Waswe, Iu Savve Finis?

Wanem nao olketa nara pruv wea Bible no storyim wea showimaot Jesus hem wanfala man wea laef bifor?

▪ Samfala man for raet, wea stap no longtaem bihaen Jesus hem dae, story abaotem hem. Wanfala long olketa man hia hem Cornelius Tacitus, wea raetem history bilong Rome taem olketa emperor rul. Taem wanfala fire spoelem Rome long 64 C.E., Tacitus herem story hao Emperor Nero nao duim datwan. And Tacitus sei, Nero hem blamem wanfala grup wea staka kolem olketa Christian nao startim datfala fire. Tacitus sei moa olsem: “Pontius Pilate wea hem bigman long taem wea Tiberius hem rul nao killim dae Christ, man wea datfala grup nemim olketa seleva followim.”​—Annals, XV, 44.

Man for raetem history Flavius Josephus tu story abaotem Jesus. Taem Josephus storyim olketa samting wea happen long samting olsem 62 C.E., taem Roman governor long Judea Festus hem dae, go kasem taem Albinus, man wea changem hem start for rul, Josephus sei, Hae Priest Annas hipimap olketa judge bilong Sanhedrin and tekem kam James front long olketa, brata bilong Jesus wea olketa kolem hem Christ, and samfala narawan.”​—Jewish Antiquities, XX, 200 (ix, 1).

Why nao olketa kolem Jesus long Christ?

▪ Olketa Gospel storyim, taem angel Gabriel kam long Mary for talem bae hem babule, hem talem Mary for nemim son bilong hem long Jesus. (Luke 1:​31) Staka long olketa Jew wea stap long datfala taem tu iusim datfala nem. Man for raetem history Josephus, raet abaotem 12-fala pipol wea Bible no storyim wea garem datfala nem. Olketa kolem son bilong Mary hem “Jesus bilong Nazareth” wea minim Jesus wea kam from Nazareth. (Mark 10:47) Nara nem bilong hem tu “datfala Christ,” or Jesus Christ. (Matthew 16:16) Wanem nao datwan minim?

Datfala English word “Christ” hem kam from wanfala Greek word Khri·stosʹ wea semsem witim datfala Hebrew word Ma·shiʹach (Messiah). Tufala word hia hem minim “Anointed Wan.” Olketa iusim datfala title tu for olketa narawan wea stap laef bifor Jesus. Tingim, Moses, Aaron and King David, olketa tu kasem anointing, wea minim God givim long olketa paoa and bigfala waka for duim. (Leviticus 4:3; 8:​12; 2 Samuel 22:51; Hebrews 11:24-​26) Jesus, Messiah wea olketa profesi story abaotem, hem nao main wan wea Jehovah markem. So, hem fitim for Jesus kasem disfala nem ‘Christ, Son bilong datfala God wea laef.’​—Matthew 16:16; Daniel 9:​25.

[Piksa long page 15]

Piksa bilong Flavius Josephus wea olketa paintim