Lovem Tumas Haos Bilong Jehovah and Tingim Evritaem!
“Mi lovem tumas haos bilong iu and mi tingim evritaem.”—JOHN 2:17.
1, 2. Wanem nao Jesus duim long temple long 30 C.E., and why nao olsem?
TINGIM samting wea happen long taem bilong Pasova long 30 C.E. Sixfala month bifor datwan, Jesus start for duim ministry bilong hem. Taem hem go long Jerusalem, hem go long temple and hem lukim “olketa man . . . wea salem olketa buluka, sheepsheep, and kurukuru, and olketa man wea changem olketa difren selen tu sidaon long there.” Jesus tekem rope and hem wakem wanfala whip. Then hem iusim datwan for raosem olketa animal witim pipol wea salem olketa. Jesus kapsaetem tu selen and tebol bilong olketa wea changem olketa difren selen. Hem talem olketa wea salem olketa kurukuru for tekem go olketa samting hia from datfala ples.—John 2:13-16.
2 Samting wea Jesus duim showimaot hem barava tingim temple. Hem tok strong long olketa: “Haos bilong Dadi bilong mi hem no haos for iufala market insaed!” Taem olketa disaepol bilong Jesus lukim diswan, olketa tingim nao disfala toktok wea David talem bifor: “Mi lovem tumas haos bilong iu and mi tingim evritaem.”—John 2:16, 17; Ps. 69:9.
3. Wanem kwestin nao hem gud for iumi tingim?
3 Jesus barava tingim haos bilong God dastawe hem duim datfala samting. Distaem winim 7 million Christian showimaot olketa barava tingim haos bilong God tu. Hem gud for iumi wanwan tingim disfala kwestin: ‘Wanem moa mi savve duim for showimaot mi lovem haos bilong Jehovah and tingim evritaem?’ Iumi bae storyim wanem nao haos bilong God distaem, mekem iumi savve ansarem datfala kwestin. Bihaen, iumi bae storyim samfala man long Bible wea showimaot olketa lovem and tingim evritaem haos bilong God. Iumi savve “lane” from samting wea olketa duim and hem savve helpem iumi for barava tingim haos bilong God tu.—Rom. 15:4.
Haos Bilong God Long Bifor and Distaem
4. Temple wea Solomon wakem hem for wanem?
4 Long Israel bifor, haos bilong God nao hem temple long Jerusalem. Bat Jehovah no stap long there bikos hem sei: “Heven nao throne bilong mi, and earth hem ples for mi putim leg bilong mi. Waswe, iufala tingse iufala savve wakem haos for mi stap long hem? And waswe, iufala tingse iufala savve wakem ples for mi rest long hem? Nomoa nao.” (Isa. 66:1) Nomata olsem, temple wea Solomon wakem nao hem main ples wea pipol worshipim Jehovah and prea long hem.—1 Ki. 8:27-30.
5. Wanem nao haos bilong Jehovah distaem?
5 Haos bilong Jehovah distaem hem no wanfala building long Jerusalem or long eni nara ples. Bat hem olsem wanfala tokpiksa haos wea iumi savve worshipim God from Christ givim laef bilong hem for iumi. Evri pipol bilong God long earth nao worshipim Jehovah long disfala tokpiksa haos.—Isa. 60:4, 8, 13; Acts 17:24; Heb. 8:5; 9:24.
6. Hu nao olketa king long Judah wea showimaot olketa tingim evritaem tru worship?
6 Bihaen Israel divaed long tufala kingdom long 997 B.C.E., 4-fala long 19-fala king wea rulim Judah long south showimaot olketa tingim evritaem tru worship. Olketa nao Asa, Jehoshaphat, Hezekiah, and Josiah. Wanem important samting nao iumi savve lanem from olketa?
God Blessim Olketa wea Worshipim Hem Long Full Heart
7, 8. (a) Jehovah blessim iumi sapos iumi worshipim hem long wanem wei? (b) Wanem samting nao King Asa duim wea iumi mas keakea long hem?
7 Taem King Asa hem rul, Jehovah sendem olketa profet for leadim pipol bilong Hem mekem olketa savve faithful long hem. Bible storyim hao Asa herem toktok bilong profet Azariah, son bilong Oded. (Readim 2 Chronicles 15:1-8.) From Asa aotem olketa rabis samting wea pipol worshipim, datwan strongim pipol long Judah witim staka pipol long kingdom bilong Israel and olketa hipap tugeta long Jerusalem. Long datfala taem olketa disaed strong for worshipim Jehovah and faithful long hem. Bible sei: “Olketa mekem promis long Jehovah and evriwan singaot and blowim olketa trumpet witim horn. Evriwan long Judah hapi tumas taem olketa mekem disfala promis witim full heart bilong olketa. Olketa hapi tumas for lukaotem hem, so hem mekem olketa for faendem hem. And Jehovah gohed for mekem olketa stap gud witim evriwan.” (2 Chron. 15:9-15) Jehovah bae blessim iumi tu taem iumi worshipim hem long full heart bilong iumi.—Mark 12:30.
8 Nogud samting nao, gogo Asa kros tumas taem profet Hanani kaonselem hem. (2 Chron. 16:7-10) Waswe long iumi? Hao nao tingting bilong iumi taem olketa elder givim advaes long iumi or talem iumi for followim wanfala samting? Waswe, iumi kwiktaem followim kaonsel wea olketa talem from Bible and no kros?
9. Hu nao laek kam faetem Jehoshaphat and olketa long Judah? Wanem nao olketa duim taem datwan happen?
9 Jehoshaphat hem king long Judah long mek-10 century B.C.E. Olketa army bilong Ammon, Moab, and pipol long olketa maunten area bilong Seir laek faetem hem witim olketa long Judah. Nomata king hem fraet, wanem nao hem duim? Hem witim olketa man long Judah, witim waef and pikinini bilong olketa hipap long haos bilong Jehovah for prea. (Readim 2 Chronicles 20:3-6.) Olsem Solomon talem taem hem dedicatem temple, Jehoshaphat barava askem Jehovah olsem: “Plis God bilong mifala, panisim olketa. Mifala no strong for faetem disfala army. Mifala no savve wanem nao for duim, bat mifala luk go long iu nomoa for helpem mifala.” (2 Chron. 20:12, 13) Taem Jehoshaphat prea finis, spirit bilong Jehovah mekem Jahaziel, wanfala Levite “long kongregeson,” for talem olketa toktok for strongim olketa.—Readim 2 Chronicles 20:14-17.
10. (a) Hu nao Jehovah iusim for helpem Jehoshaphat and olketa long Judah? (b) Wanem nao iumi savve duim for showimaot iumi tinghae long olketa wea Jehovah iusim for leadim iumi?
10 Tru tumas, long datfala taem Jehovah iusim Jahaziel for talem Jehoshaphat and olketa long Judah wanem for duim. Distaem hem iusim “wakaman wea faithful and wise” for strongim iumi and leadim iumi. Dastawe hem important for iumi waka witim olketa elder and respectim olketa, bikos olketa waka hard for lukaftarem iumi and olketa followim wanem “wakaman wea faithful and wise” talem.—Matt. 24:45; 1 Thess. 5:12, 13.
11, 12. Wanem nao iumi lanem from samting wea happen long Jehoshaphat and olketa long Judah?
11 Jehoshaphat and pipol long Judah hipap tugeta for askem Jehovah for leadim olketa. So iumi tu mas evritaem hipap witim olketa brata and sista long olketa meeting. Sapos iumi kasem barava hard taem and iumi no savve wanem for duim, hem gud for iumi followim wanem Jehoshaphat and pipol long Judah duim. Olketa prea long Jehovah and barava trustim Hem. (Prov. 3:5, 6; Phil. 4:6, 7) Nomata sapos iumi stap seleva, olketa prea wea iumi talem long Jehovah bae helpem iumi no feel olsem iumi stap seleva bat olsem iumi stap witim “evri brata bilong [iumi] long world.”—1 Pet. 5:9.
12 Jehoshaphat and olketa long Judah followim wanem Jahaziel talem. Wanem nao kamaot from datwan? Olketa winim datfala faet and taem olketa go bak long Jerusalem, olketa “hapi tumas” and “olketa ringim enikaen guitar witim harp and blowim olketa trumpet taem olketa go long haos bilong Jehovah.” (2 Chron. 20:27, 28) From Jehovah iusim “wakaman wea faithful and wise” for leadim iumi, iumi respectim olketa and iumi praisem Jehovah witim olketa.
Lukaftarem Gud Ples wea Iumi Hipap for Meeting
13. Wanem waka nao Hezekiah duim taem hem start for rul?
13 Long first month wea Hezekiah hem rul, samting wea hem duim showimaot hem tingim evritaem tru worship. Hem start for wakem bak temple and startim moa tru worship long there. Hem iusim olketa priest and Levite for aotem olketa rabis samting from haos bilong God and klinim. Olketa duim datwan insaed 16-fala day. (Readim 2 Chronicles 29:16-18.) Samting wea olketa duim mekem iumi tingim waka bilong iumi for lukaftarem ples wea iumi hipap for meeting and for fixim olketa samting wea nogud. Taem iumi duim datwan, iumi showimaot iumi tingim evritaem tru worship. Staka taem iumi savve herem olketa story hao pipol barava tinghae long olketa brata and sista wea duim kaen waka olsem! Tru tumas, waka wea olketa duim hem barava mekhae long Jehovah.
14, 15. Wanem kaen waka nao mekem pipol praisem Jehovah? Storyim samfala example.
14 Long wanfala taon long England, olketa brata laek duim big waka for fixim Kingdom Hall. Bat neiba wea stap saed long Kingdom Hall hem againstim disfala waka. Olketa brata story long kaenfala wei long disfala man and sei olketa savve fixim wall wea divaedem haos bilong hem and Kingdom Hall. Olketa brata sei olketa bae duim disfala waka free nomoa. Olketa wakem wall gogo hem olsem niu wan nao. Man hia garem difren tingting nao taem hem lukim olketa brata duim datwan. Distaem hem savve lukluk kam long Kingdom Hall mekem no eniwan spoelem.
15 Long full world, pipol bilong Jehovah wakem olketa building for iumi worshipim hem. Olketa international servant (hem nao olketa brata and sista from nara kantri) olketa kam helpem olketa brata and sista for wakem olketa Kingdom Hall, Assembly Hall, and Bethel long kantri bilong olketa. Sam witim waef bilong hem Ruth go long staka kantri long Europe and Africa for help long kaen waka olsem. Olketa preach witim olketa brata tu long evri ples wea olketa go long hem. Sam storyim why nao hem laek go long olketa kantri for duim diskaen waka. Hem sei: “Taem mi story witim olketa brata wea waka bifor long Bethel long kantri bilong mi and long olketa nara kantri, mi lukim hao olketa hapi and barava laekem waka wea olketa duim. Diswan nao mekem mi laek duim waka wea mi duim distaem.”
Obeyim Wanem God Talem
16, 17. Wanem spesol waka nao pipol bilong God hapi for duim, and wanem nao kamaot from datwan?
16 Hezekiah wakem bak temple and startim moa Pasova tu wea Jehovah talem for olketa Israelite duim evri year. (Readim 2 Chronicles 30:1, 4, 5.) Hezekiah and olketa long Jerusalem askem evriwan long Judah, nomata olketa long kingdom long north tu, for kam long Pasova. Olketa man for ranran speed go nao witim olketa leta for invaetem pipol for kam.—2 Chron. 30:6-9.
17 Insaed tu-thri year wea go pas finis, iumi tu duim waka for invaetem pipol. Iumi givimaot olketa naes pepa wea askem olketa for kam hipap witim iumi long Memorial, from Jesus talem iumi for hipap olsem. (Luke 22:19, 20) Long Service Meeting nao iumi herem hao iumi savve duim disfala waka and iumi duim datwan. And Jehovah barava blessim waka wea iumi duim! Long 2008, winim 7 million Witness bilong Jehovah givimaot disfala pepa and from datwan, 17,790,631 pipol nao kam long Memorial!
18. Why nao hem important tumas for iu tingim evritaem tru worship?
18 Bible sei olsem abaotem Hezekiah: “Hem trustim Jehovah, God bilong Israel. No eni king long Judah wea hem rul firstaem or bihaen long hem, hem gud tumas olsem hem. And hem nating lusim Jehovah. Hem evritaem followim Jehovah and obeyim olketa law wea hem givim long Moses bifor.” (2 Ki. 18:5, 6) Hem gud for iumi tu followim wei bilong hem. Taem iumi tingim evritaem haos bilong God, datwan bae helpem iumi for “nating lusim Jehovah” and gohed garem hope for laef olowe.—Deut. 30:16.
Kwiktaem Followim Wanem Iumi Herem
19. Wanem nao iumi waka hard for duim long taem bilong Memorial?
19 Taem Josiah rul, hem tu redyim gud olketa samting mekem olketa Israelite long kingdom bilong Judah duim Pasova. (2 Ki. 23:21-23; 2 Chron. 35:1-19) Iumi tu mas redi gud mekem iumi savve go long olketa distrik convention, circuit assembly, spesol assembly day, and Memorial. Long samfala kantri, olketa brata hipap long Memorial nomata nogud samting savve kasem olketa. Olketa elder no forgetim eniwan long kongregeson. Olketa helpem olketa olo and olketa wea sik for kam long Memorial.
20. (a) Wanem nao happen taem King Josiah rul, and wanem nao hem duim? (b) Wanem nao hem gud for iumi tingim?
20 Taem olketa wakem bak temple long taem bilong King Josiah, Hae Priest Hilkiah “faendem buk bilong law bilong Jehovah wea Moses raetem.” Hem givim buk long Shaphan, wakaman bilong king, and Shaphan start for readim kam long Josiah. (Readim 2 Chronicles 34:14-18.) Wanem nao king duim? Semtaem nomoa hem brekem kaleko bilong hem for showimaot hem sorre tumas and talem faevfala man for go lukim woman profet Huldah for savve long tingting bilong Jehovah. God givim message long woman hia hao Hem nating hapi long pipol bilong hem long Judah wea worshipim olketa giaman god. Nomata Jehovah talem datwan, hem lukim hard waka wea Josiah duim for aotem olketa samting wea pipol iusim for worshipim idol. Jehovah hapi long hem and Josiah no kasem olketa nogud samting wea Jehovah talem bae happen long pipol bilong hem. (2 Chron. 34:19-28) Wanem nao iumi lanem from diswan? Iumi tu laek for olsem Josiah. Iumi mas kwiktaem followim wanem Jehovah talem and tingting strong long wanem nao savve happen sapos iumi kamap apostate and no faithful long God. And iumi savve Jehovah bae hapi long iumi taem iumi tingim evritaem tru worship olsem Josiah.
21, 22. (a) Why nao iumi mas lovem haos bilong Jehovah and tingim evritaem? (b) Wanem nao bae iumi storyim long study bihaen?
21 Asa, Jehoshaphat, Hezekiah, and Josiah showimaot gudfala wei for iumi followim. Olketa lovem haos bilong God and tingim evritaem tru worship. Iumi tu shud trustim Jehovah and waka hard for worshipim hem. Best samting for iumi duim wea bae mekem iumi hapi nao hem for obeyim wanem God talem and acceptim help and kaonsel wea iumi kasem from kongregeson and olketa elder.
22 Study bihaen diswan bae story abaotem strong wea iumi garem for preach long haos tu haos and hem bae strongim olketa young wan for worshipim Dadi bilong iumi. Iumi bae storyim tu wanfala samting wea Satan iusim for spoelem pipol and wanem nao bae helpem iumi for no duim datwan. Taem iumi followim evri samting hia wea Jehovah talem, iumi showimaot iumi followim Son bilong hem, Jesus. Bible sei olsem abaotem Jesus: “Mi lovem tumas haos bilong iu and mi tingim evritaem.”—Ps. 69:9; 119:111, 129; 1 Pet. 2:21.
Waswe, Iu Tingim Yet?
• Jehovah blessim iumi sapos iumi worshipim hem long wanem wei? Why nao olsem?
• Wanem nao iumi savve duim wea showimaot iumi trustim Jehovah?
• Sapos iumi tingim evritaem tru worship, long wanem wei nao datwan helpem iumi for obeyim wanem Jehovah talem?
[Piksa long page 9]
Wanem nao Asa, Jehoshaphat, Hezekiah, and Josiah duim wea showimaot olketa tingim evritaem tru worship?