Fofala Man wea Raedem Horse​—Hao Nao Olketa Affectim Iu?

Story insaed Bible abaotem fofala strong horse and olketa man wea raedem olketa horse hia hem barava klia! Hem olsem iu herem saond bilong olketa horse hia taem olketa raed go pas! Firstfala horse kala bilong hem white. Man wea raedem hem wanfala King wea just start for rul. Horse wea kam bihaen long hem kala bilong hem red. Man wea raedem kasem paoa for aotem peace from earth. Mek-thri horse kala bilong hem blak. Man wea raedem holem wanfala scale and wanfala voice hem talem message abaotem wei wea kaikai bae short. Mek-foa horse kala bilong hem luk nogud olsem man wea sik wea diswan piksarem olketa nogud sik and olketa nara samting wea savve killim man dae. Dae nao nem bilong man wea sidaon antap long hem and Grev hem go followim hem, wea hem nao ples wea evri man wea dae stap long hem!​—Revelation 6:1-8.

“Firstaem wea mi read abaotem fofala man wea raedem horse, mi barava fraet. Mi tingse Judgment Day hem kam nao and bikos mi no redi for datwan, mi savve bae mi bae dae.”​—Crystal.

“Mi interest tumas long fofala man wea raedem olketa horse hia wea garem difren kala. Taem mi savve long mining bilong disfala vision, evri samting hia just mek sense long mi nao.”​—Ed.

Waswe, iu tu garem sem feeling olsem Crystal taem iu read abaotem fofala man wea raedem horse wea Bible buk Revelation hem storyim? Or waswe, iu garem sem feeling olsem Ed? Staka pipol nao savve long disfala story. Waswe, iu savve iu fit for kasem gud samting sapos iu savve long mining bilong datfala vision? God sei bae iu barava hapi sapos iu read abaotem datfala vision, faendemaot wanem hem minim, and followim wanem iu lanem long datfala buk wea talem profesi.​—Revelation 1:​1-3.

Samfala pipol fraet taem olketa readim vision abaotem fofala man wea raedem horse, bat hem no samting for iu faet long hem. Disfala vision hem strongim faith bilong staka million pipol finis and hem mekem olketa garem hope for gudfala future tu. Iu savve olsem tu! Next article bae storyim datwan.