Helpem Olketa Sheepsheep wea Lus
“Iufala kam and hapi witim mi. Iufala savve, disfala sheepsheep wea hem lus ia, mi faendem nao.”—LUKE 15:6.
1. Wanem nao Jesus duim wea showimaot hem lovem pipol?
JESUS CHRIST nao hem spesol Son bilong Jehovah. Bible talem Jesus nao hem “nambawan man for lukaftarem sheepsheep.” (Heb. 13:20) Bible talem finis bae hem kam long earth and hem talem tu Jesus hem nambawan Shepherd wea lukaotem olketa Israelite wea olsem “olketa sheepsheep wea lus.” (Matt. 2:1-6; 15:24) Man wea lukaftarem sheepsheep hem hapi for duim eni samting for protectim sheepsheep bilong hem nomata sapos hem mas dae. Long sem wei tu, Jesus givim laef bilong hem for pipol wea olsem sheepsheep wea laek kasem gud samting from wanem hem duim.—John 10:11, 15; 1 John 2:1, 2.
2. Wanem nao maet mekem samfala Christian no kakam long meeting and no go preaching distaem?
2 Bat sorre tumas, samfala wea bifor olketa tinghae long wanem Jesus duim and wea dedicate finis long God, olketa no savve kakam long meeting and no go preaching nao. Maet olketa wikdaon, sik, or samfala nara samting nao mekem olketa olsem. Bat sapos olketa stap long kongregeson, olketa savve hapi and stap gud olsem David hem storyim long Psalm 23. Hem talem olsem: “Jehovah hem lukaftarem mi olsem mi sheepsheep bilong hem. Dastawe mi no short long eni samting.” (Ps. 23:1) Olketa long kongregeson kasem staka samting for helpem olketa for gohed fren gud witim God, bat olketa sheepsheep wea lus no kasem datwan. Hu nao savve helpem olketa? Wanem nao bae helpem olketa? Wanem nao samfala samting wea iumi savve duim for helpem olketa for kam bak long kongregeson?
Hu Nao Savve Helpem Olketa?
3. Wanem nao Jesus talem for iumi duim for helpem sheepsheep bilong God wea lus?
3 Iumi mas waka hard for helpem sheepsheep bilong God wea lus for kam bak long kongregeson. (Ps. 100:3) Jesus talem wanfala tokpiksa for minim diswan. Hem sei: “Sapos wanfala man hem garem wan handred sheepsheep bat wanfala hem lus, bae hem mas leavim nara naenti-naen sheepsheep antap long maunten and go lukaotem datwan wea lus, iaman? Hem hapi from hem garem naenti-naen sheepsheep, bat sapos hem faendem moa datfala sheepsheep wea lus, bae hem hapi tumas nao. Olsem tu, Dadi bilong mi long heven bae no laekem eniwan long olketa disaepol hia for lus.” (Matt. 18:12-14) Hu nao savve helpem sheepsheep bilong God wea lus?
4, 5. Olketa elder mas ting hao long sheepsheep bilong God?
4 Sapos olketa elder laek helpem sheepsheep wea lus, olketa mas no forgetim hao olketa brata and sista long kongregeson dedicate long Jehovah. Tru tumas, ‘olketa nao sheepsheep bilong God’ wea hem lovem tumas. (Ps. 79:13) Olketa sheepsheep hia wea lus needim love, dastawe olketa elder mas showimaot olketa tingim olketa. Sapos olketa elder duim shepherding kol long olketa hia, datwan savve helpem olketa. Taem olketa elder story long olketa, maet datwan mekem olketa laek fren bak moa witim Jehovah and for kam bak long kongregeson.—1 Cor. 8:1.
5 Hem waka bilong olketa elder for lukaotem olketa sheepsheep bilong God wea lus and trae for helpem olketa. Aposol Paul hem talem olketa elder long Ephesus bifor hao olketa mas lukaftarem sheepsheep. Hem talem olsem: “Lukaftarem gud iufala seleva and evri sheepsheep, from holy spirit markem iufala for kamap olketa overseer for lukaftarem kongregeson bilong God wea hem baem witim blood bilong Son bilong hem.” (Acts 20:28) Aposol Peter talem olsem tu long olketa anointed Christian wea elder: “Iufala mas lukaftarem gud olketa pipol bilong God wea stap long hand bilong iufala. Olketa olsem olketa sheepsheep for iufala lukaftarem. So iufala mas willing for duim diswan and no from eniwan forcem iufala. Hem nogud for iufala duim disfala waka for kasem selen bat iufala mas duim olsem bikos iufala barava willing for helpem olketa. Hem nogud for iufala bossim olketa wea God markem for iufala lukaftarem. Bat hem gud for iufala showimaot gudfala wei mekem olketa sheepsheep hia savve followim example bilong iufala.”—1 Pet. 5:1-3.
6. Why nao olketa elder mas barava lukaftarem sheepsheep bilong God distaem?
6 Olketa elder mas followim Jesus wea hem “nambawan man for lukaftarem sheepsheep.” (John 10:11) Jesus barava tingim sheepsheep bilong God, dastawe hem talem Simon Peter hem mas ‘lukaftarem gud olketa smolfala sheepsheep bilong Hem.’ (Readim John 21:15-17.) Satan hem barava waka hard for mekem olketa wea dedicate finis long God for no gohed faithful long God, dastawe olketa elder mas lukaftarem gud olketa sheepsheep distaem. Satan lukluk for olketa wik point bilong olketa sheepsheep bilong Jehovah and hem iusim world for switim olketa for duim olketa samting wea no stret. (1 John 2:15-17; 5:19) Hem isi for olketa sheepsheep wea lus for duim olketa samting wea no stret, dastawe olketa elder mas helpem olketa hia for “gohed followim spirit.” (Gal. 5:16-21, 25) Taem olketa elder helpem sheepsheep wea lus, olketa mas askem God for givim holy spirit for leadim olketa and olketa mas iusim gud Bible tu.—Prov. 3:5, 6; Luke 11:13; Heb. 4:12.
7. Why nao hem important for olketa elder duim shepherding kol?
7 Long Israel bifor, man for lukaftarem sheepsheep savve holem wanfala longfala stik wea end bilong hem olsem huk for leadim sheepsheep bilong hem. Taem olketa sheepsheep kam insaed long fence or taem olketa go aot, man hia ‘holem disfala stik’ for kaontem olketa. (Lev. 27:32; Mic. 2:12; 7:14) Long sem wei tu, wanfala elder mas savve gud long evri sheepsheep bilong God and mas savve sapos olketa gohed fren gud witim God. (Markem witim Proverbs 27:23.) Dastawe wanfala important samting wea olketa elder savve storyim nao hem for duim olketa shepherding kol. Olketa savve storyim wanem olketa savve duim for helpem sheepsheep wea lus. Jehovah talem hao hem bae lukaotem sheepsheep bilong hem and lukaftarem olketa. (Ezek. 34:11) So God hem hapi taem olketa elder duim semkaen samting for helpem sheepsheep bilong God wea lus for kam bak long kongregeson.
8. Wanem nao olketa elder savve duim for helpem sheepsheep wea lus?
8 Taem elder go lukim wanfala brata or sista wea sik, datwan bae strongim hem and mekem hem hapi. Hem olsem tu taem elder go lukim sheepsheep wea lus. Olketa elder savve readim samfala scripture, storyim samfala samting long buk bilong iumi, storyim samfala important point wea kamap long wanfala meeting, prea witim hem, and samfala samting olsem. Olketa elder savve talem hem tu olketa brata and sista long kongregeson bae hapi tumas sapos hem kakam moa long olketa meeting. (2 Cor. 1:3-7; Jas. 5:13-15) Taem elder go lukim datfala brata or sista, story witim hem long telephone, or raetem leta long hem, datwan savve barava helpem sheepsheep hia wea lus! Datwan savve mekem elder hapi tumas tu.
Iumi Evriwan Savve Waka Tugeta
9, 10. Why nao iumi fit for sei hem no waka bilong olketa elder nomoa for helpem sheepsheep wea lus?
9 Laef hem no isi distaem and iumi evriwan savve busy, dastawe maet iumi no luksavve taem wanfala brata or sista hem isisi lusim kongregeson. (Heb. 2:1) Nomata olsem, Jehovah barava lovem olketa sheepsheep bilong hem. Hem lovem olketa sheepsheep wanwan. Olketa olsem olketa difren part long body bilong iumi wea tingim narawan. Dastawe iumi evriwan mas tingim olketa brata bilong iumi and barava lukaftarem olketa gud. (1 Cor. 12:25) Waswe, iu duim diswan?
10 Nomata hem waka bilong olketa elder for lukaotem sheepsheep wea lus and helpem olketa, iumi tu savve waka witim olketa elder for helpem olketa hia. Iumi savve helpem and strongim olketa brata and sista hia for kam bak long kongregeson. Wanem nao iumi savve duim for helpem olketa?
11, 12. Wanem nao maet olketa elder askem iu for duim?
11 Samfala taem olketa elder savve askem samfala brata and sista for study witim olketa hia wea laekem samwan for helpem olketa. Diswan hem for helpem olketa brata and sista hia for garem moa “love wea [olketa] garem firstaem.” (Rev. 2:1, 4) Taem iutufala studyim olketa samting wea hem no herem from hem no kakam long olketa meeting, datwan savve strongim faith bilong hem.
12 Sapos olketa elder askem iu for study witim wanfala brata or sista hia, prea long Jehovah for hem helpem iu long diswan. Tru tumas, sapos iu “letem Jehovah leadim iu, olketa plan bilong iu bae gohed gud.” (Prov. 16:3) Ting raonem olketa scripture and olketa point wea iu savve iusim for helpem datfala brata or sista. Ting raonem gudfala wei wea aposol Paul showimaot. (Readim Romans 1:11, 12.) Paul laek tumas for lukim olketa brata and sista long Rome mekem hem savve storyim olketa samting abaotem God for helpem olketa fren gud witim Hem. Hem savve olketa tu bae strongim hem. Hem gud for iumi tu garem sem tingting olsem Paul taem iumi helpem sheepsheep wea lus.
13. Wanem nao maet iutufala storyim?
13 Taem iutufala study tugeta, maet iu savve askem hem, “Wanem nao mekem iu laek savve long truth?” Askem hem for storyim olketa samting wea mekem hem hapi taem hem worshipim Jehovah, olsem olketa gud samting wea hem kasem long olketa meeting, preaching waka, and long olketa convention. Iutufala savve storyim olketa samting wea maet iutufala duim tugeta for worshipim Jehovah. Storyim hao iu hapi tumas from iu fren gud witim Jehovah. (Jas. 4:8) Talem hem iu tinghae long God from hem lukaftarem gud iumi from iumi pipol bilong hem, olsem taem iumi kasem hard taem, hem strongim iumi.—Rom. 15:4; 2 Cor. 1:3, 4.
14, 15. Wanem nao iumi savve storyim long olketa wea no kakam long meeting and no go preaching?
14 Samting wea bae helpem brata or sista hia, hem nao for iu storyim olketa gud samting wea hem kasem taem hem strong for worshipim Jehovah. Iu savve storyim hao long datfala taem, hem gohed for lane abaotem Bible and olketa plan bilong God. (Prov. 4:18) Taem hem ‘letem holy spirit for leadim hem,’ datwan helpem hem for no sin. (Gal. 5:22-26) From hem duim olsem, no eni samting spoelem tingting bilong hem. Hem savve prea long Jehovah and ‘peace bilong God wea winim evri tingting bilong man protectim heart and tingting bilong hem.’ (Phil. 4:6, 7) Tingim olketa samting hia taem iu helpem brata or sista wea lus. Showimaot iu tingim hem and talem hem iu barava laekem hem for kam bak moa long kongregeson.—Readim Philippians 2:4.
15 Tingim sapos elder duim shepherding kol long hasband and waef wea no kakam long meeting and no go preaching. Hem savve askem tufala for tingim taem wea tufala firstaem lanem truth. Samting wea tufala lanem hem nambawan, hem klia tumas, hem mekem tufala hapi, and free from olketa laea teaching! (John 8:32) Tufala barava tinghae long samting wea olketa lanem abaotem Jehovah, love wea hem showimaot, and olketa nambawan plan bilong hem! (Markem witim Luke 24:32.) Elder savve talem olketa hao olketa Christian wea dedicate finis, olketa fren gud witim Jehovah and savve prea long hem. Strongim tufala for followim moa “nambawan gud nius abaotem hapi God,” Jehovah.—1 Tim. 1:11.
Gohed for Showimaot Love Long Olketa
16. Storyim eni example wea showimaot iumi savve helpem olketa wea no kakam long meeting and no go preaching.
16 Waswe, olketa samting hia wea iumi storyim savve barava helpem man? Ia. Tingim wanfala young brata wea start for preach taem hem 12 year. Taem hem 15 year hem no kakam long meeting and no go preaching nao. Bat gogo hem strong bak moa and hem waka full taem for Jehovah for winim 30 year. Wanfala elder nao barava helpem hem for kam bak long kongregeson. Datfala brata hem barava tinghae long wanem datfala elder duim for helpem hem!
17, 18. Sapos iu laek helpem sheepsheep wea lus, wanem nao olketa fasin wea iu savve showimaot?
17 Iumi lovem olketa brata and sista hia dastawe iumi helpem olketa for kam bak long kongregeson. Jesus sei olsem long olketa disaepol: “Mi givim niufala law long iufala for iufala lovem narawan. Mi lovem iufala and long sem wei tu iufala mas lovem narawan. Sapos iufala lovem narawan, evriwan bae luksavve iufala nao olketa disaepol bilong mi.” (John 13:34, 35) Tru tumas, olketa tru Christian nao showimaot love. Dastawe iumi mas showimaot love long olketa wea baptaes wea no kakam long meeting and no go preaching! Bat taem iumi helpem olketa hia, iumi mas showimaot olketa nara fasin tu.
18 Sapos iu laek helpem sheepsheep bilong God wea lus, wanem nao olketa nara fasin wea iu savve showimaot? Iu savve duim samting wea showimaot iu sorre long olketa, kaen long olketa, no kros long olketa, and no givap for helpem olketa. Maet iu mas forgivim olketa tu. Paul hem sei: “Iufala mas sorre long pipol, kaen long olketa, hambol, and wei bilong iufala mas no raf. Iufala mas no givap kwiktaem. Taem eniwan long iufala feel nogud long narawan, iufala no kros bat iufala mas gohed for forgivim narawan. From Jehovah forgivim iufala, iufala tu mas hapi for forgivim narawan. Bat witim evri samting hia, iufala mas garem love from datwan nao mekem pipol garem sem tingting.”—Col. 3:12-14.
19. Why nao iumi no hard waka nating for helpem sheepsheep wea lus?
19 Long study bihaen diswan, bae iumi storyim why nao samfala sheepsheep bilong God olketa lus. Bae hem storyim tu tingting bilong olketa brata and sista long olketa wea kam bak long kongregeson. Taem iu redyim datfala study and ting raonem disfala study, bae iu luksavve iu no hard waka nating taem iu helpem olketa sheepsheep for kam bak long kongregeson. Pipol distaem waka hard for full laef bilong olketa for kasem staka selen, bat iumi savve laef bilong wanfala man nomoa hem winim evri selen long world. Jesus mekhae long diswan long tokpiksa wea hem talem abaotem sheepsheep wea lus. (Matt. 18:12-14) Tingim datwan taem iu waka hard for helpem olketa sheepsheep bilong Jehovah wea lus for kam bak long kongregeson.
Wanem Nao Ansa Bilong Iu?
• Sapos sheepsheep hem lus, wanem nao olketa elder mas duim?
• Wanem nao iu savve duim for helpem olketa wea no kakam long meeting and no go preaching?
• Sapos iu laek helpem sheepsheep wea lus, wanem nao olketa fasin wea iu savve showimaot?
[Piksa long page 10]
Olketa elder waka hard for helpem olketa sheepsheep wea lus