“Tekem Kam Gud Nius Abaotem Samting wea Moabeta”

“Samting wea luk naes tumas long olketa maunten nao hem leg bilong datwan . . . wea tekem kam gud nius abaotem samting wea moabeta.”—ISAIAH 52:7.

1, 2. (a) Wanem nao olketa nogud samting wea happen evri day? (b) Hao nao feeling bilong plande pipol taem olketa herem nogud nius olowe?

DISTAEM pipol evriwea long world feel olsem olketa nogud nius hem tumas nao. Olketa onem radio and herem nius abaotem olketa barava nogud sik wea kamap long plande ples and wea killim dae staka pipol. Olketa lukluk long nius long television and lukim olketa pikinini wea hangre and wea singaot for help. Olketa readim long niuspepa abaotem olketa bomb wea bosta long olketa building and wea killim dae staka pipol wea no duim eni rong samting.

² Tru nao, olketa nogud samting hem happen evri day. For sure, disfala world hem gohed for change and kamap worse. (1 Corinthians 7:31) Wanfala nius magasin long Western Europe talem hao samfala taem hem luk olsem full world hem “klosap for finis evribit.” Dastawe iumi minim hao plande pipol distaem barava wari tumas! Toktok bilong wanfala man wea insaed wanfala survey long United States abaotem nius long television hem showimaot feeling bilong plande million pipol taem hem sei: ‘Bihaen mi lukluk long nius, mi barava feel sorre nao. Evri nius hem nogud tumas. Hem mekem iu feel olsem no eni wei nao.’

Nius wea Evriwan Need for Herem

3. (a) Wanem nao gud nius wea Bible talemaot? (b) Why nao iu tinghae long gud nius bilong Kingdom?

³ Long disfala world wea fulap witim nogud samting, waswe, eni gud nius hem stap? Barava nao! Hem comfortim iumi for savve hao Bible talemaot gud nius. Kingdom bilong God bae finisim wei for sik, hangre, criminal fasin, war, and olketa difren kaen wei wea man spoelem narawan. (Psalm 46:9; 72:12) Evriwan need for herem diskaen nius! Iumi Olketa Jehovah’s Witness barava agree long datwan. Dastawe, evriwea long world, pipol savve hao olketa waka hard for sharem gud nius bilong Kingdom bilong God witim pipol bilong evri nation.—Matthew 24:14.

4. Long disfala article and next wan bae iumi lukluk long olketa wanem samting saed long ministry bilong iumi?

⁴ Bat, wanem nao iumi savve duim for mek sure iumi gohed for preachim gud nius long gudfala wei and long wei wea mekem iumi hapi long datwan—nomata long olketa ples wea pipol no interest tumas? (Luke 8:15) Shortfala review long thrifala important samting saed long preaching waka bilong iumi bae helpem iumi for duim datwan. Thrifala hia nao (1) samting wea muvim iumi, wea minim why nao iumi preach; (2) message bilong iumi, wea minim samting iumi preach abaotem; and (3) olketa difren wei wea iumi preach, wea minim hao nao iumi preach. Wei for mek sure stret samting muvim iumi, message bilong iumi hem klia, and for preach long olketa gudfala wei, savve givim olketa didifren pipol long world chance for acceptim best nius wea stap distaem—gud nius bilong Kingdom bilong God.a

Why Iumi Preachim Gud Nius

5. (a) Winim evri samting, wanem nao muvim iumi for duim ministry? (b) Hao nao wei for obeyim datfala komand from Bible for preach hem showimaot iumi lovem God?

⁵ First samting for ting raonem nao, samting wea muvim iumi. Why nao iumi preachim gud nius? Iumi duim for sem reason Jesus duim. Hem sei: “Mi lovem Father.” (John 14:31; Psalm 40:8) Barava important reason nao hem from iumi lovem God. (Matthew 22:37, 38) Bible joinim wei for lovem God witim ministry, from hem sei: “Diswan nao wanem hem minim for lovem God, for iumi obeyim olketa komandment bilong hem.” (1 John 5:3; John 14:21) Waswe, datfala komand for “go and mek disaepol” hem insaed long diswan tu? (Matthew 28:19) Ia. Hem tru, Jesus nao talem datfala komand, bat really datwan kam from Jehovah. Hao nao olsem? Jesus explainim olsem: “Mi nating duim eni samting followim tingting bilong miseleva; bat olsem Father hem teachim mi, mi talemaot olketa samting hia.” (John 8:28; Matthew 17:5) Dastawe, taem iumi obeyim datfala komand for preach, iumi showim long Jehovah hao iumi lovem hem.

6. Hao nao love for God muvim iumi for preach?

⁶ Nara samting, love bilong iumi for Jehovah muvim iumi for preach from iumi laek helpem pipol for savve hao samting wea Satan teachim againstim Jehovah, hem laea nomoa. (2 Corinthians 4:4) Satan kwestinim sapos rul bilong God hem raeteous or nomoa. (Genesis 3:1-5) Iumi Olketa Jehovah’s Witness laek tumas for showimaot hao Satan hem laea, and iumi laek mekhae long nem bilong God front long pipol. (Isaiah 43:10-12) Nara reason iumi duim ministry hem from iumi savve long olketa fasin and wei bilong Jehovah. Iumi fren gud witim hem and iumi garem strongfala feeling for laek talem nara pipol abaotem God bilong iumi. Tru nao, iumi barava hapi long gudfala fasin and olketa raeteous wei bilong Jehovah and diswan muvim iumi for story abaotem hem evritaem. (Psalm 145:7-12) Iumi laekem tumas for praisem hem and for storyim “olketa nambawan fasin” bilong hem long eniwan wea willing for lisin.—1 Peter 2:9; Isaiah 43:21.

7. Witim love for God, wanem nao nara important reason iumi duim preaching waka?

⁷ Nara important reason stap why iumi gohed long ministry: Iumi barava laek for helpem pipol wea wari tumas from staka nogud nius wea olketa herem, and olketa wea safa long olketa difren wei. Long diswan iumi duim best for followim example bilong Jesus. Olsem example, lukluk long samting wea Mark chapter 6 storyim.

8. Datfala story long Mark chapter 6 showimaot wanem samting abaotem feeling bilong Jesus for pipol?

⁸ Olketa aposol kam bak from preaching bilong olketa and talem Jesus evri samting wea olketa duim and teachim. Jesus lukim hao olketa aposol taed, and hem talem olketa for kam witim hem for “rest lelebet.” So olketa go insaed wanfala boat for go long wanfala kwaet ples. Bat pipol ran followim sandbis and kwiktaem kasem olketa. Wanem nao Jesus duim? Scripture hem sei: “Hem lukim staka pipol, bat hem barava feel sorre long olketa, from olketa olsem sheep wea no garem shepherd. And hem start for teachim plande samting long olketa.” (Mark 6:31-34) Nomata hem taed, wei wea hem feel sorre for olketa muvim Jesus for gohed sharem gud nius. Tru nao, Jesus barava tingim and garem love for olketa pipol hia. Hem kea for olketa.

9. Wanem nao iumi lanem from Mark chapter 6 abaotem reason why iumi preach?

⁹ Wanem nao iumi lanem from diswan? From iumi olketa Christian, iumi garem responsibility for preachim gud nius and mek disaepol. Iumi feel olsem iumi garem responsibility for talemaot gud nius long pipol, bikos hem will bilong God for “evri difren kaen man mas sev.” (1 Timothy 2:4) Bat, iumi ting long ministry bilong iumi no olsem wanfala responsibility nomoa, bat olsem wanfala waka wea showimaot iumi kea. Sapos iumi garem fasin for kea for pipol olsem Jesus, heart bilong iumi bae muvim iumi for duim best for gohed sharem gud nius witim olketa. (Matthew 22:39) Tru nao, taem stretfala samting muvim iumi for duim ministry, diswan bae muvim iumi for no givap long waka for preachim gud nius.

Message Bilong Iumi—Gud Nius Bilong Kingdom Bilong God

10, 11. (a) Hao nao Isaiah storyim message wea iumi preachim? (b) Hao nao Jesus tekem kam gud nius abaotem samting wea moabeta, and hao nao olketa servant bilong God distaem followim example bilong Jesus?

¹⁰ Waswe long mek-tu important samting saed long ministry bilong iumi—message bilong iumi? Wanem nao iumi preachim? Profet Isaiah storyim message wea iumi preachim long naesfala wei olsem: “Samting wea luk naes tumas long olketa maunten nao hem leg bilong datwan wea tekem kam gud nius, datwan wea talemaot peace, datwan wea tekem kam gud nius abaotem samting wea moabeta, datwan wea talemaot salvation, datwan wea sei long Zion: ‘God bilong iu hem kamap king!’”—Isaiah 52:7.

¹¹ Datfala important toktok, “God bilong iu hem kamap king,” insaed scripture hia, hem mekem iumi tingim datfala message wea iumi mas talemaot, hem nao, gud nius bilong Kingdom bilong God. (Mark 13:10) Lukim tu, hao datfala scripture hem showimaot theme bilong message bilong iumi. Isaiah iusim olketa toktok olsem “salvation,” “gud nius,” “peace,” and “samting wea moabeta.” Plande handred year bihaen long Isaiah, long first century C.E., Jesus Christ fulfillim disfala profesi long nambawan wei taem hem showimaot example for strong for talemaot gud nius abaotem samting wea moabeta—datfala Kingdom bilong God wea bae kam. (Luke 4:43) Distaem, especially start kam long 1919, Olketa Jehovah’s Witness followim example bilong Jesus long wei for strong for talemaot gud nius bilong Kingdom bilong God wea start for rul finis and olketa blessing wea bae kam from datwan.

12. Hao nao gud nius bilong Kingdom affectim olketa wea acceptim datwan?

¹² Hao nao gud nius bilong Kingdom hem affectim olketa wea acceptim datwan? Distaem, olsem long taem bilong Jesus, gud nius givim hope and comfort. (Romans 12:12; 15:4) Hem givim hope long olketa wea garem honest heart bikos olketa lane hao olketa gudfala reason stap for biliv future bae moabeta. (Matthew 6:9, 10; 2 Peter 3:13) Hope wea disfala promis givim hem barava helpem olketa wea fraet long God gohed for feel sure abaotem future. Man for raetem psalm talem hao olketa ‘bae no fraet long nogud nius.’—Psalm 112:1, 7.

Message wea Bae “Bandagem Olketa Pipol wea Feel Sorre”

13. Hao nao profet Isaiah storyim olketa blessing wea olketa wea acceptim gud nius kasem stretawe?

¹³ Nara samting, olketa wea acceptim gud nius wea iumi preachim kasem comfort and olketa blessing stretawe. Hao nao olsem? Isaiah storyim samfala long olketa blessing hia taem hem sei: “Spirit bilong Sovereign Lord Jehovah hem stap long mi, from Jehovah hem anointim mi for talemaot gud nius long olketa wea hambol. Hem sendem mi for bandagem olketa pipol wea feel sorre, for talemaot freedom long olketa wea stap long prison and for openem eye bilong olketa; for preach abaotem year for showaot favor bilong Jehovah and day for pei bak bilong God bilong iumi; for comfortim evriwan wea feel sorre.”—Isaiah 61:1, 2; Luke 4:16-21.

14. (a) Wanem nao datfala toktok “bandagem olketa pipol wea feel sorre” hem showimaot abaotem Kingdom message? (b) Hao nao iumi showimaot sem wei for kea long pipol olsem Jehovah?

¹⁴ Datfala profesi talem hao taem Jesus preachim gud nius, hem “bandagem olketa pipol wea feel sorre.” Isaiah iusim tokpiksa wea garem bigfala mining! Wanfala Bible dictionary talem hao plande taem datfala Hebrew word wea olketa transleitim “bandagem,” hem minim wei for givim medicine and healim man wea garekil. Kaenfala nurse savve putim bandage or dressing raonem part long body bilong man wea garekil for sapotim datwan. Olsem tu, taem olketa pablisa wea kea for pipol preachim Kingdom message, olketa givim sapot long olketa wea garekil long physical wei, saed long feeling, and long spiritual saed. Taem olketa sapotim olketa wea garem need olsem, olketa showimaot sem fasin for kea olsem Jehovah. (Ezekiel 34:15, 16) Man for raetem psalm hem sei olsem abaotem God: “Hem healim olketa wea feel sorre tumas, and bandagem olketa garekil bilong olketa.”—Psalm 147:3.

Wei wea Kingdom Message Helpem Pipol

15, 16. Wanem nao samfala example wea showimaot hao Kingdom message sapotim and strongim pipol wea garem need?

¹⁵ Plande example showimaot hao Kingdom message barava sapotim and strongim olketa wea feel sorre. Tingim Oreanna, wanfala olo woman long South America wea sorre fogud and laek dae nomoa. Wanfala Jehovah’s Witness start for visitim Oreanna and read long hem from Bible and datfala buk Bible Story Buk Bilong Mi.b Fastaem, disfala woman leidaon long bed witim eye sat and lisin nomoa, and samfala taem hem brith big. Bat, no longtaem bihaen, hem start for sidaon long bed taem sista read long hem. Gogo, hem sidaon long chair for weitim Bible teacher bilong hem. Next samting, datfala woman start for attendim olketa Christian meeting long Kingdom Hall. From hem kasem encouragement from samting hem lanem long olketa meeting hia, hem start for offerim Bible literature long eniwan wea go pas long haos bilong hem. Then, taem hem 93 year, Oreanna hem baptaes olsem wanfala Jehovah’s Witness. Datfala Kingdom message mekem hem barava lusim datfala feeling for laek dae.—Proverbs 15:30; 16:24.

¹⁶ Kingdom message barava sapotim tu olketa wea savve olketa bae dae from sik wea no savve finis. Example bilong diswan hem Maria from Western Europe. Hem garem wanfala sik olsem and hem barava lus hope nao. Long taem wea hem barava sorre tumas, hem meetim Olketa Jehovah’s Witness. Bat, taem hem lane abaotem olketa plan bilong God, laef bilong hem garem mining moa. Hem baptaes and kamap barava busy long preaching waka. Long last tufala year bifor hem dae, feis bilong hem barava showimaot hem garem hope and hem hapi. Maria dae witim strongfala hope long resurrection.—Romans 8:38, 39.

17. (a) Hao nao Kingdom message hem barava affectim laef bilong olketa wea acceptim datwan? (b) Wanem help nao iuseleva kasem wea mekem iu luksavve Jehovah hem “liftimap evriwan wea feel wikdaon”?

¹⁷ Olketa experience olsem showimaot hao Kingdom message savve barava affectim laef bilong pipol wea luk aotem truth from Bible. Pipol wea sorre from samwan olketa lovem hem dae, kasem bak strong taem olketa lane abaotem resurrection hope. (1 Thessalonians 4:13) Pipol wea poor and stragol for feedim famili bilong olketa kasem niu strong and feeling for no givap taem olketa lanem hao Jehovah bae nating lusim olketa sapos olketa loyal long hem. (Psalm 37:28) Thru long help wea Jehovah givim, plande pipol wea garem sorre feeling wea no savve finis isisi kasem strong wea olketa needim for start for feel gud moa, and samfala winim datfala sik nao. (Psalm 40:1, 2) Tru nao, from strong wea Jehovah givim thru long Word bilong hem, nomata distaem, Jehovah “liftimap evriwan wea feel wikdaon.” (Psalm 145:14) Taem iumi lukim hao datfala gud nius bilong Kingdom comfortim olketa wea safa long territory and long Christian kongregeson, hem remindim iumi evritaem hao iumi garem best nius!—Psalm 51:17.

“Samting Mi Barava Askem God for Givim Long Olketa”

18. Taem olketa Jew rejectim gud nius, hao nao datwan affectim Paul, and why nao olsem?

¹⁸ Nomata message bilong iumi hem barava best nius, plande pipol rejectim datwan. Hao nao maet diswan affectim iumi? Long sem wei wea hem affectim aposol Paul. Plande taem hem preach long olketa Jew, bat klosap evriwan long olketa rejectim datfala message abaotem salvation. Diswan barava affectim Paul. Hem sei: “Mi feelim bigfala sorre and pain wea no savve finis insaed long heart bilong mi.” (Romans 9:2) Paul barava kea for olketa Jew wea hem preach long olketa. Hem feel sorre taem olketa rejectim gud nius.

19. (a) Why nao maet iumi feel wikdaon samfala taem? (b) Wanem nao helpem Paul for gohed long preaching waka bilong hem?

¹⁹ Iumi tu preachim gud nius bikos iumi kea for pipol. Dastawe maet iumi feel wikdaon taem plande pipol rejectim datfala Kingdom message. Feeling olsem showimaot iumi barava interest long spiritual saed bilong pipol wea iumi preach long olketa. Bat, hem gud for iumi no forgetim example bilong aposol Paul. Wanem nao helpem hem gohed long preaching waka bilong hem? Nomata hem feel barava sorre from olketa Jew rejectim gud nius, Paul no givap and tingse hem iusles nao for trae helpem eni wan wea hem Jew. Hem no lus hope hao samfala bae acceptim Christ. Dastawe, Paul sei olsem abaotem feeling bilong hem for olketa Jew wanwan: “Samting wea heart bilong mi laekem tumas and samting mi barava askem God for givim long olketa, hem nao salvation.”—Romans 10:1.

20, 21. (a) Hao nao iumi savve followim example bilong Paul saed long ministry bilong iumi? (b) Wanem nao bae iumi storyim abaotem ministry bilong iumi long nextfala article?

²⁰ Lukim tufala samting wea Paul mekhae long hem. Hem laekem tumas for maet amfala kasem salvation, and hem prea strong long God saed long datwan. Distaem, iumi followim example bilong Paul. Iumi laekem tumas for faendem eniwan wea maet acceptim datfala gud nius. Iumi gohed for prea long Jehovah for iumi faendem olketa hia, mekem iumi savve helpem olketa for duim samting wea bae lead go long salvation bilong olketa.—Proverbs 11:30; Ezekiel 33:11; John 6:44.

²¹ Nomata olsem, for sharem Kingdom message witim staka pipol, iumi need for no just lukluk gud long why nao iumi preach and samting iumi preach abaotem, bat hao nao iumi preach tu. Bae iumi storyim disfala subject long nextfala article.

[Olketa Footnote]

Wanem Nao Iu Lanem?

• Why nao iumi duim ministry?

• Wanem nao main message wea iumi preachim?

• Olketa wea acceptim Kingdom message kasem olketa wanem blessing?

• Wanem nao bae helpem iumi gohed long ministry bilong iumi?

[Olketa Piksa long page 18]

Kingdom message strongim olketa wea feel sorre

[Olketa Piksa long page 20]

Prea helpem iumi no givap for duim ministry bilong iumi