Thrifala Kwestin Wea Changem Laef Bilong Mi

LAEF BILONG MI BIFOR:

Mi growap long Ancram, wanfala smol taon long New York, U.S.A. Long datfala taon, pipol garem olketa farm wea olketa keepim buluka. Olketa buluka nao staka winim pipol wea stap long there.

Wanfala church nomoa hem stap long datfala taon, and famili bilong mifala savve go prea long there. Evri Sunday morning Grandadi bilong mi klinim shoe bilong mi, and then mi go long Sunday skul. Mi tekem smol white Bible wea granmami bilong mi givim mi. Dadi and mami teachim mi and brata and sista bilong mi for waka hard, showimaot respect, helpem olketa narawan, and for tinghae long olketa gud samting wea mifala kasem.

Taem mi big, mi muv go long nara ples and kamap skulteacher long there. Mi garem staka kwestin abaotem God and abaotem laef bilong iumi olketa man. Mi lukim samfala student bilong mi olketa kleva tumas. Olketa narawan garem lelebet savve bat mas waka hard. Samfala disable bat olketa narawan savve duim enikaen sports. Mi tingse diswan hem no stret. Samfala taem parents bilong olketa student wea disable savve sei olsem, “Diswan hem will bilong God for pikinini bilong mi.” Bat mi laek for savve why nao God letem samfala pikinini for disable and olketa narawan no olsem. Mi tingse olketa pikinini hia no duim eni rong samting mekem olketa kasem datwan.

Mi no barava satisfae long wanem mi duim long laef bilong mi. Nomata famili bilong mi hem gud, mi go long olketa gud skul, and mi duim waka wea mi barava laekem, mi laek for duim samfala samting moa. Maet bae mi marit and garem olketa pikinini, garem naesfala haos and gohed waka go kasem taem mi retire, and gogo bae mi olo nao. Bat mi laek for savve sapos laef hem olsem nomoa.

BIBLE CHANGEM LAEF BILONG MI:

Wanfala taem mi and samfala nara teacher travel go long samfala kantri long Europe. Mifala go long samfala big church olsem Westminster Abbey, Notre-Dame de Paris, and Vatican, and plande smolfala church tu. Taem mi go long olketa church hia mi askem olketa kwestin wea mi garem abaotem God and laef. Bihaen mi kam bak long hom long Sloatsburg, New York, mi go long samfala nara church for askem olketa sem kwestin. Bat mi no kasem eni ansa wea here stret long mi.

Wantaem wanfala student wea 12-year askem mi thrifala kwestin. First samting, hem askem mi sapos mi savve hem wanfala Jehovah’s Witness. Mi sei ia, mi savve long datwan. Mek-tu samting, hem askem mi sapos mi laek for savve abaotem Olketa Jehovah’s Witness. Mi sei ia. Mek-thri samting, hem askem address bilong mi. Taem mi talem hem, mitufala just savve mitufala stap klosap long each other. Mi no luksavve thrifala kwestin bilong datfala young gele bae barava changem laef bilong mi.

No longtaem bihaen, hem raedem baesikol bilong hem for kam long haos bilong mi and hem start for studyim Bible witim mi. Mi askem hem olketa sem kwestin wea mi askem long olketa bigman bilong olketa church. Bat disfala gele hem showim mi olketa scripture long Bible wea barava ansarem olketa kwestin bilong mi wea mi nating savve bifor.

Mi barava hapi and satisfae long wanem mi lanem long Bible. Taem mi readim 1 John 5:19 mi luksavve long wanfala samting. Hem sei: “Full world hem stap long paoa bilong Satan.” Mi hapi taem mi savve God no laekem pipol for safa and hem bae finisim datwan. (Revelation 21:3, 4) Taem samwan explainim gud olketa teaching long Bible hem isi nomoa for minim. Mi luksavve nomata gele wea teachim mi hem 12 year nomoa, hem teachim mi olketa tru samting.

Nomata olsem, mi laek for savve sapos olketa Witness followim wanem olketa talem. Olsem example, datfala young gele hem sei olketa tru Christian olketa patient and kaen long narawan. (Galatia 5:22, 23) Mi laek for lukim sapos hem garem olketa wei hia. Wanfala taem, mi disaed for kam leit lelebet for study bilong mitufala. Mi laek lukim sapos hem bae weit for mi. And sapos hem weitim mi, waswe, bae hem kros long mi? Taem mi kasem haos, mi lukim hem sidaon long ladder for weitim mi. Hem ran kam long mi and sei: “Mi ting for go bak long haos for talem mami bilong mi for hem ringim police and hospital for faendemaot sapos eni samting happen long iu. Mi wari bikos no enitaem iu leit olsem!” Datwan mekem mi for luksavve hem patient and kaen.

Long narataem, mi askem hem wanfala kwestin wea mi tingse bae hem hard for wanfala pikinini for ansarem. Mi laek for lukim sapos hem bae guessim ansa nomoa. Taem mi askem hem datfala kwestin, hem no guessim ansa bat hem lukluk strong long mi and hem sei: “Datwan hem wanfala hard kwestin. Bae mi raetem mekem mi askem mami and dadi bilong mi for helpem mi long diswan.” Long next taem wea hem kam for mitufala study, hem tekem kam wanfala copy bilong The Watchtower wea garem ansa for kwestin bilong mi. Mi laekem wei wea olketa pablikeson bilong olketa Witness iusim Bible for ansarem evri kwestin bilong mi. Mitufala gohed for study, and bihaen wanfala year mi baptaes and kamap wanfala Jehovah’s Witness.a

GUD SAMTING WEA MI KASEM:

Taem mi savve long olketa tru samting long Bible, mi laek for storyim datwan long evriwan. (Matthew 12:35) Firstaem, olketa long famili bilong mi no hapi from mi kamap wanfala Jehovah’s Witness. Gogo olketa start for acceptim datwan and mami bilong mi start for studyim Bible. Nomata hem no baptaes bifor hem dae, mi sure hem disaed finis for worshipim Jehovah.

Long 1978, mi maritim Elias Kazan wea hem wanfala Witness. Long 1981, mitufala kasem invitation for waka long Bethel long United States.b Sorre samting nao, bihaen mitufala waka long there for fofala year nomoa, Elias hem dae. Nomata mi widow, mi gohed waka long Bethel. Datwan helpem mi for gohed busy and for no sorre tumas.

Long 2006, mi maritim Richard Eldred wea hem waka long Bethel tu. Mitufala hapi for garem privilege for gohed waka long Bethel. From mi savve long olketa tru samting abaotem God, mi kasem nao ansa for olketa kwestin bilong mi and mi iusim gud laef bilong mi. Hem olsem bikos long thrifala kwestin wea datfala gele askem long mi.