“Jehovah Nao Man wea Helpem Mi”
Wei for Praisem Jehovah Mekem Laef Bilong Young Pipol Kamap Moabeta
“MI LAEK kasem best samting long laef!” Hem nao wanem wanfala teenage boy laek kasem. Bat hao nao wanfala young wan savve kasem best samting long laef? Bible tok stret olsem: “Tingim olowe Creator bilong iu taem iu young!”—Ecclesiastes 12:1, Contemporary English Version.
Wei for praisem and servem Jehovah hem no for olketa man wea big finis nomoa. Son bilong Elkanah and Hannah, Samuel, hem young tumas taem hem servem Jehovah long tabernacle. (1 Samuel 1:19, 20, 24; 2:11) Wanfala young girl bilong olketa Jew, showimaot bigfala faith long Jehovah taem hem talem Naaman, chief bilong army bilong Syria, hao sapos hem go long profet Elisha bae hem kasem healing for datfala sik leprosy. (2 Kings 5:2, 3) Psalm 148:7, 12 komandim olketa young boy and young girl for praisem Jehovah.a Taem Jesus 12 year nomoa, hem barava interest long service bilong Dadi bilong hem. (Luke 2:41-49) From olketa kasem training from Bible, samfala boy singaot olsem taem olketa lukim Jesus long temple: “Mifala prea, sevem Son bilong David!”—Matthew 21:15, 16.
Praisem Jehovah Distaem
Distaem, plande young wan midolwan Olketa Jehovah’s Witness hapi and tinghae long biliv bilong olketa and no fraet for storyim datwan long olketa narawan long skul and long eni ples. Lukim tufala example hia.
Long England, long class bilong Stephanie wea hem 18 year, olketa story abaotem wei for killim dae baby insaed bele and olketa standard saed long fasin. Teacher storyim hao plande pipol distaem killim dae baby insaed bele and olketa young girl no garem eni reason for les for duim datwan. Taem evriwan long class agree witim datfala idea, Stephanie barava laek for defendim samting wea Bible teachim abaotem diswan. Stephanie garem chance taem teacher askem tingting bilong hem abaotem datwan. Nomata hem seksek fastaem, Stephanie iusim datfala chance for storyim teaching bilong Bible saed long datwan. Hem storyim Exodus 21:22-24 and explainim hao hem rong for killim dae wanfala baby wea no born yet, and wei for killim dae baby insaed bele hem barava no fitim will bilong God.
Datfala teacher, wea hem wanfala bigman long religion, hem nating readim olketa verse hia bifor. Wei wea Stephanie no fraet for witness openem wei for hem storyim plande difren topic wea interesting witim olketa classmate bilong hem. Distaem, wanfala girl long class bilong hem evritaem tekem olketa niu Wastaoa and Wekap!, and nara tufala girl attendim distrik convention bilong Olketa Jehovah’s Witness for lukim Stephanie showimaot dedication bilong hem long God taem hem baptaes.
Vareta wea 6 year and wea stap long Suriname, South America, hem iusim chance wea kamap for praisem God taem teacher bilong hem needim comfort from Bible. Taem teacher bilong hem kam bak long skul bihaen thrifala day wea hem no kam, hem askem olketa student bilong hem sapos olketa savve why hem no kam teach. Olketa sei, “Iu sik, iaman?” Teacher talem olketa, “Nomoa. Sista bilong mi nao hem dae, and mi barava sorre tumas. So iufala no mek noise bikos hed bilong mi soa.”
Long datfala aftanun taem mami bilong hem sleep, Vareta busy for lukluk long title bilong olketa old magasin. Hem lukluk gogo hem faendem Wastaoa bilong July 15, 2001, wea garem title “Waswe, Laef Stap Bihaen Man Dae?” Hem barava hapi tumas, and hem go wekapem mami bilong hem and sei long hem, “Mami, Mami, lukim! Mi faendem wanfala magasin wea storyim dae for teacher bilong mi!” Vareta raetem wanfala leta and sendem witim datfala magasin for teacher bilong hem. Hem raet olsem: “Diswan hem for iu. Long paradaes iu bae lukim moa sista bilong iu bikos Jehovah nating savve laea. Hem promis hem bae givim kam wanfala paradaes, no long heven, bat long earth.” Datfala teacher barava sei thankiu from hem kasem comfort wea kam from Bible taem hem readim datfala magasin.
Mek Redi for Future
Jehovah hem “hapi God,” and hem laekem olketa young wan for hapi. (1 Timothy 1:11) Word bilong hem sei: “Enjoyim young laef bilong iu. Stap hapi taem iu young yet.” (Ecclesiastes 11:9, Today’s English Version) Jehovah savve long samting wea bae kamap long future and hem luksavve long samting wea kamaot from fasin wea gud and nogud. Dastawe, Word bilong hem givim advaes long olketa young wan: “So, rememberim Nambawan Creator bilong iu taem iu young yet, bifor olketa nogud day hem kam, or olketa year wea iu bae sei: “Mi no hapi long olketa.’”—Ecclesiastes 12:1.
Tru nao, Jehovah laekem tumas for olketa young wan enjoyim evribit laef bilong olketa wea datwan hem nambawan present from God. Taem olketa rememberim and praisem God, young pipol savve garem gudfala laef and laef wea mekem man satisfae. Nomata taem olketa kasem hard taem, olketa fit for sei: “Jehovah nao man wea helpem mi.”—Psalm 121:2.
[Footnote]
a Lukim 2005 Calendar of Jehovah’s Witnesses, March/April.
[Blurb long page 9]
“Praisem Jehovah from earth, . . . iufala young man and tu iufala young gele.”—PSALM 148:7, 12
[Box long page 8]
JEHOVAH SAPOTIM OLKETA YOUNG WAN
“Iu nao hope bilong mi, O Sovereign Lord Jehovah, datwan wea mi trustim from taem mi young.”—Psalm 71:5.
“[God] satisfaem full laef bilong iu witim samting wea gud; young laef bilong iu gohed for kamap niu olsem young laef bilong wanfala eagle.”—Psalm 103:5.