Waswe, Iu Savve Gud Long Datfala “Languis wea Klin”?
“Mi bae lanem olketa tu for savve gud long wanfala niu languis wea klin, mekem olketa savve singaotem nem bilong Jehovah.”—ZEPH. 3:9.
1. Wanem spesol samting nao Jehovah givim long iumi?
JEHOVAH GOD nao startim languis, no olketa man. (Ex. 4:11, 12) Hem mekem Adam for toktok and startim olketa niu word tu. Gogo hem garem staka word long languis bilong hem. (Gen. 2:19, 20, 23) Hem wanfala spesol samting! Datwan mekem iumi man fit for story tu long Dadi bilong iumi long heven and mekhae long nambawan nem bilong hem.
2. Why nao iumi man toktok long olketa didifren languis distaem?
2 Long 1,700 year bihaen God wakem Adam, olketa man toktok long “wanfala languis nomoa.” (Gen. 11:1) Bat long taem bilong Nimrod hem no olsem nao. Olketa man long datfala taem laek bighed and no followim wanem Jehovah talem. From olketa laek stap long wanfala ples nomoa, olketa hipap long Babel. Olketa wakem wanfala big taoa, no from olketa laek mekhae long Jehovah, bat from olketa laek “mekhae long nem” bilong olketa seleva nomoa. Dastawe Jehovah tanem nao firstfala languis for go difren mekem olketa story long olketa didifren languis. Then olketa pipol go stap nao long olketa difren ples long earth.—Readim Genesis 11:4-8.
3. Taem Jehovah tanem firstfala languis for go difren, wanem nao happen?
3 Winim 6,800 languis nao pipol toktok long hem distaem. From evri languis hem difren, hao olketa man tingting hem no semsem tu. So luk olsem taem Jehovah God tanem firstfala languis for go difren, hem aotem nao datfala languis from tingting bilong olketa. Then hem mekem olketa garem olketa niufala word, wei for tingting, and hao for joinim olketa word tu. Dastawe “Babel” hem minim wei for konfius! (Gen. 11:9) Tru tumas, Bible nomoa storyim why nao staka languis hem stap distaem.
Wanfala Niu Languis wea Klin
4. Wanem nao Jehovah talem bae gohed distaem?
4 Datfala samting wea God duim long Babel hem big samting, bat wanfala samting wea big winim datwan hem gohed distaem. Profet Zephaniah talem disfala toktok bilong Jehovah: “Mi bae lanem olketa tu for savve gud long wanfala niu languis wea klin, mekem olketa savve singaotem nem bilong Jehovah and waka tugeta for worshipim hem.” (Zeph. 3:9) Wanem nao disfala “niu languis wea klin”? Wanem nao bae helpem iumi for savve gud long datfala languis?
5. Wanem nao datfala niu languis wea klin? Wanem nao pipol duim taem olketa lanem disfala languis?
5 Datfala languis wea klin nao hem trufala toktok abaotem Jehovah God and plan bilong hem wea stap long Bible. And tu, hem trufala toktok abaotem Kingdom bilong God and wanem Kingdom hia bae duim for mekhae long nem bilong Jehovah, for showimaot hao God nomoa fit for rul, and for mekem man kasem gud samting for olowe. Wanem nao pipol duim taem olketa lanem disfala languis? Bible sei olketa bae “singaotem nem bilong Jehovah” and olketa bae “waka tugeta for worshipim hem.” Diswan bae mekhae long nem bilong Jehovah and mekem pipol bilong hem garem sem tingting. Datwan hem difren tumas from samting wea happen long Babel.
Lanem Datfala Niu Languis wea Klin
6, 7. (a) Taem man laek lanem nara languis, wanem nao hem mas duim? Wanem nao hem mas duim taem hem laek lanem datfala niu languis wea klin? (b) Wanem nao bae iumi storyim distaem?
6 Taem man laek lanem nara languis, hem no baeheartim nomoa olketa word bat hem mas lanem tu hao for tingting long datfala languis. Evri languis hem no semsem long hao olketa joinim olketa word and for mekfani. Man mas lane hao for talem stret olketa word. Hem olsem tu taem iumi lanem olketa trufala toktok long Bible. Iumi no lanem nomoa tu-thri teaching long Bible, bat iumi mas changem tingting bilong iumi tu mekem iumi savve gud long datfala languis wea klin.—Readim Romans 12:2; Ephesians 4:23.
7 Wanem nao bae helpem iumi for savve gud long datfala niu languis wea klin? Taem iumi lanem nara languis, iumi mas duim samfala samting mekem iumi savve gud long datfala languis. Hem olsem tu taem iumi laek savve gud long olketa trufala toktok long Bible. Distaem bae iumi storyim samfala samting wea bae helpem iumi for savve gud long disfala niu languis wea klin.
Savve Gud Long Datfala Languis wea Klin
8, 9. Sapos iumi laek savve gud long datfala niu languis wea klin, wanem nao iumi mas duim? Why nao iumi mas duim olsem?
8 Lisin gud. Taem man firstaem herem nara languis, hem nating minim nomoa. (Isa. 33:19) Bat taem hem lisin gud, bae hem start for heresavve long samfala word and hao for talem tu. Bible sei olsem: “Iumi mas lisin gud moa long olketa toktok wea iumi herem finis mekem iumi no isisi go difren.” (Heb. 2:1) Staka taem Jesus talem olketa disaepol bilong hem: “Man wea willing for lisin mas herehere kam.” (Matt. 11:15; 13:43; Mark 4:23; Luke 14:35) Tru tumas, sapos iumi laek savve gud go moa long datfala niu languis wea klin, iumi mas ‘lisin and minim’ toktok wea iumi herem.—Matt. 15:10; Mark 7:14.
9 Iumi bae kasem gud samting sapos iumi lisin gud. (Luke 8:18) Taem iumi long meeting, waswe, iumi lisin gud long wanem olketa storyim, or waswe, tingting bilong iumi go wakabaot long nara ples? Iumi mas barava lisin gud long wanem olketa storyim. Sapos nomoa, iumi herehere nating nomoa.—Heb. 5:11.
10, 11. (a) Iumi mas lisin gud bat wanem moa iumi mas duim? (b) Wanem moa iumi mas duim mekem iumi savve gud long datfala niu languis wea klin?
10 Followim man wea savve gud long languis. Taem man lanem nara languis, hem lisin gud bat hem followim tu hao man wea savve gud long datfala languis hem talem olketa word. Diswan bae helpem hem for talem stret olketa word mekem pipol savve minim hem. Long sem wei tu, iumi savve lane taem iumi followim olketa wea savve ‘teachim gud’ datfala niu languis wea klin. (2 Tim. 4:2) Askem nara man for helpem iu. Sapos iu mistek and wanfala man hem stretem iu, herem wanem hem talem.—Readim Hebrews 12:5, 6, 11.
11 Taem iumi savve gud long datfala niu languis wea klin, iumi bilivim olketa trufala toktok long Bible and iumi teachim long nara man. Bat iumi mas followim tu olketa law bilong God and toktok wea showimaot tingting bilong Hem. Wanfala samting wea bae helpem iumi nao, hem for followim gudfala wei bilong olketa nara brata and sista. Iumi laek garem strong faith olsem olketa tu. Wanfala wea iumi savve followim nao hem Jesus. (1 Cor. 11:1; Heb. 12:2; 13:7) Sapos iumi evriwan gohed duim olketa samting hia, pipol bilong God bae garem sem tingting. Olketa bae savve gud long disfala niu languis wea klin.—1 Cor. 4:16, 17.
12. Wanem nao bae helpem man lanem nara languis?
12 Baeheartim. Pipol wea lanem nara languis mas baeheartim staka niufala word and toktok. Olketa Christian savve baeheartim olketa samting tu mekem olketa savve gud long datfala niu languis wea klin. Hem gud for iumi baeheartim nem bilong evri buk long Bible. Samfala baeheartim olketa scripture long Bible. Samfala moa baeheartim olketa Kingdom song, nem bilong olketa tribe long Israel, nem bilong 12-fala aposol, and olketa fasin wea spirit bilong God mekem man for garem. Staka Israelite bifor baeheartim olketa psalm. Wanfala smol boy distaem wea six year, hem baeheartim winim 80 scripture long Bible. Waswe, iu trae for baeheartim samfala samting tu?
13. Why nao hem gud for iumi mas herem sem toktok evritaem?
13 Herem olowe. Taem iumi herem olowe wanfala samting, bae iumi no forgetim kwiktaem. Diswan savve helpem iumi long olketa meeting. Aposol Peter hem sei: “Iufala savve finis long olketa samting hia and iufala barava bilivim olketa trufala toktok. Nomata olsem, mi mas gohed for talemaot olketa trufala toktok long iufala evritaem.” (2 Pet. 1:12) Why nao hem gud for iumi herem sem toktok evritaem? Bikos diswan mekem iumi minim go moa samfala samting and strongim iumi for gohed obeyim Jehovah. (Ps. 119:129) Taem iumi herem olowe olketa samting wea God laekem iumi for duim, datwan helpem iumi for lukluk gud long iumiseleva and for ‘no herehere nating nomoa.’ (Jas. 1:22-25) Sapos nomoa, olketa nara samting bae pullim tingting bilong iumi gogo iumi no savve gud nao long datfala niu languis wea klin.
14. Wanem nao bae helpem iumi for savve gud long datfala niu languis wea klin?
14 Read big. (Rev. 1:3) Samfala wea lanem nara languis olketa readim nomoa olketa word bat no talemaot big. Datwan bae no helpem man lanem gud datfala languis. Taem iumi lanem datfala niu languis wea klin, maet samfala taem iumi mas “read smol” mekem tingting bilong iumi no go wakabaot. (Readim Psalm 1:1, 2.) Taem iumi duim datwan, bae iumi no kwiktaem forgetim wanem iumi readim. Long Hebrew languis, datfala toktok “read smol” hem minim tu for ting raonem samting. Olsem kaikai hem helpem body, iumi mas ting raonem wanem iumi readim tu. Waswe, iu markem inaf taem mekem iu savve ting raonem samting wea iu studyim? Taem iumi readim Bible, iumi mas ting raonem wanem iumi readim.
15. Wanem nao bae helpem iumi for joinim olketa gudfala toktok bilong datfala niu languis wea klin?
15 Lukluk gud long hao olketa joinim olketa word. Taem iumi lanem nara languis, iumi mas lukluk gud long hao olketa joinim olketa word long datfala languis. Diswan bae helpem iumi for minim datfala languis mekem iumi savve story gud long hem. Evri languis garem wei for joinim olketa word. Datfala niu languis wea klin tu hem garem ‘wei for joinim olketa gudfala toktok.’ (2 Tim. 1:13) Iumi tu mas savve hao for ‘joinim olketa gudfala toktok’ hia.
16. Wanem kaen tingting nao iumi mas no garem? Wanem nao savve helpem iumi long diswan?
16 Gohed for lane. Taem man hem lanem tu-thri toktok long nara languis, maet hem tingse datwan hem fitim nao. Man savve garem semkaen tingting tu taem hem lanem datfala niu languis wea klin. (Readim Hebrews 5:11-14.) Wanem nao savve helpem iumi for no garem kaen tingting olsem? Iumi mas gohed lanem disfala languis. Bible hem sei: “From iumi savve finis long olketa main teaching abaotem Christ, iumi mas mekem savve bilong iumi big go moa. Nogud iumi gohed moa for teachim olketa samting wea iumi start witim, olsem teaching abaotem hao iumi mas lusim olketa nogud wei, hao iumi mas biliv long God, hao iumi mas baptaes, hao iumi putim hand antap long hed bilong man, hao olketa man bae laef bak moa and hao God bae judgem pipol.”—Heb. 6:1, 2.
17. Why nao iumi mas study evritaem? Storyim wanfala tokpiksa.
17 Markem taem for study seleva. Hem gud for iu study seleva evritaem nomata sapos iu study for lelebet taem nomoa. Diswan hem winim wei for study for staka hour bat iu duim samfala taem nomoa. Study long taem wea iu no laek sleep and long ples wea hem kwaet. Taem man hem lanem nara languis, hem olsem hem wakem wanfala niu road long bush. Taem hem wakabaot followim datfala road olowe, hem isi nao for hem followim. Bat sapos hem no wakabaot followim datfala road for longtaem lelebet, bae hem bushes nao. Dastawe iumi mas study evritaem! (Dan. 6:16, 20) Iumi mas ‘gohed for wekap and prea strong’ mekem iumi savve gud long datfala niu languis wea klin.—Eph. 6:18.
18. Why nao iumi mas story evritaem long datfala niu languis wea klin?
18 Story long datfala languis evritaem! Samfala wea lanem nara languis maet no story olowe long datfala languis bikos olketa shame or fraet nogud olketa talem rong long olketa word. Kaen tingting olsem bae mekem olketa no lane gud. Sapos man laek story gud long nara languis, hem mas story long datfala languis evritaem. Sapos olsem, hem bae no fraet for story. Iumi tu mas storyim olketa trufala toktok long Bible evritaem. Bible hem sei: “God bae ting long man wea garem faith olsem gudfala man. Bat man wea talemaot faith bilong hem nao bae sev.” (Rom. 10:10) Iumi ‘talemaot faith bilong iumi’ taem iumi baptaes bat iumi talemaot datwan tu taem iumi story long pipol abaotem Jehovah. Plande taem iumi duim diswan long preaching waka. (Matt. 28:19, 20; Heb. 13:15) Iumi savve duim diswan tu long olketa meeting bilong iumi.—Readim Hebrews 10:23-25.
Story Long Datfala Niu Languis for Praisem Jehovah
19, 20. (a) Wanem spesol samting nao Olketa Jehovah’s Witness duim distaem? (b) Wanem nao iu laek gohed duim?
19 Tingim spesol samting wea happen long Jerusalem long Sunday morning long Sivan 6, 33 C.E.! Taem hem no naen klok yet long datfala morning, wanfala mirakol hem happen. Olketa wea hipap long wanfala haos olketa “start for story long olketa didifren languis.” (Acts 2:4) Distaem pipol bilong God no kasem kaen paoa olsem for story long olketa difren languis. (1 Cor. 13:8) Nomata olsem, Olketa Jehovah’s Witness talemaot gud nius abaotem Kingdom long winim 430 languis.
20 Iumi hapi tumas bikos nomata iumi story long olketa difren languis, iumi evriwan savve gud long datfala languis wea klin, wea hem nao olketa tru toktok long Bible! Diswan hem difren tumas from samting wea happen long Babel. Pipol bilong Jehovah story long wanfala languis for praisem nem bilong hem. (1 Cor. 1:10) Iumi mas gohed “waka tugeta” witim olketa brata and sista bilong iumi long world and savve gud go moa long datfala niu languis wea klin, mekem iumi praisem Dadi bilong iumi long heven, Jehovah.—Readim Psalm 150:1-6.
Wanem Nao Ansa Bilong Iu?
• Wanem nao datfala niu languis wea klin?
• Taem man laek lanem datfala niu languis wea klin, wanem nao hem mas duim?
• Wanem nao bae helpem iumi savve gud long datfala niu languis wea klin?
[Box long page 23]
Savve Gud Long Datfala Languis wea Klin Taem Iu
◆ lisin gud.
◆ followim man wea savve gud long languis.
◆ baeheartim and herem olowe.
◆ read big.
◆ lukluk gud long “hao olketa joinim olketa word.”
◆ gohed for lane.
◆ markem taem for study seleva.
◆ story long datfala languis.
[Piksa long page 24]
Pipol bilong Jehovah savve gud long datfala niu languis wea klin