Hao for Witness Long Olketa Relative
1. Why nao iumi needim fasin for luksavve taem iumi witness long olketa relative?
1 Bae iumi barava hapi sapos iumi savve go insaed niu world witim olketa relative bilong iumi, and garem wan mind for worshipim Jehovah! Maet iumi savve kasem diswan sapos iumi witness long olketa. Bat, for duim diswan long wei wea savve helpem olketa, iumi needim fasin for luksavve. Wanfala circuit overseer hem sei: “Olketa wea win for pullim interest bilong olketa relative, hem olketa wea isisi storyim olketa subject wea bae mekem wanfala relative interest and wea duim datwan long taem wea fitim.” Hao nao iumi savve duim diswan?
2. Hao nao wei for barava interest long olketa relative bilong iumi savve pullim interest bilong olketa?
2 Kasem Interest Bilong Olketa: Tingting gud raonem hao iu savve kasem interest bilong olketa relative bilong iu. (Prov. 15:28) Wanem nao samting olketa wari long hem? Wanem nao olketa hard samting wea olketa feisim? Maet iu savve showim wanfala article or wanfala scripture wea join witim wanfala subject wea olketa barava interest long hem. Sapos olketa relative bilong iu stap farawe, maet iu savve duim diswan thru long wei for raetem leta or iusim telephone. Isisi plantim olketa seed bilong truth and prea long Jehovah for mekem olketa seed hia grow.—1 Cor. 3:6.
3. Hao nao wei wea olketa relative interest long iumi savve givim iumi chance for witness long olketa?
3 Bihaen Jesus aotem olketa demon from wanfala man, hem givim disfala instruction long hem: “Go bak long ples bilong iu, long olketa relative bilong iu, and talem olketa evri samting wea Jehovah duim for iu and mercy wea hem showim long iu.” (Mark 5:19) Tingim hao masbi diswan hem barava mekem olketa relative bilong hem interest! Nomata kaen big samting olsem maet no happen long iu, for sure, olketa relative bilong iu interest long samting wea iu and olketa pikinini bilong iu duim. Maet iu savve talem olketa abaotem wanfala tok wea iu duim long Theocratic Ministry Skul, wanfala convention wea iu attendim, maet bihaen iu visitim Bethel iu savve storyim datwan, or maet wanfala important samting wea happen long iu wea savve givim iu chance for talem moa samting long olketa abaotem Jehovah and organization bilong hem.
4. Wanem nao iumi shud stap klia long hem taem iumi witness long olketa relative?
4 Garem Fasin for Luksavve: Taem iu witness long olketa relative, stap klia long wei for talem tumas samting. Wanfala brata sei olsem abaotem taem wea hem start for studyim Bible: “Mi ova tumas for trae and explainim evri samting wea mi lanem from Bible long mami bilong mi, and plande taem diswan lead go long wei for raoa, especially witim dadi bilong mi.” Nomata sapos wanfala relative showimaot interest long message bilong Bible, no storyim tumas samting, and witness long wei wea savve mekem hem interest for laek savve long moa samting bihaen. (Prov. 25:7) Evritaem showimaot respect, kaenfala fasin, and patient fasin, olsem wei wea iu duim taem iu story long pipol iu meetim long ministry.—Col. 4:6.
5. Wanem nao iumi shud duim sapos fastaem olketa relative no interest for iumi witness long olketa?
5 Wantaem, olketa relative bilong Jesus tingse hem krangge nao. (Mark 3:21) Bat, bihaen, samfala biliv long hem. (Acts 1:14) Sapos fastaem olketa relative no interest long wanem iu laek for talem, no givap. Living and tingting bilong pipol savve change. Gohed for luk aotem nara chance moa for sharem eni point witim olketa wea savve mekem olketa interest. Maet iu savve kasem hapi wea kamaot from wei for helpem olketa start for wakabaot long road wea lead go long laef olowe.—Matt. 7:13, 14.