Followim Christ Long Wei for Showimaot Honor
1. Long wanem wei nao theme bilong convention for disfala year hem join witim wei for showimaot honor?
1 Bible storyim hao honor hem olsem kaleko bilong Jehovah, wea hem Haefala Ruler bilong Universe. (Ps. 104:1) Jesus evritaem storyim and duim samting wea honorim Dadi bilong hem and olketa arrangement bilong Hem. (John 17:4) Iumi evriwan garem chance for followim example bilong Jesus and givim glory long Jehovah long taem bilong “Followim Christ!” Distrik Convention.
2. Olketa wanem wei for prepare gud mekem iumi stap for each session, hem honorim Jehovah?
2 Worship wea Garem Honor: Iumi savve honorim Jehovah long wei for go long spiritual feast wea hem redyim for iumi. Waswe, iu story finis witim boss bilong iu and duim olketa samting iu need for duim mekem iu savve go long thrifala day evriwan bilong convention? Waswe, iu mekem plan finis for arrive early for faendem ples for sidaon and join for singim firstfala song and prea? Waswe, iu planim finis wanem bae iu redyim for kaikaim long lunch taem mekem iu kaikai witim olketa brata bilong iu long ples bilong convention? Long start bilong each session taem chairman askem iumi for go sidaon long ples bilong iumi bifor music hem start, iumi shud kwiktaem finis for story and sidaon bifor program hem start.
3. Hao nao wei for lisin gud long program mekem worship bilong iumi garem honor?
3 Wei for lisin gud long program tu hem honorim Dadi bilong iumi long heven. Bihaen hem lukluk long olketa samting wea gohed long wanfala distrik convention, wanfala man for reportim nius hem talem hao sapos pipol go and lukim diswan olketa bae tinghae long “nambawan fasin bilong olketa wea kam long convention long wei wea olketa showimaot respect taem olketa stap kwaet for lisin and barava interest long olketa spiritual samting.” Hem storyim tu hao “staka pikinini stap . . . , wea showimaot gudfala fasin and plande busy for luk followim olketa scripture long Holy Bible.” Taem program hem gohed, hem no taem for story, kaikai, or wakabaot raon. Olketa young wan shud sidaon witim parents bilong olketa mekem dadi and mami helpem olketa for kasem gud samting from program. (Deut. 31:12; Prov. 29:15) Wei for trae hard for duim olketa samting hia showimaot iumi respectim olketa narawan and tinghae long spiritual kaikai wea iumi kasem.
4. Why nao lukluk bilong iumi shud showimaot respect taem iumi long convention?
4 Lukluk wea Showimaot Respect: Staka talem hao olketa tinghae long olketa reminder long distrik convention tok last year wea garem title “Evritaem Showimaot Christian Fasin wea Pipol Fit for Respectim,” wea mekhae long wei wea olketa servant bilong God shud duim best for showimaot Christian fasin saed long kaleko and lukluk bilong olketa. Disfala year iumi shud ting strong tu abaotem diswan. Lukluk bilong iumi showimaot hao iumi ting long Jehovah and long privilege iumi garem olsem olketa Witness bilong hem. Kaleko iumi werem shud evritaem showimaot iumi “honorim God.”—1 Tim. 2:9, 10.
5. Long wanem wei nao iumi savve garem lukluk wea showimaot respect long taem for relax bifor and bihaen olketa session bilong convention?
5 Waswe, iumi shud garem lukluk wea showimaot respect long taem bilong program nomoa? Tingim hao plande pipol bae lukim iumi werem convention badge. Lukluk bilong iumi shud showimaot iumi difren from nara pipol. So nomata long taem for relax, olsem long taem for kaikai bihaen program hem finis, iumi shud werem kaleko wea fitim olketa minister wea attendim wanfala Christian convention and shud no werem jean, short trouser, or T-shirt. Diswan bae givim gudfala witness long pipol! Jehovah hem hapi taem lukluk bilong iumi showimaot iumi olketa minister.
6. Wanem nao olketa gud samting wea kamaot from wei for showimaot Christian fasin wea pipol fit for respectim?
6 Gudfala Samting wea Kamaot From Diswan: Wei for showimaot Christian fasin wea pipol fit for respectim long convention bilong iumi mekem olketa chance kamap for preach long pipol and hem mekem pipol wea luk kam long iumi for tinghae long diswan. Bihaen wanfala convention, wanfala bigman hem sei: “Iufala nomoa pipol wea barava showimaot gudfala fasin. Iufala duim samting wea God laekem iumi for duim.” Wei for showimaot honor hem showimaot respect and love for narawan and diswan givim glory long Jehovah. (1 Pet. 2:12) Diswan showimaot iumi fraet long God and iumi tinghae long privilege for Dadi bilong iumi teachim iumi. (Heb. 12:28) Iumi laek for traem best for showimaot honor taem iumi luk forward long “Followim Christ!” Distrik Convention for disfala year.