Armageddon—Waswe, Hem Nogud Samting wea Bae Distroem World?
ARMAGEDDON! Waswe, disfala word mekem iu tingim wei wea staka pipol bae dae or fire wea bae bonem full universe? Long plande kantri, pipol iusim disfala word “Armageddon” winim eni nara word long Bible. Pipol iusim datfala word for storyim olketa nogud samting wea bae kasem olketa man. Olketa movie, television, and video fulimap mind bilong pipol witim olketa barava nogud samting wea bae happen long wanfala “Armageddon.” Pipol no minim datfala word and garem rong tingting abaotem datwan. Nomata plande idea kamap abaotem Armageddon, plande long olketa idea hia no followim Bible, wea hem nao ples wea datfala word hem kam from.
From Bible showimaot Armageddon hem join witim “end bilong world,” waswe, iu agree hao hem important for savve gud wanem nao really mining bilong datfala word? (Matthew 24:3) For faendem ansa abaotem wanem nao Armageddon and hao hem affectim iu and famili bilong iu, hem bae barava fitim for iumi luk long Word bilong God wea teachim truth abaotem datfala word!
Wei for duim olsem bae showimaot hao Armageddon hem no wanfala nogud samting wea bae distroem world, bat hem start bilong wanfala hapi samting for pipol wea laek for stap and garem gudfala laef long wanfala raeteous niu world. Long nextfala article, iu bae kasem kliafala mining bilong disfala important truth wea kam from Bible taem iu lukluk gud long really minim bilong Armageddon.
[Box/Piksa long page 3]
IU TINGSE WANEM NAO ARMAGEDDON?
• Wanfala nuclear war
• Wanfala disaster wea kamap from environment
• Wanfala samting from space wea bangam earth
• Wei wea God distroem olketa wea wicked