Duim Samting Followim Will Bilong God Distaem
“[Christ] hem dae for evriwan mekem olketa wea laef savve iusim laef bilong olketa for no duim nomoa samting olketa seleva nao laekem.”—2 CORINTHIANS 5:15.
1. Storyim experience bilong wanfala missionary long assignment bilong hem.
WANFALA missionary wea nem bilong hem Aaron hem sei: “Bihaen war hem finis, trak bilong mifala nao first trak wea no bilong army for kasem wanfala vilij long Africa wea farawe long bush.a War hem mekem hem hard for mifala sendem message or for kasem datfala smol kongregeson long there, and mifala need for tekem olketa samting wea olketa brata needim. Mifala tekem kaikai, kaleko, and olketa Bible pablikeson, and tu, datfala video Jehovah’s Witnesses—The Organization Behind the Name.b From staka tumas kam for lukim datfala video wea mifala showim insaed long wanfala big leaf haos, mifala mas showim datwan tufala taem. Bihaen long datwan, staka acceptim Bible study. Nomata hem no isi for mifala kasem datfala ples, barava gud samting nao kamaot from datwan.”
2. (a) Why nao olketa Christian disaed for iusim laef bilong olketa for servem God? (b) Wanem nao olketa kwestin wea iumi bae storyim?
2 Why nao Aaron and olketa nara brata acceptim disfala assignment nomata hem no isi? Hem bikos olketa tinghae long ransom sakrifaes bilong Jesus Christ, olketa dedicate long God, and laek iusim laef bilong olketa for duim will bilong Hem. Olketa Christian wea dedicate finis laek for duim sem samting olsem olketa. Olketa disaed strong “no for duim nomoa samting olketa seleva nao laekem” bat for duim evri samting olketa savve duim “for saed bilong gud nius.” (2 Corinthians 5:15; 1 Corinthians 9:23) Olketa savve hao taem disfala world hem finis, selen and bignem wea pipol garem bae iusles nomoa. So from olketa laef and garem gudfala health, olketa laek for iusim diswan for duim will bilong God. (Ecclesiastes 12:1) Hao nao iumi savve duim diswan? Hao nao bae iumi kasem strong and fasin for no fraet for duim olsem? And wanem nao olketa privilege wea iumi savve kasem?
Duim Samting wea Bae Helpem Iu for Muv Ahed
3. For duim will bilong God, wanem nao olketa first samting wea iumi mas duim?
3 For duim will bilong God hem samting wea olketa tru Christian duim for full laef bilong olketa. Firstaem iumi joinim Theocratic Ministry Skul, readim Bible evriday, share long preaching waka, and duim olketa samting wea lead go for iumi baptaes. Taem iumi duim olsem, iumi tingim toktok bilong aposol Paul wea sei: “Ting raonem evri samting hia; tingting strong long olketa, mekem wei wea iu muv ahed savve showaot klia long evriwan.” (1 Timothy 4:15) Wei wea iumi muv ahed hem no for mekem pipol tinghae long iumi, bat hem showimaot hao iumi no selfish and iumi disaed strong for duim will bilong God. Wei for duim olsem hem showimaot iumi letem God leadim iumi long evri samting wea iumi duim from God nao best wan for duim olsem.—Psalm 32:8.
4. Wanem nao iumi savve duim for aotem eni feeling for wari?
4 Bat wei for hol bak or for tingim seleva nomoa savve stopem iumi for muv ahed for servem God. (Ecclesiastes 11:4) So for iumi hapi taem iumi servem God and helpem olketa narawan, maet firstaem iumi need for aotem eni feeling for wari. Olsem example, Erik hem laek for muv long kongregeson wea iusim difren languis. Bat hem wari and ting olsem: ‘Waswe, bae olketa long datfala kongregeson acceptim mi? Bae mi laekem olketa brata? Bae olketa laekem mi?’ Hem sei: “Gogo, mi luksavve hao mi mas tingim olketa brata, no miseleva. Mi disaed bae mi no wari, bat bae mi tingim nomoa wei wea mi savve helpem olketa narawan. Mi prea for Jehovah helpem mi and mi muv long datfala kongregeson. Distaem mi barava enjoyim wei for serve long there.” (Romans 4:20) Tru tumas, taem iumi willing for duim moa samting for servem God and helpem narawan, bae iumi satisfae and barava hapi long laef.
5. Why nao iumi need for plan gud for aftarem will bilong God? Storyim wanfala example.
5 For aftarem will bilong God iumi mas plan gud tu. Hem wise for iumi no garem staka kaon wea savve mekem iumi kamap olsem slave long disfala world and wea mekem iumi no garem staka taem for duim waka wea God laekem iumi for duim. Bible remindim iumi olsem: “Man wea garem kaon hem servant bilong man wea givim datfala kaon long hem.” (Proverbs 22:7) Wei for trust long Jehovah and aftarem olketa spiritual samting firstaem hem evritaem helpem iumi for luksavve long samting wea barava important. Olsem example, Guoming and tufala sista bilong hem stap witim mami bilong olketa long ples wea hem kostim staka selen for rentim or ownim wanfala haos and hem no isi for faendem gudfala waka. Nomata long taem wea samfala long olketa nomoa waka, olketa iusim selen wea olketa garem long wisefala wei and evritaem olketa kasem need bilong olketa. Guoming hem sei: “Samfala taem, no evriwan long mifala garem waka for selen. Nomata olsem, mifala gohed long pioneer ministry and lukaftarem mami tu. Mifala hapi Mami no laekem mifala for finis for duim pioneer waka and olketa nara samting long kongregeson mekem mifala provaedem staka material samting for hem.”—2 Corinthians 12:14; Hebrews 13:5.
6. Wanem example nao showimaot hao iumi savve changem samfala samting long laef for duim will bilong God?
6 Sapos iu barava busy for aftarem selen or olketa nara samting, maet iu need for changem staka samting mekem iu savve duim will bilong God firstaem. Maet iu no savve changem staka samting kwiktaem, and maet iu duim samfala mistek taem iu trae for mekem olketa change. Nomata olsem, diswan no minim iu fail nao. Tingim Koichi wea iusim staka taem for hapitaem. Koichi hem studyim Bible taem hem teenager, bat for staka year, main samting wea hem gohed for duim hem for pleim olketa video game. Wanday Koichi sei long hemseleva: ‘Mi hao ia? Mi 30 year finis bat mi nating duim eni gud samting long laef bilong mi!’ Koichi start for studyim Bible moa and acceptim help from olketa insaed long kongregeson. Nomata hem no savve change kwiktaem, hem no givap. Thru long wei for prea and encouragement wea hem kasem from olketa narawan, gogo, hem winim problem bilong hem. (Luke 11:9) Distaem Koichi hem hapi for serve olsem ministerial servant.
Lane for Balance
7. Why nao iumi mas balance taem iumi duim waka bilong God?
7 Iumi shud duim best bilong iumi taem iumi aftarem will bilong God. Iumi shud no hol bak or lesy for duim datwan. (Hebrews 6:11, 12) Nomata olsem, Jehovah no laekem iumi for barava ova tumas for duim samting for hem, gogo, iumi taed saed long body, tingting, or feeling. Wei for luksavve iumi needim strong bilong Jehovah for duim waka bilong hem savve givim glory long God, and tu, hem showimaot iumi balance. (1 Peter 4:11) Jehovah promis for strongim iumi for duim will bilong hem, bat iumi mas balance and no trae for duim olketa samting wea hem no askem iumi for duim. (2 Corinthians 4:7) Iumi need for iusim taem and strong bilong iumi long wisefala wei mekem iumi savve gohed for servem God and no taed.
8. Wanem nao happen long wanfala young Christian wea trae for duim best bilong hem for Jehovah and for disfala world, and wanem nao hem duim for changem datwan?
8 Tingim example bilong Ji Hye, wanfala sista wea stap long East Asia. Hem duim waka for tufala year wea tekem tumas taem and strong bilong hem and long semtaem hem gohed for pioneer. Hem sei: “Mi trae for duim best bilong mi long waka wea mi duim for Jehovah and waka for selen, bat evri naet mi savve sleep faevfala hour nomoa. Gogo, from mi taed tumas, mi no ting strong long truth and mi no kasem hapi from olketa samting wea mi duim for Jehovah.” So Ji Hye hem lukaotem difren waka mekem hem servem Jehovah witim ‘full heart, soul, mind, and strong’ bilong hem. (Mark 12:30) Hem sei: “Nomata mi kasem hevi from famili bilong mi for garem waka wea mekem mi savve kasem staka selen, mi trae hard for putim will bilong God firstaem. Mi kasem inaf selen fitim need bilong mi, olsem for peim gudfala kaleko. And mi feel gud from mi savve sleep gud long naet! Mi kasem hapi long ministry and distaem mi barava fren gud witim Jehovah. Datwan hem bikos mi no letem olketa samting long world for switim and pullim mi go difren.”—Ecclesiastes 4:6; Matthew 6:24, 28-30.
9. Hao nao waka wea iumi duim savve affectim pipol?
9 No evriwan savve servem God long wei for preach full taem. Sapos iu olo, health bilong iu nogud, or olketa nara samting stopem iu for duim datwan, Jehovah hem tinghae long faithful fasin bilong iu and wei wea iu duim best bilong iu for servem hem. (Luke 21:2, 3) And tu, no eniwan long iumi shud tingim hao no eni gud samting savve kamaot from waka wea iumi duim for servem God. Olsem example, tingim sapos iumi duim preaching waka and iumi meetim samfala pipol nomoa and olketa no interest long message wea iumi talem. Bihaen iumi go, maet olketa story abaotem visit bilong iumi for staka hour or day, and maet olketa wea stap long haos bat no openem door for story witim iumi duim olsem tu! Iumi savve staka wea herem message abaotem gud nius bae no acceptim datwan, bat samfala bae acceptim. (Matthew 13:19-23) Maet taem samting happen long world or laef bilong olketa change, datwan muvim olketa for lisin. Nomata pipol interest or nomoa taem iumi duim ministry, iumi duim waka wea God laekem iumi for duim. Iumi “pipol wea waka witim God.”—1 Corinthians 3:9.
10. Iumi evriwan long kongregeson savve duim wanem?
10 Iumi evriwan tu savve helpem famili bilong iumi and olketa brata and sista insaed Christian kongregeson. (Galatians 6:10) Gudfala example wea iumi showimaot savve barava affectim and helpem olketa narawan. (Ecclesiastes 11:1, 6) Taem olketa elder and ministerial servant duim gud waka wea olketa duim insaed long kongregeson, datwan helpem olketa long kongregeson for fren gud witim Jehovah and duim moa samting for servem hem. Jehovah promisim hao taem iumi garem “staka samting for duim long waka bilong Lord,” iumi “no hard waka nating.”—1 Corinthians 15:58.
Duim Will Bilong God Full Taem
11. Wanem nao samfala nara privilege wea maet iumi savve kasem?
11 Iumi olketa Christian enjoyim laef and laek for givim glory long God long evri samting wea iumi duim. (1 Corinthians 10:31) Taem iumi faithful for preachim gud nius abaotem Kingdom and teachim olketa narawan for followim evri samting wea Jesus talem, iumi savve kasem olketa difren privilege for servem God wea mekem iumi hapi. (Matthew 24:14; 28:19, 20) Iumi savve waka witim kongregeson wea iumi stap, bat maet iumi garem chance tu for serve long nara ples or kantri wea needim olketa Bible teacher, or long kongregeson wea iusim difren languis. Olketa elder and ministerial servant wea no marit and wea fit maet kasem invitation for attendim Ministerial Training Skul, and bihaen datwan serve long olketa kongregeson long kantri wea olketa stap or long nara kantri wea needim help from olketa Christian wea mature long spiritual wei. Olketa wea marit wea duim ministry full taem maet fit for attendim Gilead Skul for kasem training for kamap missionary and serve long nara kantri. And evritaem organization bilong Jehovah needim olketa volunteer tu for duim olketa difren waka long Bethel and for buildim olketa Kingdom Hall and branch office.
12, 13. (a) Wanem nao hem gud for iu duim sapos iu laek for kasem wanfala privilege? (b) Storyim hao savve wea man kasem from wanfala assignment savve helpem hem long nara assignment.
12 Wanem privilege nao hem gud for iu aftarem? From iu wanfala servant bilong Jehovah wea dedicate finis, depend evritaem long hem and organization bilong hem for leadim iu. “Gudfala spirit” bilong hem bae helpem iu for disaedem samting wea stret. (Nehemiah 9:20) Plande taem, assignment wea iumi kasem hem trainim iumi for duim nara assignment, and savve wea iumi kasem from datfala assignment maet helpem iumi long difren kaen assignment wea iumi kasem bihaen.
13 Olsem example, Dennis and waef bilong hem Jenny volunteer evritaem for buildim olketa Kingdom Hall. Bihaen bigfala cyclone wea nem bilong hem Hurricane Katrina kasem south part long United States, olketa volunteer for helpem olketa wea garem need. Dennis hem sei: “Mifala barava hapi for iusim datfala savve wea mifala kasem taem mifala buildim olketa Kingdom Hall for fixim olketa haos bilong olketa brata. Olketa wea mifala helpem tinghae long help wea olketa kasem and datwan mekem mifala hapi tumas. Staka nara organization long world wea duim relief waka fixim samfala samting nomoa. Olketa Jehovah’s Witness fixim and buildim winim 5,300 haos and staka Kingdom Hall. Pipol lukim diswan and distaem olketa lelebet interest long message abaotem Kingdom.”
14. Wanem nao iu savve duim sapos iu laek for duim full-taem ministry?
14 Waswe, iu savve aftarem will bilong God long wei for duim full-taem ministry? Bae iu kasem staka blessing sapos iu duim olsem. Sapos iu no fit for duim from living bilong iu distaem stopem iu, maet iu savve changem samfala samting mekem iu savve duim datwan. Prea olsem Nehemiah taem hem laek for duim wanfala important assignment. Hem prea olsem: “Plis Jehovah, . . . mekem servant bilong iu win long samting wea hem laek for duim.” (Nehemiah 1:11) Then trust long “Datwan wea herem prea” and duim samting followim prea bilong iu. (Psalm 65:2) Iu mas changem samfala samting firstaem bifor Jehovah hem blessim wei wea iu laek for duim moa samting for servem hem. Taem iu disaed for duim ministry full taem, duim datwan. Gogo, bae iu kasem moa savve and datwan bae mekem iu barava hapi winim bifor.
Laef wea Mekem Iu Satisfae
15. (a) Hao nao wei for story witim olketa wea worshipim God for longfala taem finis and for readim olketa laef story savve helpem iumi? (b) Storyim wanfala laef story wea barava encouragem iu.
15 Wanem gud samting nao iu savve kasem taem iu aftarem will bilong God? Story witim olketa wea worshipim Jehovah for longfala taem finis, especially olketa wea duim full-taem ministry for staka year. Samting wea olketa duim barava mekem olketa satisfae! (Proverbs 10:22) Olketa bae storyim hao Jehovah hem evritaem helpem olketa for kasem samting wea olketa needim and staka nara samting tu, nomata long olketa taem wea hem hard. (Philippians 4:11-13) For staka year finis, The Watchtower pablisim plande laef story abaotem olketa faithful brata and sista. Wei wea olketa brata and sista hia hapi and strong for duim preaching waka mekem iumi tingim feeling wea olketa Christian long first century garem wea Bible buk bilong Acts hem storyim. Taem iu readim olketa interesting story olsem, datwan bae muvim iu for sei, ‘Datkaen laef nao mi laekem!’
16. Wanem nao mekem wanfala Christian hapi and satisfae long laef?
16 Aaron, wea iumi storyim long start bilong disfala article hem sei: “Long Africa, plande taem mi meetim olketa young wan wea go evriwea long kantri for lukaotem samting wea bae mekem olketa satisfae long laef. Staka no faendem datwan. Bat mifala aftarem will bilong God long wei for talemaot gud nius abaotem Kingdom, and mifala satisfae long laef. Mifala savve finis hao moa hapi hem kamaot from wei for givim samting winim wei for kasem samting.”—Acts 20:35.
17. Why nao iumi mas aftarem will bilong God distaem?
17 Waswe long iu? Wanem nao goal bilong iu long laef? Sapos iu no garem goal wea bae helpem iu for aftarem will bilong God, olketa nara samting long laef bae mekem iu busy tumas. No weistim laef bilong iu long olketa samting long world bilong Satan wea no important! Klosap nao datfala “big trabol” bae happen, and olketa material riches and bignem wea pipol garem long world bae iusles nomoa. Samting wea bae important long datfala taem hem wei wea iumi fren gud witim Jehovah. Bae iumi barava hapi from iumi disaed for servem God and helpem olketa narawan and wei wea iumi aftarem will bilong God long laef bilong iumi!—Matthew 24:21; Revelation 7:14, 15.
[Olketa Footnote]
a Mifala changem samfala nem.
b Olketa Jehovah’s Witness pablisim.
Waswe, Iu Savve Explainim?
• Hao nao Jehovah ting long samting wea iumi duim for hem?
• Hao nao wei for iusim gudfala tingting and balance helpem iumi for servem God and helpem olketa narawan?
• Wanem nao samfala privilege wea iumi savve kasem?
• Wanem nao iumi savve duim for garem laef wea mekem iumi satisfae distaem?
[Piksa long page 25]
Iumi mas balance mekem iumi gohed for duim best bilong iumi for servem Jehovah
[Piksa long page 26]
Plande difren wei stap for servem God