Spesol Waka for Askem Pipol Kam Long Memorial!
1.Wanem waka nao evri pablisa bae duim evriwea long world start long March 21, 2009, and why nao olsem?
1 Long Thursday, April 9, 2009, olketa wea worshipim Jehovah God evriwea long world bae hipap for ting raonem barava bigfala love wea hem showimaot long olketa man. (Rom. 5:6-8) Iumi laek for lukim staka million pipol hipap witim iumi for tingim dae bilong Jesus. Start long March 21, iumi bae givimaot wanfala spesol pepa evriwea long world wea askem pipol for kam long Memorial.
2.Wanem nao iu mas tingim taem iu givimaot Memorial pepa?
2 Olketa Samting for Tingim: Storyim olketa piksa, kwestin and scripture wea stap long Memorial pepa. Tingim diswan, iu savve showim piksa long kava and talem olsem: “Mi laek for askem iu for kam hipap witim mifala long Thursday, April 9, 2009 for tingim dae bilong Jesus.” Then showim title long datfala pepa and olketa kwestin. Talem long man wea iu askem hao hem tu savve askem olketa narawan long famili bilong hem or eniwan wea hem laekem for kam.
3.Wanem nao iu savve duim bihaen iu givimaot Memorial pepa?
3 Sapos kongregeson bilong iu garem big territory, maet olketa elder savve talem iu for leavim olketa pepa long haos wea no eniwan stap. Long olketa weekend, iu savve offerim olketa magasin tu taem iu givimaot datfala pepa. Markem goal for askem olketa return visit, Bible study, relative, skulfren, man wea iu waka witim, neiba, and olketa narawan wea iu savve long olketa for kam. Long last year, wanfala sista hem askem 30-fala relative bilong hem for kam long Memorial and hem evritaem go bak for talem olketa hao hipap hia hem important tumas. Hem hapi tumas taem 25-fala nao kam long Memorial and bihaen, 4-fala nao laek for study!
4.Wanem nao iumi mas plan for duim distaem, and why nao olsem?
4 Plan Distaem: Maet staka pablisa fit for duim bigfala preaching moa long March and April. Sapos iu garem pikinini or Bible study wea gohed gud, hem gudfala taem nao for olketa kamap pablisa wea no baptaes. Plan distaem for join insaed disfala spesol waka wea mekhae long nambawan love wea Jehovah and Jesus showimaot.—John 3:16; 15:13.