Iu Savve Duim Enitaem Witnessing!
1. (a) Enitaem witnessing hem minim wanem? (b) Haomas long iumi wea attendim disfala meeting nao kasem truth from enitaem witnessing?
1 Haomas long kongregeson nao kasem truth from enitaem witnessing? Maet iu bae sapraes for savve. Wei for duim enitaem witnessing hem minim for talemaot gud nius long pipol wea iumi meetim evriday, taem iumi travel, visitim olketa relative or neiba, shopping, long skul, long waka ples, and long olketa nara ples. Long wanfala grup bilong winim 200 Witness, 40 percent long olketa savve long truth from enitaem witnessing! Dastawe, disfala wei for duim enitaem witnessing hem barava waka gud.
2. Olketa wanem example abaotem enitaem witnessing nao Bible storyim?
2 Staka taem olketa wea talemaot gud nius long first century duim enitaem witnessing. Tingim Jesus, taem hem go long Samaria, hem witness long wanfala woman wea tekem wata from well bilong Jacob. (John 4:6-26) Philip startim story witim wanfala bigman bilong Ethiopia wea readim buk bilong Isaiah, taem hem askem hem olsem: “Hao, iu minim samting wea iu readim?” (Acts 8:26-38) Taem aposol Paul stap insaed prison long Philippi, hem preach long wanfala man wea lukaftarem prison. (Acts 16:23-34) Bihaen, taem Paul stap prisoner long wanfala haos, hem “hapi for story long eniwan wea kam for lukim hem. Hem no fraet for preach abaotem kingdom bilong God long olketa, and teachim olketa abaotem Lord Jesus Christ.” (Acts 28:30, 31) Iu tu savve duim enitaem witnessing nomata sapos iu shame. Long wanem wei?
3. Wanem nao savve helpem iumi for no shame?
3 Hao for Startim Story: Staka long iumi faendem hem hard for startim story witim samwan wea iumi no savve long hem. And hem hard lelebet tu for storyim truth long olketa wea iumi savve gud long olketa. Bat taem iumi ting raonem olketa gudfala wei bilong Jehovah, olketa nambawan samting wea hem givim long pipol bilong hem, and wei wea living bilong pipol distaem hem no isi, datwan mekem iumi laek for story long olketa. (Jonah 4:11; Ps. 40:5; Matt. 13:52) And tu, iumi savve askem Jehovah for helpem iumi ‘no fraet for story.’ (1 Thess. 2:2) Wanfala brata wea skul long Gilead sei olsem: “Staka taem mi luksavve, prea nao savve helpem mi taem hem no isi for mi story long pipol.” Sapos iu hol bak for story, talem shortfala prea.—Neh. 2:4.
4. Wanem goal nao maet iumiseleva markem, and why nao olsem?
4 Enitaem witnessing hem no minim man mas evritaem iusim Bible for startim story or followim wanfala set wei for story. Hem gud for garem goal for startim story nomoa winim wei for tingse iumi mas preach long pipol stretawe. Staka pablisa storyim hao wei for duim olsem helpem olketa for no fraet, gogo olketa storyim nao gud nius. Sapos man no laek story witim iu, no forcem hem for story. Finisim story long gudfala wei and leavim hem.
5. Wanem nao helpem wanfala sista wea savve shame for duim enitaem witnessing?
5 Taem wanfala sista wea savve shame go shopping, hem luk long wanfala man and smile long hem. Sapos datfala man smile kam, sista story lelebet. Sapos datfala man story gud, datwan mekem datfala sista for no fraet for gohed story. Hem lisin gud and trae for minim samting wea datfala man interest long hem, mekem hem storyim gud nius long hem. Taem hem duim olsem, hem offerim staka literature and startim Bible study.
6. Hao nao iumi savve startim story long enitaem witnessing?
6 Startim Story: Wanem nao iumi savve talem for startim wanfala story? Taem Jesus story witim datfala woman long well, hem startim story taem hem askem wata for drink. (John 4:7) Maet iumi tu savve startim story long wei for sei hello or askem kwestin. Taem iu story, maet iu faendem wei for storyim wanfala point from Bible, and iu savve plantim seed bilong truth. (Eccl. 11:6) Samfala kasem gud samting taem olketa talem wanfala interesting toktok wea savve mekem man interest and laek for savve moa. Olsem example, taem iu weit for lukim doctor, maet iu savve startim story olsem, “Mi bae hapi taem mi bae no sik moa.”
7. Hao nao wei for luksavve long samting wea happen helpem iumi for duim enitaem witnessing?
7 For luksavve long samting wea happen savve helpem iumi for startim story. Sapos iumi luksavve wanfala mami or dadi garem pikinini wea showimaot gudfala wei, maet iumi savve praisem hem and ask olsem, “Wanem nao helpem iu for kamap gudfala mami or dadi?” Wanfala sista luksavve long samting wea olketa narawan long waka ples storyim and hem storyim samting wea olketa interest long hem. Taem hem herem wanfala gele wea tufala waka tugeta plan for marit, hem givim wanfala Awake! magasin wea storyim hao for planim wanfala wedding. Diswan mekem tufala for story go moa abaotem Bible.
8. Wanem nao iumi savve duim for iusim olketa literature bilong iumi for startim story?
8 Nara wei for startim story hem taem iumi readim olketa buk bilong iumi long ples wea olketa narawan savve lukim. Wanfala brata lukluk long wanfala article insaed long Wastaoa or Awake! magasin wea garem interesting title and hem readim kwaet nomoa. Sapos hem lukim eniwan wea klosap long hem luk kam long magasin, hem savve askem kwestin or story lelebet abaotem datfala article. Staka taem diswan savve mekem iu for story and preach long pipol. For putim eni buk bilong iumi long ples wea olketa wakfren or classmate savve lukim, datwan tu savve mekem olketa for laek savve moa.
9, 10. (a) Wanem nao iumi savve duim for lukaotem chance for duim enitaem witnessing? (b) Wanem nao iu duim finis?
9 Lukaotem Chance for Story: From preaching waka hem barava important, iumi shud no ting smol long enitaem witnessing olsem samting wea seknomoa happen. Bat iumi shud lukaotem chance for preach taem iumi meetim pipol evriday. Tingim pipol wea iu bae meetim, and ting raonem hao iu bae story gud witim olketa. Evritaem karem Bible and olketa literature wea iu savve offerim long pipol wea interest.—1 Pet. 3:15.
10 Staka pablisa faendem olketa difren wei for story taem olketa lukaotem chance for story long wei for duim enitaem witnessing. Wanfala sista wea stap long wanfala building wea garem security, iusim datfala ples for hapitaem for wakem wanfala game wea garem naes piksa. Taem pipol start for story long hem abaotem datfala naes piksa, hem iusim datfala chance for story and talem olketa abaotem wanem Bible promisim abaotem “wanfala niu heven and wanfala niu earth.” (Rev. 21:1-4) Waswe, iu savve tingim samfala samting wea iu savve duim for lukaotem chance for duim enitaem witnessing?
11. Wanem nao iumi savve duim for go bak lukim olketa wea interest wea iumi meetim long enitaem witnessing?
11 Go Bak Long Olketa wea Interest: Sapos iu meetim man wea interest, trae for go bak long hem. Sapos fitim, maet iu savve sei: “Mi barava enjoyim story bilong iumi tufala. Long wea nao bae mi meetim iu mekem iumi tufala savve story moa?” Samfala pablisa givim address and phone namba bilong olketa and sei: “Mi enjoyim story bilong iumi tufala. Sapos iu laek savve moa abaotem wanem iumi tufala storyim, diswan nao address bilong mi.” Sapos iu no savve go bak long datfala man, arrangem kongregeson wea stap klosap for go bak and kwiktaem givim disfala form Please Go Lukim Man Hia (S-43-SP) long secretary bilong kongregeson bilong iu.
12. (a) Why nao hem gud for keepim record and raetem report long taem wea iumi duim enitaem witnessing? (b) Wanem gud samting nao kamaot from wei for duim enitaem witnessing? (Lukim box “Gud Samting Kamaot From Enitaem Witnessing!”)
12 Iumi savve raetem long report hour or minute wea iumi duim enitaem witnessing. Dastawe, hem gud for keepim record long diswan nomata hem tu-thri minute nomoa. Tingim diswan: Sapos evri pablisa duim enitaem witnessing for faev minute evriday, long end bilong evri month iumi savve kasem winim 17 million hour!
13. Wanem nao shud strongim iumi for duim enitaem witnessing?
13 Love wea iumi garem for God and nara pipol hem nambawan reason wea mekem iumi for duim enitaem witnessing. (Matt. 22:37-39) Wei wea iumi tinghae long olketa wei bilong Jehovah and plan bilong hem strongim iumi for story abaotem ‘glory bilong rul bilong hem.’ (Ps. 145:7, 10-12) Wei wea iumi barava tingim olketa neiba bilong iumi mekem iumi for iusim evri chance wea iumi garem long lelebet taem wea stap, for storyim gud nius long olketa. (Rom. 10:13, 14) Taem iumi ting raonem and redi firstaem, iumi evriwan savve duim enitaem witnessing and maet iumi kasem hapi taem iumi storyim truth long man wea garem honest heart.
[Box long page 4]
Maet hem gud for markem goal for meetim pipol and startim story
[Box long page 5]
Staka pablisa lukaotem olketa difren wei for startim story taem olketa duim enitaem witnessing
[Box long page 5]
Olketa Idea for Startim Story
◼ Prea long God for helpem iu startim story
◼ Story long olketa wea luk olsem olketa kaen and no hariap
◼ Trae for luk long wanfala man, smile long hem, and storyim samting wea iutufala interest long hem
◼ Iumi mas lisin gud
[Box long page 6]
Gud Samting Kamaot From Enitaem Witnessing!
• Wanfala brata weit long wanfala workshop taem olketa wakem trak bilong hem. Hem preach long olketa wea waka long there and givim samfala invitation pepa long olketa for kam long wanfala pablik tok. Wanfala year bihaen long wanfala convention, wanfala brata wea hem no luksavve kam and hello long hem. Hem wanfala long olketa man long workshop long year bifor wea hem givim invitation pepa long hem! Datfala man go long pablik tok and ask for studyim Bible. Distaem hem and waef bilong hem tufala baptaes.
• Wanfala sista wea kasem truth from samwan preach long hem long enitaem witnessing, tingim hao spesol territory bilong hem, hem pipol wea hem meetim bikos long thrifala pikinini bilong hem. And tu hem preach long olketa neiba, mami and dadi wea hem meetim long skul, and olketa meeting long skul for olketa mami and dadi. Taem hem meetim pipol, hem story long simpol wei, bat samting wea hem talem showimaot Bible hem main buk wea hem iusim for teachim olketa pikinini bilong hem, and then hem savve storyim nara samting long Bible. From hem mekwe for story finis, hem faendem hem isi nao for iusim Bible for gohed story. From hem iusim diskaen teknik, hem helpem 12-fala for baptaes.
• Taem wanfala man wea waka long insurance company visitim wanfala sista, sista hia mekius long datfala chance for preach long hem. Sista askem hem sapos hem laek garem gud health, hapi, and laef olowe. Man hia sei hem laekem, and askem sista wanem kaen insurance nao hem minim. Sista showim olketa promis from Bible and givim hem wanfala buk, wea hem readim long wanfala evening nomoa. Hem agree for studyim Bible. Hem kam long olketa meeting, and bihaen hem baptaes.
• Wanfala sista story witim wanfala woman insaed aeroplane wea sidaon saed long hem, and gogo hem preach long hem nao. Taem olketa kasem airport, datfala sista givim address and phone namba, and hem encouragem hem for askem eni Jehovah’s Witness for study witim hem. Long nara day nomoa, tufala Witness kam long haos bilong hem. Woman hia studyim Bible, gohed gud, baptaes, and then hem startim thrifala Bible study.
• Wanfala brata wea 100 year wea blind wea stap long nursing hom staka taem sei, “Iumi needim Kingdom.” Diswan mekem olketa nurse and olketa wea sik for askem hem for explainim wanem nao Kingdom. Wanfala woman wea waka long there askem wanem hem bae duim long Paradaes. Hem sei, “Mi bae lukluk and wakabaot moa, and bonem wheelchair bilong mi.” From hem blind, hem askem datfala woman for readim olketa magasin for hem. Taem gele bilong datfala brata visit kam, woman hia askem datfala gele for tekem olketa magasin long haos. Wanfala nurse talem long datfala gele, “Distaem toktok bilong mifala long nursing hom hem olsem: ‘Iumi needim Kingdom.’”
• Long wanfala restaurant, wanfala sista herem samfala man wea sidaon klosap long hem story abaotem politik. Wanfala sei gavman no savve stretem olketa problem bilong iumi. Sista sei, ‘Chance for mi nao ia.’ Hem talem shortfala prea and story long olketa. Bihaen hem talem nem bilong hem, hem talem olketa abaotem wanfala gavman wea bae stretem evri problem bilong man, hem nao Kingdom bilong God, and hem givim wanfala brochure. Then nomoa, manager bilong restaurant kam nao. Sista tingse, man hia bae talem hem for go aot. Bat hem talem sista hao hem lisin long story and laekem tu wanfala brochure. Nara wakaman wea lisin tu kam bat hem krae. Hem study bifor, bat distaem hem laek for study moa.