Preach From Haos tu Haos
1. Wanem kwestin nao kamap long wei for duim haos-tu-haos ministry, and why nao olsem?
1 “Olketa wea garem bigfala savve long wei for iusim olketa difren wei for teachim Truth long staka pipol bae agree hao wei for iusim datfala buk, MILLENNIAL DAWN long preaching waka hem nambawan wei for preach abaotem Truth distaem.” Datfala toktok wea kam from Zion’s Watch Tower bilong July 1, 1893, hem mekhae long gud samting abaotem haos-tu-haos ministry. Pipol evriwea long world lukim diswan olsem mark wea showimaot sapos man hem wanfala Jehovah’s Witness. Waswe, datfala wei hem waka gud distaem tu, from long samfala kantri plande taem pipol no stap long haos taem olketa Witness go preach?
2. Why nao iumi preach from haos tu haos?
2 Bible Talem and Hem Important: Bible nao talem for iumi preach from haos tu haos. Jesus talem 70 disaepol bilong hem for go tu bae tu long haos bilong pipol. (Luke 10:5-7) No longtaem bihaen Jesus dae, Bible story olsem abaotem olketa disaepol bilong hem: “Evriday long temple and from haos tu haos olketa gohed and nating givap for teach and talemaot gud nius.” (Acts 5:42) Aposol Paul tu strong for teach from haos tu haos.—Acts 20:20.
3. Wanem nao samfala gud samting abaotem wei for preach from haos tu haos?
3 Wanfala important wei for staka pipol herem gud nius hem for preach from haos tu haos. Long wei wea organize gud, diswan helpem iumi for “lukaotem” pipol wea willing for lisin. (Matt. 10:11) Pipol no fraet for story taem olketa stap long haos bilong olketa. Wei for story witim olketa hem mekem iumi herem voice bilong olketa, luksavve long feeling wea showaot long feis bilong olketa, and lukim olketa samting wea stap raonem area bilong olketa. Diswan helpem iumi for luksavve long samting wea olketa wari abaotem and interest long hem. Plande taem diswan mekem iumi garem nambawan chance for story longtaem lelebet witim olketa.
4. Wanem nao iumi savve duim for meetim moa pipol taem iumi preach from haos tu haos?
4 Change for Fitim: Aposol Paul hem willing for changem samfala samting long laef bilong hem “for saed bilong gud nius.” (1 Cor. 9:23) Maet iumi savve changem schedule bilong iumi mekem iumi preach long taem wea staka pipol maet stap long haos, olsem long evening, long weekend, or pablik holiday. Recordim olketa haos wea pipol no stap, and go bak long difren day or difren taem.
5. Hao nao olketa wea health bilong olketa no mas gud savve tekpart long waka for preach from haos tu haos?
5 Nomata olketa wea health bilong olketa no mas gud maet fit for preach from haos tu haos. Hem gud for tekem olketa hia long territory wea fitim olketa for go long hem and for olketa duim samting wea hem fitim olketa. Wanfala sista wea savve short wind hem savve duim nomoa wanfala haos bihaen evri 30 minute. Nomata olsem, hem barava hapi and satisfae taem hem go witim olketa narawan for preach!
6. Why nao iumi shud evritaem mekem wei for preach from haos tu haos kamap part long ministry bilong iumi?
6 Olketa pablisa meetim staka pipol wea olsem sheep taem olketa preach from haos tu haos. Wanfala pablisa noknok long door and samwan insaed tok olsem: “Kam insaed, mi savve hu nao iu. Mi prea long God for hem sendem kam eniwan for helpem mi, then nomoa mi herem iu noknok long door. God herem mi and hem sendem iu kam.” Olketa experience olsem showimaot hao Jehovah blessim diskaen wei for preach. (Matt. 11:19) Disaed strong for evritaem mekem wei for preach from haos tu haos kamap part long ministry bilong iu.