Garem Gudfala Spiritual Schedule and Kasem Staka Blessing
1. Why nao hem gud for lukluk gud long spiritual schedule bilong iu?
1 Taem iu kamap wanfala Christian, maet iu waka hard for garem gudfala schedule for duim olketa spiritual waka wea insaed diswan hem wei for studyim Bible, attendim olketa Christian meeting, join insaed long field ministry, and prea. From Jehovah blessim hard waka bilong iu, iu kamap moa strong long spiritual wei. Bat distaem, maet plande year go pas finis from taem wea iu baptaes. Waswe, iu gohed for garem gudfala spiritual schedule olsem taem wea iu just kamap wanfala Christian?
2. Wanem gud samting nao iumi kasem from wei for readim Bible evriday?
2 Lukluk Gud Long Schedule Bilong Iu: Waswe, iu garem schedule for readim Word bilong God evriday? Iumi kasem staka blessing taem iumi duim datwan! (Josh. 1:8; Ps. 1:2, 3) Long Israel bifor, each king mas readim copy bilong Law bilong hem “evriday long laef bilong hem.” Wanem gud samting nao hem kasem from datwan? Datwan bae helpem hem lane for garem hambol heart and for fraet long Jehovah mekem hem obeyim olketa komandment bilong Jehovah. (Deut. 17:18-20) Distaem tu, wei for readim Bible evriday hem helpem iumi for stap free from blame insaed disfala world wea nogud tumas. Hem helpem iumi tu for redi evritaem for duim ministry.—Phil. 2:15; 2 Tim. 3:17.
3. Olketa wanem blessing nao iumi kasem taem iumi attendim olketa meeting evritaem?
3 Wei bilong Jesus hem for evritaem go long synagogue, ples wea olketa storyim Bible. (Luke 4:16) Iumi sure diswan strongim hem for feisim olketa test wea hem mas safa long hem. Spiritual instruction wea iumi kasem long olketa kongregeson meeting and wei wea iumi “encouragem each other,” savve strongim iumi tu. (Rom. 1:12) Wei for hipap witim olketa brata bilong iumi savve helpem iumi for gohed and no givap long olketa hard taem distaem. (Heb. 10:24, 25) Waswe, iu still gohed for attendim evri meeting distaem?
4. Hao nao wei for share long field service evri week savve helpem iumi?
4 Bible talem iumi hao olketa aposol share for talemaot gud nius “evriday long temple and from haos tu haos.” (Acts 5:42) Nomata maet iumi no fit for preach evriday, waswe, iumi savve join insaed long ministry evri week? Sapos iumi duim datwan, bae iumi kamap moabeta long wei for iusim Word bilong God, and kasem olketa experience wea encouragem iumi taem iumi sharem Bible truth witim olketa narawan.
5. Why nao hem important tumas for prea evritaem long Jehovah?
5 Profet Daniel kasem staka blessing from hem gohed servem Jehovah “evritaem” long full laef bilong hem. Hem wei bilong hem tu for prea long Jehovah evritaem. (Dan. 6:10, 16, 20) Long sem wei tu, taem iumi prea from heart bilong iumi long Jehovah evritaem, hem bae givim iumi holy spirit bilong hem. (Luke 11:9-13) And tu, Jehovah bae fren gud witim iumi mekem iumi enjoyim klos wei for fren witim hem. (Ps. 25:14; Jas. 4:8) Datwan hem barava nambawan reward! So iumi mas waka hard for garem gudfala spiritual schedule and kasem staka blessing from Jehovah.