“Duim Evri Samting for Talemaot Gud Nius”
1. Man wea preach abaotem Kingdom bae laek for duim wanem for pipol, and why nao olsem?
1 Aposol Paul laek tumas for talemaot gud nius long pipol. (1 Cor. 9:16, 19, 23) Iumi tu laek for helpem pipol, dastawe iumi duim bigfala waka for preachim gud nius long olketa.
2. Hao nao iumi savve changem hao iumi preach, and why nao olsem?
2 Preach Long Ples and Taem wea Pipol Stap: Man wea savve tumas hao for fishing, bae go fishing long ples and taem wea fish stap, and no long ples and taem wea fitim hemseleva. From iumi “fishing for kasem pipol,” maet iumi tu need for changem samfala samting mekem iumi savve faendem pipol and diswan bae mekem iumi kasem bigfala hapi for hipimap “olketa didifren kaen fish.” (Matt. 4:19; 13:47) Waswe, iumi savve duim street witnessing long morning taem pipol gogo for waka or go long haos bilong pipol bihaen olketa kam bak from waka? Goal bilong Paul hem “for duim gud disfala waka for preachim gud nius,” and hem iusim evri chance for duim datwan.—Acts 17:17; 20:20, 24.
3, 4. Taem iumi preach, wanem nao iumi savve changem, and wanem nao happen?
3 Changem Story Fitim Pipol: Olketa man for fishing iusim olketa difren wei for fishing mekem olketa savve kasem fish. Hao nao iumi savve storyim gud nius abaotem Kingdom long wei wea pipol bae laek for herem? Iumi mas isisi storyim samting wea staka pipol warim and then herehere gud long wanem olketa storyim. (Jas. 1:19) Iumi savve askem kwestin mekem olketa talemaot tingting bilong olketa. (Prov. 20:5) Taem iumi duim olsem, datwan bae mekem iumi storyim gud nius long wei wea barava helpem man wanwan. Paul kamap “evri samting long evrikaen pipol.” (1 Cor. 9:22) For barava helpem pipol, iumi mas changem story bilong iumi fitim olketa.
4 Iumi barava hapi for preachim “gud nius abaotem samting wea naes tumas”! (Isa. 52:7) Iumi mas gohed for “duim evri samting for talemaot gud nius” mekem iumi savve helpem staka pipol.—1 Cor. 9:23.