Long Sea Bilong Galilee
MARK 4:35-41 story abaotem taem wea Jesus and olketa disaepol bilong hem go insaed wanfala boat for katkros long Sea Bilong Galilee. Hem sei: “Wanfala big wind kamap and olketa wave gohed for kam insaed long boat, gogo, boat klosap kapsaet. Bat [Jesus] hem sleep long [datfala] pillow andanit long deck bihaen long boat.”
Hem nomoa ples insaed long Bible wea datfala word long Greek languis for pillow hem stap. Dastawe, olketa savveman no savve long barava mining bilong disfala word wea olketa iusim long hia. Staka Bible iusim “pillow” for datfala word. Bat wanem nao datfala pillow? Wei wea Mark sei datfala pillow, mekem hem luk olsem datwan hem samting for iusim long boat. Wanfala boat wea olketa faendem klosap long Sea Bilong Galilee long 1986 hem showimaot maet wanfala mining for Greek word wea Mark iusim.
Olketa wea duim research faendemaot hao datfala boat hem 8 meter long, and hem garem olketa bigfala padol and olketa sail. Hem wanfala boat for fishing and hem garem wanfala deck long bihaen for keepim bigfala hevi net for fishing. Date wea olketa tingse olketa iusim disfala boat hem midolwan 100 B.C.E. and 70 C.E., and maet hem semkaen boat wea Jesus and olketa disaepol bilong hem iusim tu. Shelley Wachsmann wea insaed grup wea digim olketa pis bilong boat hia from graon, hem raetem buk wea nem bilong hem The Sea of Galilee Boat—An Extraordinary 2000 Year Old Discovery. Hem sei maet datfala “pillow” wea Jesus sleep antap hem bag sandbis for mekem boat stedy. Wanfala fisherman from Jaffa wea savve tumas long wei for fishing long bigfala net hem sei: “Taem mi young, olketa boat wea mi waka long hem insaed Mediterranean, olketa mas tekem wan or tufala bag sandbis. . . . Olketa bag hia stap insaed long boat for mekem hem hevi and balance. Bat taem mifala no iusim, mifala putim andanit deck bihaen long boat. Then, sapos eniwan hem taed, hem krol go andanit deck for sleep and iusim datfala bag sandbis olsem pillow.”
Staka savveman sei samting wea Mark talem hem minim Jesus hem sleep antap wanfala bag sandbis andanit long deck bihaen long boat, from hem nomoa ples wea drae lelebet taem sea hem raf. Nomata iumi no barava sure wanem nao datfala pillow, important point nao hem samting wea happen bihaen. Jesus mekem datfala raf sea for kwaet witim help and paoa bilong God. Nomata olketa disaepol tu, olketa ask olsem: “Disfala man hem hu ia, bikos nomata wind and sea bat obeyim hem tu?”