Gohed Strong for Preach!
1. Wanem toktok bilong Paul nao iumi need for followim distaem?
1 “Preachim word bilong God and gohed strong for duim datwan.” (2 Tim. 4:2) Why nao toktok bilong Paul hem barava important long taem bilong iumi? Wanem gud samting nao iumi and olketa narawan savve kasem from disfala toktok bilong Paul?
2. Why nao iumi gohed strong for lukaotem olketa wea no herem gud nius yet?
2 Laef Bilong Pipol Stap Long Danger: Staka million pipol evriwea long world mas herem gud nius wea bae sevem laef bilong olketa. (Rom. 10:13-15; 1 Tim. 4:16) Iumi savve meetim staka wea laek for herem gud nius long olketa territory wea iumi duim evritaem. Sapos iumi preach long olketa difren day or taem, maet iumi savve meetim olketa difren pipol long haos. Taem iumi duim olsem, bae iumi garem klinfala conscience and iumi no guilty sapos man dae.—Acts 20:26.
3. Taem iumi duim preaching waka, wanem nao iumi savve duim for iusim gud taem bilong iumi?
3 Nomata olketa Christian long first century kasem barava hard taem, ‘evriwan long Jerusalem herem teaching bilong olketa.’ (Acts 5:28) Waswe, iumi duim sem samting for “talem long evriwan” disfala gud nius? (Acts 10:42) Taem iumi duim preaching waka, waswe, iumi iusim gud taem bilong iumi? Sapos iumi weitim olketa narawan taem olketa duim return visit, waswe, iumi savve story witim eniwan wea go pas?
4. Taem iumi gohed strong for preach, hao nao datwan helpem iumi for gohed lukaot?
4 Iumi Mas Gohed for Wekap: From disfala world hem klosap for finis, iumi mas gohed for wekap and lukaot. (1 Thess. 5:1-6) Taem iumi talemaot hope bilong iumi abaotem Kingdom evritaem, datwan bae stopem olketa wari bilong disfala world for spoelem iumi. (Luke 21:34-36) So, taem iumi “tingim evritaem” day bilong Jehovah, datwan bae helpem iumi for barava gohed strong for duim preaching waka wea sevem laef.—2 Pet. 3:11, 12.
5. Taem iumi tinghae long laef, hao nao datwan helpem iumi long ministry?
5 ‘Jehovah no laekem eniwan for dae bat hem laekem evriwan for repent.’ Iumi showimaot iumi garem sem tingting wea hem garem abaotem laef, taem iumi gohed strong for preach. (2 Pet. 3:9; Ezek. 33:11) Iumi barava laek for helpem staka pipol long territory bilong iumi, wea datwan hem for givim praise long Jehovah!—Ps. 109:30.