Wanem Bible Teachim Buk—Main Bible Study Buk Bilong Iumi
1 Iumi hapi tumas for kasem disfala buk Wanem Nao Really Samting wea Bible Teachim? long English long “Obeyim God” Distrik Convention! Olketa wea kam long convention hapi tumas for kasem copy bihaen program hem finis long Saturday. Hao nao bae iumi iusim disfala niu tul for teachim pipol? Olketa wakem diswan olsem main buk bilong iumi for duim Bible study.
2 Olketa wea Iumi Study Witim Distaem: Olketa pablisa wea iusim Savvy buk or Kasem brochure for conductim olketa Bible study shud iusim gudfala tingting taem olketa disaedem hao and long wanem taem hem fitim for iusim disfala niu buk long study. Sapos iu startim wanfala study no longtaem go nomoa, iu savve gohed long datfala study from start bilong disfala niu buk. Sapos iu iusim Savvy buk long Bible study for tu-thri month finis, maet iu savve stop for iusim datfala buk and startim study long chapter insaed Wanem Bible Teachim buk wea semsem witim chapter wea iu duim insaed Savvy buk. Sapos iu klosap finisim Savvy buk, maet iu disaed for finisim datfala buk.
3 For sure, iumi savve long plande pipol wea bae kasem gud samting from wei for studyim Wanem Bible Teachim buk. Hem gud for askem olketa sapos olketa laek for studyim Bible long wei for iusim disfala study buk wea storyim olketa truth insaed Bible. Olsem example, olketa wea studyim Kasem brochure or Savvy buk bat wea no muv ahed for dedicate and baptaes maet laek for startim study moa long disfala niu buk. Olketa dadi and mami maet disaed for iusim disfala buk for teachim olketa pikinini bilong olketa stretfala savve abaotem will bilong God.—Col. 1:9, 10.
4 Studyim Mek-tu Buk: Waswe, eni nara buk for Bible student studyim bihaen hem finisim Wanem Nao Really Samting wea Bible Teachim? Ia. Sapos iu luksavve hao student hem isisi muv ahed, and hem showimaot hem tinghae long samting wea hem lanem, then maet iu savve iusim Worshipim Datfala Only Tru God buk long study. Mifala sure hao disfala Wanem Bible Teachim buk bae hem wanfala nambawan tul for iusim taem iumi followim komand bilong Jesus for mekem pipol kamap disaepol.—Matt. 28:19, 20.