Kwestin Box
◼ Sapos wanfala brata and sista plan for iusim Kingdom Hall for wedding, wanem nao tufala need for storyim witim olketa elder?
Olketa wedding wea followim wanem Bible talem hem showimaot respect long Jehovah. Diswan hem barava tru long olketa wedding wea kamap long Kingdom Hall, bikos pipol tingim eni program wea kamap long Kingdom Hall olsem part long organization bilong iumi. Sapos iu laek iusim Kingdom Hall for wanfala wedding hem stret for askem olketa elder mekem “evri samting mas followim stretfala wei and order.”—1 Cor. 14:40.
Tufala wea laek iusim Kingdom Hall for wedding shud raetem leta long wanfala kongregeson service komiti wea hipap long datfala hall. Tufala shud givim datfala leta firstaem and shud talem date and taem wea tufala laek for iusim datfala hall. Tufala shud tingim hao olketa elder bae no changem meeting schedule for fitim wanfala wedding. And kongregeson mas tinghae long wei bilong tufala, and tufala mas live followim wanem Bible talem and evri stretfala mark bilong Jehovah.
For datfala wedding showimaot respect long God, tufala mas storyim evri samting wea bae gohed long datfala wedding witim service komiti bifor olketa disaedem eni samting. Olketa elder bae no trae for talemaot tingting bilong olketa seleva, bat sapos olketa elder no hapi long samfala samting, tufala shud changem. Iusim nomoa music wea kam from Kingdom Melodies or from songbuk bilong iumi. Olketa elder mas appruvim firstaem eni wei for decoratem Kingdom Hall or for muvim olketa chair. Sapos eniwan bae tek piksa or recordim video, diswan shud no spoelem wei wea taem bilong wedding hem spesol. Olketa elder savve letem olketa for duim rehearsal long Kingdom Hall sapos datwan no kamap long semtaem wea kongregeson markem for duim eni nara samting. No putim eni invitation long notice board. Bat long Service Meeting, olketa elder savve announcem long kongregeson abaotem wedding wea bae kamap long Kingdom Hall.
No eni rul talem hao olketa wea standap witim tufala long wedding mas baptaes, bat bae hem barava no fitim for chusim pipol wea barava no followim wanem Bible talem or wea wei bilong olketa bae spoelem samfala wea kam. Sapos eni elder hem stap, hem nao shud lukaftarem datfala wedding. Olketa elder savve hao for iusim Bible for teach, dastawe nao olketa barava fit for storyim wanem Bible talem long disfala important taem.—1 Tim. 3:2.
Elder wea bae duim wedding tu shud savve long evri samting wea bae gohed long datfala wedding bikos sapos eni samting nogud pipol bae ting daonem hem. Hem bae askem tufala abaotem wei wea tufala fren for faendaot sapos tufala garem eni problem and tufala mas no haedem eni samting from hem. Sapos eniwan long tufala divorce, hem mas pruvim hao hem free for marit moa fitim wanem Bible and law bilong kantri talem. (Matt. 19:9) And hem mas showim wanfala copy long datfala divorce pepa long elder.
Taem tufala story gud and waka tugeta witim olketa elder, datfala wedding bae kamap wanfala hapitaem for evriwan.—Prov. 15:22; Heb. 13:17.