Hapi Long Marit Bilong Iu
“Wisdom bae mekem wanfala famili kamap strong, and fasin for luksavve bae mekem hem barava stap strong.”—PROV. 24:3.
1. Wanem nao God duim wea showimaot hem wise?
DADI bilong iumi long heven hem wise and hem savve wanem nao bae helpem iumi. Olsem example, God luksavve hao plan bilong Hem bae no gohed sapos “man seleva nomoa stap” long garden bilong Eden. Wanfala important samting for mekem datfala plan gohed hem for olketa wea marit for garem pikinini and “fulimap earth.”—Gen. 1:28; 2:18.
2. Wanem nao Jehovah hem startim wea helpem olketa man?
2 Jehovah hem sei: “Mi bae wakem wanfala helper for man hia wea barava fitim hem.” So God mekem firstfala man for deep sleep, and then Hem aotem wanfala bon from perfect body bilong man hia and Hem wakem wanfala woman. Taem Jehovah tekem disfala woman Eve kam long Adam, Adam hem sei: “Hem nao bon wea kamaot long bon bilong mi and body wea kamaot long body bilong mi. Nem bilong hem Woman, from hem kam from man.” Eve hem barava fitim Adam. Nomata wei bilong tufala hem difren from narawan, tufala perfect and garem semkaen fasin olsem God. Jehovah nao startim datfala first marit. Adam and Eve hapi long disfala plan bilong God for tufala stap tugeta for helpem narawan.—Gen. 1:27; 2:21-23.
3. Wanem nao tingting bilong plande pipol long marit, and diswan mekem iumi askem olketa wanem kwestin?
3 Bat sorre samting nao, plande pipol long world distaem olketa bighed. Olketa problem wea kamaot from diswan hem no kam from God. Staka ting daonem marit, wea hem present from God, and tingse hem samting wea no fitim taem bilong iumi, wea mekem man feel nogud or kosim raoa nomoa. Plande long olketa wea marit olketa divorce. Maet dadi and mami no showim love long pikinini and iusim pikinini for kasem samting wea olketa seleva laekem. Nomata for helpem famili stap gud bat staka dadi and mami no willing for lisin long narawan tu. (2 Tim. 3:3) So hao nao man savve hapi long marit bilong hem long disfala taem wea hard tumas? Hao nao wei for waka tugeta and followim samting wea Jehovah talem savve helpem marit for no brekdaon? Wanem nao iumi savve lanem from samfala hasband and waef distaem wea hapi long marit bilong olketa?
Followim Evri Samting wea Jehovah Talem
4. (a) Wanem nao Paul hem talem abaotem marit? (b) Wanem nao olketa Christian duim for followim toktok bilong Paul?
4 Aposol Paul talem olketa widow woman hao sapos olketa laek marit moa, olketa mas maritim nomoa man “wea followim Lord.” (1 Cor. 7:39) Samting wea Paul talem hem no niu samting long olketa Jew wea kamap Christian. Law wea God givim long Israel hem talem olketa for “no maritim” eniwan long olketa nation wea stap raonem olketa wea no worshipim God. Jehovah talem nogud samting wea bae kamaot from wei for no obeyim disfala law bilong hem. Hem sei: “Bikos [man wea no Israelite] bae stopem son bilong iu for followim mi, and bae olketa worshipim olketa nara god; and Jehovah bae barava kros long iufala, and semtaem nomoa bae hem finisim iufala.” (Deut. 7:3, 4) Waswe, Jehovah hapi for pipol bilong hem distaem for maritim eniwan nomoa? Olketa wea worshipim God mas maritim nomoa man “wea followim Lord,” wea minim olketa wea dedicate and baptaes finis. Taem man laek marit, bae hem kasem gud samting sapos hem followim wanem Jehovah hem talem.
5. Hao nao Jehovah and olketa Christian ting long promis wea man and woman talem taem tufala marit?
5 God ting long promis wea man and woman talem taem tufala marit olsem samting wea holy. Son bilong God, Jesus, hem sei olsem abaotem marit bilong Adam and Eve: “No eni man mas aotem samting wea God joinim finis.” (Matt. 19:6) Man wea raetem psalm tu hem talem iumi hao iumi shud tinghevi long olketa promis wea iumi talem. Hem sei: “Givim sakrifaes long God long wei for talem thankiu, and olketa promis wea iufala talem long Most Hae, iufala mas duim.” (Ps. 50:14) Nomata hasband and waef savve kasem bigfala hapi long marit, promis wea tufala talem long day wea tufala marit hem samting wea olketa mas barava tinghevi long hem and hem minim tufala mas waka hard for mekem marit gohed gud.—Deut. 23:21.
6. Wanem nao iumi savve lanem from Jephthah?
6 Tingim Jephthah, wea hem wanfala judge long Israel bifor. Hem promis olsem long Jehovah: “Sapos iu mekem mi winim olketa bilong Ammon, first wan wea kamaot from haos bilong mi for lukim mi taem mi kam bak from datfala faet, bae mi givim hem nao long [iu] olsem wanfala sakrifaes wea olketa bonem.” Bat taem Jephthah kam bak long hom bilong hem long Mizpah, gele bilong hem nao first wan for kam lukim hem wea hem nomoa wanfala pikinini bilong hem. So waswe, Jephthah changem tingting bilong hem nao? Nomoa. Hem sei: “Mi talem promis long Jehovah finis and mi mas duim nao samting wea mi promisim.” (Judg. 11:30, 31, 35) Jephthah hem duim wanem hem promisim long Jehovah, nomata diswan minim gele bilong hem bae no garem pikinini and famili laen bilong Jephthah bae no gohed. Nomata promis wea Jephthah talem hem difren from promis wea man and woman talem taem tufala marit, Jephthah showimaot nambawan example for olketa Christian hasband and waef for duim samting wea olketa promis for duim.
Wanem Nao Savve Mekem Tufala wea Marit for Hapi?
7. Wanem nao samfala samting wea olketa wea niu marit mas waka hard long hem?
7 Plande hasband and waef ting bak long taem olketa fren olsem taem wea spesol. Olketa hapi tumas for savve gud long datwan wea olketa bae maritim! Bifor tufala marit, tufala barava fren gud. Bat nomata tufala fren bifor tufala marit or famili nao stretem marit bilong olketa, bihaen olketa marit tufala mas changem samfala samting mekem tufala fitim narawan. Wanfala hasband hem sei: “Taem mifala niu marit, wanfala big samting mifala mas luksavve long hem nao, mifala no singol nao. Long firstaem mifala no balance long tingting bilong mifala saed long famili and olketa fren bilong mifala.” Wanfala man wea marit 30 year finis luksavve taem hem niu marit hem mas no tingim hemseleva nomoa bat mas tingim waef bilong hem tu. Taem samwan hem askem olketa for go long eni ples or duim eni samting, hem story witim waef firstaem then hem givim ansa wea fitim tingting bilong tufala evriwan. Wei for tingim narawan firstaem hem helpem tufala long taem olsem.—Prov. 13:10.
8, 9. (a) Why nao tufala wea marit mas story gud tugeta? (b) Long olketa wanem samting nao hasband and waef mas tingim narawan firstaem, and why nao olsem?
8 Samfala taem, man and gele from difren ples and kastom nao marit. Sapos olsem, tufala hia mas barava story gud tugeta. Wei bilong evriwan for story hem difren. Lukluk long hao nao hasband or waef bilong iu story witim famili bilong hem bikos diswan bae helpem iu savve gud long hem. Samfala taem hem no toktok bilong man nao wea showimaot tingting bilong hem bat hao hem story. Samting wea hem no storyim tu savve showimaot wanem kaen man or woman nao hem. (Prov. 16:24; Col. 4:6) Hem important tumas for garem wei for luksavve.—Readim Proverbs 24:3.
9 Plande luksavve hem important for tingim narawan taem olketa chusim hapitaem. Bifor iutufala marit, maet hasband or waef bilong iu savve pleim sports or duim nara samting wea hem interest long hem. So waswe, iutufala need for changem samfala samting? (1 Tim. 4:8) Nara samting tu hem haomas taem nao iu savve gogo for visitim famili. Olketa wea marit mas tingim diswan bikos tufala seleva needim taem for duim olketa spiritual samting and nara samting tu.—Matt. 6:33.
10. Wanem nao savve helpem dadi and mami witim pikinini bilong olketa wea marit finis for fren gud?
10 Taem man and woman marit, tufala lusim dadi and mami and stap seleva nao. (Readim Genesis 2:24.) Nomata olsem, tufala mas followim komand bilong God for respectim dadi and mami. Tufala bae go lukim olketa witim olketa in-law tu. Wanfala man wea marit 25 year finis hem talem olsem: “Samfala taem hem no isi for duim samting wea hasband or waef laekem or for givim samting wea hem needim and long semtaem for tingim famili and olketa in-law tu. Disfala scripture long Genesis 2:24 hem helpem mi for luksavve hao nomata mi mas tingim famili bilong mi, mi mas tingim firstaem wanem nao waef bilong mi hem needim.” Long semtaem tu, Christian dadi and mami wea luksavve long datwan bae respectim wei wea pikinini bilong tufala wea marit finis, hem garem famili bilong hemseleva and hasband nao hem hed bilong datfala famili.
11, 12. Why nao hem important tumas for hasband and waef duim famili study and prea?
11 Hem important for duim famili study evritaem. Plande Christian famili talem hao datwan hem tru tumas. Maet hem no isi for duim famili study and for duim datwan olowe. Wanfala hasband hem tok olsem: “Mi sorre taem mi ting go bak long taem wea mitufala niu marit, mifala no savve duim famili study evritaem.” Hem sei tu: “Taem mitufala duim famili study, mi barava hapi taem waef bilong mi storyim wanfala nambawan samting wea hem lanem.”
12 Prea tu hem narafala samting wea helpem olketa wea marit. (Rom. 12:12) Taem hasband and waef worshipim Jehovah and fren gud witim Hem, datwan savve strongim marit bilong tufala. (Jas. 4:8) Wanfala Christian hasband hem talem olsem: “Nomata sapos wanfala duim smolfala mistek nomoa wea mekem narawan feel nogud, wei for kwiktaem tok sorre and storyim diswan long prea showimaot man hem barava sorre long samting wea hem duim.”—Eph. 6:18.
Hasband and Waef Mas Tingim Narawan Firstaem
13. Wanem samting nao Paul talem for hasband and waef saed long sex?
13 Olketa Christian wea marit mas no duim olketa samting wea spoelem marit, olsem olketa nogud samting saed long sex wea plande pipol long world duim distaem. Paul hem sei olsem abaotem diswan: “Hasband mas sleep witim waef bilong hem, and waef tu mas sleep witim hasband bilong hem. Waef hem no boss long body bilong hem bat hasband nao hem boss long hem. Hasband tu hem no boss long body bilong hem bat waef nao hem boss long hem.” Then Paul talem disfala kaonsel: “Wanfala long tufala mas no stopem narawan for sleep witim hem, bat sapos tufala agree for no sleep tugeta for lelebet taem diswan hem gud nomoa.” Why nao olsem? “Mekem tufala savve prea and bihaen tufala savve sleep tugeta moa, nogud Satan hem traem eniwan long tufala wea no savve bossim gud hemseleva long diswan.” (1 Cor. 7:3-5) Paul showimaot long hia hao prea hem important samting for wanfala Christian. Bat hem talem tu hao evri Christian wea marit mas luksavve long samting wea hasband or waef hem needim saed long feeling and body.
14. Wanem nao olketa scripture wea fitim hasband and waef saed long sex?
14 Hasband and waef mas no hol bak for storyim feeling bilong olketa and luksavve hao sapos tufala no tingim narawan saed long sex, olketa problem savve kamap. (Readim Philippians 2:3, 4; markem witim Matthew 7:12.) Hem nao samting wea kasem samfala famili wea hasband or waef nomoa hem Witness. Nomata sapos olketa no agree long samfala samting, taem datwan wea Witness hem garem gudfala wei, hem kaen, and waka tugeta witim hasband or waef bilong hem, datwan savve helpem marit bilong tufala. (Readim 1 Peter 3:1, 2.) Taem man lovem Jehovah and lovem marit partner and tingim hem firstaem, diswan bae helpem tufala long disfala samting.
15. Hao nao hasband and waef savve respectim narawan?
15 Hasband wea kaen bae respectim waef bilong hem long olketa nara samting tu. Olsem example, hasband bae tingim feeling bilong waef nomata long olketa smol samting. Wanfala man wea marit 47 year finis hem sei: “Kam kasem distaem mi lane yet long diswan.” Bible talem olketa Christian waef for barava respectim hasband bilong olketa. (Eph. 5:33) Sapos waef hem tok spoelem hasband and talem olketa wik point bilong hem front long narawan, datwan barava no showimaot respect. Proverbs 14:1 talem iumi: “Barava wisefala woman buildimap haos bilong hem, bat woman wea krangge hem brekem haos bilong hemseleva from nogud wei bilong hem.”
No Letem Devil Spoelem Marit
16. Hao nao hasband and waef savve followim samting wea Ephesians 4:26, 27 talem?
16 “Iufala savve kros, bat no sin; no letem sun go daon taem iufala kros yet, and no givim eni chance long Devil.” (Eph. 4:26, 27) Taem iumi followim toktok hia, datwan savve helpem iumi for stretem problem long marit and stopem problem for kamap. Wanfala sista hem sei: “Taem mifala no agree long eni samting, mifala mas stretem datfala problem nomata maet diswan tekem staka hour.” Taem tufala niu marit, hem and hasband bilong hem disaed for stretem problem long sem day and no weitim nara day. Hem sei tu: “Mitufala sei nomata wanem kaen problem kamap, mifala mas forgivim narawan and forgetim datwan mekem long next day mifala gud bak moa.” Tufala “no givim eni chance long Devil” for spoelem marit bilong tufala.
17. Nomata sapos hem luk olsem tufala wea marit no fitim each other, wanem nao savve helpem tufala?
17 Bat waswe sapos gogo iu luksavve iu maritim wanfala wea hem no fitim iu? Maet love bilong iutufala hem no strong olsem olketa nara hasband and waef. Nomata olsem, sapos iu tingim tingting bilong Creator abaotem marit datwan bae helpem iu. Paul talem disfala kaonsel long olketa Christian: “Evriwan shud barava respectim and tinghae long marit, and marit mas stap klin, bikos God bae judgem olketa wea duim dirty fasin and adultery.” (Heb. 13:4) And iumi mas no forgetim disfala toktok: “Wanfala rope wea garem thrifala string no savve brek kwiktaem.” (Eccl. 4:12) Taem hasband and waef ting long wei for mekhae long holy nem bilong Jehovah olsem hem barava important, diswan strongim marit bilong tufala and wei wea tufala fren witim God. Tufala mas waka hard for strongim marit bilong olketa bikos tufala savve diswan bae mekhae long Jehovah, Man wea startim marit.—1 Pet. 3:11.
18. Olketa wea marit savve kasem wanem?
18 Olketa Christian savve hapi long marit bilong olketa. Olketa mas waka hard and showimaot olketa fasin bilong Christian, wea wanfala nao hem for tingim narawan firstaem. Staka hasband and waef wea worshipim Jehovah showimaot hao man savve hapi long marit bilong hem.
Wanem Nao Ansa Bilong Iu?
• Why nao man savve hapi long marit?
• Wanem nao savve mekem tufala wea marit for hapi?
• Olketa wanem kaen fasin nao hasband and waef mas garem?
[Piksa long page 9]
Taem samwan askem olketa for go long eni ples or duim eni samting hasband and waef story gud firstaem
[Piksa long page 10]
Stretem problem long sem day and no weitim nara day, mekem ‘Devil no garem chance for spoelem marit’