Ministry Bilong Iumi—Waka wea Showimaot Fasin for Kea for Pipol
1 Jesus lukim hao staka pipol wea lisin long message bilong hem, olketa “garekil and stap olobaot olsem olketa sheep wea no garem eni shepherd.” (Matt. 9:36) Hem showimaot love and wei for kea taem hem teachim olketa wei bilong Jehovah long olketa, hem comfortim olketa, and provaedem wanem olketa needim long spiritual wei. Taem iumi ting raonem olketa fasin bilong Jesus, iumi lane for garem tingting and feeling olsem hem, and disfala fasin for kea bae showaot long ministry bilong iumi.
2 Tingim samting wea Jesus duim taem pipol wea barava needim help kam for lukim hem. (Luke 5:12, 13; 8:43-48) Hem luksavve long best wei for helpem olketa wea garem spesol need. (Mark 7:31-35) Hem minim feeling bilong olketa narawan and hem kea for olketa. Wanem hem savve abaotem pipol hem no affectim wei wea hem laek for helpem olketa. (Luke 7:36-40) Tru nao, Jesus showimaot fasin for kea bilong God bilong iumi long perfect wei.
3 “Barava Feel Sorre”: Jesus no duim ministry bilong hem bikos datwan hem samting wea hem mas duim nomoa. Hem “barava feel sorre” long pipol. (Mark 6:34) Olsem tu, distaem, iumi duim moa samting winim wei for talemaot wanfala message nomoa, iumi trae for sevem laef bilong pipol tu. Trae for minim why pipol duim olketa samting wea olketa duim. Why nao olketa wari and no interest? Waswe, olketa shepherd bilong false religion fail for lukaftarem olketa and laea long olketa? Wei for barava interest long olketa savve muvim olketa for lisin long gud nius.—2 Cor. 6:4, 6.
4 Fasin for kea savve muvim heart bilong man. Wanfala example hem olsem: Wanfala woman barava sorre tumas from baby gele bilong hem wea thri month hem dae. Taem tufala Witness kasem haos bilong hem, hem invaetem tufala go insaed from hem laek pruvim long olketa hao hem rong for God letem wei for safa gohed. Bat bihaen, hem sei olsem: “Olketa lisin long mi long wei wea showimaot olketa barava kea for mi, and taem olketa redi for go, mi barava feel gud so mi laekem for olketa kam bak moa narataem.” Waswe, iu traem best for showimaot fasin for kea long evriwan wea iu meetim long ministry?
5 Wei for trae hard for showimaot fasin for kea bae helpem iumi for comfortim nara pipol. Taem iumi duim datwan, iumi givim glory long “Dadi bilong olketa kaenfala mercy,” Jehovah.—2 Cor. 1:3.