim. Sapos iumi letem datwan happen long iumi, bae iumi no garem nao disfala “kaleko.” Diswan hem bae sorre samting and samting for shame long hem.

5, 6. Why nao hem important tumas for stedy long spiritual wei?

⁵ Wei for evritaem tingim klia wei wea iumi Christian, savve barava affectim olketa samting wea iumi duim long laef. Why nao olsem? Sapos samwan wea worshipim Jehovah hem no tingim klia long mind hao hem wanfala Christian, maet staka samting savve pullim tingting bilong hem and hem no garem olketa kliafala goal. Bible planti taem warnim iumi abaotem wei for daot olsem. Disaepol James hem sei: “Man wea daot hem olsem wave bilong sea wea wind blowim olobaot. Tru nao, no letem datfala man tingse hem bae kasem eni samting from Jehovah; hem man wea no sure, no stedy long evri wei bilong hem.”—James 1:6-8; Ephesians 4:14; Hebrews 13:9.

⁶ Hao nao iumi savve protectim wei wea iumi Christian? Wanem nao savve helpem iumi for minim klia go moa hao iumi garem nambawan privilege for worshipim Most Hae? Plis tingim olketa samting hia.

Strongim Long Mind Hao Iu Wanfala Christian

7. Why nao iumi shud ask strong long Jehovah for lukluk gud long iumi?

⁷ Gohed for strongim wei wea iu fren witim Jehovah. Samting wea barava spesol and important tumas long wanfala Christian, hem nao wei wea hem fren witim God. (Psalm 25:14; Proverbs 3:32) Sapos iumi start for daotem wei wea iumi Christian, iumi need for lukluk gud for faendaot hao deep and strong nao wei wea iumi fren witim Jehovah. Man for raetem psalm hem ask strong olsem: “Lukluk gud long mi, O Jehovah, and testim mi; klinim kidney bilong mi and heart bilong mi.” (Psalm 26:2) Why nao iumi laekem Jehovah for lukluk long iumi? Bikos hem hard for iumiseleva luksavve long barava tingting and samting wea muvim iumi. Jehovah nomoa fit for minim hu nao iumi—samting wea muvim iumi, tingting bilong iumi, and feeling bilong iumi.—Jeremiah 17:9, 10.

8. (a) Hao nao olketa test from Jehovah savve helpem iumi? (b) Wanem help nao iuseleva kasem for mekem iu muv ahed olsem wanfala Christian?

⁸ Wei for askem Jehovah for lukluk gud long iumi, hem minim iumi askem hem for testim iumi. Hem savve letem samfala samting for kasem iumi mekem iumi luksavve wanem nao really muvim iumi and for iumi luksavve wanem kaen heart nao iumi garem. (Hebrews 4:12, 13; James 1:22-25) Iumi shud hapi for kasem olketa test olsem from diswan givim iumi chance for showimaot hao deep nao loyal fasin bilong iumi long Jehovah. Diswan savve showimaot sapos iumi “fit long evri wei and no short long eni samting.” (James 1:2-4) And taem iumi gohed for kasem olketa test olsem, iumi grow long spiritual wei.—Ephesians 4:22-24.

9. Why nao hem important for iumi pruvim long iumiseleva hao teaching long Bible hem tru? Explainim datwan.

⁹ Study for mekem iu bilivim truth wea stap long Bible. Wei for tinghae long wei wea iumi servant bilong Jehovah hem savve kamap wik sapos Bible hem no faondeson for wei wea iumi feel olsem. (Philippians 1:9, 10) Evri Christian, nomata young or olo need for pruvim long hemseleva truth wea stap long Bible. Paul encouragem olketa Christian olsem: “Mek sure long evri samting; hol strong long samting wea gud.” (1 Thessalonians 5:21) Olketa young Christian wea stap insaed olketa famili wea servem God mas luksavve hao olketa no savve depend long faith bilong dadi and mami. David talem son bilong hem Solomon hao hem need for “savve long God bilong dadi bilong [hem] and servem hem witim full heart.” (1 Chronicles 28:9) Hem no inaf for Solomon lukluk nomoa long dadi bilong hem wea gohed for buildim faith long Jehovah. Hemseleva need for savve long Jehovah, and hem duim datwan. Hem ask strong olsem long God: “Givim mi wisdom and savve distaem mekem mi savve go aot front long pipol hia and mi savve kam insaed.”—2 Chronicles 1:10.

10. Why nao hem no rong for askem olketa kwestin wea fitim and wea kam from heart wea really laek savve long hem?

¹⁰ Strongfala faith kamap from wei for kasem savve. Paul sei olsem: “Faith kamap bihaen man herem samting.” (Romans 10:17) Wanem nao datwan minim? Taem iumi kaikai evritaem long Word bilong God, iumi savve buildimap faith and trust bilong iumi long Jehovah, olketa promis bilong hem, and organization bilong hem. Wei for askem olketa kwestin wea fitim abaotem Bible savve leadim man for kasem olketa ansa wea strongim hem. And tu, Paul givim disfala advaes long Romans 12:2: “Pruvim long iufala seleva, gudfala and stretfala and perfect will bilong God.” Bat hao nao iumi savve duim datwan? Thru long wei for kasem “stretfala savve bilong truth.” (Titus 1:1) Holy Spirit bilong Jehovah savve helpem iumi for minim evri samting, nomata olketa point wea hard. (1 Corinthians 2:11, 12) Iumi shud prea for God helpem iumi taem hem hard for minim samfala point. (Psalm 119:10, 11, 27) Jehovah laekem iumi for minim, bilivim, and obeyim Word bilong hem. Hem hapi taem iumi askem olketa kwestin wea fitim and wea kam from heart wea really laek savve long hem.

Disaed Strong for Mekem God Hapi

11. (a) Wanem normal feeling nao savve kamap olsem trap? (b) Hao nao iumi savve kasem strong for againstim hevi from olketa wea sem age?

¹¹ Trae hard for mekem God hapi, no man. For minim hu nao iumi, hem normal nomoa for iumi laek member long wanfala grup. Evriwan long iumi need for garem olketa fren, and iumi feel hapi and sef taem pipol acceptim iumi. Taem iumi young, and bihaen datfala taem tu, wei for kasem hevi from olketa wea sem age hem strong fogud, and hem savve mekem iumi barava trae hard for followim olketa or mekem olketa hapi. Bat olketa fren and olketa wea sem age olsem iumi no evritaem warim iumi. Samfala taem olketa laekem nomoa samwan for join witim olketa for go duim samting wea no stret. (Proverbs 1:11-19) Taem wanfala Christian followim olketa wea putim hevi long hem, planti taem hem bae trae for haedem hao hem wanfala Christian. (Psalm 26:4) Paul sei olsem: “No followim fasin bilong world wea stap raonem iu.” (Romans 12:2, The Jerusalem Bible) Jehovah hem givim iumi strong wea iumi needim for mekem iumi fit for faet againstim eni hevi wea iumi kasem.—Hebrews 13:6.

12. Wanem principle and wanem example nao savve strongim iumi for stand strong taem iumi deal witim samting wea affectim trust bilong iumi long God?

¹² Taem olketa hevi olsem start for spoelem wei wea iumi Christian, hem gud for iumi tingim hao loyal fasin bilong iumi for God hem barava important winim tingting bilong staka pipol. Toktok long Exodus 23:2 hem wanfala gudfala principle for diswan: “Iu mas no go witim olketa wea plan for duim nogud samting.” Taem staka long olketa Israelite daotem hao Jehovah bae fulfillim olketa promis bilong hem, Caleb stand strong and no laek for followim tingting bilong olketa nomata staka nao ting olsem. Hem barava feel sure hao olketa promis bilong God hem samting wea man fit for trustim, and hem kasem bigfala blessing from wei wea hem duim datwan. (Numbers 13:30; Joshua 14:6-11) For protectim wei wea iu fren witim God, waswe, iu willing tu for no letem tingting bilong staka pipol affectim iu?

13. Why nao hem wise for talem nara pipol hao iumi Christian?

¹³ Showimaot klia hao iu wanfala Christian. Wei for defendim wei wea iumi Christian savve protectim iumi. Taem olketa faithful Israelite feisim olketa wea trae for stopem olketa for duim waka bilong Jehovah long taem bilong Ezra, olketa sei olsem: “Mifala olketa servant bilong God bilong heven and earth.” (Ezra 5:11) Sapos iumi letem nogud toktok bilong pipol and samting wea olketa duim for affectim iumi, wei for fraet savve mekem iumi no fit for duim eni samting. Wei for trae mekem evriwan hapi bae mekem iumi kamap wik and no fit for duim gud waka bilong iumi. So no letem eniwan mekem iu fraet. Hem evritaem gud for talem pipol hao iu wanfala Jehovah’s Witness. Long wei wea showimaot respect, bat long semtaem showimaot iu stand strong iu savve explainim olketa standard, olketa biliv, and olketa samting wea iu olsem wanfala Christian bae duim and bae no duim. Talem olketa narawan hao iu disaed strong for followim olketa hae standard bilong Jehovah saed long fasin. Showimaot klia hao iu bae no letem eni samting spoelem wei wea iu wanfala faithful Christian. Showimaot hao iu nating feel shame long gudfala fasin bilong iu. (Psalm 64:10) Wei wea iu showimaot klia hao iu strong for followim Christian wei savve strongim iu, protect iu, and tu, savve mekem samfala interest for savve moa abaotem Jehovah and pipol bilong hem.

14. Waswe, iumi shud letem wei wea samfala mekfani or againstim iumi mekem iumi wikdaon? Explainim datwan.

¹⁴ Hem tru, maet samfala mekfani or againstim iu. (Jude 18) Sapos olketa narawan no interest long wei wea iu trae for explainim biliv and standard bilong iu long olketa, no feel wikdaon. (Ezekiel 3:7, 8) Nomata iu barava laek for explainim samting hia, iu bae hard for mekem olketa herem iu sapos olketa les. Tingim Pharaoh. No eni trabol or mirakol savve mekem Pharaoh biliv hao Moses toktok for Jehovah, nomata fasbon son bilong hem dae. Dastawe, no letem wei for fraetem man mekem iu no duim samting. Wei for garem trust and faith long God savve helpem iumi for winim feeling for fraet.—Proverbs 3:5, 6; 29:25.

Lane From Samting Bifor, Duim Samting for Future

15, 16. (a) Wanem nao spiritual samting wea iumi kasem from taem bifor kam? (b) Wanem gud samting nao iumi savve kasem taem iumi iusim Word bilong God for ting raonem olketa spiritual samting hia?

¹⁵ Tinghae long spiritual samting wea iumi kasem from bifor kam. Taem olketa Christian iusim Word bilong God, olketa savve kasem gud samting from wei for ting raonem olketa barava nambawan spiritual samting wea olketa kasem from bifor kam. Samfala spiritual samting hia hem nao truth long Word bilong Jehovah, hope for laef olowe, and privilege wea iumi garem for waka for God for talemaot gud nius. Waswe, iu luksavve long waka bilong iuseleva olsem wanfala Witness, hao iu part long wanfala grup wea kasem assignment for duim disfala waka for sevem laef thru long wei for preach abaotem Kingdom? Remember, Jehovah seleva nao talem: “Iufala nao olketa witness bilong mi.”—Isaiah 43:10.

¹⁶ Iu savve askem iuseleva olketa kwestin olsem: ‘Waswe, mi ting long olketa spiritual samting hia olsem samting wea barava important long mi? Waswe, mi barava tinghae long hem and from diswan mi putim will bilong God fastaem long laef bilong mi? Waswe, wei wea mi tinghae long diswan mekem mi strong for againstim eni temptation wea maet mekem mi lusim datwan?’ Wei wea iumi kasem olketa spiritual samting hia from bifor kam, hem barava mekem iumi feel sef long spiritual wei, wea datwan nao samting wea pipol insaed organization nomoa savve garem. (Psalm 91:1, 2) Wei for ting bak long olketa spesol samting wea happen saed long organization bilong Jehovah distaem, hem savve strongim hao no eni man or eni samting savve finisim pipol bilong Jehovah from earth.—Isaiah 54:17; Jeremiah 1:19.

17. Winim wei for depend nomoa long olketa spiritual samting wea iumi kasem from bifor kam, wanem moa iumi need for duim?

¹⁷ Hem tru, iumi mas no depend nomoa long spiritual samting wea iumi kasem from bifor kam. Evriwan long iumi mas mekem grow klosfala wei for fren witim God. Bihaen Paul waka hard for buildimap faith bilong olketa Christian long Philippi, hem raet olsem long olketa: “Dastawe, olketa wea mi lovem, long wei wea iufala obey evritaem, no long taem wea mi stap nomoa, bat long bigfala wei taem mi no stap, gohed for waka for salvation bilong iufala witim wei for fraet and seksek.” (Philippians 2:12) Iumi no savve depend long narawan for sevem iumi.

18. Hao nao olketa waka wea iumi Christian duim barava mekem iumi tingim klia hao iumi Christian?

¹⁸ Busy for duim olketa Christian waka. Pipol luksavve hao “waka wea man duim savve barava affectim hu nao hem.” Olketa Christian distaem kasem assignment for duim datfala important waka for preachim gud nius bilong Kingdom bilong God. Paul hem sei: “From mi wanfala aposol long olketa nation, mi mekem ministry bilong mi kasem glory.” (Romans 11:13) Waka bilong iumi for preach hem mekem iumi difren from world, and wei wea iumi tekpart long datwan barava mekem iumi tingim klia hao iumi Christian. Taem iumi busy long waka bilong iumi long Christian kongregeson, olsem olketa meeting, olketa program for buildim ples for worship, wei for helpem olketa wea garem need, and kaen samting olsem, diswan savve barava strongim go moa wei for tingim klia hao iumi Christian.—Galatians 6:9, 10; Hebrews 10:23, 24.

Wei for Tingim Klia, Mekem Man Kasem Blessing

19, 20. (a) Wanem gud samting nao iuseleva kasem from iu wanfala Christian? (b) Wanem nao mekem iumi barava luksavve hu nao iumi?

¹⁹ Tingting fastaem long planti nambawan and gud samting wea iumi kasem from iumi olketa tru Christian. Tingim hao hem nambawan privilege for Jehovah luksavve long iumi wanwan. Profet Malachi hem sei: “Olketa wea fraet long Jehovah toktok each wan witim fren bilong hem, and Jehovah gohed for lukluk and lisin. And olketa raetem front long hem wanfala buk for rememberim olketa wea fraet long Jehovah and olketa wea tingim nem bilong hem.” (Malachi 3:16) Iumi savve kamap man wea God ting long hem olsem fren. (James 2:23) Laef bilong iumi kamap gud tumas from iumi lukim klia why iumi laef and iumi garem olketa gudfala goal. And iumi kasem tu hope for laef olowe.—Psalm 37:9.

²⁰ Remember hao iu and wei wea iu important hem no depend long wei wea man ting long iu, bat long wei wea God ting long iu. Maet wei wea man ting long iumi hem followim olketa standard wea no perfect. Bat, love bilong God and wei wea hem interest long iumi hem nao samting wea mekem iumi feel iumi important long hem, bikos iumi bilong hem. (Matthew 10:29-31) From diswan, love bilong iumi for God savve mekem iumi barava luksavve hu nao iumi and wanem nao iumi shud duim long laef bilong iumi. “Sapos eniwan lovem God, God savve long hem.”—1 Corinthians 8:3.

[Footnote]

Waswe, Iu Tingim?

• Why nao hem important for iumi protectim wei wea iumi Christian?

• Hao nao iumi savve strongim long mind hao iumi olketa Christian?

• Taem iumi mas disaed hu nao bae iumi mekem hapi, olketa wanem samting nao iumi mas tingim for helpem iumi disaed long stretfala wei?

• Hao nao wei for tingim klia wei wea iumi Christian savve affectim future bilong iumi?

[Olketa Piksa long page 21]

Wei for busy for duim Christian waka savve mekem iumi tingim klia hao iumi olketa Christian