Waswe, Bae Iu Gohed Faithful?

“Go kasem taem mi dae, mi bae no duim eni samting wea bae mekem mi no faithful!”​—JOB 27:5.

1, 2. Wanem nao iumi mas waka hard for duim? Wanem nao olketa kwestin wea iumi bae storyim?

TINGIM sapos iu laek wakem wanfala kapa haos and iu lukluk long plan bilong hem. Datfala plan bilong haos hem gud tumas. Iu tingim hao iu and famili bilong iu bae stap gud long datfala haos. Bat sapos iu no wakem datfala haos, go stap long hem, and lukaftarem gud, plan hia bae iusles nomoa.

² Hao iumi faithful hem olsem tu. Iumi savve hem important tumas for iumi faithful bikos datwan bae barava helpem iumi and famili bilong iumi. Bat sapos iumi tingting nomoa for faithful and no duim eni samting, datwan hem iusles. Iumi mas gohed faithful. Long world distaem, sapos man laek wakem wanfala big haos, datwan savve kostim staka selen and iusim staka taem tu. (Luke 14:28, 29) Long sem wei tu, sapos iumi laek gohed faithful, iumi mas iusim staka taem and waka hard tu. Nomata olsem, iumi bae kasem gud samting taem iumi duim datwan. So distaem bae iumi storyim thrifala kwestin hia: Wanem nao savve helpem iumi for faithful? Wanem nao iumi mas duim mekem iumi gohed faithful? Sapos man no faithful long God for lelebet taem, wanem nao hem savve duim?

Wanem Nao Savve Helpem Iumi for Faithful?

3, 4. (a) Wanem nao Jehovah duim for helpem iumi faithful? (b) Wanem nao iumi savve duim for mekem iumi gohed faithful olsem Jesus?

³ Long study bifor diswan, iumi lanem hao Jehovah letem iumiseleva nao disaed sapos iumi laek faithful long hem or nomoa. Nomata olsem, iumi hapi from hem helpem iumi for garem disfala fasin. Hem lanem iumi long wanem iumi mas duim for faithful. Hem givim holy spirit tu long iumi. Datwan nao helpem iumi for followim wanem Bible teachim. (Luke 11:13) Sapos iumi trae hard for faithful long Jehovah, hem bae no letem eni samting spoelem wei wea iumi fren gud witim hem.​—Prov. 2:7.

⁴ Long wanem wei nao Jehovah lanem iumi for gohed faithful? Nambawan samting wea hem duim nao, hem sendem kam Son bilong hem Jesus long earth. Jesus obeyim God evritaem. Hem “obey olowe nomata hem mas dae.” (Phil. 2:8) Jesus obeyim Dadi bilong hem long heven long evri samting wea hem duim, nomata taem hem no isi tu. Hem sei olsem long Jehovah: “Iu no duim wanem mi laekem, bat duim nomoa wanem iu laekem.” (Luke 22:42) Hem gud for iumi wanwan tingim diswan: ‘Waswe, mi followim wei bilong Jesus for obey?’ Taem iumi obey from iumi lovem God, datwan bae helpem iumi gohed faithful. Tingim samfala samting wea iumi mas obey long hem.

5, 6. (a) Wanem nao David talem wea showimaot iumi mas faithful nomata taem iumi stap seleva? (b) Wanem samting nao savve mekem hem no isi for iumi faithful taem iumi stap seleva?

⁵ Iumi mas obeyim Jehovah tu taem iumi stap seleva. David luksavve man mas faithful nomata taem hem stap seleva. (Readim Psalm 101:2.) From David hem king, plande taem staka pipol lukim wanem hem duim. (Markem witim Psalm 26:12.) Long taem olsem, king hia mas faithful bikos pipol bae lukluk for followim gudfala wei bilong hem. (Deut. 17:18, 19) Bat David luksavve hem mas faithful tu nomata taem hem stap seleva long haos bilong hem. Waswe long iumi, iumi luksavve long datwan tu?

⁶ Long Psalm 101:3, David talem olsem: “Mi barava les for lukim eni nogud samting.” Staka nogud samting nao stap distaem wea hem isi for iumi lukluk long hem taem iumi stap seleva. From staka pipol savve lukluk long Internet long computer, hem isi nomoa for man lukluk long olketa rabis piksa. Bat sapos man duim datwan, waswe, hem obeyim datfala toktok wea God mekem David for raetem? Olketa rabis piksa savve barava spoelem man. Hem savve mekem man laek tumas for duim rabis samting, tingim hemseleva nomoa, spoelem gudfala tingting bilong hem, spoelem marit, and spoelem olketa nara man tu.​—Prov. 4:​23; 2 Cor. 7:1; 1 Thess. 4:​3-5.

7. Toktok long wanem scripture nao savve helpem iumi gohed faithful taem iumi stap seleva?

⁷ Hem tru, no eniwan savve barava stap seleva bikos Jehovah lukluk kam long iumi. (Readim Psalm 11:4.) Jehovah hapi tumas taem hem lukim iu gohed faithful taem iu kasem test! Taem iu duim datwan, iu followim nao toktok wea Jesus talem for warnim iumi wea stap long Matthew 5:​28. So iu mas disaed strong for no lukluk long olketa rabis piksa and for no readim olketa rabis toktok wea bae switim iu for durong. Iu mas no letem olketa samting hia mekem iu no faithful long God!

8, 9. (a) Wanem nao testim faithful fasin bilong Daniel and thrifala fren bilong hem? (b) Wanem nao olketa young Christian distaem savve duim for mekem Jehovah witim olketa brata and sista hapi?

⁸ Iumi savve faithful and obeyim Jehovah tu taem iumi stap witim pipol wea no worshipim hem. Tingim Daniel and thrifala fren bilong hem. Taem olketa young, olketa prisoner long Babylon. Pipol long there no savve gud long Jehovah. Olketa laek forcem fofala Hebrew boy hia for kaikaim kaikai wea Law bilong God tambuim. Maet olketa boy hia tingse hem olraet nomoa for kaikaim datfala kaikai bikos dadi and mami no stap, and olketa nara mature Israelite and priest tu no stap. Hu nao bae lukim wanem olketa duim? Jehovah nao bae lukim. So nomata olketa long Babylon laek forcem olketa boy hia and nomata olketa maet kasem nogud samting, olketa obeyim God.​—Dan. 1:​3-9.

⁹ Staka young Witness bilong Jehovah long full world duim sem samting tu. Olketa followim wanem God laekem and no duim olketa nogud samting wea olketa nara young pipol long world duim. Taem iufala young wan no tekem drug, no raf, no tok swear, no durong, and no duim olketa nara nogud samting, iufala obeyim Jehovah nao. Iufala faithful tu. Taem iufala duim olsem, iufala kasem gud samting, and Jehovah witim olketa brata and sista hapi long iufala!​—Ps. 110:3.

10. (a) Wanem tingting wea no stret nao samfala young wan garem abaotem wei for durong? (b) Sapos iumi faithful, bae iumi garem wanem tingting abaotem wei for durong?

¹⁰ Iumi mas obeyim Jehovah tu taem iumi frenim wanfala boy or gele. Iumi savve finis Bible tambuim wei for durong. Bat hem isi tumas for iumi no garem stretfala tingting abaotem datwan. Tingim diswan. Samfala young wan iusim mouth long private part bilong nara boy or gele, or duim sex long ass, or holehole long private part bilong narawan. Olketa tingse olketa no durong nomoa, from olketa tingse wei for durong nao hem taem man duim sex. Olketa young wan hia forgetim or no laek tingim hao disfala word “durong” long Bible, hem minim evri nogud samting hia wea iumi storyim. Man wea duim olketa nogud samting hia savve disfellowship.a Bat nogud samting nao, olketa no tingim olketa mas faithful long God. From iumi laek faithful evritaem, iumi no lukaotem excuse for nogud samting wea iumi duim. Iumi no olsem man wea standap klosap long fire and tingse fire bae no bonem hem. Long sem wei tu, iumi bae no duim eni bigfala sin and tingse iumi bae no panis. Iumi no tingim nomoa panis wea iumi savve kasem from kongregeson sapos iumi duim bigfala sin. Bat iumi mas tingting for duim nomoa wanem Jehovah hem hapi long hem, and no duim eni samting wea bae mekem hem sorre. Iumi mas “ranawe from wei for durong” and no duim eni samting wea bae mekem iumi sin. (1 Cor. 6:​18) Sapos olsem, pipol bae luksavve iumi faithful long God.

Wanem Nao Iumi Mas Duim Mekem Iumi Gohed Faithful?

11. Why nao hem barava important for iumi obey evritaem? Storyim tokpiksa.

¹¹ Taem iumi obey, datwan helpem iumi for faithful. So taem iumi gohed for obey, iumi gohed for faithful tu. Maet iu tingse hem no big samting taem iu obey long wanfala smol samting nomoa. Bat taem iu obey olowe olsem, iu showimaot iu gohed faithful. Tingim diswan. Maet iumi no savve wakem eni samting long wanfala brik nomoa, bat sapos iumi joinim staka brik tugeta, iumi savve wakem wanfala naes haos nao. Iumi olsem tu. Taem iumi gohed obey, datwan helpem iumi gohed faithful.​—Luke 16:10.

12. Wanem nao David duim wea showimaot hem gohed faithful nomata hem kasem nogud samting?

¹² Taem iumi gohed strong nomata iumi kasem hard taem, nara pipol spoelem iumi, or olketa duim samting long iumi wea no stret, datwan showimaot iumi faithful tu. Tingim story long Bible abaotem David. Taem David hem young, King Saul duim nogud samting long hem, nomata Jehovah nao markem Saul for rul. Bat gogo Jehovah no hapi long Saul and Saul jealous tumas long David from God hapi long David. Bat Saul gohed for king for lelebet longtaem and hem iusim army bilong Israel for ronem David. Jehovah no duim eni samting for stretem diswan kwiktaem. Waswe, diswan mekem David kros long God? Waswe, David tingse hem no need for gohed faithful nao? Nomoa. Hem respectim Saul from hem luksavve God nao markem hem for king. Hem no laek for duim eni nogud samting go bak long Saul nomata hem garem chance for duim datwan.​—1 Sam. 24:​2-7.

13. Sapos wanfala man duim nogud samting long iumi or iumi feel nogud long hem, wanem nao bae helpem iumi gohed faithful?

¹³ Iumi savve lanem gud samting from wanem David hem duim! From iumi evriwan olsem wanfala kongregeson long world wea evriwan savve sin, samfala taem maet wanfala man duim nogud samting long iumi or hem no gohed faithful. Hem tru, iumi savve hao no eni samting savve spoelem evri pipol bilong Jehovah distaem. (Isa. 54:17) Bat wanem nao bae iumi duim sapos iumi feel nogud long wanfala brata or sista? Sapos iumi kros olowe long datfala brata or sista, diswan savve mekem iumi no gohed faithful long God. Iumi mas no garem tingting hao samting wea nara man duim, hem excuse for iumi kros long God or for no gohed faithful. (Ps. 119:165) Sapos iumi no givap taem iumi kasem hard taem, datwan bae helpem iumi gohed faithful.

14. Hao nao tingting bilong iumi sapos mining bilong scripture or hao iumi duim samting hem change?

¹⁴ Iumi showimaot iumi gohed faithful long Jehovah tu taem iumi no lukluk for mistek bilong nara man. God givim staka gud samting long pipol bilong hem distaem. Staka pipol nao worshipim Jehovah distaem. (Isa. 2:​2-4) Bat sapos mining bilong samfala scripture or hao iumi duim samfala samting hem change, hem gud for iumi followim nomoa. Iumi hapi tumas taem iumi minim gud moa samfala scripture. Hem olsem laet hem kakamap big. (Prov. 4:​18) Sapos iumi no minim gud wanfala samting wea change, iumi savve prea long Jehovah for helpem iumi minim datwan. Iumi obey nomoa and gohed faithful.

Waswe Sapos Man No Gohed Faithful?

15. Hu nomoa savve mekem iu no faithful?

¹⁵ Hem gud for iumi tingting strong long datfala kwestin! Iumi lanem finis long study bifor diswan why nao man mas faithful. Sapos man no faithful, hem bae no fren gud witim Jehovah and no garem eni hope for laef olowe. Tingim diswan: Wanfala man nomoa savve mekem iu no faithful. Iu nomoa savve duim datwan. Job luksavve long diswan. Hem sei: “Go kasem taem mi dae, mi bae no duim eni samting wea bae mekem mi no faithful!” (Job 27:5) Sapos iu garem sem tingting olsem Job and iu fren gud witim Jehovah, iu bae gohed faithful.​—Jas. 4:8.

16, 17. (a) Sapos man duim bigfala sin, wanem nao hem mas no duim? (b) Wanem nao hem mas duim?

¹⁶ Nomata olsem, samfala no gohed faithful long God. Olsem hem happen long taem bilong olketa aposol, samfala Christian distaem tu gohed for duim bigfala sin. Sapos samting olsem kasem iu, waswe, iu no wei nao? Nomoa. Wanem nao iu savve duim? Firstaem bae iumi storyim wanem nao iumi mas no duim. Hem wei bilong man for haedem sin bilong hem from dadi and mami, olketa brata and sista, or olketa elder. Bat Bible talem iumi olsem: “Man wea laek haedem sin bilong hem bae no savve haedem, bat man wea talemaot sin bilong hem and no duim moa bae kasem mercy.” (Prov. 28:13) Olketa wea laek haedem sin bilong olketa no duim stret samting nao from God lukim evri samting nomoa. (Readim Hebrews 4:​13.) Samfala tingse olketa savve worshipim Jehovah and long semtaem gohed for duim bigfala sin. Man olsem no faithful nao. Jehovah no hapi long pipol wea worshipim hem olsem and hem kros long olketa wea laea long wei bilong olketa.​—Prov. 21:27; Isa. 1:​11-​16.

¹⁷ Taem wanfala Christian duim bigfala sin, Bible talem finis wanem nao hem mas duim. Hem mas story witim olketa elder for helpem hem. Jehovah markem olketa elder hia for helpem olketa wea no fren gud witim God. (Readim James 5:​14.) Iu mas no fraet for kasem kaonsel or discipline bikos datwan nao bae helpem iu for fren bak moa witim Jehovah. Tingim man wea sik big. Sapos hem laek gud bak moa, hem bae no fraet for nila or operate!​—Heb. 12:11.

18, 19. (a) Wanem nao David duim wea showimaot iumi savve faithful moa long God? (b) Wanem nao iu barava laek for duim?

¹⁸ Waswe, man savve fren bak moa witim Jehovah? Waswe, hem savve faithful moa? Tingim David. Hem duim bigfala sin. Hem lukluk long woman bilong nara man gogo hem laekem woman hia nao. Hem durong witim datfala woman and hem killim dae hasband bilong woman hia tu. Taem hem duim olsem, hem no faithful nao, iaman? Bat waswe, hem no wei nao? David kasem discipline wea hem needim. Bihaen datwan, Jehovah showim mercy long David from hem repent. David kasem gud samting from datwan and hem obeyim God and gohed faithful moa long hem. Samting wea David duim showimaot disfala toktok long Proverbs 24:16 hem tru: “Nomata sapos gudfala man hem foldaon sevenfala taem, bae hem standap moa.” Wanem nao happen long David bihaen? Tingim samting wea Jehovah talem long Solomon abaotem David bihaen David hem dae. (Readim 1 Kings 9:4.) God no forgetim hao David hem faithful man. Tru tumas, Jehovah savve forgivim bigfala sin wea man duim.​—Isa. 1:​18.

¹⁹ Iaman, sapos iu gohed obeyim God from iu lovem hem, iu faithful nao. Gohed faithful. Sapos iu duim bigfala sin, iu mas repent and no duim moa datfala sin. Sapos iu gohed faithful, datwan hem barava spesol samting! Hem gud for iumi evriwan garem sem tingting olsem David. Hem sei: “Mi ia, mi bae gohed faithful.”​—Ps. 26:11.

[Footnote]

Wanem Nao Ansa Bilong Iu?

• Wanem nao iu savve duim for faithful?

• Wanem nao iu savve duim mekem iu gohed faithful?

• Wanem nao savve helpem man wea duim bigfala sin for faithful moa?

[Box long page 8]

‘HEM KAEN TUMAS’

Wanfala woman wea babule faev month nao talem datfala toktok taem woman wea hem no savve long hem duim kaenfala samting long hem from hem honest. Disfala woman wea babule hem lusim paos bilong hem long ples for drink coffee. Samting olsem 2,000 (U.S.) dollar nao stap long paos bilong hem. Hem no savve karem staka selen olsem evritaem. Hem talem olsem long wanfala niusman: “Ei, mi sorre fogud.” Bat wanfala young woman faendem datfala paos and hem kwiktaem lukaotem hu nao paos hia bilong hem. From hem no faendem, hem go givim long police and police nao faendem datfala woman wea babule. Woman hia hapi tumas and hem tok olsem: “Ei, datfala woman hem barava kaen tumas.” Why nao datfala young woman trae hard tumas for givim bak datfala selen? Niuspepa talem hao from woman hia hem wanfala Jehovah’s Witness, hem “honest bikos long religion wea hem big kam long hem.”

[Piksa long page 9]

Olketa young wan savve gohed faithful taem olketa kasem test

[Piksa long page 10]

David no faithful for lelebet taem, bat bihaen hem faithful moa