Waka wea Mekem Mifala Satisfae

MITUFALA Gwen start for lanem hao for dance taem mitufala faev year nomoa. Mitufala no savve long mitufala yet long datfala taem. Gogo, mitufala evriwan disaed for iusim laef bilong mifala for duim ballet dance. Taem mifala start for kasem bignem long datfala waka, mifala stop nao. Why nao mifala disaed for duim olsem?

David: Mi born long 1945 long Shropshire, long England. Dadi bilong mi garem wanfala farm long wanfala kwaet area. Bihaen mi kam bak from skul, mi savve laekem tumas for go feedim olketa kokorako and kolektem egg bilong olketa, and tu, for lukaftarem olketa buluka and olketa sheepsheep. Long taem bilong skul holiday, mi savve help for harvestim kaikai wea mifala plantim long farm, and samfala taem mi savve draevem olketa tractor tu.

Bat gogo, mi start for interest long nara samting. Dadi bilong mi lukim taem mi smol yet mi savve laekem tumas for dance taem mi herem music. So taem mi faev year, hem talem mami for tekem mi go long wanfala class for lanem tap dance. Teacher bilong mi sei bae mi fit for duim ballet dance, so hem lanem mi tu long datfala dance. Taem mi 15 year, mi kasem scholarship for go long Royal Ballet Skul long London. Mi meetim Gwen long datfala skul, and Gwen nao partner bilong mi for dance tugeta evritaem.

Gwen: Mi born long London long 1944. Taem mi smol yet mi biliv long God. Mi readim Bible bat hem no isi for mi minim. Taem mi faev year, mi attendim wanfala class for lanem hao for dance. Sixfala year bihaen, mi winim wanfala competition wea kamap long Britain, and prize wea mi kasem hem for joinim The Royal Ballet Skul long London. Disfala skul hem stap long White Lodge, wanfala bigfala naes haos long Richmond Park klosap long London. Mi go for skul long there and long semtaem mi kasem training for duim ballet dance. Taem mi 16 year, mi kamap wanfala senior student long The Royal Ballet Skul long London, and long there nao mi meetim David. Tu-thri month bihaen, mifala dance long olketa opera show long Royal Opera Haos long Covent Garden, long London.

David: Olsem Gwen talem finis, disfala waka wea mifala duim hem mekem mifala go dance long Royal Opera Haos and witim London Festival Ballet company (wea distaem hem English National Ballet). Wanfala teacher bilong mifala long Royal Ballet Skul startim wanfala dance company long Wuppertal, long Germany, and hem chusim mitufala Gwen for dance for company bilong hem. Long olketa year wea mifala dance, mifala savve dance long plande ples long world, and mifala dance witim olketa wea pipol long world savve long olketa olsem Margot Fonteyn and Rudolf Nureyev. Waka hia hem mekem mifala for praod, and hem kamap main samting long laef bilong mitufala.

Gwen: Dance hem kamap main samting long laef bilong mi. Goal bilong mitufala David hem for garem bignem. Mi savve laekem taem pipol askem mi for saenem autograph bilong mi, givim mi flaoa, and for herem taem audience klap for mi. Staka pipol wea mi waka witim olketa savve durong, smoke, and drunk. Olsem samfala narawan wea garem sem waka olsem mi, mi bilivim samfala samting wea mi keepim hem garem magic paoa for helpem mi.

MIFALA DUIM DIFREN SAMTING LONG LAEF

David: Bihaen mifala dance for staka year, mi taed nao for travel long staka difren ples. From mi growap long farm, mi laek for garem moa kaen simpol laef olsem. So long 1967, mi lusim waka bilong mi for dance and go waka long wanfala big farm wea klosap long dadi and mami bilong mi. Mi rentim wanfala smol haos wea stap long datfala farm. Then mi ringim Gwen and askem hem for maritim mi. From Gwen kasem hae position long waka bilong hem for dance, datwan hem big samting for hem disaedem. Nomata olsem, Gwen agree for maritim mi and hem kam stap witim mi long farm, wea datwan hem laef wea hem no getius long hem.

Gwen: Hem no isi for stap long farm. Wei for lukaftarem olketa buluka and feedim olketa pigpig and kokorako nomata taem weather hem nogud, hem samting wea mi no getius long hem. David go duim wanfala course for naenfala month saed long farming, and mi savve stap seleva nomoa long haos go kasem taem hem kam bak long naet. Long datfala taem mitufala garem wanfala gele wea nem bilong hem Gilly. David encouragem mi for lane for draev, and wanday mi draev go long wanfala taon wea klosap. Long there mi lukim Gael, wanfala woman wea mi meetim taem hem waka long wanfala stoa klosap long ples wea mifala stap.

Gael invaetem mi for go drink tea long haos bilong hem. Mitufala lukluk long olketa wedding foto, and long wanfala foto bilong hem mi lukim wanfala grup standap aotsaed long Kingdom Hall. Mi askem hem wanem kaen church nao datwan. Taem Gael sei hem and hasband bilong hem tufala Jehovah’s Witness, mi hapi tumas. Mi tingim wanfala aunty bilong mi tu hem wanfala Witness. Bat mi tingim tu hao dadi bilong mi barava kros long hem and savve torowem olketa buk bilong hem long rabis. Mi no minim why nao dadi bilong mi wea hem kaenfala man hem kros tumas long aunty bilong mi wea hem naesfala woman.

Mi hapi mi garem chance for savve wanem aunty bilong mi bilivim and hao hem difren from olketa nara church. Gael showim mi olketa tru samting wea Bible teachim. Mi sapraes for lukim staka teaching olsem Trinity and soul wea no savve dae, no stap insaed long Bible. (Eccl. 9:5, 10; John 14:28; 17:3) Long datfala taem tu, hem firstaem bilong mi for lukim nem bilong God, Jehovah, insaed long Bible.—Ex. 6:3.

David: Gwen storyim long mi wanem hem lanem. Mi tingim taem mi smol yet dadi bilong mi sei mi shud readim Bible. So mitufala Gwen agree for Gael and hasband bilong hem, Derrick, for studyim Bible witim mifala. Bihaen sixfala month, mifala muv go long wanfala smol farm long Oswestry, wea stap tu long Shropshire province. Long there, Deirdre, wanfala sista gohed study witim mifala. From mifala busy for lukaftarem farm, long firstaem mifala no gohed gud tumas long study bilong mifala. Bat gogo, mifala start for followim wanem mifala lanem.

Gwen: Wanfala big samting wea mi mas winim nao hem wei wea mi bilivim samfala samting wea mi keepim hem garem magic paoa for helpem mi. Isaiah 65:11 helpem mi for luksavve long tingting bilong Jehovah long olketa wea bilivim kaen samting olsem. For lusim olketa samting hia hem tek taem and mi mas prea staka taem. Matthew 23:12 hem sei: “Man wea mekhae long hemseleva bae God mekem hem for hambol, bat man wea hambol bae God mekhae long hem.” Scripture hia helpem mi for luksavve wanem kaen man nao Jehovah hapi long hem. Taem mi lanem God hem givim spesol son bilong hem olsem wanfala sakrifaes bikos hem lovem iumi, datwan mekem mi laek for worshipim hem. Mifala garem nara gele moa, and mi hapi tumas for savve famili bilong mifala savve laef olowe long paradaes earth.

David: Taem mi lanem hao olketa Bible profesi kamap tru, datwan mekem mi barava sure diswan nao truth. Samfala example nao hem olketa profesi long Matthew chapter 24 and long Bible buk Daniel. Mi luksavve wei for fren witim Jehovah hem winim eni nara samting long disfala world. So mi no aftarem nao olketa samting long world. Mi luksavve mi mas tingim tu waef and tufala dota bilong mi. Philippi 2:4 mekem mi luksavve mi shud no tingim miseleva nomoa and goal bilong mi for garem bigfala farm. Bat for worshipim Jehovah nao shud main samting long laef bilong mi. Mi stop for smoke. For mifala go long meeting evri Saturday evening hem no isi bikos mifala mas travel 10 kilometer and datfala taem nao mifala savve tekem milk from olketa buluka. Nomata olsem, from bigfala sapot bilong Gwen, mifala nating misstim eni meeting. And tu, mifala tekem olketa dota bilong mifala long preaching evri Sunday morning, bihaen mifala tekem milk from olketa buluka.

Olketa relative no hapi long wanem mifala duim. Dadi bilong Gwen no story witim hem for sixfala year. Dadi and mami bilong mi tu trae for stopem mifala for no associate witim olketa Witness.

Gwen: Jehovah helpem mifala for winim olketa hard taem hia. And gogo, olketa brata and sista long Oswestry Kongregeson kamap olsem famili bilong mifala and barava sapotim mifala. (Luke 18:29, 30) Mitufala dedicate long Jehovah and baptaes long 1972. From mi laek for helpem staka pipol moa for lanem truth, mi start for pioneer.

WAKA WEA MEKEM MIFALA SATISFAE

David: Long olketa year wea mifala waka long farm mifala barava waka hard. Mifala trae for showimaot gudfala example for olketa gele bilong mifala saed long worship. Gogo mifala stop for ranem datfala farm, bikos mifala no kasem nao sapot from gavman. Long datfala taem mifala no garem eni ples for stap or waka for selen, and mek-thri dota bilong mifala hem just wan year nomoa, so mifala prea long Jehovah for helpem and leadim mifala. For kasem selen mifala disaed for startim wanfala class for lanem pipol hao for dance. Gud samting kamaot from wei wea mifala putim olketa spiritual samting first long laef bilong mifala. Mifala barava hapi taem thrifala gele bilong mifala evriwan duim pioneer waka taem olketa finis skul. Gwen tu hem pioneer, so hem savve helpem olketa gele long pioneer waka bilong olketa.

Bihaen tufala gele bilong mifala, Gilly and Denise, tufala marit, mifala klosim datfala class for lanem pipol hao for dance. Mifala raet go long branch office and askem olketa for talem mifala eni ples wea needim help. Olketa talem mifala samfala kongregeson wea stap long southeast long England nao needim help. Long datfala taem Debbie, wanfala dota bilong mitufala nomoa stap yet witim mifala, so mi tu start for pioneer. Bihaen faevfala year, branch askem mifala for helpem olketa narafala kongregeson moa. Bihaen Debbie hem marit, for tenfala year mitufala duim construction waka long Zimbabwe, Moldova, Hungary, and Côte d’Ivoire. Then mifala kam bak long England for joinim construction waka long London Bethel. From mi waka long farm bifor, olketa askem mi for help long Bethel farm wea olketa garem long datfala taem. Distaem mitufala pioneer long northwest long England.

Gwen: Mitufala enjoyim waka for duim ballet dance bat mifala duim for short taem nomoa. Wei for dedicate long Jehovah hem mekem mifala barava hapi, and mifala bae worshipim hem for olowe. Mitufala still partner distaem, no for dance bat for pioneer tugeta. Mifala barava hapi for helpem staka pipol for lanem truth wea savve sevem laef bilong olketa. Diswan hem winim wei for garem bignem long world. (2 Cor. 3:1, 2) Sapos mifala no faendem truth, only samting wea mifala bae garem distaem hem olketa old foto, olketa old theater program, and olketa memory bilong olketa taem wea mitufala dance bifor.

David: Wei for worshipim Jehovah barava helpem mifala for garem gudfala laef. Hem helpem mi for kamap gudfala dadi and hasband tu. Bible sei Miriam, King David, and olketa narawan, olketa dance taem olketa hapi. And mitufala laek for dance witim olketa narawan insaed niu world bilong Jehovah.—Ex. 15:20; 2 Sam. 6:14.