Followim Jesus for Showimaot Love Taem Iumi Teach
“Ei, taem disfala man hem toktok, no eniwan hem fitim hem nao.”—JOHN 7:46.
1. Wanem nao tingting bilong pipol long hao Jesus hem teach?
IU TINGIM, masbi hem naes tumas for herem Jesus taem hem teachim pipol! Bible storyim tingting bilong pipol wea herem wanem hem teachim. Luke hem storyim hao pipol long hom bilong Jesus “barava sapraes long olketa nambawan toktok bilong [Jesus].” Matthew talem hao olketa wea herem Jesus taem hem givim Sermon Long Maunten, “olketa barava sapraes nao long hao hem teach.” And John storyim hao taem olketa police go for arrestim Jesus bat kam bak nating nomoa, olketa sei: “Ei, taem disfala man hem toktok, no eniwan hem fitim hem nao.”—Luke 4:22; Matt. 7:28; John 7:46.
2. Wanem nao Jesus duim taem hem teachim pipol?
2 Wanem olketa police talem hem tru tumas. Jesus hem nambawan Teacher winim eni nara man. Pipol minim wanem hem talem, and no eniwan savve argue witim kliafala wei wea hem teach. Jesus savve tumas for iusim olketa tokpiksa and askem olketa kwestin. Hem changem hao hem teach for fitim pipol wea garem bignem and pipol wea no garem bignem. Olketa tru samting wea hem teachim hem isi for pipol minim and barava helpem olketa. Bat hem no olketa samting hia nomoa wea mekem Jesus hem nambawan Teacher.
Love Nao Barava Important
3. Hao nao wei wea Jesus teach hem barava difren from olketa bigman bilong religion?
3 Luk olsem samfala Pharisee and man wea teachim law, olketa savve long staka samting and savve hao for teach tu. Why nao wei wea Jesus teach hem barava difren from olketa? Olketa bigman bilong religion long datfala taem no lovem pipol. Olketa ting daonem olketa and sei: “God bae finisim nomoa olketa pipol hia.” (John 7:49) Bat Jesus hem barava sorre tumas long pipol olsem, bikos olketa “garekil and stap olobaot olsem olketa sheepsheep wea no garem eni man for lukaftarem olketa.” (Matt. 9:36) Jesus hem tingim pipol and kaen long olketa. Nara samting, olketa bigman bilong religion no lovem God. (John 5:42) Bat Jesus lovem Dadi bilong hem long heven and hem hapi for duim samting wea Hem laekem. Olketa bigman bilong religion changem wanem God talem for fitim olketa seleva nomoa, bat Jesus tinghae long “toktok bilong God.” Hem teachim datwan long pipol, minim kam long olketa, obeyim toktok bilong God, and tok stret long olketa wea againstim datwan. (Luke 11:28) Tru tumas, Christ hem barava showimaot love. Hem tinghae long wanem hem teachim, hem lovem pipol, and hem showimaot love taem hem teachim olketa.
4, 5. (a) Why nao hem important for iumi showimaot love taem iumi teach? (b) Why nao hem important tu for savve long wanem iumi teachim and hao for teach?
4 Waswe long iumi? Taem iumi duim ministry and eni nara samting, iumi laek followim wei bilong Jesus. (1 Pet. 2:21) So goal bilong iumi nao hem for teachim pipol abaotem Bible and showimaot olketa wei bilong Jehovah, wea main wan nao hem love. Nomata sapos iumi savve long staka samting or lelebet nomoa, or iumi savve gud hao for teach or lelebet savve nomoa, love wea iumi showimaot long pipol savve mekem olketa interest. Sapos iumi laek helpem man for kamap disaepol, iumi mas followim wei bilong Jesus for showimaot love taem iumi teach.
5 Hem tru, sapos iumi laek for teach gud, iumi mas savve long wanem iumi teachim and hao for teach. Jesus helpem olketa disaepol bilong hem for duim tufala samting hia, and Jehovah iusim organization bilong hem for helpem iumi tu long diswan. (Readim Isaiah 54:13; Luke 12:42.) Nomata sapos iumi garem savve for teach, iumi mas showimaot love taem iumi teachim pipol. Taem iumi savve long wanem iumi teachim, hao for teach, and showimaot love, gud samting savve kamaot from datwan. Long olketa wanem wei nao iumi savve showimaot love taem iumi teach? Long wanem wei nao Jesus and olketa disaepol duim datwan? Bae iumi storyim olketa samting hia.
Iumi Mas Lovem Jehovah
6. Iumi savve story hao abaotem samwan wea iumi lovem?
6 Hem wei bilong iumi for story abaotem olketa samting wea iumi laekem tumas, and taem iumi duim olsem, pipol savve lukim hao iumi hapi tumas. Plande taem iumi duim olsem taem iumi story abaotem samwan wea iumi lovem. Iumi laek tumas for storyim wei bilong datfala man long olketa narawan. Iumi tok hae abaotem hem, respectim hem, and sapos pipol tok spoelem hem, iumi talem gud samting abaotem hem. Iumi duim olsem bikos iumi laekem narawan tu for laekem datfala man and olketa wei bilong hem.
7. From Jesus lovem God, wanem nao hem duim?
7 Iumi mas savve gud long Jehovah and lovem hem firstaem bifor iumi savve helpem olketa narawan for duim olsem. Man wea laek worshipim God mas lovem hem. (Matt. 22:36-38) Jesus showimaot gudfala wei for iumi followim. Hem lovem Jehovah long full heart, soul, strong, and evri savve bilong hem. Jesus savve gud long Dadi bilong hem long heven bikos hem stap witim hem for barava longfala taem. Dastawe Jesus hem sei: “Mi lovem Dadi long heven.” (John 14:31) Evri samting wea Jesus talem and duim showimaot hem lovem Dadi bilong hem. Hem evritaem duim olketa samting wea God laekem. (John 8:29) Hem tok againstim olketa bigman bilong religion wea laea tumas and sei olketa waka for God. Hem laek story abaotem Jehovah and helpem pipol for savve long God and lovem hem.
8. From olketa disaepol bilong Jesus lovem God, wanem nao olketa duim?
8 Olketa disaepol long first century tu lovem Jehovah olsem Jesus. Diswan mekem olketa strong for preachim gud nius and no fraet for duim datwan. Nomata olketa bigman bilong religion againstim olketa, evriwan long Jerusalem herem teaching bilong olketa disaepol. Hem hard tumas for olketa no storyim samting wea olketa lukim and herem. (Acts 4:20; 5:28) Olketa savve Jehovah bihaenem olketa and hem bae blessim olketa. Tru tumas, Jehovah barava blessim olketa! Nomata hem no 30 year yet bihaen Jesus hem dae, aposol Paul sei olketa preachim gud nius long “evri pipol long world.”—Col. 1:23.
9. Wanem nao iumi savve duim for strongim love wea iumi garem for God?
9 Sapos iumi laek teach gud, iumi mas gohed strongim love wea iumi garem for God. Hao nao iumi savve duim datwan? Iumi mas prea long God evritaem. Iumi mas readim Bible, olketa buk bilong iumi, and go long olketa meeting tu. Taem iumi gohed for lane abaotem God, iumi bae strongim love wea iumi garem for hem. Taem iumi talem and duim samting wea showimaot iumi lovem God, pipol bae lukim datwan and maet olketa laek savve long Jehovah.—Readim Psalm 104:33, 34.
Tinghae Long Wanem Iumi Teachim
10. Wanem nao mekem man hem gudfala teacher?
10 Man wea hem gudfala teacher hem tinghae long wanem hem teachim. Hem mas bilivim samting wea hem teachim hem tru, hem important, and savve helpem man. Sapos hem tinghae long wanem hem teachim, pipol wea hem teachim bae luksavve long diswan and laek duim samting wea olketa lanem. Bat sapos man hem no tinghae long wanem hem teachim, olketa wea hem teachim bae no tinghae long datwan tu! Example wea iu showimaot taem iu teach savve helpem man or nomoa. Jesus hem sei: “Student wea teacher barava lanem hem gud, bae hem olsem teacher bilong hem nao.”—Luke 6:40.
11. Why nao Jesus tinghae long wanem hem teachim?
11 Jesus hem tinghae long wanem hem teachim. Hem savve hem garem important samting for teachim, hem nao for teachim tru samting abaotem Dadi bilong hem long heven, “toktok bilong God,” and ‘toktok wea savve mekem man laef olowe.’ (John 3:34; 6:68) Olketa tru samting wea Jesus teachim hem olsem wanfala braet laet wea showim wanem hem gud and wanem hem nogud. Hem strongim and givim hope long pipol wea olketa bigman bilong religion laea long olketa and wea kasem hard taem from Satan. (Acts 10:38) Wanem Jesus hem teachim and evri samting wea hem duim showimaot hem tinghae long truth.
12. Hao nao tingting bilong aposol Paul abaotem gud nius?
12 Long sem wei wea Jesus tinghae long tru samting, olketa disaepol bilong hem barava tinghae long tru samting abaotem Jehovah and Christ, dastawe no eniwan savve stopem olketa for no storyim datwan long narawan. Paul sei olsem long olketa Christian long Rome: “Mi laekem tumas for talemaot gud nius . . . Mi nating shame long disfala gud nius bikos hem nao paoa bilong God for sevem evriwan wea garem faith.” (Rom. 1:15, 16) Paul ting long waka wea hem duim for talemaot truth hem wanfala privilege. Hem sei: “God hem kaen tumas and hem givim mi disfala waka. Hem sendem mi go long olketa wea no Jew for talemaot gud nius abaotem olketa gudfala samting wea Christ duim wea tingting bilong iumi no savve kasem.” (Eph. 3:8) Paul hapi tumas taem hem teachim pipol abaotem Jehovah and plan bilong Hem.
13. Why nao iumi tinghae long gud nius?
13 Gud nius wea Bible storyim hem helpem iumi for savve long Jehovah and fren witim hem. Bible savve ansarem olketa important kwestin wea pipol askem and hem savve mekem iumi changem wei bilong iumi, givim iumi hope, and strongim iumi taem iumi kasem hard taem. Nara samting tu, hem helpem iumi for hapi and kasem laef olowe. Gud nius long Bible hem winim eni savve long disfala world. Hem nambawan samting wea God givim long iumi and wea mekem iumi barava hapi. And iumi savve hapi go moa taem iumi storyim gud nius long narawan.—Acts 20:35.
14. Wanem nao iumi savve duim mekem iumi tinghae go moa long wanem iumi teachim?
14 Wanem nao iu savve duim mekem iu tinghae go moa long gud nius? Taem iu readim Bible, ting raonem wanem iu readim. Taem iu read abaotem preaching waka wea Jesus duim or wea aposol Paul duim, trae for tingim olsem iu long there and iu waka witim olketa. Tingim olsem iu stap long niu world, and laef bilong iu bae barava difren from distaem. Tingim olketa gud samting wea iu kasem finis from iu lisin long gud nius. Sapos iu gohed tinghae long gud nius wea iu lanem, pipol wea iu teachim bae luksavve long diswan. So hem important for ting raonem wanem iumi lanem and lukluk gud long hao iumi teach.—Readim 1 Timothy 4:15, 16.
Iumi Mas Lovem Pipol
15. Why nao teacher mas lovem olketa student bilong hem?
15 Man wea teach gud hem story long wei wea hem mekem olketa student laek for lane and talemaot tingting bilong olketa. Hem laek teachim olketa student bikos hem tingim olketa. Hem changem hao hem teach for fitim olketa student and wanem olketa savve long hem. Hem tingim wanem olketa fit for duim and living bilong olketa. Sapos teacher lovem olketa student olsem, olketa bae luksavve long datwan. Teacher bae hapi for teach and olketa student bae hapi for lane.
16. Wanem nao olketa samting wea Jesus duim wea showimaot hem lovem pipol?
16 Jesus showimaot hem lovem pipol. Big samting wea showimaot datwan nao hem taem hem dae for olketa man mekem olketa savve kasem laef olowe. (John 15:13) Taem Jesus duim ministry bilong hem, hem barava helpem pipol and teachim olketa abaotem Jehovah. Hem no weitim pipol for kam long hem, bat hem baeleg go long olketa farawe ples for storyim gud nius long olketa. (Matt. 4:23-25; Luke 8:1) Hem isisi witim pipol and hem showimaot hem tingim olketa. Taem olketa disaepol duim samting wea no stret, hem showimaot love taem hem stretem olketa. (Mark 9:33-37) Hem savve olketa bae duim gud disfala waka for preachim gud nius and datwan strongim olketa. Jesus hem nambawan teacher wea showimaot love. From hem lovem olketa disaepol bilong hem, datwan mekem olketa for lovem hem tu and obeyim olketa law bilong hem.—Readim John 14:15.
17. Wanem nao olketa disaepol bilong Jesus duim wea showimaot olketa lovem pipol?
17 Olketa disaepol bilong Jesus tu barava lovem and tingim pipol taem olketa preach. Olketa waka for helpem pipol and gohed for preachim gud nius nomata pipol spoelem olketa and laek killim olketa dae. Olketa barava lovem pipol wea lisin long gud nius! Wanem aposol Paul talem barava showimaot hem lovem pipol. Hem sei: “Mifala lukaftarem iufala olsem wanfala mami hem lukaftarem gud pikinini wea hem susum. Mifala lovem iufala tumas and laek tumas for helpem iufala, dastawe mifala talem gud nius abaotem God long iufala and willing for givim laef bilong mifala for iufala.”—1 Thess. 2:7, 8.
18, 19. (a) Why nao iumi hapi tumas for iusim taem, strong, and material samting bilong iumi for duim preaching waka? (b) Storyim example wea showimaot pipol lukim love wea iumi showimaot.
18 Distaem tu Olketa Jehovah’s Witness preach long evri ples mekem olketa savve faendem pipol wea laek savve long God and worshipim hem. Long 17 year wea go pas, iumi iusim winim 1 billion hour evri year for preach and teachim pipol for kamap disaepol. Iumi gohed for duim disfala waka and hapi tumas for iusim taem, strong, and olketa material samting bilong iumi for duim datwan. Iumi garem sem tingting olsem Jesus. Iumi savve Dadi bilong iumi long heven laekem pipol for savve long tru samting wea bae mekem olketa kasem laef olowe. (John 17:3; 1 Tim. 2:3, 4) From iumi lovem pipol, iumi laek helpem olketa for savve long Jehovah and lovem hem.
19 Pipol lukim love wea iumi showimaot. Tingim samting wea wanfala pioneer sista long America hem duim. Hem raetem leta for strongim pipol wea lusim samwan wea olketa lovem. Wanfala man raet kam bak long hem and hem sei: “Mi sapraes bikos mi nating tingim man wea mi no savve long hem bae raet kam long mi for strongim mi taem mi kasem hard taem. Masbi iu raetem leta olsem bikos iu lovem pipol and lovem God wea helpem pipol long laef bilong olketa.”
20. Sapos iumi showimaot love taem iumi teach, wanem nao bae iumi kasem?
20 Wanfala man long bifor hem sei taem man laekem tumas wanem hem duim and hem garem savve for duim datwan, hem bae wakem samting wea nambawan. Taem iumi teach, iumi trae for helpem student for savve long Jehovah and for lovem hem. Tru tumas, sapos iumi laek teach gud, iumi mas lovem God, tinghae long tru samting wea iumi teachim, and lovem pipol. Taem iumi garem love olsem and showimaot datwan long ministry, iumi bae hapi from iumi helpem pipol and iumi followim wei bilong Jesus. Jehovah tu bae hapi long iumi.
[Piksa long page 15]
Why nao wei wea Jesus teach difren from olketa man wea teachim law and olketa Pharisee?
[Piksa long page 18]
Man wea laek teach gud mas savve long wanem hem teachim, hao for teach, and lovem pipol
[Piksa long page 18]
Wanem Nao Ansa Bilong Iu?
• Taem iumi teachim gud nius long pipol, why nao iumi mas . . .
lovem God?
tinghae long wanem iumi teachim?
lovem pipol wea iumi teachim?